KA BUKE A IOSUA 15 - Ka Baibala Hemolele

1 No kā Iuda hoʻoilina. 13 No ka hoʻoilina i lilo iā Kaleba. 16 No ʻOteniʻela a me kāna wahine. 21 Na kūlanakauhale o Iuda.

MOKUNA XV.

¹ ¶ Eia ke kuleana o ka ʻohana a Iuda e like me ko lākou poʻe ʻōhua, a hiki i ka mokuna ʻo ʻEdoma; ʻo ka wao akua o Zina ma ka hema, ʻo ia ka wēlau o ko lākou ʻaoʻao hema.

² A ʻo ko lākou mokuna hema, aia mai kahakai o ka Moana Kai, mai ke kaikūʻono hoʻi e ʻoi ana i ka hema.

³ A moe aʻela ma ka ʻaoʻao hema i Maʻale ʻAkerabima, a hele aʻela i Zina, a piʻi aʻe i luna ma ka hema i Kadesa Banea, a hiki aʻela i Hezerona, a piʻi hou i luna i ʻAdara a puni i Karekaʻa.

⁴ A ma laila aʻe a i ʻAzemona, a hele aku i ka muliwai o ʻAigupita; a ʻo nā wēlau o ia ʻāina aia ma ke Kai. ʻO ia ko lākou ʻaoʻao hema.

⁵ A ʻo ka ʻaoʻao hikina, ʻo ka Moana Kai nō ia a hiki i ka nuku o Ioredane; a ʻo ka mokuna ma ka ʻaoʻao ʻākau, aia mai ke kaikūʻono o ke kai ma ka nuku o Ioredane.

⁶ A ua piʻi i luna ka mokuna i Bete Hogela, a hele ia ma ka ʻākau aʻe o Betearaba, a piʻi aʻela ia ʻaoʻao i ka pōhaku o Bohana ke keiki a Reubena.

⁷ Piʻi aʻela ka mokuna iā Debira, mai ke awāwa ʻo ʻAkora mai, ma ka ʻākau i mua o Gilegala, ma kahi e piʻi ai i ʻAdumima, ma ka ʻaoʻao hema o ka muliwai; a moe aʻela ka mokuna i ka wai o ʻEne Semesa, a ʻo kona wēlau aia ma ʻEne Rogela.

⁸ Piʻi aʻela hoʻi ka mokuna ma ke awāwa o ke keiki a Hinoma, ma ka ʻaoʻao hema o ka poʻe Iebusa, ʻo ia ʻo Ierusalema; a ua piʻi ka mokuna i ka piko o ka mauna, aia i mua o ke awāwa ʻo Hinoma ma ke komohana, ma ka wēlau o ke awāwa o ka poʻe Repaima ma ka ʻākau.

⁹ Ua hōʻailona ʻia ka mokuna mai ka piko o ka mauna a hiki i ka pūnāwai Nepetoa, a ma laila aku a hiki i nā kūlanakauhale o ka mauna ʻo ʻEperona; a ua hōʻailona ʻia ka mokuna ma Baʻala, ʻo ia ʻo Kiriata Iearima.

¹⁰ Ua huli ka mokuna mai Baʻala ma ke komohana a i ka mauna ʻo Seria, a moe aʻela ia ma ka ʻaoʻao o ka Mauna Iearima, ʻo ia ʻo Kesalona, ma ka ʻaoʻao ʻākau, a iho i lalo i Bete Semesa, a moe aʻe i Timena.

¹¹ Ua moe aʻela ka mokuna ma ka ʻaoʻao o ʻEkerona ma ka ʻākau; a ua hōʻailona ʻia ka mokuna ma Sikerona, a moe aʻela i ka mauna ʻo Baʻala, a ma laila aʻe i Iabenela; a ʻo kona wēlau aia ma ke kai.

