KA BUKE A ʻEZERA 8 - Ka Baibala Hemolele

1 Papa inoa o ka poʻe i piʻi pū me ʻEzera i Ierusalema. 15 ʻImi aku ʻo ʻEzera i nā kāhuna. 21 Hoʻokē ʻai lākou. 24 Hāʻawi aku ʻo ʻEzera i ka waiwai laʻa na nā kāhuna e mālama. 31 Hiki pōmaikaʻi aku lākou i Ierusalema. 33 Hōʻike i nā waiwai, a kaumaha aku i nā mōhai. 36 Hōʻike i ke kauoha a ke aliʻi.

MOKUNA VIII.

¹ ¶ Eia ka poʻe koʻikoʻi o nā mākua, a me ke kūʻauhau o lākou, ka poʻe i piʻi pū me aʻu, mai Babulona aku, i ke au iā ʻAretasaseta ke aliʻi:

² no nā mamo a Pinehasa, ʻo Geresoma; no nā mamo a ʻItamara, ʻo Daniʻela; no nā mamo a Dāvida, ʻo Hatusa;

³ no nā mamo a Sekania, no nā mamo a Parosa, ʻo Zekaria; a me ia ua helu ʻia ma ke kūʻauhau o nā kāne, hoʻokahi haneri a me kanalima;

⁴ no nā mamo a Pahata-Moaba, ʻo ʻElihoenai ke keiki a Zerahia, a me ia nō ʻelua haneri kāne;

⁵ no nā mamo a Sekania, ʻo ke keiki a Iahaziʻela, a me ia nō ʻekolu haneri kāne;

⁶ no nā mamo a ʻAdina, ʻo ʻEbeda, ke keiki a Ionatana, a me ia nō he kanalima kāne;

⁷ no nā mamo a ʻElama, ʻo Iesaia, ke keiki a ʻAtalia, a me ia nō he kanahiku kāne;

⁸ no nā mamo a Sepatia, ʻo Zebadia ke keiki a Mikaʻela, a me ia nō he kanawalu kāne;

⁹ no nā mamo a Ioaba, ʻo ʻObadia ke keiki a Iehiʻela, a me ia nō ʻelua haneri a me ka ʻumikumamāwalu kāne;

¹⁰ ʻo nā mamo a Selomita, ʻo ke keiki a Iosipia, a me ia nō hoʻokahi haneri a me kanaono kāne;

¹¹ no nā mamo a Bebai, ʻo Zekaria ke keiki a Bebai, a me ia nō he iwakālua a me kumamāwalu kāne;

¹² no nā mamo a ʻAzegada, ʻo Iohanana ke keiki a Hakatana, a me ia nō hoʻokahi haneri a me ka ʻumi nā kāne;

¹³ no nā mamo hope a ʻAdonikama, a eia ka inoa o lākou, ʻo ʻElipeleta, ʻo Ieiʻela, a me Semaia, a me lākou nō he kanaono kāne;

¹⁴ a no nā mamo hoʻi a Bigevai, ʻo ʻUtai, a ʻo Zabuda, a me lāua nō he kanahiku nā kāne.

¹⁵ ¶ A hoʻākoakoa aʻela au iā lākou ma ka muliwai e kahe ana i ʻAhava, a ma laila mākou i hoʻomoana ai i nā lā ʻekolu; a nānā akula au i nā kānaka, a me nā kāhuna, ʻaʻole i loaʻa ma laila kekahi o nā mamo a Levi.

¹⁶ A laila kiʻi akula au iā ʻEliezera, a iā ʻAriʻela, a iā Simaia, a iā ʻElenatana, a iā Iariba, a iā ʻElenatana, a iā Natana, a iā Zekaria, a me Mesulama, he mau mea koʻikoʻi; a iā Ioiariba, a iā ʻElenatana, he mau mea naʻauao.

¹⁷ A hoʻouna aku au iā lākou e kauoha iā ʻIdo, i ka luna ma ke kauwahi i Kasipia, a haʻi aku au iā lākou i nā mea a lākou e ʻōlelo aku ai iā ʻIdo, a me kona mau hoahānau, ka poʻe Netini ma ke kauwahi i Kasipia, e lawe mai lākou na mākou i mea lawelawe no ka hale o ko kākou Akua.

¹⁸ A ma ka lima o ke Akua ma luna o mākou e pono ai, lawe mai lākou no mākou i kekahi kanaka naʻauao no nā keiki a Maheli, ka mamo a Levi, ke keiki a ʻIseraʻela; a iā Serebia, me kāna mau keiki, a me kona mau hoahānau he ʻumikumamāwalu;

¹⁹ a me Hasabia, a me ia nō ʻo Iesaia, no nā mamo a Merari, kona mau hoahānau, a me kā lākou mau keiki, he iwakālua;

²⁰ a no ka poʻe Netini, nā mea a Dāvida, a me nā luna i hoʻonoho ai no ka ʻoihana Levi, ʻelua haneri a me ka iwakālua Netini; ua kāhea ʻia lākou a pau ma ka inoa.

