KA BUKE A ʻEZERA 10 - Ka Baibala Hemolele

1 Uē pū nā kānaka me ʻEzera. 2 Hoʻohiki ihola e haʻalele i kā lākou mau wāhine ʻē. 6 Hoʻoʻākoakoa ʻo ʻEzera i nā kānaka ma Ierusalema. 15 Hana lākou e like me ko lākou hoʻohiki ʻana a hoʻokuke aku i kā lākou mau wāhine ʻē. 18 Nā inoa o ka poʻe i lawe i nā wāhine ʻē.

MOKUNA X.

¹ ¶ A pau kā ʻEzera pule ʻana, a me ka uē ʻana, a me ka moe ʻana i mua o ka hale o ke Akua, hoʻākoakoa ʻia aʻela i ona lā he anaina kanaka nui loa o kā ʻIseraʻela, nā kāne, me nā wāhine a me nā kamaliʻi; no ka mea, he nui loa ka uē o nā kānaka.

² A ʻōlelo mai ʻo Sekania ke keiki a Iehiʻela, no nā mamo a ʻElama, ʻī maila iā ʻEzera, “Ua hana hewa mākou i ke Akua, a ua lawe mākou i nā wāhine ʻē no nā kānaka o ka ʻāina; akā ʻānō, he manaʻolana nō i loko o kā ʻIseraʻela no kēia mea.

³ “ʻĀnō hoʻi, e hoʻohiki kākou i ko kākou Akua e hoʻokuke aku i nā wāhine a pau, a me nā mea a lākou i hānau ai, e like me ke aʻo ʻana a kuʻu haku, a me ka poʻe e makaʻu ana i ke kauoha a ko kākou Akua; a e hana ʻia ia mea ma ke kānāwai.

⁴ “E kū aʻe ʻoe; no ka mea, iā ʻoe nō kēia mea: ʻo mākou pū kekahi me ʻoe; e ikaika ʻoe, a e hana.”

⁵ ¶ A laila kū aʻela ʻo ʻEzera, a hoʻohiki akula i nā kāhuna nui, i nā Levi, a me kā ʻIseraʻela a pau, e hana lākou e like me kēia ʻōlelo. A hoʻohiki ihola lākou.

⁶ A laila kū aʻela ʻo ʻEzera mai ke alo mai o ka hale o ke Akua, a komo i loko o ke keʻena o Iehohanana ke keiki a ʻEliasiba; a hiki aku ia i laila, ʻaʻole ia i ʻai i ka ʻai, ʻaʻole hoʻi i inu i ka wai; no ka mea, uē ihola ia no ka hewa o ka poʻe pio i hoʻi mai.

⁷ A haʻi akula lākou ma Iuda, a ma Ierusalema i ka poʻe pio a pau e hōʻuluʻulu lākou ma Ierusalema;

⁸ a ʻo nā mea a pau i hele ʻole mai i nā lā ʻekolu, e like me ke kauoha a nā luna, a me ka poʻe kahiko, e hoʻolaʻa ʻia kona waiwai a pau, a e hoʻokaʻawale ʻia ʻo ia mai ke anaina kanaka aku o ka poʻe pio i lawe pio ʻia aku.

⁹ ¶ A laila hoʻākoakoa ʻia aʻela nā kānaka a pau o kā Iuda, a ʻo kā Beniamina i Ierusalema i nā lā ʻekolu, i ka iwa o ka malama, a i ka lā iwakālua o ka malama; a noho ihola nā kānaka a pau ma ke ala o ka hale o ke Akua, e haʻalulu ana no kēia mea, a no ka ua nui.

¹⁰ Kū aʻela ʻo ʻEzera ke kahuna, a ʻōlelo akula iā lākou, “Ua hana hewa ʻoukou, a ua lawe i nā wāhine ʻē, e hoʻomāhuahua i ka hala o kā ʻIseraʻela.

¹¹ “ʻĀnō hoʻi, e haʻi aku ʻoukou iā Iēhova ke Akua o ko ʻoukou poʻe mākua, a e hana i kona makemake; a hoʻokaʻawale ʻoukou iā ʻoukou iho mai nā kānaka o ka ʻāina aku, a mai nā wāhine ʻē aku.”

¹² A laila ʻōlelo maila ka ʻaha kanaka a pau, ʻī maila me ka leo nui, “E like me kāu ʻōlelo, pēlā mākou e hana aku ai.

¹³ “Akā, ua nui nā kānaka, a he manawa ua nui, ʻaʻole e hiki iā mākou ke kū ma waho, a ʻo ka hana, ʻaʻole ia no ka lā hoʻokahi, ʻaʻole no nā lā ʻelua; no ka mea, ua nui nā mea o mākou i hana hewa ma kēia mea.

¹⁴ “ʻĀnō hoʻi, e hoʻonoho ʻia nā luna o ka ʻaha kanaka a pau, a ʻo nā mea a pau ma ko kākou mau kūlanakauhale i lawe i nā wāhine ʻē, e hele mai lākou i ka manawa maopopo, a me lākou pū nō nā lunakahiko o kēlā kūlanakauhale kēia kūlanakauhale, a me nā luna kānāwai ona, a e hoʻohuli aʻe i ka inaina o ko kākou Akua mai o kākou aku no kēia hewa.”

