KA BUKE ʻALUA A SAMUʻELA 7 - Ka Baibala Hemolele

1 No ko Dāvida manaʻo e hana i luakini no Iēhova, 5 a pāpā mai ke Akua. 6 Ka ʻōlelo ʻana mai a ke Akua iā Dāvida, 18 a me kā Dāvida pule hoʻomaikaʻi aku.

MOKUNA VII.

¹ ¶ A i ka wā i noho ai ke aliʻi i loko o kona hale, a hoʻomaha maila ʻo Iēhova iā ia mai ʻō a ʻō, mai kona poʻe ʻenemi a pau;

² ʻī akula ke aliʻi iā Natana ke kāula, “Eia hoʻi au ke noho nei i loko o ka hale kedera; akā, e noho ana ka pahu o Iēhova ma loko o nā pākū.”

³ ʻĪ akula ʻo Natana i ke aliʻi, “E hele ʻoe e hana i ka mea a pau i loko o kou naʻau; no ka mea, me ʻoe pū nō ʻo Iēhova.”

⁴ A ia pō iho nō, hiki maila ka ʻōlelo a Iēhova i o Natana lā, ʻī maila,

⁵ “E hele ʻoe e haʻi aku i kuʻu kauā iā Dāvida, ‘Eia kā Iēhova e ʻōlelo aku nei, “E hana anei ʻoe i hale noʻu e noho ai?

⁶ “No ka mea, ʻaʻole nō au i noho i loko o ka hale maoli mai ka manawa mai aʻu i alakaʻi mai nei i nā mamo a ʻIseraʻela mai ʻAigupita mai, a hiki i kēia lā; akā, ua hele nō wau ma loko o ka hale lole, a me ka halelewa.

⁷ “I koʻu hele ʻana a pau me nā mamo a pau a ʻIseraʻela, i ʻōlelo aku anei au i kekahi ʻohana a ʻIseraʻela, i ka mea aʻu i kauoha aku ai e hānai i koʻu poʻe kānaka i kā ʻIseraʻela, i ka ʻī ʻana aku, ‘He aha ka mea e hana ʻole ai ʻoukou i hale kedera noʻu?’”’

⁸ “No laila hoʻi, e ʻōlelo aku ʻoe i kuʻu kauwā iā Dāvida, ‘Eia kā Iēhova Sābāōta e ʻōlelo mai nei, “I lawe mai nō wau iā ʻoe mai ka pā hipa mai, ma muli mai hoʻi o ka poʻe hipa, i aliʻi ʻoe ma luna o kuʻu poʻe kānaka o kā ʻIseraʻela.

⁹ “ʻO wau hoʻi kekahi pū me ʻoe i kou mau wahi i hele aku ai, a ua hōʻoki iho nō wau i ou poʻe ʻenemi a pau mai kou maka aku, a ua hoʻokaulana aku au i kou inoa, e like me ka inoa o ka poʻe nui ma ka honua.

¹⁰ “Naʻu hoʻi e hōʻike aku i wahi no koʻu poʻe kānaka no kā ʻIseraʻela, a e kanu iho nō au iā lākou i noho ai lākou ma ko lākou wahi iho, ʻaʻole e neʻe hou aku lākou; ʻaʻole hoʻi e hōʻino hou mai ka poʻe keiki na ka ʻino iā lākou, e like me ka manawa ma mua,

¹¹ a mai ka manawa mai aʻu i hoʻonoho ai i nā luna kānāwai ma luna o koʻu poʻe kānaka o kā ʻIseraʻela, a hiki i ka hoʻomaha ʻana iā ʻoe mai kou poʻe ʻenemi aʻe a pau. Eia hoʻi kā Iēhova e ʻī mai nei iā ʻoe, ‘Na Iēhova nō e hana i hale nou.’

¹² “Aia pau kou mau lā, a moe iho ʻoe me ou poʻe kūpuna, e hoʻokū aʻe au i kāu keiki ma hope ou, i ka mea e puka ana mai loko aʻe o kou ʻōpū, a e hoʻokūpaʻa hoʻi au i kona aupuni.

¹³ “Nāna nō e hana i hale no koʻu inoa, a e hoʻokūpaʻa hoʻi au i ka noho aliʻi o kona aupuni a mau loa aku.

¹⁴ “ʻO wau nō auaneʻi kona makua kāne, a e lilo hoʻi ia i keiki naʻu; a i hana ʻino kēlā, naʻu nō e paʻipaʻi aku iā ia me ka lāʻau ma ko ke kanaka, a me ka hahau ʻana ma ko nā keiki a nā kānaka.