²¹ ¶ A laila kūkala aku au i hoʻokē ʻai ma laila ma ka muliwai ʻo ʻAhava, i hoʻohaʻahaʻa iho ai mākou iā mākou iho i mua o ko kākou Akua, e ʻimi aku iā ia i ʻaoʻao pono no mākou, a no kā mākou kamaliʻi, a no kā mākou waiwai a pau.

²² No ka mea, ua hilahila nō wau e noi aku i ke aliʻi i poʻe koa, a me nā holoholo lio, e kōkua iā mākou no nā ʻenemi ma ke ala; no ka mea, ua ʻōlelo mākou i ke aliʻi, i ka ʻī ʻana aku, “ʻO ka lima o ko kākou Akua ma luna o lākou a pau e pono ai, ʻo ka poʻe e ʻimi ana iā ia; akā, ua kūʻē mai kona mana a me kona huhū i ka poʻe a pau e haʻalele iā ia.”

²³ A hoʻokē ʻai ihola mākou, a nonoi aku i ko kākou Akua no kēia mea; a hoʻolohe mai nō ia iā mākou.

²⁴ ¶ A laila hoʻokaʻawale au i nā luna kāhuna he ʻumikumamālua, ʻo Serebia, ʻo Hasabia, a he ʻumi o ko lāua mau hoahānau me lāua;

²⁵ a kaupaona ihola au no lākou i ke kālā, a i ke gula, a me nā kīʻaha, ka manawaleʻa no ka hale o ko kākou Akua, a ke aliʻi, a me kona poʻe kākāʻōlelo, a me kona poʻe luna, a me kā ʻIseraʻela a pau e noho ana, i hāʻawi mai ai.

²⁶ Kaupaona akula au no ko lākou lima i ʻeono haneri a me kanalima tālena kālā, a me nā kīʻaha kālā hoʻokahi haneri tālena, a me ke gula hoʻokahi haneri tālena;

²⁷ a he iwakālua bola gula, hoʻokahi tausani derama; a ʻelua kīʻaha keleawe melemele maikaʻi, he nui ke kumu kūʻai, e like me ke gula.

²⁸ A ʻī akula au iā lākou, “Ua hoʻolaʻa ʻia ʻoukou no Iēhova; ua hoʻolaʻa ʻia nō hoʻi nā kīʻaha; a ʻo ke kālā a me ke gula, he makana wale no Iēhova ke Akua o ko ʻoukou poʻe kūpuna.

²⁹ “E makaʻala ʻoukou, a e mālama hoʻi, a kaupaona ʻoukou ia mea i mua o nā luna kahuna a me nā Levi, a me nā mea koʻikoʻi o nā mākua o kā ʻIseraʻela ma Ierusalema, i loko o nā keʻena ma ka hale o Iēhova.”

³⁰ A lawe aʻela nā kāhuna a me nā Levi i ke kālā, a me ke gula, a me nā kīʻaha i kaupaona ʻia, e hali aku i Ierusalema ma ka hale o ko kākou Akua.

³¹ ¶ A haʻalele mākou i ka muliwai o ʻAhava, i ka lā ʻumikumamālua o ka malama mua, e hele i Ierusalema; a ma luna o mākou ka lima o ko mākou Akua, a hoʻopakele nō ʻo ia iā mākou i ka lima o ka ʻenemi, a me ka poʻe hoʻohālua ma ke ala.

³² A hele mai mākou i Ierusalema, a noho ma laila i nā lā ʻekolu.

³³ A i ka hā o ka lā, kaupaona ʻia ke kālā, a me ke gula, a me nā kīʻaha, i loko o ka hale o ko kākou Akua, ma ka lima o Meremota, ke keiki a ʻUria ke kahuna; a me ia nō ʻo ʻEleazara, ke keiki a Pinehasa; a me lākou nō ʻo Iozabada, ke keiki a Iesua, a ʻo Noadia, ke keiki a Binui, no nā Levi;

³⁴ ma ka helu ʻana, a me ke kaupaona ʻana, o nā mea a pau: a ʻo nā paona a pau, ua kākau ʻia i kēlā manawa.

³⁵ ¶ A ʻo nā keiki a ka poʻe pio i hoʻi hou mai, kaumaha aku lākou i nā mōhai kuni i ke Akua o kā ʻIseraʻela, he ʻumikumamālua nā bipi kāne no kā ʻIseraʻela a pau, a he kanaiwakumamāono nā hipa kāne, a he kanahikukumamāhiku nā keiki hipa, he ʻumikumamālua nā kao kāne, i mōhai hala; ʻo ia mea a pau i mōhai kuni iā Iēhova.

³⁶ A hāʻawi aku lākou i nā kauoha a ke aliʻi, i nā kiaʻāina, a me nā aliʻi ʻai moku o ke aliʻi ma kēia ʻaoʻao o ka Muliwai; a kōkua lākou i nā kānaka, a me ka hale o ke Akua.