KA BUKE ʻALUA A SAMUʻELA 23 - Ka Baibala Hemolele

1 Nā ʻōlelo hope a Dāvida. 8 Nā inoa a me nā hana a nā luna koa ona.

MOKUNA XXIII.

¹ ¶ Eia nā ʻōlelo hope a Dāvida. ʻĪ akula ʻo Dāvida ke keiki a Iese, Ke kanaka i hoʻokiʻekiʻe ʻia aʻe i luna, Ka mea poni a ke Akua o Iakoba, A me ka mea haku mele maikaʻi no kā ʻIseraʻela;

² “Ua ʻōlelo aku ka ʻUhane o Iēhova ma oʻu nei, A ma koʻu alelo kāna ʻōlelo.

³ “ʻĪ maila ke Akua no kā ʻIseraʻela, ʻŌlelo maila ka Pōhaku no kā ʻIseraʻela iaʻu, ‘ʻO ka mea e aliʻi ana ma luna o kānaka, e hoʻopono ʻo ia, E aliʻi ana me ka makaʻu i ke Akua.

⁴ ‘A e like ia me ka mālamalama o ke kakahiaka i ka puka ʻana o ka lā, Me ke kakahiaka i uhi ʻole ʻia e ke ao; A e like hoʻi me ka mauʻu ʻōpiopio mai loko mai o ka honua, E kupu ana ma ka mālamalama aʻiaʻi ma hope iho o ka ua.’

⁵ “Inā ʻaʻole pēlā kaʻu ʻohana i mua o ke Akua; Ua hoʻokau mai hoʻi ʻo ia i berita mau loa me aʻu, I hoʻonohonoho pono ʻia ma nā mea a pau, a i mālama ʻia; No ka mea, ʻo ia kuʻu mea e ola ai a pau, a me kuʻu makemake a pau, Ke ʻole paha ia e hoʻoulu aʻe ia?

⁶ “Akā, e pau nō ka poʻe Beliala i ke kiola ʻia aku e like me ka nahele ʻoʻoi; No ka mea, ʻaʻole e hiki ke hoʻopā ʻia aku e nā lima.

⁷ “A ʻo ke kanaka nāna lākou e hoʻopā aku, E pono iā ia ke uhi ʻia i nā mea hao, a me ke ʻau o ka ihe, A e pau lākou i ka puhi ʻia ma loko o ke ahi ma ia wahi nō.”

⁸ ¶ Eia nā inoa o nā kānaka ikaika no Dāvida: ʻo ke Takemoni kai noho ma ka noho, ka luna o nā mea ʻakolu, ʻo ia ka mea i hoaka i ka ihe i kūʻē i nā haneri kānaka ʻewalu, a pepehi akula i ka manawa hoʻokahi.

⁹ Ma hope iho ona ʻo ʻEleazara ke keiki a Dodo ke keiki a ʻAhohi, kekahi o nā kānaka ikaika ʻekolu me Dāvida, iā lākou i kūʻē i ka poʻe Pilisetia i kahi i hoʻākoakoa ʻia aʻe lākou e kaua, a ua naholo aku nā kānaka o kā ʻIseraʻela.

¹⁰ Kū aʻela ia, a pepehi akula i ko Pilisetia, a luhi ihola kona lima, a pipili ihola kona lima i ka pahi kaua; na Iēhova i hāʻawi mai i ka lanakila nui ia lā, a hoʻi hou maila nā kānaka ma hope ona a lawe waiwai pio wale nō.

¹¹ ¶ Ma hope iho ona ʻo Sama ke keiki a ʻAgeʻe no ka ʻāina mauna. Ua ʻākoakoa aʻe ko Pilisetia i poʻe kaua hoʻokahi ma kahi e paʻapū ana nā pāpapa; a naholo akula nā kānaka mai ko Pilisetia aku.

¹² Akā, kū aʻela ʻo ia ma waenakonu o ia wahi, a mālama aku ia, a pepehi ihola i ko Pilisetia; a hāʻawi maila ʻo Iēhova i ka lanakila nui.

¹³ ¶ Iho akula nā mea ʻekolu o ka poʻe luna he kanakolu, a hiki akula i o Dāvida lā i ke ana o ʻAdulama i ka wā e ʻohi ai i ka ʻai, a hoʻomoana ihola ko Pilisetia ma ke awāwa i Repaima.

¹⁴ I laila ʻo Dāvida i loko o ka wahi paʻa, a ma Betelehema ka pā kaua o ko Pilisetia ia manawa.

¹⁵ A make wai ihola ʻo Dāvida, ʻī ihola, “Nani ʻino kuʻu makemake e hāʻawi mai kekahi i wai e inu no ka luawai ma Betelehema ma ka ʻīpuka!”