¹² A ʻo kona ʻaoʻao komohana aia ma ke Kai Nui, a me kona kahakai. ʻO ia ka mokuna o ka poʻe mamo a Iuda a puni e like me ko lākou poʻe ʻōhua.

¹³ ¶ A iā Kaleba ke keiki a Iepune hāʻawi ʻo ia i hoʻoilina i waena o ka poʻe mamo a Iuda, e like me ke kauoha a Iēhova iā Iosua, iā Kiriata ʻAreba, ʻo ia ka makua o ʻAnaka, ʻo Heberona nō ia.

¹⁴ Ua kipaku aku ʻo Kaleba i nā keiki kāne ʻekolu a ʻAnaka, iā Sesai a me ʻAhimana, a me Talemai, ka poʻe i hānau na ʻAnaka.

¹⁵ Piʻi akula ia mai laila aku a i Debira, a ʻo ka inoa ʻo Debira ma mua o Kiriata Sepera.

¹⁶ ʻŌlelo akula ʻo Kaleba, “ʻO ka mea nāna e pepehi iā Kiriata Sepera, a hoʻopio iho ia wahi, naʻu nō e hāʻawi iā ʻAkesa i kaʻu kaikamahine i wahine nāna.”

¹⁷ Na ʻOteniʻela, ke keiki a Kenaze, ke kaikaina o Kaleba i hoʻopio aku ia wahi; a hāʻawi akula ʻo ia iā ʻAkesa i kāna kaikamahine i wahine nāna.

¹⁸ A i kona hele ʻana i ona lā, koi aʻela ʻo ia iā ia e noi aku i kona makua kāne i ʻāina. A iho ihola ia mai luna mai o kona hoki. Nīnau aʻela ʻo Kaleba iā ia, “He aha kāu?”

¹⁹ ʻĪ maila kēlā, “E hāʻawi mai iaʻu i mea e pōmaikaʻi ai. No ka mea, ua hāʻawi mai ʻoe iaʻu i ka ʻāina ma ke kūkulu hema; e hāʻawi mai nō hoʻi ʻoe i nā kumu wai.” A hāʻawi maila ʻo Kaleba i nā kumu wai luna, a me nā kumu wai lalo.

²⁰ ¶ Eia ka hoʻoilina o ka ʻohana a Iuda ma muli o ko lākou poʻe ʻōhua.

²¹ ¶ ʻO nā kūlanakauhale ma ka wēlau o ka ʻohana a Iuda e pili ana i ka mokuna ʻo ʻEdoma ma ka Hema, ʻo Kabezeʻela, a me ʻEdera, a me Iagura,

²² ʻo Kina, a me Dimona a me ʻAdada,

²³ ʻo Kedesa a me Hazora a me ʻItanana,

²⁴ ʻo Zipa, a me Telema a me Bealota,

²⁵ ʻo Hazora a me Hadata, a me Keriota a me Hezerona ʻo ia ʻo Hazora,

²⁶ ʻo ʻAmama a me Sema a me Molada,

²⁷ ʻo Hazara Gada a me Hesemona, a me Beta Peleta,

²⁸ a me Hazara Suala a me Beʻeraseba a me Biziotia,

²⁹ ʻo Baʻala a me Iima, a me ʻAzema,

³⁰ ‘o ʻEletolada a me Kisila, a me Horema,

³¹ ʻo Zikelaga, a me Mademana, a me Sanesana,

³² ʻo Lebaota a me Silihima, a me ʻAina a me Rimona; ʻo nā kūlanakauhale a pau he iwakālua lākou a me kumamāiwa, a me ko lākou mau kauhale.

