KA BUKE A IOSUA 13 - Ka Baibala Hemolele

1 No nā mokuna o nā ʻāina i hoʻolilo ʻole ʻia mai. 15 Ka ʻāina no kā Reubena. 22 Ua pepehi ʻia ʻo Balaʻama.

MOKUNA XIII.

¹ ¶ A ʻelemakule ʻo Iosua, a nui nō hoʻi kona mau makahiki. ʻŌlelo akula ʻo Iēhova iā ia, “Ua ʻelemakule ʻoe, a nui kou mau makahiki, a nui nō hoʻi ka ʻāina i koe iho ʻaʻole i komo.

² “Eia ka ʻāina i koe, ʻo nā wahi a pau o ka poʻe Pilisetia, a ʻo Gesura a pau,

³ mai Sihora mai aia i mua o ʻAigupita a hiki i ka palena ʻo ʻEkerona ma ka ʻākau aʻe, ua helu ʻia nō ka poʻe Kanaʻana; ʻelima haku o ka poʻe Pilisetia: ka poʻe Gaza, a me ka poʻe ʻAsedoda, a me ka poʻe ʻEsekalona, a me ka poʻe Gata, a me ka poʻe ʻEkerona; a ʻo ka poʻe ʻAvita kekahi.

⁴ “Mai ke kūkulu hema mai o ka ʻāina a pau a ka poʻe Kanaʻana, a me kā Meara, kahi e pili ana i ko Sidona poʻe a hiki i ʻApeka i ka palena o kā ʻAmora.

⁵ “ʻO ka ʻāina o ka poʻe Gibeli, a ʻo Lebanona a pau loa ma ka hikina a ka lā, mai Baʻala Gada aku ma lalo aʻe o ka mauna ʻo Heremona a hiki i kahi e komo ai i loko o Hamata.

⁶ “A ʻo ka poʻe noho ma ka mauna, mai Lebanona mai a hiki i Miserepote Maima, a me ko Sidona a pau, ʻo lākou, kaʻu e kipaku aku auaneʻi mai kā ʻIseraʻela aku; akā, e puʻunaue ʻoe ia mea ma ka hailona no ka poʻe mamo a ʻIseraʻela i wahi e noho ai, me aʻu i kauoha aku ai iā ʻoe.

⁷ “ʻĀnō e puʻunaue ʻoe i kēia ʻāina i noho ʻana no nā ʻohana ʻeiwa, a me ka ʻohana hapa a Manase.”

⁸ ¶ Ma laila i loaʻa ai kā Reubena a me kā Gada, ko lākou wahi e noho ai, kahi a Mose i hāʻawi aku ai iā lākou ma kēlā kapa o Ioredane ma ka hikina, e like me kā Mose, ke kauā a Iēhova i hāʻawi aku ai iā lākou;

⁹ Mai ʻAroera mai ma ke kapa o ka muliwai ʻo ʻArenona, a me ke kūlanakauhale aia ma ka muliwai, a me ke awāwa a pau o Medeba a hiki i Dibona;

¹⁰ ʻo nā kūlanakauhale a pau o Sihona, ke aliʻi o ka poʻe ʻAmora, ka mea i aliʻi ai ma Hesebona a hiki i ka palena o nā keiki a ʻAmona;

¹¹ a me Gileada, a me ka palena o ka poʻe Gesura, a me ka poʻe Maʻakati, a ʻo ka mauna a pau ʻo Heremona, a me Basana a pau a hiki i Saleka;

¹² a me ke aupuni a pau o ʻOga, ma Basana, ka mea i aliʻi ai ma ʻAsetarota a me ʻEderei, ʻo ia ka mea i koe iho no ka poʻe Repaima; ʻo ka poʻe a Mose i pepehi ai, a i kipaku aku nō hoʻi.

¹³ Akā, ʻaʻole i kipaku ʻia ka poʻe Gesuri, a me ka poʻe Maʻakati e kā ʻIseraʻela; akā, noho pū nō ka poʻe Gesuri, a me ka poʻe Maʻakati me kā ʻIseraʻela a hiki i kēia lā.

¹⁴ ʻAʻole i hāʻawi ʻia mai ka ʻāina hoʻoili no kā Levi; ʻo nā mōhai o Iēhova, ke Akua o kā ʻIseraʻela, ʻo ia ko lākou ʻāina hoʻoili, e like me ia i ʻōlelo mai ai.