¹⁵ “Akā, ʻaʻole au e lawe i koʻu aloha mai ona aku lā, me aʻu i lawe aku ai ia mea mai o Saula aku, ka mea aʻu i hoʻolei aku ai mai koʻu alo aku.

¹⁶ “A e hoʻokūpaʻa mau loa ʻia aku kāu ʻohana a me kou aupuni i mua ou; e hoʻokūpaʻa ʻia hoʻi kou noho aliʻi a mau loa aku.”’”

¹⁷ Ma kēia mau ʻōlelo a pau, a ma kēia hihiʻo a pau kā Natana i ʻōlelo aku ai iā Dāvida.

¹⁸ ¶ A laila komo akula ʻo Dāvida ke aliʻi i loko, a noho ihola i mua o Iēhova, a ʻōlelo akula, “ʻO wai lā hoʻi wau, e ka Haku e Iēhova? He aha hoʻi koʻu ʻohana i mālama mai ai ʻoe iaʻu a hiki i nēia wā?

¹⁹ “He mea ʻuʻuku hoʻi kēia i mua o kou maka, e Iēhova ka Haku; akā, ua ʻōlelo mai hoʻi ʻoe no ka ʻohana a kāu kauā a liʻuliʻu aku ma hope. Ua like anei kēia me ko ke kanaka, e Iēhova ka Haku?

²⁰ “He aha ka mea hou aku e hiki iā Dāvida ke ʻōlelo aku iā ʻoe? No ka mea, ua ʻike pono mai ʻoe i kāu kauā nei, e Iēhova ka Haku.

²¹ “No ka pono o kāu ʻōlelo, a e like me ko loko o kou naʻau kāu i hana mai ai i kēia mau mea nui a pau, i mea e ʻike ai kāu kauā.

²² “No laila, e Iēhova e ke Akua, he nui ʻoe; no ka mea, ʻaʻohe mea like me ʻoe, ʻaʻohe hoʻi Akua ʻē aʻe, ʻo ʻoe wale nō; e like me ka mea a pau a mākou i lohe ai ma ko mākou pepeiao.

²³ “ʻO wai lā ka lāhui kanaka ma ka honua nei e like me kou poʻe kānaka me kā ʻIseraʻela, ka poʻe a ke Akua i kiʻi aku ai e hoʻōla i poʻe kānaka nona, i mea e kaulana ai kona inoa, a e hana aku nō lākou i nā mea nui a weliweli no kou ʻāina, i mua o kou poʻe kānaka, ʻo ka poʻe āu i hoʻōla aʻe nou mai nā lāhui kanaka o ʻAigupita, a me ko lākou mau akua mai?

²⁴ “No ka mea, ua hoʻolilo ʻoe nou i kou kanaka i kā ʻIseraʻela, i poʻe kānaka nou ma hope mau loa aku; a ʻo ʻoe, e Iēhova, ua lilo mai ʻoe i Akua no lākou.

²⁵ “ʻĀnō hoʻi, e Iēhova ke Akua, e hoʻokūpaʻa mau loa ʻoe i ka ʻōlelo āu i ʻōlelo mai ai no kāu kauā a me kāna ʻohana, a e hana mai e like me kāu ʻōlelo.

²⁶ “A e hoʻonani mau loa ʻia kou inoa, i ka ʻī ʻana, ‘ʻO Iēhova Sābāōta, ʻo ia ke Akua ma luna o kā ʻIseraʻela’; a e hoʻokūpaʻa ʻia hoʻi ka ʻohana a kāu kauā a Dāvida i mua ou.

²⁷ “No ka mea, ua hōʻike mai ʻoe, e Iēhova Sābāōta, ke Akua no kā ʻIseraʻela, i loko o ka pepeiao o kāu kauā, i ka ʻī ʻana mai, ‘E hana au i hale nou’; no laila, ua manaʻo iho kāu kauā i loko o kona naʻau e pule aku i kēia pule iā ʻoe.

²⁸ “ʻĀnō hoʻi, e Iēhova ka Haku, ʻo ʻoe nō ua Akua lā, a he ʻoiaʻiʻo hoʻi kāu mau ʻōlelo; a ua ʻōlelo mau mai ʻoe i kēia lokomaikaʻi i kāu kauā nei.

²⁹ “No laila hoʻi, e leʻaleʻa mai ʻoe, a e hoʻopōmaikaʻi mai i ka ʻohana a kāu kauā, i mau loa ia i mua ou; no ka mea, ua ʻōlelo nō ʻoe, e Iēhova ka Haku; a ma kāu hoʻopōmaikaʻi ʻana e pōmaikaʻi ai ka ʻohana a kāu kauā ma hope mau loa aku.”