³³ ¶ A ma ke awāwa: ʻo ʻAsetaola a me Zorea, a me ʻAsena,

³⁴ ʻo Zanoa a me ʻEne Ganima, a me Tapua a me ʻEnama,

³⁵ ʻo Iaremuta a me ʻAdulama, a me Soko a me ʻAzeka,

³⁶ ʻo Saraima a me ʻAditaima a me Gidera, a me Gederotaima: nā kūlanakauhale he ʻumikumamāhā, a me ko lākou mau kauhale;

³⁷ ¶ ʻo Zenana, a me Hadasa, a me Migedala Gada,

³⁸ ʻo Dileana, a me Mizepa, a me Ioketeʻela,

³⁹ ʻo Lakisa, a me Bozekata, a me ʻEgelona,

⁴⁰ ʻo Kabona a me Lahemama, a me Ketilisa,

⁴¹ ʻo Gederota, a me Bete Dagona, a me Naʻama, a me Makeda: he ʻumikumamāono kūlanakauhale, a me ko lākou mau kauhale;

⁴² ¶ ʻo Libena, a me ʻEtera, a me ʻAsana,

⁴³ ‘o Iipeta, a me ʻAsena, a me Neziba,

⁴⁴ ʻo Keila, a me ʻAkiziba, a me Maresa: ʻeiwa kūlanakauhale, a me ko lākou mau kauhale;

⁴⁵ ¶ ‘o ʻEkerona a me kona mau kūlanakauhale a me nā kauhale;

⁴⁶ mai ʻEkerona aku a hiki i ke kai, ʻo nā mea a pau e pili ana iā ʻAsedoda, a me kona mau kauhale;

⁴⁷ ¶ ʻo ʻAsedoda a me kona mau kūlanakauhale, a me kona mau kauhale; ʻo Gaza a me kona mau kūlanakauhale, a me kona mau kauhale, a hiki i ka muliwai ʻo ʻAigupita, a me ke Kai Nui, a me kona mokuna.

⁴⁸ ¶ A ma ka mauna: ʻo Samira, a me Iatira, a me Soko,

⁴⁹ ʻo Dana, a me Kiriata Sana, ʻo ia ʻo Debira,

⁵⁰ ʻo ʻAnaba, a me ʻAsetemo, a me ʻAnima,

⁵¹ ʻo Gosena, a me Holona, a me Gilo: he ʻumikumamākahi kūlanakauhale, a me ko lākou mau kauhale;

⁵² ¶ ʻo ʻAraba, a me Duma, a me ʻEseana,

⁵³ ʻo Ianuma, a me Bete Tapua, a me ʻApeka,

⁵⁴ ʻo Humeta, a me Kiriata ʻAreba, ʻo ia ʻo Heberona, a me Ziora: ʻeiwa kūlanakauhale, a me ko lākou mau kauhale;

⁵⁵ ¶ ʻo Maona, a me Karemela, a me Zipa, a me Iuta,

⁵⁶ ʻo Iezereʻela, a me Iokedeama, a me Zanoa,

⁵⁷ ʻo Kaina, ʻo Gibea, a me Timena: he ʻumi kūlanakauhale, a me ko lākou mau kauhale;

⁵⁸ ¶ ʻo Halehula, ʻo Bete Zura, a me Gedora,

⁵⁹ ʻo Maʻarata, me Bete ʻAnota, a me ʻEletekona: ʻeono kūlanakauhale, a me ko lākou mau kauhale;

⁶⁰ ¶ ʻo Kiriata Baʻala, ʻo Kiriata Iearima nō ia, a me Raba: ʻelua kūlanakauhale, a me ko lākou mau kauhale.

⁶¹ ¶ Ma ka wao nahele: ʻo Bete ʻAraba, a me Midina a me Sekaka,

⁶² ʻo Nibesana, a me ke Kūlanakauhale o Paʻakai, a me ʻEne Gedi: ʻeono kūlanakauhale, a me ko lākou mau kauhale.

⁶³ ¶ A ʻo ka poʻe Iebusa, ka poʻe i noho ma Ierusalema, ʻaʻole i hiki i kā Iuda ke kipaku aku iā lākou; akā, ua noho pū nō ka poʻe Iebusa me kā Iuda ma Ierusalema a hiki i kēia lā.