KA BUKE A IOSUA 10 - Ka Baibala Hemolele

1 No ke kaua iā Gibeona. 12 Ke kau mālie ʻana o ka lā.

MOKUNA X.

¹ ¶ Eia hoʻi kekahi; a lohe ʻo ʻAdoni-Zedeka, ke aliʻi o Ierusalema, i ke pio ʻana o ʻAi iā Iosua, a me kona luku ʻana ia wahi; e like me kāna hana ʻana iā Ieriko a me kona aliʻi, pēlā kāna hana ʻana iā ʻAi, me ko laila aliʻi; a ua hoʻokuʻikahi aku nā kānaka o Gibeona me kā ʻIseraʻela, a ua noho pū me lākou;

² makaʻu loa ʻo ia, me kona poʻe; no ka mea, he kūlanakauhale nui ʻo Gibeona, me he kūlanakauhale aliʻi lā; no ka mea, ʻo ia ka nui o lāua ʻo ʻAi, a ʻo ko laila poʻe kānaka a pau, he poʻe koa loa.

³ No laila kiʻi akula ʻo ʻAdoni-Zedeka, ke aliʻi o Ierusalema, iā Hohama, i ke aliʻi o Heberona, a iā Pirama, i ke aliʻi o Iaremuta, a iā Iapia, i ke aliʻi o Lakisa, a iā Debira, ke aliʻi o ʻEgelona, ʻī akula iā lākou,

⁴ “E hele mai ʻoukou i oʻu nei, e kōkua mai iaʻu, i pepehi kākou i ko Gibeona; no ka mea, ua hoʻokuʻikahi lākou me Iosua a me nā mamo a ʻIseraʻela.”

⁵ A laila, ʻākoakoa maila nā aliʻi ʻelima o kā ʻAmora, ʻo ke aliʻi o Ierusalema, ʻo ke aliʻi o Heberona, ʻo ke aliʻi o Iaremuta, ʻo ke aliʻi o Lakisa, a me ke aliʻi o ʻEgelona, a piʻi akula lākou a me ko lākou huna kaua a pau, a hoʻomoana ihola ma ke alo o Gibeona, a kaua akula.

⁶ ¶ Hoʻouna koke maila nā kānaka o Gibeona iā Iosua, ma kahi āna i hoʻomoana ai ma Gilegala, ʻī maila, “Mai hoʻokaʻulua ʻoe i kou lima i kāu poʻe kauā nei; e piʻi koke mai i o mākou nei, e hoʻopakele, a e kōkua mai iā mākou; no ka mea, ua ʻākoakoa mai nei nā aliʻi a pau o kā ʻAmora, ka poʻe e noho ana ma nā mauna, e kūʻē iā mākou.”

⁷ A laila, piʻi akula ʻo Iosua, mai Gilegala aku, ʻo ia, a me nā kānaka kaua a pau pū me ia, a me ka poʻe koa ikaika a pau.

⁸ ʻĪ maila ʻo Iēhova iā Iosua, “Mai makaʻu iā lākou; no ka mea, ua hāʻawi au iā lākou a pau i loko o kou lima, ʻaʻole loa e kū kekahi kanaka o lākou i mua ou.”

⁹ Hiki koke akula ʻo Iosua iā lākou, i kona hele ʻana, mai Gilegala aku i ka pō a ao.

¹⁰ Hoʻoʻauheʻe akula ʻo Iēhova iā lākou i mua o kā ʻIseraʻela, a luku akula ʻo ia iā lākou i ka make nui loa, ma Gibeona, a hahai akula nō hoʻi ʻo ia iā lākou, ma ke ala e hiki aku ai i Bete Horona, a pepehi ihola iā lākou a hiki i ʻAzeka, a i Makeda.

¹¹ A i ko lākou heʻe ʻana i mua o kā ʻIseraʻela, i ko lākou iho ʻana i Bete Horona, hoʻolei maila ʻo Iēhova i nā pōhaku nui ma luna o lākou, mai ka lani mai, a hiki i ʻAzeka, a make lākou. Ua nui ka poʻe i make i ka huahekili, he hapa ka poʻe i make i nā mamo a ʻIseraʻela, i ka pahi kaua.

¹² ¶ A laila, ʻōlelo akula ʻo Iosua iā Iēhova, i ka lā i hāʻawi mai ai ʻo Iēhova i kā ʻAmora na nā mamo a ʻIseraʻela, ʻī akula ia i mua o ke alo o kā ʻIseraʻela: “E ka lā, e kau mālie ʻoe ma luna o Gibeona, A ʻo ʻoe hoʻi, e ka mahina, ma luna o ke awāwa ʻo ʻAialona.”

