KA BUKE A ʻEZERA 1 - Ka Baibala Hemolele

1 Hoʻolaha akula ʻo Kuro i ka ʻōlelo e ʻae aku ana i nā Iudaio e hoʻi i Ierusalema e hana i ka luakini. 5 A ʻo ka poʻe noho e kōkua lākou i ka poʻe hele. 7 Hoʻihoʻi aku ʻo Kuro i nā mea o ka luakini a Nebukaneza i lawe pio ai.

MOKUNA I.

¹ ¶ I ka makahiki ʻakahi o Kuro ke aliʻi o Peresia, i hoʻokō ʻia ai ka ʻōlelo a Iēhova ma ka waha o Ieremia, hoʻāla mai ʻo Iēhova i ka naʻau o Kuro ke aliʻi o Peresia, a kūkala aku ia ma kona aupuni a pau, a ma ka palapala hoʻi, i ka ʻī ʻana aʻe,

² “Pēnēia ka ʻōlelo a Kuro ke aliʻi o Peresia, ‘ʻO Iēhova ke Akua o ka lani, ua hāʻawi mai ia noʻu i nā aupuni a pau o ka honua; a ua kauoha mai ʻo ia iaʻu e hana i hale nona ma Ierusalema i Iuda.

³ ‘ʻO wai lā ka mea i waena o ʻoukou no kona poʻe kānaka a pau? ʻO kona Akua kekahi me ia, a e piʻi aku ia ma Ierusalema i Iuda, a e hana i ka hale ma Ierusalema no Iēhova ke Akua o kā ʻIseraʻela, ʻo ia ke Akua.

⁴ ‘A ʻo kēlā mea kēia mea e noho ana ma nā wahi a pau āna e noho lā, e kōkua mai nā kānaka o kona wahi iā ia me ke kālā, a me ke gula, a me ka waiwai, a me nā holoholona, me ka makana nō hoʻi no ka hale o ke Akua ma Ierusalema.’”

⁵ ¶ A laila kū aʻela ka poʻe koʻikoʻi o nā mākua no kā Iuda, a me kā Beniamina, a me nā kāhuna, a me nā Levi, ʻo nā mea a pau a ke Akua i hoʻāla mai ai i ko lākou mau naʻau e piʻi aʻe e hana i ka hale no Iēhova ma Ierusalema.

⁶ A kōkua mai nō ko lākou poʻe hoalauna a pau iā lākou me nā kīʻaha kālā, a me ke gula, me ka waiwai, a me nā holoholona, a me nā mea maikaʻi, a he ʻokoʻa hoʻi nā mea a pau i hāʻawi lokomaikai ʻia mai.

⁷ A lawe maila ʻo Kuro, ke aliʻi, i nā kīʻaha o ka hale o Iēhova, nā mea a Nebukaneza i lawe aʻe mai Ierusalema mai, a waiho iā lākou i loko o ka hale o kona mau akua;

⁸ ʻo ia mau mea kā Kuro ke aliʻi o Peresia i lawe mai ai i waho, ma ka lima o Miteredate, ka puʻukū kālā, a helu akula ia mau mea no Sesebazara, ka luna no kā Iuda.

⁹ A eia ka huina o ia mau mea; he kanakolu ipu gula, a hoʻokahi tausani ipu kālā, he iwakāluakumamāiwa pahi,

¹⁰ he kanakolu bola gula, ʻehā haneri a me ka ʻumi keu nā bola kālā maikaʻi iki iho, a ʻo nā kīʻaha ʻē aʻe hoʻokahi tausani.

¹¹ ʻO nā mea gula a pau, a me ke kālā, ʻelima tausani a me nā haneri ʻehā. ʻO kēia mau mea a pau kā Sesebazara i lawe aku ai i ka piʻi ʻana o ka poʻe pio mai Babulona aku a Ierusalema.