KA BUKE ʻALUA A SAMUʻELA 9 - Ka Baibala Hemolele

1 No Mepiboseta ke keiki kāne a Ionatana. Hoʻouna akula Dāvida e kiʻi iā ia, a hāʻawi akula ia i ka ʻāina o kona kupuna kāne, a kāohi ihola e noho me ia.

MOKUNA IX.

¹ ¶ ʻĪ akula Dāvida, “ʻAʻole anei e koe kekahi o ka ʻohana a Saula, i hōʻike aku ai au iā ia i aloha no Ionatana?”

² Aia kekahi kauā no ka ʻohana o Saula, ʻo Ziba kona inoa; a kiʻi akula lākou iā ia e hele i o Dāvida lā, ʻī akula ke aliʻi iā ia, “ʻO ʻoe nō ʻo Ziba?” ʻĪ maila kēlā, “ʻO wau nō ʻo kāu kauā!”

³ ʻĪ akula ke aliʻi, “ʻAʻole anei e koe kekahi o ka ʻohana a Saula, i hōʻike aku ai au i ke aloha o ke Akua iā ia?” ʻĪ maila ʻo Ziba i ke aliʻi, “Ke koe nei nō kekahi keiki kāne a Ionatana, ua ʻoʻopa nā wāwae ona.”

⁴ ʻĪ akula ke aliʻi iā ia, “ʻAuhea lā ia?” ʻĪ maila ʻo Ziba i ke aliʻi, “Aia ma loko o ka hale o Makira ke keiki a ʻAmiʻela i Lo Debara.”

⁵ A laila, hoʻouna akula ʻo Dāvida ke aliʻi, a lawe maila iā ia mai loko mai o ka hale o Makira ke keiki a ʻAmiʻela mai Lo Debara mai.

⁶ A hiki maila Mepiboseta, ke keiki a Ionatana, ke keiki a Saula, i o Dāvida lā, kūlou ihola ia i lalo kona alo, a hoʻomaikaʻi akula. ʻĪ akula ʻo Dāvida, “E Mepiboseta.” ʻĪ maila kēlā, “Eia kāu kauā!”

⁷ ʻĪ akula ʻo Dāvida iā ia, “Mai makaʻu ʻoe; no ka mea, e ʻoiaʻiʻo nō, e lokomaikaʻi aku au iā ʻoe no Ionatana kou makua kāne, a e hoʻihoʻi aku au nou i ka ʻāina a pau o kou kupuna kāne ʻo Saula; a e ʻai mau ʻoe i ka berena ma kuʻu papa ʻaina.”

⁸ Kūlou ihola ia, ʻī maila, “He aha kāu kauā, i ʻike mai ai ʻoe iaʻu he ʻīlio make?”

⁹ ¶ A laila kāhea akula ke aliʻi iā Ziba ke kauā a Saula, ʻī akula iā ia, “Ua hāʻawi aku au na ke keiki a kou haku i nā mea a pau o Saula a ʻo kāna ʻohana a pau.

¹⁰ “E mālama ʻoe i ka ʻāina nona, ʻo ʻoe me āu mau keiki a me āu mau kauā; a e lawe mai hoʻi ʻoe i ʻai na ke keiki a kou haku e ʻai ai; akā, ʻo Mepiboseta ke keiki a kou haku, e ʻai mau ia ma koʻu papa ʻaina.” Aia iā Ziba nā keiki kāne he ʻumikumamālima, a me nā kauā he iwakālua.

¹¹ A laila ʻōlelo akula ʻo Ziba i ke aliʻi, “E like me ka mea a pau a koʻu haku a ke aliʻi i kauoha mai ai i kāna kauā, pēlā nō e hana aku ai kāu kauā.” “A ʻo Mepiboseta, e ʻai ia ma koʻu papa ʻaina e like me kekahi keiki kāne a ke aliʻi.”

¹² He keiki kāne ʻōpiopio kā Mepiboseta, ʻo Mika kona inoa; a ʻo nā mea a pau i noho ma ka hale o Ziba, he mau kauā lākou na Mepiboseta.

¹³ A noho ihola ʻo Mepiboseta ma Ierusalema, a ʻai mau ihola ia ma ka papa ʻaina o ke aliʻi; a ua ʻoʻopa kēlā ma kona mau wāwae a ʻelua.