¹⁵ ʻO Ionatana wale nō, ke keiki a ʻAsahela, a ʻo Iahazia ke keiki a Tikeva i noho no kēia mea, a ʻo Mesulama, a me Sabetai kā Levi, i kōkua mai iā lāua.

¹⁶ ¶ A hana akula pēlā ka poʻe pio i hoʻi mai. A ʻo ʻEzera ke kahuna, me nā kānaka koʻikoʻi o nā mākua, no ka hale o ko lākou mau mākua, ʻo lākou a pau ma ko lākou inoa i hoʻokaʻawale ʻia, a noho ihola lākou i ka lā mua o ka ʻumi o ka malama e hoʻokolokolo ai i kēia mea.

¹⁷ A hoʻopau lākou me nā kānaka a pau i lawe i nā wāhine ʻē, i ka lā ʻakahi o ka malama mua.

¹⁸ ¶ A ua loaʻa i waena o nā keiki a nā kāhuna, nā mea i lawe i nā wāhine ʻē; no nā mamo a Iesua ke keiki a Iozadaka, a me kona mau hoahānau, ʻo Maʻaseia, a ʻo ʻEliezera, ʻo Iariba, a me Gedalia.

¹⁹ A hāʻawi mai lākou i ko lākou mau lima e hoʻokuke aku i kā lākou mau wāhine; a kaumaha aku lākou i ka hipa kāne o ka poʻe hipa i mōhai hala no ko lākou lawehala ʻana.

²⁰ A no nā mamo a ʻImera: ʻo Hanani, a me Zebadia;

²¹ a no nā mamo a Harima: ʻo Maʻaseia, ʻo ʻElia, ʻo Semaia, ʻo Iehiʻela, a me ʻUzia;

²² a no nā mamo a Pasura: ʻo ʻElioenai, ʻo Maʻaseia, ʻo ʻIsemaʻela, ʻo Nataneʻela, ʻo Iozabada, a me ʻElasa.

²³ ¶ A no nā Levi: ʻo Iozabada, ʻo Simei, ʻo Kelaia, (ʻo ia ʻo Kelita), ʻo Petahia, ʻo Iuda, a me ʻEliezera.

²⁴ ¶ A no ka poʻe mele; ʻo ʻAliasiba: a no nā kiaʻi puka: ʻo Saluma, ʻo Telema, a me ʻUri.

²⁵ ¶ A no kā ʻIseraʻela hoʻi; no nā mamo a Parosa: ʻo Ramia, ʻo Iezia, ʻo Malekia, Miiamina, ʻo ʻEleazara, ʻo Malekia, a me Benaia;

²⁶ a no nā mamo a ʻElama: ʻo Matania, ʻo Zekaria, ʻo Iehiʻela, ʻo ʻAbedi, ʻo Ieremota, a me ʻElia;

²⁷ a no nā mamo a Zatu: ʻo ʻElioenai, ʻo ʻEliasiba, ʻo Matania, ʻo Ieremota, ʻo Zabada, a me ʻAziza;

²⁸ a no nā mamo a Bebai: ʻo Iehohanana, ʻo Hanania, ʻo Zabai, a me ʻAtelai;

²⁹ a no nā mamo a Bani: ʻo Mesulama, ʻo Maluka, ʻo ʻAdaia, ʻo Iasuba, ʻo Seala, a me Ramota;

³⁰ a no nā mamo a Pahata-Moaba: ʻo ʻAdena, ʻo Kelala, ʻo Benaia, ʻo Maʻaseia, ʻo Matania, ʻo Bezaleʻela, ʻo Binui, a me Manase;

³¹ a no nā mamo a Harima: ʻo ʻEliezera, ʻo ʻIsiia, ʻo Malekia, ʻo Semaia, ʻo Simeona,

³² ʻo Beniamina, ʻo Maluka, a me Semaria;

³³ a no nā mamo a Hasuma: ʻo Matenai, ʻo Matata, ʻo Zabada, ʻo ʻElipeleta, ʻo Ieremai, ʻo Manase, a me Simei;

³⁴ no nā mamo a Bani: ʻo Maʻadai, ʻo ʻAmerama, a me ʻUʻela,

³⁵ ʻo Benaia, ʻo Bedeia, ʻo Kelu,

³⁶ ʻo Vania, ʻo Meremota, ʻo ʻEliasiba,

³⁷ ʻo Matania, ʻo Matenai, a me Iaʻasau,

³⁸ a ʻo Bani, ʻo Binui, ʻo Simei,

³⁹ a ʻo Selemia, ʻo Natana, a me ʻAdaia,

⁴⁰ ʻo Makenadebai, ʻo Sasai, ʻo Seharai,

⁴¹ ʻo ʻAzareʻela, ʻo Selemia, ʻo Semaria,

⁴² ʻo Saluma, ʻo ʻAmaria, ʻo Iosepa;

⁴³ no nā mamo a Nebo: ʻo Ieiʻela, ʻo Matitia, ʻo Zabada, ʻo Zebina, ʻo Iadau, ʻo Ioʻela, ʻo Benaia.

⁴⁴ ʻO kēia mau mea a pau, ua lawe lākou i nā wāhine ʻē; a ʻo nā wāhine a kekahi poʻe o lākou ua hānau keiki na lākou.