¹⁶ Wāhi aʻela ua mau kānaka ikaika lā ʻekolu i ko Pilisetia, a huki aʻela i ka wai mai loko aʻe o ka lua ma Betelehema ma ka ʻīpuka, lālau ihola a lawe aʻela ia i o Dāvida lā; akā, ʻaʻole ia i manaʻo e inu, a ninini aku nō ia mea no Iēhova.

¹⁷ ʻĪ akula ia, “E Iēhova, ʻaʻole loa au e hana ia mea; ʻaʻole anei kēia ke koko o nā kānaka, ʻo ka poʻe i hele a kokoke i ka make?” No laila ʻaʻole ia i make inu ia. Pēlā i hana ai ia mau kānaka ikaika ʻekolu.

¹⁸ ¶ A ʻo ʻAbisai ke kaikaina o Ioaba, ke keiki a Zeruia, ʻo ia ka luna o kekahi poʻe ʻekolu. Hoaka aʻela ia i kāna ihe e kūʻē i nā kānaka ʻekolu haneri, a pepehi ihola iā lākou; a loaʻa iā ia ka inoa i waena o ua mau kānaka ikaika lā ʻekolu.

¹⁹ ʻAʻole anei ʻo ia ka mea koʻikoʻi loa o ka poʻe ʻekolu? No laila ʻo ia ko lākou luna; ʻaʻole hoʻi i hiki aku kona e like me ko ka poʻe mua ʻekolu.

²⁰ ¶ ʻO Benaia hoʻi ke keiki a Iehoiada, ke keiki a kekahi kanaka ikaika, no Kabezeʻela, he nui kāna hana kupanaha; pepehi ihola ia i nā kānaka liona ʻelua o kā Moaba; iho ihola hoʻi ia i loko o ka lua, a pepehi ihola i ka liona i ka manawa hau.

²¹ Pepehi ihola hoʻi ʻo ia i kekahi kanaka no ʻAigupita, he mea helehelena maikaʻi; he ihe nō ma ka lima o ke kanaka no ʻAigupita, a hele akula kēlā i ona lā me ke koʻokoʻo, a kāʻili aʻela i ka ihe mai loko aʻe o ka lima o ke kanaka ʻAigupita, a pepehi ihola iā ia me kāna ihe.

²² ʻO nā mea kēia a Benaia a ke keiki a Iehoiada i hana ai, a loaʻa iā ia ka inoa i waena o ka poʻe kānaka ikaika ʻekolu.

²³ Ua ʻoi aku kona koʻikoʻi i ko ka poʻe kanakolu, ʻaʻole hoʻi i hiki aku kona i ko ka poʻe mua ʻekolu. A hoʻonoho akula ʻo Dāvida iā ia i kuhina nona.

²⁴ ¶ ʻO ʻAsahela ke kaikaina o Ioaba kekahi o ka poʻe kanakolu; a ʻo ʻElehanana ke keiki a Dodo no Betelehema,

²⁵ ʻo Sama no Haroda, a ʻo ʻElika no Haroda,

²⁶ ʻo Heleza no Paleti, ʻo ʻIra ke keiki a ʻIkesa no Tekoa,

²⁷ ʻo ʻAbiezera no ʻAnetota, ʻo Mebunai no Husata,

²⁸ ʻo Zalemona no ʻAhota, ʻo Maharai no Netopati,

²⁹ ʻo Heleba ke keiki a Baʻana no Netopati, ʻo ʻItai ke keiki a Ribai no Gibea, no nā mamo a Beniamina,

³⁰ ʻo Benaia no Piratona, ʻo Hidai no nā awāwa o Gaʻasa,

³¹ ʻo ʻAbialebona no ʻAreba, ʻo ʻAzemaveta no Barehuma,

³² ʻo ʻEliaba no Saʻalebo, ʻo Ionatana no nā keiki kāne a Iasehena,

³³ ʻo Sama no Harara, ʻAhiama ke keiki a Sarara no Harara,

³⁴ ʻo ʻElipaleta ke keiki a ʻAhasabai, ke keiki a ka Maʻaka, ʻo ʻEliama ke keiki a ʻAhitopela no Gilo,

³⁵ ʻo Hezerai no Karemela, ʻo Paʻarai no ʻAreba,

³⁶ ʻo ʻIgala ke keiki a Natana no Zoba, ʻo Bani no Gada,

³⁷ ʻo Zeleka no kā ʻAmona, ʻo Nahari no Beʻerota, nāna i halihali i nā mea kaua no Ioaba ke keiki a Zeruia.

³⁸ ʻO ʻIra no ʻItera, ʻo Gareba no ʻItera,

³⁹ ʻo ʻUria ka Heta: he kanakolukumamāhiku lākou a pau.