KA BUKE ʻALUA A SAMUʻELA 22 - Ka Baibala Hemolele

1 Kā Dāvida mele hoʻomaikaʻi iā Iēhova.

MOKUNA XXII.

¹ ¶ ʻŌlelo akula ʻo Dāvida iā Iēhova i nā hua ʻōlelo o kēia mele, i ka lā a Iēhova i hoʻopakele aʻe iā ia mai ka lima aku o kona poʻe ʻenemi a pau, a mai ka lima aku hoʻi o Saula.

² ʻĪ akula ia: “ʻO Iēhova nō kuʻu pōhaku, kuʻu pā kaua, a me kuʻu hoʻōla;

³ “ʻO ke Akua ʻo koʻu pōhaku, e paulele aku au ma luna ona; ʻO ia koʻu pale kaua, a me ka pepeiaohao o koʻu ola, ʻO ia koʻu hale kiaʻi kiʻekiʻe, ʻo kuʻu puʻuhonua, a me kuʻu hoʻōla; Ke hoʻōla mai nei ʻoe iaʻu, i ke kolohe ʻia.

⁴ “E hea aku nō wau iā Iēhova, ka mea pono ke hoʻonani ʻia aku; Pēlā nō wau e hoʻopakele ʻia mai ai i koʻu poʻe ʻenemi.

⁵ “Hoʻopuni maila nā ʻale o ka make iaʻu, Hoʻoweliweli maila ka waikahe o ka poʻe ʻaiā iaʻu,

⁶ “Ua puni au i ko ka pō mea e paʻa ai; A hoʻohei maila iaʻu nā ʻupena o ka make.

⁷ “I koʻu pōpilikia, kāhea akula au iā Iēhova, Uē akula hoʻi au i koʻu Akua; A lohe maila kēlā i koʻu leo mai kona luakini mai, A komo akula hoʻi koʻu kāhea ʻana i loko o kona mau pepeiao.

⁸ “A laila naue ihola ka honua me ka haʻalulu; Neʻe akula nā kumu o nā lani, A nāueue aʻela hoʻi no kona inaina.

⁹ “Pūkoʻa aʻela ka uahi mai loko aʻe o kona mau puka ihu, Mai loko aku o kona waha i ʻai aku ai ke ahi; Ua kukuni ʻia nā lānahu e ia.

¹⁰ “Hoʻohaʻahaʻa ihola ʻo ia i nā lani, a iho maila Ma lalo aʻe o kona mau wāwae ka pouli.

¹¹ “Holo aʻela kēlā ma luna o kekahi keruba, a lele aʻela nō hoʻi ia; Ua ʻikea nō hoʻi ʻo ia ma luna o nā ʻēheu o ka makani.

¹² “ʻO ka pouli i puni mai iā ia, ʻo ia kāna i hoʻolilo ai i wahi noho nona, ʻO nā wai ʻākoakoa i nā ao ʻeleʻele o ka lani.

¹³ “No loko o ka ʻōlinolino i mua ona, ua kuni ʻia nā lānahu ahi.

¹⁴ “Hoʻohekili maila ʻo Iēhova mai ka lani mai, A hoʻopohā maila hoʻi ka Mea Kiʻekiʻe Loa i kona leo.

¹⁵ “Pana maila ia i nā pua, a hoʻopuehu iā lākou; I nā uila hoʻi a hoʻoʻauheʻe akula iā lākou.

¹⁶ “A laila ua ʻikea nā kaha o ke kai, Ua hōʻike ʻia mai nō hoʻi nā kumu o ka honua, I ka pāpā ʻana mai o Iēhova, I ka nou ʻana mai o ka hanu o kona mau puka ihu.

¹⁷ “Kiʻi maila ʻo ia mai luna mai, lālau maila iaʻu, Unuhi aʻela hoʻi iaʻu mai loko mai o nā wai nui;

¹⁸ “Hoʻopakele aʻe hoʻi ʻo ia iaʻu i koʻu ʻenemi ikaika, A me ka poʻe i inaina mai iaʻu; No ka mea, ua ʻoi aku ko lākou ikaika i koʻu.

¹⁹ “Hāʻule maila lākou ma luna oʻu i koʻu lā pōpilikia, Akā, ua kōkua mai ʻo Iēhova iaʻu.

²⁰ “Lawe aʻela hoʻi ʻo ia iaʻu i kahi ākea; Hoʻopakele aʻela ia iaʻu, no kona makemake mai iaʻu.

²¹ “Uku maila ʻo Iēhova iaʻu e like me koʻu pono; Ua hoʻihoʻi mai ʻo ia iaʻu e like me ka maʻemaʻe o koʻu mau lima.

²² “No ka mea, ua mālama aku au i nā ʻaoʻao o Iēhova, ʻAʻole hoʻi au i hele hewa aku mai koʻu Akua aku.

²³ “Ma mua hoʻi oʻu kāna mau ʻōlelo hoʻopono a pau; ʻAʻole hoʻi au i haʻalele aku i kāna mau kauoha.

²⁴ “Ua kūpono hoʻi au i mua ona, A ua mālama au iaʻu iho i kuʻu hewa.

²⁵ “No laila i uku mai ai ʻo Iēhova iaʻu e like me koʻu pono, E like me koʻu maʻemaʻe ʻana i mua o kona mau maka.

