KA BUKE A ʻEZERA 6 - Ka Baibala Hemolele

1 Loaʻa iā Dariu ke kauoha a Kuro, a hoʻokūpaʻa aku hoʻi ia mea, a kōkua aku ia me kona waiwai i ka hana ʻana i ka luakini, a hoʻouku aku ia i nā mea kūʻē ia hana. 13 Hana ʻia ka luakini a paʻa, a hoʻolaʻa ʻia akula ia, a mālama ʻia ka ʻAhaʻaina Mōliaola me ka ʻoliʻoli.

MOKUNA VI.

¹ ¶ A laila kauoha aʻela ʻo Dariu ke aliʻi, ʻimihia ma ka hale o nā palapala, kahi i waiho ai nā waiwai i laila ma Babulona.

² A loaʻa ihola, ma ʻAkemeta, ma ka hale aliʻi, o ko Media, he palapala, a pēnēia ka ʻōlelo i kākau ʻia ai ma loko:

³ “I ka makahiki mua o Kuro ke aliʻi, kauoha aʻela ʻo ua Kuro lā ke aliʻi no ka hale o ke Akua ma Ierusalema, ‘E hana ʻia ka hale, kahi i kaumaha aku ai i nā mōhai, a e hoʻonoho paʻa ʻia ke kumu; he kanaono haʻilima ke kiʻekiʻe, a he kanaono haʻilima ka laulā;

⁴ pākolu nā papa pōhaku kālai, a e pākahi hoʻi ka papa lāʻau hou; a e hāʻawi ʻia ka waiwai mai ka hale o ke aliʻi mai.

⁵ ‘A ʻo nā kīʻaha gula hoʻi a me ke kālā o ka hale o ke Akua, nā mea a Nebukaneza i lawe aʻe mai ka luakini mai ma Ierusalema, a hali mai i Babulona, e hoʻihoʻi ʻia aku, a e hali ʻia aku i ka luakini ma Ierusalema, ʻo kēlā kēia ma kona wahi iho, a e waiho ma ka hale o ke Akua.’

⁶ ¶ “ʻĀnō hoʻi, e Tatenai, ke kiaʻāina ma kēlā ʻaoʻao o ka Muliwai, a me Setara-Bozenai, a me ko lāua poʻe hoa lawehana, ka poʻe ʻAparesaka, ma kēlā ʻaoʻao o ka Muliwai, e hoʻokaʻawale ʻia ʻoukou mai ia wahi aku.

⁷ “E waiho mālie ʻoukou i ka hana o kēia hale o ke Akua; a ʻo ke aliʻi kiaʻāina o nā Iudaio, a me ka poʻe kahiko o nā Iudaio, e hana lākou i kēia hale o ke Akua ma kona wahi.

⁸ “Eia hoʻi kaʻu e kauoha aku nei i ka mea a ʻoukou e hana aku ai i nā lunakahiko o kēia poʻe Iudaio, no ka hana ʻana i kēia hale o ke Akua: no loko mai o ka waiwai o ke aliʻi, ʻo ia ka hoʻokupu ma kēlā ʻaoʻao o ka Muliwai, e hāʻawi koke ʻia aku ka waiwai no kēia poʻe kānaka, i keʻakeʻa ʻole ʻia ai lākou.

⁹ “A ʻo nā mea e pono ai lākou, ʻo nā keiki bipi kāne, a ʻo nā hipa kāne, a me nā keiki hipa, no nā mōhai kuni na ke Akua o ka lani, ʻo ka palaoa, ka paʻakai, ʻo ka waina, a me ka ʻaila, e like me ke kauoha a nā kāhuna ma Ierusalema, e hāʻawi ʻia aku ia na lākou i kēlā lā kēia lā, ʻaʻole ka ʻole;

¹⁰ i kaumaha aku ai lākou i nā mea ʻala i ke Akua o ka lani, a i pule aku hoʻi no ke ola o ke aliʻi, a no kāna mau keiki.

