KA BUKE A IOSUA 16 - Ka Baibala Hemolele

1 No ka ʻāina o kā Iosepa. 10 ʻAʻole i pau i ke kipaku ʻia ka poʻe Kanaʻana.

MOKUNA XVI.

¹ ¶ Ua loaʻa mai i ka poʻe mamo a Iosepa ma ka hailona ka ʻāina mai Ioredane mai ma Ieriko, a hiki i ka wai o Ieriko ma ka hikina, a ʻo ka wao nahele kahi e piʻi ai mai Ieriko aʻe a hiki i ka mauna o Betela,

² a hala ia mai Betela aku a hiki i Luza, a moe aʻela a hiki i ka mokuna ʻo ʻAreki a i ʻAtarota,

³ a iho i lalo i kahakai a hiki i ka ʻaoʻao o Iapeleti, a hiki i ka mokuna ʻo Bete Horona lalo a hiki i Gezera; a ʻo kona wēlau aia nō ma ke Kai.

⁴ ¶ Pēlā i loaʻa ai iā Manase a me ʻEperaima nā keiki a Iosepa ko lāua ʻāina hoʻoili.

⁵ Eia ka ʻaoʻao o kā ʻEperaima ma muli o ko lākou poʻe ʻōhua; ʻo ka mokuna o ko lākou ʻāina hoʻoili ma ka hikina, aia nō i ʻAtarota ʻAdara a hiki i Bete Horona Luna.

⁶ A ua moe aku ka mokuna i ke Kai ma Mikemeta ma ka ʻaoʻao ʻākau; a huli aʻela ka mokuna ma ka hikina a hiki i Taʻanata Silo, a moe aʻela ma ka hikina a i Ianoha.

⁷ A iho ihola ia mai Ianoha aʻe a hiki i ʻAtarota, a me Naʻarata, a hiki mai i Ieriko, a mai laila aku i Ioredane.

⁸ Ua moe aku ka mokuna mai Tapua aku ma ke komohana i ka muliwai ʻo Kana; a ʻo kona wēlau aia nō ma ke Kai. ʻO ia ka ʻāina hoʻoili o ka ʻohana a ʻEperaima ma ko lākou poʻe ʻōhua.

⁹ ʻO nā kūlanakauhale i hoʻokaʻawale ʻia no ka poʻe mamo a ʻEperaima aia nō ma waena o ka ʻāina o kā Manase; ʻo nā kūlanakauhale a pau a me nā kauhale.

¹⁰ ʻAʻole lākou i kipaku aku i ka poʻe Kanaʻana, ka poʻe i noho ma Gezera; akā, ua noho pū nō ka poʻe Kanaʻana me kā ʻEperaima a hiki i kēia lā, a ua hoʻoluhi lākou he poʻe hoʻokupu.