²⁶ “I ka mea lokomaikaʻi e hōʻike mai nō ʻoe iā ʻoe iho he lokomaikaʻi; I ke kanaka hoʻopono e hōʻike mai nō ʻoe iā ʻoe iho he pono;

²⁷ “I ka mea maʻemaʻe e hōʻike mai nō ʻoe iā ʻoe iho he maʻemaʻe; A i ka mea hoʻokekeʻe e hōʻike mai nō ʻoe iā ʻoe iho he ʻoluʻolu ʻole.

²⁸ “E hoʻōla auaneʻi ʻoe i ka poʻe i hoʻoluhi ʻia; Akā, ke nānā mai nei kou mau maka i ka poʻe hoʻokiʻekiʻe, e hoʻohaʻahaʻa iho ai.

²⁹ “No ka mea, ʻo ʻoe nō koʻu kukui, e Iēhova; A e hoʻomālamalama mai nō ʻo Iēhova i koʻu pouli.

³⁰ “Ma ou lā wau i wāhi aʻe i ka poʻe kaua; Ma koʻu Akua wau i lēhai aku ai ma luna o ka pā pōhaku.

³¹ “A ʻo ke Akua, ua hemolele kona ʻaoʻao; Ua maʻemaʻe ka ʻōlelo a Iēhova; He pale kaua ia no ka poʻe a pau e paulele ma luna ona.

³² “ʻO wai lā ke Akua ke ʻole ʻo Iēhova? ʻO wai hoʻi ka pōhaku ke ʻole ko kākou Akua?

³³ “ʻO ke Akua nō koʻu ikaika a me koʻu mana; Ke hoʻopololei nei ʻo ia i koʻu alanui.

³⁴ “Ke hoʻomāmā nei ʻo ia i koʻu mau wāwae e like me nā wāwae dia, Me ka hoʻonoho iaʻu ma koʻu mau wahi kiʻekiʻe.

³⁵ “Ke aʻo mai nei ʻo ia i kuʻu mau lima e kaua, I uhaʻi ʻia ai e koʻu lima ke kakaka keleawe.

³⁶ “Ua hāʻawi mai hoʻi ʻoe i kou pākū e ola ai; A ʻo kou ahonui kai hoʻonui mai iaʻu.

³⁷ “Ua hoʻoākea ʻoe i koʻu mau kapuaʻi ma lalo iho oʻu; ʻAʻole hoʻi i paheʻe koʻu mau wāwae.

³⁸ “Ua alualu aku au i koʻu poʻe ʻenemi, A ua luku aku au iā lākou; ʻAʻole au i hoʻi mai a pau ʻē lākou iaʻu i ka make.

³⁹ “Hoʻopau akula au iā lākou, me ka pepehi iho, ʻAʻole i hiki iā lākou ke kū aʻe; Aiʻa, ua hina lākou ma lalo iho o koʻu mau wāwae.

⁴⁰ “Ua kākoʻo mai ʻoe iaʻu i ka ikaika e kaua ai; Ua hoʻokūlou iho ʻoe ma lalo oʻu i ka poʻe i kūʻē mai iaʻu.

⁴¹ “Ua hāʻawi mai ʻoe iaʻu i nā ʻāʻī o koʻu poʻe ʻenemi, I luku aku ai au i ka poʻe inaina mai iaʻu.

⁴² “Leha aʻe lākou, ʻaʻohe hoʻi mea e ola ai; Iā Iēhova hoʻi, ʻaʻole naʻe ia i hoʻolohe mai.

⁴³ “A laila pākuʻikuʻi aku au iā lākou a okaoka me he lepo lā o ka honua; A hehi ihola au iā lākou a like me ka nenelu o ke alanui, A hoʻopēpē ihola au iā lākou.

⁴⁴ “Ua hoʻopakele mai hoʻi ʻoe iaʻu i ka paio ʻana o koʻu poʻe kānaka; Ua mālama mai ʻoe iaʻu i poʻo no nā kānaka ʻē. E hoʻokauā mai naʻu ka lāhui kanaka aʻu i ʻike ʻole ai.

⁴⁵ “E hoʻolohe mai nō auaneʻi iaʻu nā kānaka ʻē; I ka lohe o ka pepeiao, e mālama koke mai nō lākou iaʻu.

⁴⁶ “E mae aku nō nā kānaka ʻē, E makaʻu hoʻi lākou ma ko lākou wahi paʻa.

⁴⁷ “Ke ola nei ʻo Iēhova, e hoʻomaikaʻi ʻia koʻu Pōhaku! E hāpai ʻia aku hoʻi ke Akua ʻo kuʻu Pōhaku e ola ai!

⁴⁸ “ʻO ke Akua ke hoʻopaʻi aku noʻu, Me ka hoʻolilo i nā kānaka ma lalo iho oʻu,

⁴⁹ “ʻO ia ke hoʻopakele iaʻu i koʻu poʻe ʻenemi. ʻO ia hoʻi kai hoʻokiʻekiʻe aʻe iaʻu ma luna o ka poʻe i kūʻē mai iaʻu; Ua hoʻōla mai ʻoe iaʻu i ke kanaka hōʻino.

⁵⁰ “No laila au e hoʻālohaloha aku ai iā ʻoe, e Iēhova, ma waena o nā kānaka ʻē, E mele hoʻomaikaʻi aku au i kou inoa.

⁵¹ “ʻO ia ka hale kiaʻi no kāna aliʻi, Ua aloha mai ia i kāna mea poni, Iā Dāvida me kāna poʻe mamo, a mau loa aku.”