¹¹ “A ke kauoha aku nei nō hoʻi au, ʻo kēlā kanaka kēia kanaka e hoʻololi i kēia ʻōlelo, e lawe ʻia ka lāʻau mai kona hale mai, a kūkulu ʻia, e kāʻawe ʻia ʻo ia ma luna o ia mea, a e hoʻolilo ʻia kona hale i puʻu lepo no kēia mea.

¹² “A ʻo ke Akua, nāna i waiho kona inoa ma laila, e luku aku ia i nā aliʻi a pau, a me nā kānaka, ke ʻō aku ko lākou lima e hoʻololi, a e wāwahi i kēia hale o ke Akua ma Ierusalema. ʻO wau, ʻo Dariu kai kauoha aku; e hana koke ʻia hoʻi ʻo ia!”

¹³ ¶ A laila ʻo Tatenai, ke kiaʻāina ma kēia ʻaoʻao o ka Muliwai, ʻo Setara-Bozenai, a me ko lāua hoa lawehana, e like me ka mea a ke aliʻi i hoʻouna mai ai, pēlā lākou i hana koke aku ai.

¹⁴ A hana akula nā lunakahiko o nā Iudaio, a ua pōmaikaʻi lākou ma ka wānana a Hagai ke kāula, a me Zekaria ke keiki a ʻIdo. A hana lākou, a hoʻopaʻa hoʻi, e like me ke kauoha a ke Akua o kā ʻIseraʻela, a like hoʻi me ke kauoha a Kuro, a me Dariu, a me ʻAretasaseta, ke aliʻi o Peresia.

¹⁵ A ua hoʻopaʻa ʻia kēia hale i ke kolu o ka lā o ka malama ʻAdara, ʻo ia ke ono o ka makahiki a Dariu ke aliʻi i noho aliʻi ai.

¹⁶ ¶ A ʻo nā mamo a ʻIseraʻela, nā kāhuna, a me nā Levi, a me nā mea i koe o ka poʻe i pio, hoʻolaʻa akula lākou i kēia hale o ke Akua me ka ʻoliʻoli.

¹⁷ A kaumaha akula no ka hoʻolaʻa ʻana i kēia hale o ke Akua, i hoʻokahi haneri bipi kāne, i ʻelua haneri hipa kāne, a i ʻehā haneri keiki hipa; a i ʻumikumamālua nā kao kāne i mōhai hala no kā ʻIseraʻela a pau, e like me nā ʻohana o kā ʻIseraʻela.

¹⁸ A hoʻonoho ihola lākou i nā kāhuna ma ko lākou mau papa, a me nā Levi ma ko lākou mau papa, no ka ʻoihana o ke Akua ma Ierusalema; e like me ke kauoha ma ka Buke a Mose.

¹⁹ ¶ A mālama akula ka poʻe i pio i ka Mōliaola, i ka lā ʻumikumamāhā o ka malama mua.

²⁰ No ka mea, ua huikala pū ʻia nā kāhuna, a me nā Levi, a ua maʻemaʻe lākou a pau, a kālua akula lākou i ka Mōliaola, no ka poʻe i pio a pau, a no ko lākou poʻe hoahānau nā kāhuna, a no lākou iho.

²¹ A ʻai ihola nā mamo a ʻIseraʻela, ka poʻe i hoʻi mai, mai ke pio ʻana mai, a me ka poʻe a pau i hoʻokaʻawale iā lākou iho mai ka mea haumia o nā lāhui kanaka o ka ʻāina, e ʻimi iā Iēhova ke Akua o kā ʻIseraʻela.

²² A mālama lākou i ka ʻAhaʻaina Berena Hū ʻOle i nā lā ʻehiku me ka ʻoliʻoli; no ka mea, ʻo Iēhova kai hoʻohauʻoli mai iā lākou, a hoʻohuli mai i ka naʻau o ke aliʻi o ʻAsuria iā lākou, e hoʻoikaika i ko lākou lima i ka hana ʻana i ka hale o ke Akua, ke Akua o kā ʻIseraʻela.