KA BUKE ʻALUA A SAMUʻELA 8 - Ka Baibala Hemolele

1 No ka lanakila ʻana o Dāvida ma luna o nā Pilisetia, me ko Moaba, a me ko Suria. 15 Ka noho pōmaikaʻi ʻana o Dāvida, a me nā inoa o nā luna a me nā kuhina.

MOKUNA VIII.

¹ ¶ Ma hope aku, pepehi akula ʻo Dāvida i nā Pilisetia, a hoʻolilo ihola iā lākou ma lalo ona; a lawe aʻela hoʻi ʻo Dāvida i ke kūlanakauhale aliʻi mai loko aʻe o ka lima o nā Pilisetia.

² Pepehi akula hoʻi ia i ko Moaba, ana ihola iā lākou i ke kaula ana, e hoʻohina ana iā lākou ma ka honua; ana ihola ʻo ia iā lākou i ʻelua kaula ana e make ai, a me kekahi kaula ana ʻokoʻa e ola ai. Pēlā i lilo ai ko Moaba i ʻāina kauā na Dāvida, a lawe maila hoʻi lākou i ka waiwai hoʻokupu.

³ ¶ Pepehi akula hoʻi ʻo Dāvida iā Hadadezera ke keiki a Rehoba, ke aliʻi o Zoba, iā ia i hele aku ai e hoʻopaʻa i kona palena ʻāina ma ka muliwai ʻo ʻEuperate.

⁴ Lawe pio akula hoʻi ʻo Dāvida mai ona aku lā i nā hoʻoholo lio hoʻokahi tausani me nā haneri ʻehiku, a me nā tausani kānaka hele wāwae he iwakālua; a ʻoki ihola ʻo Dāvida i ke olonā wāwae o nā lio no nā hale kaʻa; akā, ua hoʻokoe ia i hoʻokahi haneri o nā lio hale kaʻa.

⁵ A i ka hele ʻana mai o ko Suria no Damaseko e kōkua ma muli o Hadadezera ke aliʻi o Zoba, pepehi ihola ʻo Dāvida i nā kānaka he iwakāluakumamālua tausani o ko Suria.

⁶ A hana ihola ʻo Dāvida i nā pā kaua ma Suria o Damaseko; a lilo aʻela ko Suria i poʻe kauā na Dāvida, a lawe maila i ka waiwai hoʻokupu. A mālama maila ʻo Iēhova iā Dāvida i nā wahi a pau āna i hele ai.

⁷ Hao aʻela ʻo Dāvida i nā pale kaua gula ma luna o nā kauā a Hadadezera, a lawe maila ia mau mea i Ierusalema.

⁸ Lawe maila hoʻi ʻo Dāvida ke aliʻi i ke keleawe he nui loa, mai Beta mai, a mai Berotai mai, nā kūlanakauhale o Hadadezera.

⁹ ¶ A lohe aʻela ʻo Toi ke aliʻi o Hamata, ua pepehi aku ʻo Dāvida i ka poʻe kaua a pau no Hadadezera,

¹⁰ A laila, hoʻouna maila ʻo Toi iā Iorama kāna keiki i o Dāvida lā ke aliʻi e ʻike iā ia, a e hoʻālohaloha iā ia; no ka mea, ua kaua aku ʻo ia iā Hadadezera, a ua luku aku iā ia; no ka mea, he kanaka kaua ʻo Toi me Hadadezera; a ma kona lima nā kīʻaha kālā a me nā kīʻaha gula a me nā kīʻaha keleawe.

¹¹ Hoʻolaʻa akula nō ʻo Dāvida ia mau mea no Iēhova, me ke kālā a me ke gula āna i hoʻolaʻa aku ai ʻo nā lāhui kanaka a pau āna i hoʻokauā aku ai;

¹² ʻo ko Suria, ʻo ko Moaba, a ʻo ka poʻe mamo a ʻAmona, ʻo ko Pilisetia, a ʻo ko ʻAmeleka, a ʻo ka waiwai pio no Hadadezera ke keiki a Rehoba, ke aliʻi no Zoba.

¹³ ¶ Kaulana aʻela ka inoa ʻo Dāvida i kona wā i hoʻi mai ai, mai ka pepehi ʻana i ko Suria ma ke Awāwa Paʻakai, he ʻumikumamāwalu tausani kānaka.

¹⁴ Hana ihola hoʻi ia i nā pā kaua ma ʻEdoma; ma ʻEdoma a pau i hana iho ai ʻo ia i nā pā kaua; a lilo maila ko ʻEdoma a pau i kauā na Dāvida. A mālama maila ʻo Iēhova iā Dāvida i nā wahi a pau āna i hele aku ai.

¹⁵ ¶ Noho aliʻi ihola ʻo Dāvida ma luna o kā ʻIseraʻela a pau; a hoʻokō akula ʻo Dāvida i ke kānāwai, me ka hoʻopono aku i nā kānaka ona a pau.

¹⁶ A ʻo Ioaba ke keiki a Zeruia, ʻo ia ka luna kaua; a ʻo Iehosapata ke keiki a ʻAhiluda ke kākāʻōlelo;

¹⁷ a ʻo Zadoka ke keiki a ʻAhituba, a me ʻAhimeleka ke keiki a ʻAbiatara nā kāhuna; a ʻo Seraia ke kākau ʻōlelo;

¹⁸ a ʻo Benaia ke keiki a Iehoida, ma luna ia o ka poʻe Kereti, a me ka poʻe Peleti; a ʻo nā keiki a Dāvida, he mau keiki aliʻi lākou.