KA BUKE ʻALUA A SAMUʻELA 6 - Ka Baibala Hemolele

1 No ka lawe ʻana mai o ka pahu berita mai Gibea mai a Ierusalema. 14 Haʻa ihola ʻo Dāvida i mua o ua mea lā. 20 ʻŌlelo ukiuki akula ʻo Mikala iā Dāvida.

MOKUNA VI.

¹ ¶ Hōʻuluʻulu hou aʻela ʻo Dāvida i nā kānaka i wae ʻia a pau o kā ʻIseraʻela, he kanakolu tausani.

² Kū aʻela ʻo Dāvida, a hele pū akula me nā kānaka a pau me ia mai Baʻale o kā Iuda, e halihali mai laila mai i ka pahu o ke Akua, i ka mea i hea ʻia aku ai ka inoa, ka inoa ʻo Iēhova Sābāōta, ʻo ka Mea e noho ana ma waena o nā kerubima.

³ Kau akula lākou i ka pahu o ke Akua ma luna o ke kaʻa hou, a lawe maila ia mai loko aʻe o ka hale o ʻAbinadaba ma Gibea. Kaʻi akula ʻo ʻUza a me ʻAhio nā keiki kāne a ʻAbinadaba i ke kaʻa hou.

⁴ Lawe maila lākou ia mea mai loko mai o ka hale o ʻAbinadaba ma Gibea, e hele pū ana me ka pahu o ke Akua, a hele akula ʻo ʻAhio i mua o ka pahu.

⁵ Hoʻokani akula ʻo Dāvida a me ka ʻohana a ʻIseraʻela a pau i mua o Iēhova, me nā mea kani o nā lāʻau ʻo kēlā ʻano ʻo kēia ʻano; me nā lira, nā pesaleteria, nā timeberela, nā korineta, a me nā kimebala.

⁶ ¶ A hiki akula lākou i kahi hehi palaoa no Nakona, ʻō akula ʻo ʻUza i kona lima i ka pahu o ke Akua, a paʻa akula ia; no ka mea ua ʻōkupe nā bipi kauō.

⁷ Huhū maila ʻo Iēhova iā ʻUza, a hahau maila ke Akua iā ia ma laila, no kona hala; a make ihola ia ma laila ma ka pahu o ke Akua.

⁸ Ukiuki ihola ʻo Dāvida i ko Iēhova hahau ʻana aku iā ʻUza; a kapa akula ʻo Dāvida i ka inoa o ia wahi, ʻo Pereza ʻUza.

⁹ Makaʻu ihola ʻo Dāvida iā Iēhova ia lā, ʻī ihola, “Pehea lā e hiki aku ai ka pahu o ke Akua i oʻu lā?”

¹⁰ No laila, ʻaʻole i lawe ʻo Dāvida i ka pahu o Iēhova i ona lā i ke kūlanakauhale o Dāvida; akā, lawe aʻela ʻo Dāvida ia mea i loko o ka hale o ʻObeda-ʻEdoma no Gata.

¹¹ A waiho wale ʻia ka pahu o Iēhova ma ka hale o ʻObeda-ʻEdoma no Gata i nā malama ʻekolu, a hoʻopōmaikaʻi maila ʻo Iēhova iā ʻObeda-ʻEdoma a me ko ka hale ona a pau.

¹² ¶ Haʻi akula lākou iā Dāvida i ke aliʻi, ʻī maila, “Ē, ua hoʻopōmaikaʻi ʻo Iēhova i ko ka hale o ʻObeda-ʻEdoma, a me nā mea a pau iā ia, no ka pahu o ke Akua.” A hele akula ʻo Dāvida, a lawe maila i ka pahu o ke Akua, mai ka hale o ʻObeda-ʻEdoma mai, a i loko o ke kūlanakauhale o Dāvida me ka ʻoliʻoli.

¹³ Aiʻa, hele akula ka poʻe halihali i ka pahu o Iēhova i nā ana ʻeono, mōhai akula ʻo ia i nā bipi a me nā mea i kūpalu ʻia.

¹⁴ Haʻa ikaika akula hoʻi ʻo Dāvida i mua o Iēhova; a ua kāʻei ʻia ʻo Dāvida i ka ʻēpoda olonā.

¹⁵ A halihali maila ʻo Dāvida a me ka ʻohana a ʻIseraʻela a pau i ka pahu o Iēhova me ka hoʻōho ʻana, a me ka hoʻokani ʻana i ka pū.

¹⁶ A i ka hiki ʻana mai o ka pahu o ke Akua i loko o ke kūlanakauhale o Dāvida, nānā akula ʻo Mikala ke kaikamahine a Saula ma ka puka makani, a ʻike akula i ke aliʻi iā Dāvida e lele ana, a e haʻa ana i mua o Iēhova; hoʻowahāwahā akula kona naʻau iā ia.

¹⁷ Lawe maila lākou i ka pahu o Iēhova i loko, a kau ihola ia ma kona wahi, ma waenakonu o ka halelewa a Dāvida i kūkulu ai nona; a mōhai akula ʻo Dāvida i nā mōhai kuni, a me nā mōhai aloha i mua o Iēhova.

¹⁸ A pau aʻela kā Dāvida mōhai ʻana i nā mōhai kuni a me nā mōhai hoʻomalu, hoʻomaikaʻi akula ia i nā kānaka ma ka inoa ʻo Iēhova Sābāōta.

¹⁹ A hāʻawi akula ia na ka poʻe kānaka a pau, na ke anaina kanaka a pau o kā ʻIseraʻela, na nā wāhine a me nā kāne, na kēlā mea kēia mea, i ka pōpō berena a me kauwahi iʻa, a me kekahi paʻi hua waina. A hoʻi hou akula nā kānaka a pau i ko lākou mau wahi.

²⁰ ¶ Hoʻi hou akula ʻo Dāvida e hoʻoaloha i ko ka hale ona. Hele maila ʻo Mikala ke kaikamahine a Saula e hālāwai me Dāvida, ʻī maila, “Kai ka nani o ke aliʻi o kā ʻIseraʻela i kēia lā, nāna i wehe aʻe i kona kapa i kēia lā i mua o nā maka o nā kauā wahine a kona poʻe kānaka, e like me ka wehe hilahila ʻole ʻana o kekahi kanaka lapuwale!”

²¹ ʻĪ akula ʻo Dāvida iā Mikala, “I mua ia o Iēhova, nāna au i koho mai i mua o kou makua kāne, i mua hoʻi o kāna ʻohana a pau e hoʻonoho iaʻu i aliʻi ma luna o ko Iēhova poʻe kānaka, ma luna o kā ʻIseraʻela; no laila hoʻi e hula au i mua o Iēhova.

²² “A ma kēia hope, e lilo ana au i mea i hoʻowahāwahā ʻia, a i mea ʻino hoʻi i mua o koʻu maka iho; a ʻo ka poʻe kauā wahine aʻu i ʻōlelo mai ai, e hoʻomaikaʻi ʻia mai hoʻi au e lākou.”

²³ No laila, ʻaʻohe keiki a Mikala ke kaikamahine a Saula a hiki i kona lā i make ai.