¹³ Kau mālie ihola ka lā, a kū mālie nō hoʻi ka mahina, a hoʻopaʻi akula nā kānaka i ko lākou poʻe ʻenemi. ʻAʻole anei kēia ka mea i palapala ʻia ma ka Buke a Iasera? Kau mālie nō ka lā ma waena o ka lani, ʻaʻole i hoʻomau i kona hele a pau ka lā hoʻokahi.

¹⁴ ʻAʻole lā e like me ia ma mua, ʻaʻole hoʻi ma hope, i lohe ai ʻo Iēhova i ka leo o ke kanaka; no ka mea, kaua maoli nō ʻo Iēhova ma muli o kā ʻIseraʻela.

¹⁵ Hoʻi maila ʻo Iosua a me kā ʻIseraʻela a pau pū me ia, a i kahi i hoʻomoana ai ma Gilegala.

¹⁶ ¶ Holo akula ua mau aliʻi nei ʻelima, a peʻe ihola i loko o ke ana ma Makeda.

¹⁷ Ua haʻi ʻia mai iā Iosua, i ka ʻī ʻana mai, “Ua loaʻa nā aliʻi ʻelima, ua peʻe lākou i loko o kekahi ana aia ma Makeda.”

¹⁸ ʻĪ akula ʻo Iosua, “E ʻolokaʻa i mau pōhaku nui ma ka waha o ke ana, a e hoʻonoho i mau kānaka e kiaʻi iā lākou.

¹⁹ “Mai kakali ʻoukou, e hahai ʻoukou i ko ʻoukou poʻe ʻenemi, a e pepehi i ko lākou hopena. Mai kuʻu aku iā lākou e komo i loko o ko lākou mau kūlanakauhale; no ka mea, na Iēhova ko ʻoukou Akua i hāʻawi mai iā lākou i ko ʻoukou lima.”

²⁰ Luku akula ʻo Iosua a me nā mamo a ʻIseraʻela iā lākou i ka make nui loa, a oki loa ihola lākou, a laila, holo akula ke koena o lākou a komo i loko o nā kūlanakauhale i paʻa i ka pā.

²¹ Hoʻi maluhia maila nā kānaka a pau i kahi a lākou i hoʻomoana ai, i o Iosua lā, ma Makeda. ʻAʻole loa i hoʻokala kekahi i kona alelo i nā mamo a ʻIseraʻela.

²² ¶ ʻĪ akula ʻo Iosua, “E wehe i ka waha o ke ana, a e lawe mai i waho i oʻu nei, i ua mau aliʻi lā ʻelima, mai ke ana mai.”

²³ Hana ihola nō lākou pēlā, a lawe maila i ua mau aliʻi lā ʻelima i ona lā, mai ke ana mai; ʻo ke aliʻi o Ierusalema, a me ke aliʻi o Heberona, a me ke aliʻi o Iaremuta, a me ke aliʻi o Lakisa, a me ke aliʻi o ʻEgelona.

²⁴ A i ka wā i lawe mai ai lākou i ua mau aliʻi nei i o Iosua lā, a laila, hea akula ʻo Iosua i kānaka a pau o kā ʻIseraʻela, ʻī akula i nā ʻalihi o ka poʻe koa, i hele pū me ia, “E neʻeneʻe mai ʻoukou, a e hehi ko ʻoukou kapuaʻi ma luna o nā ʻāʻī o kēia poʻe aliʻi.” Neʻeneʻe maila lākou a hehi akula ko lākou kapuaʻi, ma luna o ko lākou mau ʻāʻī.

²⁵ ʻĪ akula ʻo Iosua iā lākou, “Mai makaʻu ʻoukou, ʻaʻole hoʻi e weliweli; e ikaika ʻoukou, a e koa hoʻi; no ka mea, pēlā nō e hana mai ai ʻo Iēhova i nā ʻenemi a pau a ʻoukou e kaua aku ai.”

²⁶ A ma hope iho, luku akula ʻo Iosua iā lākou a pepehi ihola, a kāʻawe aʻela ma nā lāʻau ʻelima; a e kaulia ana nō lākou ma nā lāʻau, a hiki i ke ahiahi.

²⁷ A hiki i ka manawa i napoʻo ai ka lā, kauoha aʻela ʻo Iosua, e kuʻu iā lākou mai luna iho o nā lāʻau, a e kiola iā lākou i loko o ke ana, ma kahi a lākou i peʻe aku ai; a waiho akula i nā pōhaku nui ma ka waha o ke ana, a hiki loa mai i nēia lā.

