KA BUKE A ʻEZERA 5 - Ka Baibala Hemolele

1 Wānana ʻo Hagai, a me Zekaria i nā Iudaio, a hoʻomaka hou ʻo Zerubabela a ʻo Iesua e hana i ka luakini. 3 Hoʻoikaika mai ʻo Tatenai mā e hoʻōki i ka hana, ʻaʻole e hiki. 6 Ka palapala a Tatenai mā i ke aliʻi, iā Dariu.

MOKUNA V.

¹ ¶ A laila ʻo nā kāula, ʻo Hagai ke kāula, a ʻo Zekaria ke keiki a ʻIdo, wānana akula lāua i nā Iudaio ma Iuda, a ma Ierusalema, ma ka inoa o ke Akua o kā ʻIseraʻela iā lākou.

² Ia manawa kū aʻela ʻo Zerubabela ke keiki a Sealetiʻela, a me Iesua, ke keiki a Iozadaka, a hoʻomaka aku e hana i ka hale o ke Akua ma Ierusalema; a me lāua pū nā kāula o ke Akua e kōkua ana iā lāua.

³ A ia wā hoʻi, hele mai i o lākou lā ʻo Tatenai, ke kiaʻāina o kēia ʻaoʻao o ka Muliwai, a me Setara-Bozenai, a me ko lāua mau hoa lawehana, a ʻōlelo mai iā lākou pēnēia, “Na wai ʻoukou i kauoha mai e hana i kēia hale, a e hoʻopaʻa hoʻi i kēia pā pōhaku?”

⁴ A laila nīnau aku hoʻi mākou iā lākou pēnēia, “ʻO wai ka inoa o nā kānaka, nāna e hana kēia hale?”

⁵ Akā, ʻo ka maka o ko lākou Akua, aia nō ia ma luna o ka poʻe lunakahiko o nā Iudaio, ʻaʻole lākou i hiki ke hoʻōki aku iā lākou, a hiki ia mea i o Dariu lā; a laila hoʻouna akula lākou i ka palapala no kēia mea.

⁶ ¶ Eia ka palapala a Tatenai, ke kiaʻāina o kēia ʻaoʻao o ka Muliwai, a ʻo Setara-Bozenai, a me kona poʻe hoa lawehana, ka poʻe ʻAparesaka, ma kēia ʻaoʻao o ka Muliwai, i hoʻouna aku ai iā Dariu ke aliʻi.

⁷ Hoʻouna akula lākou i ka palapala iā ia, pēnēia i kākau ʻia ai ma loko, “Na Dariu ke aliʻi, e aloha nui ʻia ʻo ia.

⁸ “E hōʻike ʻia i ke aliʻi, i hele ai mākou i ka ʻāina o kā Iuda i ka hale o ke Akua nui, ka mea i hana ʻia i ka pōhaku i kālai ʻia a me ka lāʻau i hoʻonoho ʻia ma loko o nā pā pōhaku, a ke hana wikiwiki ʻia kēia hana, a e kō ana ia i loko o ko lākou lima.

⁹ “A laila nīnau akula mākou i kēlā poʻe lunakahiko, a ʻī akula iā lākou, ‘Na wai ʻoukou i kauoha mai e hana i kēia hale, a e hoʻopaʻa hoʻi i kēia mau pā pōhaku?’

¹⁰ “Nīnau aku hoʻi mākou i ko lākou inoa, i hōʻike aku ai mākou iā ʻoe, a i kākau iho ai hoʻi i ka inoa o nā kānaka, ka poʻe luna hoʻi o lākou.

¹¹ ‘A haʻi mai lākou i ka ʻōlelo iā mākou pēnēia, ʻī maila, “He poʻe kauā mākou na ke Akua o ka lani, a ʻo ka honua, a ke hana nei i ka hale, i ka mea i hana ʻia i nā makahiki ma mua loa aku, a kekahi aliʻi nui o kā ʻIseraʻela i hana, a hoʻopaʻa aku ia.

¹² ‘Akā, ma hope o ka hoʻonāukiuki ʻana o ko mākou poʻe mākua i ke Akua o ka lani, hāʻawi ʻo ia iā lākou i loko o ka lima o Nebukaneza ke aliʻi o Babulona, no Kaledea, nāna i wāwahi kēia hale, a lawe pio akula i nā kānaka i Babulona.

¹³ ‘Akā, i ka makahiki mua o Kuro ke aliʻi o Babulona, kauoha akula ʻo Kuro ke aliʻi, e hana i ka hale o ke Akua.

¹⁴ ‘A ʻo nā kīʻaha gula, a me ke kālā o ka hale o ke Akua, nā mea a Nebukaneza i lawe aʻe mai loko mai o ka luakini ma Ierusalema, a hali aku ia mau mea i ka luakini ma Babulona, ʻo ia mau mea kā Kuro ke aliʻi i lawe ai mai loko mai o ka luakini ma Babulona, a ua hāʻawi ʻia ʻo ia mau mea i kekahi, ʻo Sesebazara kona inoa, ka mea āna i hoʻonoho ai i kiaʻāina.

¹⁵ ‘ʻĪ akula iā ia, “E lawe i kēia mau kīʻaha, e hele e hali aku ia mau mea i ka luakini ma Ierusalema, a e hana ʻia ka hale o ke Akua ma kona wahi.”

¹⁶ ‘A laila hele mai ʻo ua Sesebazara lā, a hoʻonoho i ke kahua o ka hale o ke Akua ma Ierusalema: a mai ia manawa a kēia wā ka hana ʻana, ʻaʻole naʻe i paʻa.’

¹⁷ “ʻĀnō hoʻi, inā he mea pono i ke aliʻi, e ʻimihia ma ka hale waihona waiwai o ke aliʻi ma Babulona, inā he ʻoiaʻiʻo, ua kauoha ʻia e Kuro e hana i kēia hale o ke Akua ma Ierusalema; a e hoʻouna mai ke aliʻi i kona manaʻo no kēia mea.”