KA BUKE ʻALUA A SAMUʻELA 5 - Ka Baibala Hemolele

1 No ka poni ʻia ʻo Dāvida i aliʻi ma luna o kā ʻIseraʻela a pau. 6 Ua kaua aku ia i ko Ierusalema a lilo mai ia wahi nona; a noho ihola ʻo Dāvida i laila. 13 ʻO nā wāhine a me nā keiki a Dāvida. 17 Ke kaua ʻana me ko Pilisetia.

MOKUNA V.

¹ ¶ A laila hele maila nā ʻohana a pau o kā ʻIseraʻela i o Dāvida lā i Heberona, a ʻōlelo maila lākou, “Eia hoʻi, hoʻokahi nō ko kākou iwi a me ka ʻiʻo.

² “I ka wā ma mua nō hoʻi, iā Saula i aliʻi ai ma luna o kākou, ʻo ʻoe nō ka mea nāna i alakaʻi aku a i alakaʻi mai i kā ʻIseraʻela; ʻī maila hoʻi ʻo Iēhova iā ʻoe, ‘E hānai ʻoe i koʻu poʻe kānaka i kā ʻIseraʻela, a e lilo ʻoe i luna no kā ʻIseraʻela.’”

³ Pēlā nā lunakahiko a pau o kā ʻIseraʻela i hele mai ai i ke aliʻi ma Heberona; a hoʻopaʻa ihola ke aliʻi ʻo Dāvida i berita me lākou ma Heberona i mua o Iēhova; a poni ihola lākou iā Dāvida i aliʻi no kā ʻIseraʻela.

⁴ He kanakolu nā makahiki o Dāvida, i kona wā i lilo ai i aliʻi, a noho aliʻi ihola ia i nā makahiki he kanahā.

⁵ ʻEhiku mau makahiki a me nā malama keu ʻeono i noho aliʻi iho ai ʻo ia ma Heberona ma luna o kā Iuda; a ma Ierusalema i noho aliʻi iho ai ʻo ia ma luna o kā ʻIseraʻela a pau a me kā Iuda i nā makahiki he kanakolu a me kumamākolu.

⁶ ¶ Hele akula ke aliʻi a me nā kānaka ona i Ierusalema i ka poʻe Iebusa, nā kamaʻāina o ia wahi. ʻŌlelo maila lākou iā Dāvida, i ka ʻī ʻana mai, “Inā ʻaʻole ʻoe e lawe aku i ka poʻe makapō a me ka poʻe ʻoʻopa, ʻaʻole nō ʻoe e komo mai i ʻaneʻi”; e manaʻo ana lākou, “ʻAʻole e komo ʻo Dāvida i laila.”

⁷ Akā, hoʻopio aʻela ʻo Dāvida i ka pā kaua o Ziona, ʻo ia hoʻi ke kūlanakauhale o Dāvida.

⁸ ʻĪ akula Dāvida ia lā, “ʻO nā mea pepehi i kā Iebusa, e hele lākou i ke kahawai e luku i ka poʻe ʻoʻopa a me ka poʻe makapō, i ka poʻe i inaina ʻia e ko Dāvida naʻau”; no ka mea, ua ʻōlelo nā mea makapō a me nā mea ʻoʻopa, “ʻAʻole ia e hiki ma loko o ka hale.”

⁹ Noho ihola ʻo Dāvida i loko o ka pā kaua, a kapa ihola ia wahi, ʻo ke kūlanakauhale o Dāvida; a kūkulu ihola ʻo Dāvida i nā hale ma Milo ma waho a ma loko.

¹⁰ Māhuahua aʻela ʻo Dāvida a nui loa, me ia pū nō hoʻi ʻo Iēhova ke Akua o nā kaua.

¹¹ ¶ A ʻo Hirama ke aliʻi o Turo, hoʻouna maila ia i nā ʻelele i o Dāvida lā, me nā lāʻau kedera, a me nā kamanā, a me nā kālai pōhaku; a hana ihola lākou i hale no Dāvida.

¹² ʻIke pono ihola ʻo Dāvida, ua hoʻokūpaʻa iho nō ʻo Iēhova iā ia i aliʻi ma luna o kā ʻIseraʻela, a ua hoʻokiʻekiʻe aʻe ia i kona aupuni no kona poʻe kānaka no kā ʻIseraʻela.

¹³ ¶ Lawe hou aʻela ʻo Dāvida i nā haiā wahine a me nā wāhine hoʻi nāna no Ierusalema, ma hope iho o kona hele ʻana mai mai Heberona mai; a hānau maila nā keiki kāne hou a me nā kaikamāhine hou na Dāvida.

¹⁴ Eia nā inoa o ka poʻe i hānau nāna ma Ierusalema, ʻo Samua, ʻo Sobaba, ʻo Natana, a ʻo Solomona,

¹⁵ ʻo ʻIbehana hoʻi me ʻElisua, ʻo Nepega a me Iapia,

¹⁶ ʻo ʻElisama, ʻo ʻEliada, a me ʻElipaleta.

¹⁷ ¶ A lohe aʻela ka poʻe Pilisetia, ua poni iho lākou iā Dāvida i aliʻi ma luna o kā ʻIseraʻela; piʻi nui maila nā Pilisetia a pau e ʻimi iā Dāvida; a lohe aʻela Dāvida, a iho ihola ia ma ka pā kaua.

¹⁸ Hele maila hoʻi ka poʻe Pilisetia, a hoʻomoana akula ma ke awāwa ʻo Repaima.

¹⁹ Nīnau akula ʻo Dāvida iā Iēhova, ʻī akula, “E piʻi aku anei au i ka poʻe Pilisetia? E hoʻolilo mai hoʻi ʻoe iā lākou i kuʻu lima?” ʻĪ maila ʻo Iēhova iā Dāvida, “E piʻi aku ʻoe; no ka mea, e ʻoiaʻiʻo nō e hoʻolilo au i ka poʻe Pilisetia i kou lima.”

²⁰ Hele akula ʻo Dāvida i Baʻala Perazima, a luku akula ʻo Dāvida iā lākou ma laila, ʻī ihola ia, “Ua pohā aku ʻo Iēhova ma luna o koʻu poʻe ʻenemi, e like me ka pohā ʻana o ka wai.” No laila, kapa akula ia i ka inoa o ia wahi, ʻo Baʻala Perazima.

²¹ Haʻalele lākou i nā kiʻi o lākou i laila, a lawe akula ʻo Dāvida a me nā kānaka ona ia mau mea.

²² ¶ Piʻi hou maila ka poʻe Pilisetia, a hoʻomoana ihola ma ke awāwa ʻo Repaima.

²³ A nīnau akula ʻo Dāvida iā Iēhova, ʻī maila kēlā, “ʻAʻole ʻoe e piʻi pono aku; akā, e hoʻopuni aʻe ʻoe ma hope mai o lākou, i kahi e kūpono ana i nā lāʻau silika.

²⁴ “A lohe ʻoe i ka halulu o ka hele ʻana ma nā wēlau o nā lāʻau silika, a laila ʻoe e lalelale; no ka mea, a laila e hele aku ana ʻo Iēhova i mua ou e pepehi aku i nā Pilisetia.”

²⁵ Hana akula ʻo Dāvida e like me kā Iēhova i kauoha mai ai iā ia; a luku akula ia i nā Pilisetia mai Geba aku a hiki aku ʻoe i Gazera.