²⁸ ¶ Ia lā nō i hoʻopio ai ʻo Iosua iā Makeda, a luku akula me ka maka o ka pahi kaua, a pepehi akula i ko laila aliʻi a make loa, ʻo lākou, a me ko laila kānaka a pau, ʻaʻole ia i waiho i kekahi koena. Hana akula ia i ko laila aliʻi, e like me ia i hana aku ai i ke aliʻi o Ieriko.

²⁹ ¶ Hele akula ʻo Iosua, a me kā ʻIseraʻela a pau pū me ia, mai Makeda aku a hiki i Libena, a kaua akula iā Libena.

³⁰ Hāʻawi mai nō hoʻi ʻo Iēhova ia wahi a me ko laila aliʻi a me ko laila poʻe kānaka a pau, i ka lima o kā ʻIseraʻela, a luku akula ʻo ia ia wahi ma ka maka o ka pahi kaua; ʻaʻole ia i waiho i koena ma ia wahi. Hana aku nō hoʻi ia i ko laila aliʻi e like me ia i hana aku ai i ke aliʻi o Ieriko.

³¹ ¶ Hele akula ʻo Iosua, a me kā ʻIseraʻela a pau pū me ia mai Libena aku a Lakisa, hoʻomoana ihola ma ke alo o ia wahi, a kaua akula.

³² Hāʻawi maila ʻo Iēhova iā Lakisa i ka lima o kā ʻIseraʻela, a i ka lua o ka lā, hoʻopio ihola ʻo ia ia wahi a luku akula ia wahi ma ka maka o ka pahi kaua, a me nā kānaka a pau ma ia wahi, e like me nā mea a pau āna i hana aku ai iā Libena.

³³ ¶ A laila, hele aʻela ʻo Horama, ke aliʻi o Gezera, e kōkua ma muli o Lakisa. Luku akula ʻo Iosua iā ia, a me kona kānaka, a pau loa lākou i ka make, ʻaʻole i koe.

³⁴ ¶ Hele akula ʻo Iosua a me kā ʻIseraʻela a pau pū me ia, mai Lakisa aku a ʻEgelona, a hoʻomoana ihola ma ke alo o ia wahi, a kaua akula iā ia.

³⁵ Hoʻopio ihola lākou ia wahi ia lā nō, a luku akula ia wahi ma ka maka o ka pahi kaua, a me ko laila kānaka a pau, luku loa akula ia, e like me nā mea a pau āna i hana aku ai iā Lakisa.

³⁶ ¶ Hele akula ʻo Iosua, a me kā ʻIseraʻela a pau pū me ia, mai ʻEgelona aku a Heberona, a kaua akula ia wahi.

³⁷ Hoʻopio ihola lākou ia wahi, a luku akula ma ka maka o ka pahi kaua, a me ko laila aliʻi, a me ko laila kūlanakauhale a pau, a me ko laila kānaka a pau; ʻaʻole ia i waiho i koena, e like me nā mea a pau āna i hana aku ai iā ʻEgelona. Hoʻōki loa ihola ʻo ia ia wahi a me ko laila kānaka a pau.

³⁸ ¶ Hoʻi maila ʻo Iosua a me kā ʻIseraʻela a pau pū me ia, a i Debira, a kaua aʻela ia wahi.

³⁹ A hoʻopio ihola, a me ko laila aliʻi, a me ko laila kūlanakauhale a pau, a luku akula iā lākou ma ka maka o ka pahi kaua, a hoʻōki loa ihola ia i kānaka a pau o ia wahi, ʻaʻole i waiho i koena; e like me ia i hana aku ai iā Heberona, pēlā nō ia i hana ai iā Debira, a me kona aliʻi, e like hoʻi me ia i hana ai iā Libena, a me kona aliʻi.

⁴⁰ ¶ Luku akula ʻo Iosua i ka ʻāina mauna a pau, a ma ka Lima Hema, a ma kahi pāpū, a ma kahi haʻahaʻa, a me ko laila poʻe aliʻi a pau. ʻAʻole ia i waiho i kekahi koena. Hoʻōki loa ihola ia i nā mea hanu a pau, e like me ke kauoha ʻana mai o Iēhova ke Akua o kā ʻIseraʻela.

⁴¹ Luku akula ʻo Iosua iā lākou, mai Kadesa Banea a hiki i Gaza, a me ka ʻāina a pau o Gosena a hiki loa i Gibeona.

⁴² Hoʻopio ihola ʻo Iosua i kēia poʻe aliʻi a pau, a me ko lākou ʻāina, i kēlā wā hoʻokahi nō; no ka mea, na Iēhova nō, ke Akua o kā ʻIseraʻela, i kaua mai ma muli o kā ʻIseraʻela.

⁴³ Hoʻi maila ʻo Iosua, a me kā ʻIseraʻela a pau pū me ia, a hiki i kahi a lākou i hoʻomoana ai ma Gilegala.