KA BUKE A IOSUA 12 - Ka Baibala Hemolele

1 No nā aliʻi ʻelua a Mose i pepehi ai a lawe i ko lāua ʻāina. 7 No nā aliʻi he kanakolukumamākahi a Iosua i pepehi aku ai.

MOKUNA XII.

¹ ¶ Eia nā aliʻi a ka poʻe mamo a ʻIseraʻela i luku aku ai, a lawe aku i ko lākou ʻāina, ma kēlā kapa o Ioredane ma ka hikina a ka lā, mai ke kahawai ʻo ʻArenona, a hiki i ka mauna ʻo Heremona, a me ka pāpū a pau ma ka hikina.

² ʻO Sihona ke aliʻi o kā ʻAmora ka mea i noho ma Hesebona, a aliʻi ihola ʻo ia mai ʻAroera, ʻo ia ma kapa o ke kahawai ʻo ʻArenona, a ma waena aʻe o ke kahawai a me ka hapa o Gileada a hiki i ke kahawai ʻo Iaboka, ʻo ia ka palena o ka poʻe mamo a ʻAmona.

³ A ʻo ka pāpū a hiki i ke kai ʻo Kinerota ma ka hikina, a hiki i ke kai o ka pāpū, ʻo ia ke Kai Paʻakai ma ka hikina ma ka ʻaoʻao o Bete Iesimota, ma ka ʻaoʻao hema ma lalo aʻe o ʻAsedota Pisega.

⁴ A ʻo ka mokuna o ʻOga ke aliʻi o Basana, ka mea i koe o ka poʻe Repaima, ua noho ʻo ia ma ʻAsetarota i ʻEderei,

⁵ a aliʻi ihola ʻo ia ma ka mauna ʻo Heremona, a ma Saleka, a ma Basana a puni, a hiki i ka mokuna o Gesuri a me Maʻakati, a me ka hapa o Gileada, ka mokuna o Sihona ke aliʻi o Hesebona.

⁶ Ua pepehi ʻia lākou e Mose, e ke kauā a Iēhova, a me kā ʻIseraʻela, a hāʻawi ʻo Mose ke kauā a Iēhova ia mea i ʻāina hoʻoili na kā Reubena, a me kā Gada, a me ka ʻohana hapa a Manase.

⁷ ¶ Eia nā aliʻi o ka ʻāina a Iosua a me kā ʻIseraʻela i pepehi aku ai ma kēlā kapa o Ioredane, ma ke komohana, mai Baʻala Gada ma ke awāwa ʻo Lebanona a hiki i ka mauna ʻo Halaka, kahi e piʻi ai i Seira, a hāʻawi ʻo Iosua ia mea i nā ʻohana o kā ʻIseraʻela i kahi e noho ai e like me ko lākou mahele ʻana;

⁸ ma nā kuahiwi, a ma nā pāpū, a ma nā awāwa, a ma kahi haʻahaʻa, a ma ka wao nahele, a ma ke kūkulu hema: ʻo kā Heta, ʻo kā ʻAmora a ʻo kā Kanaʻana, ʻo kā Pereza, ʻo kā Heva hoʻi a me kā Iebusa.

⁹ ʻO ke aliʻi o Ieriko, hoʻokahi; ʻo ke aliʻi o ʻAi, aia ma ka ʻaoʻao o Betela, hoʻokahi;

¹⁰ ʻo ke aliʻi o Ierusalema, hoʻokahi; ʻo ke aliʻi o Heberona, hoʻokahi;

¹¹ ʻo ke aliʻi o Iaremuta, hoʻokahi; ʻo ke aliʻi o Lakisa, hoʻokahi;

¹² ʻo ke aliʻi o ʻEgelona, hoʻokahi; ʻo ke aliʻi o Gezera, hoʻokahi;

¹³ ʻo ke aliʻi o Debira, hoʻokahi; ʻo ke aliʻi o Gedera, hoʻokahi;

¹⁴ ʻo ke aliʻi o Horema, hoʻokahi; ʻo ke aliʻi o ʻArada, hoʻokahi;

¹⁵ ʻo ke aliʻi o Libena, hoʻokahi; ʻo ke aliʻi o ʻAdulama, hoʻokahi;

¹⁶ ʻo ke aliʻi o Makeda, hoʻokahi; ʻo ke aliʻi o Betela, hoʻokahi;

¹⁷ ʻo ke aliʻi o Tapua, hoʻokahi; ʻo ke aliʻi o Hepera, hoʻokahi;

¹⁸ ʻo ke aliʻi o ʻApeka, hoʻokahi; ʻo ke aliʻi o Lasarona, hoʻokahi;

¹⁹ ʻo ke aliʻi o Madona, hoʻokahi; ʻo ke aliʻi o Hazora, hoʻokahi;

²⁰ ʻo ke aliʻi o Simerona Merona, hoʻokahi; ʻo ke aliʻi o ʻAkesapa, hoʻokahi;

²¹ ʻo ke aliʻi o Taʻanaka, hoʻokahi; ʻo ke aliʻi o Megido, hoʻokahi;

²² ʻo ke aliʻi o Kadesa, hoʻokahi; ʻo ke aliʻi o Iokeneama no Karemela, hoʻokahi;

²³ ʻo ke aliʻi o Dora no Napeta Dora, hoʻokahi; ʻo ke aliʻi o Goima no Gilegala, hoʻokahi;

²⁴ ʻo ke aliʻi o Tiresa, hoʻokahi; ʻo nā aliʻi a pau loa, he kanakolukumamākahi.