¹⁵ ¶ Hāʻawi ʻo Mose no ka ʻohana a Reubena e like me ko lākou mau hale.

¹⁶ Aia ko lākou palena mai o ʻAroera mai, ma ke kapa o ka muliwai ʻo ʻArenona, a me ke kūlanakauhale ma ua muliwai lā, a me ka pāpū a pau ma Medeba.

¹⁷ ʻO Hesebona, a me nā kūlanakauhale ona a pau ma ka pāpū: ʻo Dibona, a me Bamota Baʻala, a me Beta Baʻala Meona,

¹⁸ a me Iahasa a me Kedemota, a me Mepaʻata,

¹⁹ a me Kireataima, a me Sibema, a me Zereta Sahara ma ka mauna no ka pāpū,

²⁰ a me Bete Peora a me ʻAsedota Pisega, a me Bete Iesimota,

²¹ a me nā kūlanakauhale a pau o ka pāpū a me ke aupuni a pau o Sihona ke aliʻi o kā ʻAmora, ka mea i aliʻi ai ma Hesebona, ka mea a Mose i pepehi ai me nā kaukaualiʻi hoʻi o Midiana. ʻO ia ʻo ʻEli a me Rekema a me Gura a me Hura a me Reba, ʻo ia nā mākualiʻi o Sihona e noho ana ma ka ʻāina.

²² ʻO Balaʻama ke kilo ke keiki a Beora, ʻo ia kekahi i pepehi ʻia e kā ʻIseraʻela me ka pahi kaua, i waena o ka poʻe i pepehi ʻia e lākou.

²³ A ʻo ka palena o kā Reubena ʻo Ioredane nō ia, a me kona palena. ʻO ia ka ʻāina hoʻoilina o kā Reubena ma ko lākou mau hale, ʻo nā kūlanakauhale a me nā kauhale o laila.

²⁴ ¶ Puʻunaue aʻela ʻo Mose no ka ʻohana o Gada, no nā mamo a Gada ma muli o ko lākou poʻe ʻōhua.

²⁵ Aia nō iā lākou ka palena ʻo Iazera, a me nā kūlanakauhale a pau o Gileada, a me ka hapalua o ka ʻāina o ka poʻe mamo a ʻAmona a hiki i ʻAroera aia i mua o Raba.

²⁶ A mai Hesebona a hiki iā Ramata Mizepa, a me Betonima; a mai Mahanaima a hiki i ka mokuna o Debira.

²⁷ Ma ke awāwa ʻo Bete ʻArama a me Bete Nimera a me Sukota, a me Zapora, ke koena o ke aupuni o Sihona, ke aliʻi o Hesebona, ʻo Ioredane a me kona palena a hiki i kahakai o Kinerota me kēlā kapa o Ioredane ma ka hikina.

²⁸ ʻO ia ka hoʻoilina a ka poʻe mamo a Gada ma ko lākou poʻe ʻōhua, ʻo nā kūlanakauhale, a me nā kauhale o laila.

²⁹ ¶ A puʻunaue aʻela ʻo Mose na ka ʻohana hapa a Manase; eia ka hoʻoilina na ka poʻe keiki a Manase ma ko lākou mau ʻōhua.

³⁰ Aia ko lākou palena mai Mahanaima aʻe o Basana a pau, ʻo ke aupuni a pau o ʻOga, ke aliʻi o Basana, a me nā kauhale a pau o Iaira, aia nō ma Basana kanaono kauhale;

³¹ a ʻo ka hapa o Gileada a me ʻAsetarota, a me ʻEderei, nā kūlanakauhale o ke aupuni o ʻOga ma Basana, ʻo ia na ka poʻe mamo a Makira ke keiki a Manase, na ka ʻohana hapa nō a Makira ma ko lākou mau ʻōhua.

³² ¶ ʻO ia kā Mose i puʻunaue ai i ʻāina hoʻoili ma ka pāpū ʻo Moaba ma kēlā kapa o Ioredane, ma ka hikina o Ieriko.

³³ Akā, ʻaʻole i hāʻawi ʻo Mose i ʻāina hoʻoili na kā Levi. ʻO Iēhova ke Akua o kā ʻIseraʻela, ʻo ia ko lākou ʻāina hoʻoili, e like me ka mea āna i ʻōlelo mai ai iā lākou.