KA BUKE ʻALUA A SAMUʻELA 21 - Ka Baibala Hemolele

1 ʻEkolu nā makahiki wī no ko Saula pepehi ʻana i ka poʻe Gibeona. 8 Ua pepehi ʻia nā kānaka ʻehiku o ka ʻohana a Saula e ko Gibeona i mea e lauleʻa iā lākou. 15 No ka poʻe kānaka ikaika o Dāvida.

MOKUNA XXI.

¹ ¶ I laila nō i nā lā o Dāvida nā makahiki wī ʻekolu, i kēlā makahiki i kēia makahiki; a nīnau akula Dāvida iā Iēhova. ʻĪ maila ʻo Iēhova, “No Saula ia, a no kona ʻohana koko; no ka mea, ua pepehi ʻo ia i ko Gibeona.”

² Kiʻi akula ke aliʻi i ko Gibeona, ʻī akula iā lākou; (a ʻo ko Gibeona ʻaʻole lākou no nā mamo a ʻIseraʻela, no ke koena lākou o ka poʻe ʻAmora; a ua hoʻohiki aku nā mamo a ʻIseraʻela iā lākou; a manaʻo ihola ʻo Saula e pepehi iā lākou no kona manaʻo ikaika i nā mamo a ʻIseraʻela lāua ʻo Iuda).

³ ʻĪ akula ʻo Dāvida i ko Gibeona, “He aha kaʻu e hana aku ai no ʻoukou? Pehea hoʻi au e hoʻokalahala aku ai, i hoʻomaikaʻi mai ʻoukou i ka ʻāina a Iēhova i hāʻawi mai ai?”

⁴ ʻĪ maila ko Gibeona iā ia, “ʻAʻole mākou e makemake i ke kālā, ʻaʻole hoʻi i ke gula no Saula a no kāna ʻohana; ʻaʻole hoʻi ʻoe e pepehi i kekahi kanaka i loko o kā ʻIseraʻela no mākou.” ʻĪ akula kēlā, “ʻO ka mea a ʻoukou e ʻōlelo mai ai, ʻo ia kaʻu e hana aku ai no ʻoukou.”

⁵ ʻĪ maila lākou i ke aliʻi, “ʻO ke kanaka nāna mākou i hoʻopau aku, a i noʻonoʻo e luku mai iā mākou, i noho ʻole ai mākou ma kekahi palena ʻāina o kā ʻIseraʻela,

⁶ e hāʻawi ʻia mai nā kānaka ʻehiku o kāna mau keiki iā mākou, a e kau aku mākou iā lākou i luna no Iēhova ma Gibea no Saula ʻo ka mea a Iēhova i wae ai.” ʻĪ akula ke aliʻi, “E hāʻawi nō wau.”

⁷ ¶ Akā, kala akula ke aliʻi iā Mepiboseta ke keiki a Ionatana ke keiki a Saula, no ka hoʻohiki ʻana iā Iēhova i waena o lāua, i waena o Dāvida lāua ʻo Ionatana ke keiki a Saula.

⁸ A lawe akula ke aliʻi i nā keiki kāne ʻelua a Rizepa ke kaikamahine a ʻAia, i nā mea āna i hānau ai na Saula, ʻo ʻAremoni a ʻo Mepiboseta; a me nā keiki kāne ʻelima a Mikala ke kaikamahine a Saula, nā mea āna i hānai ai na ʻAderiʻela ke keiki a Barezilai no Meholata.

⁹ A hāʻawi akula ʻo ia iā lākou i nā lima o ko Gibeona, a kāʻawe akula lākou ia poʻe ma luna o ka puʻu i mua o Iēhova; a hina pū ihola lākou a ʻehiku, a make ihola i nā lā o ka ʻohi ʻai ʻana, i nā lā mua o ka ʻohi bale ʻana.

¹⁰ ¶ Lawe aʻela ʻo Rizepa ke kaikamahine a ʻAia i ke kapa ʻinoʻino, a hāliʻi ihola nona ma luna o ka pōhaku nui, mai ka wā mua o ka ʻohi bale ʻana a hiki i ka wā i hāʻule mai ai ka ua mai ka lani mai ma luna iho o lākou, a kiaʻi ihola ia i kau ʻole ai nā manu o ka lewa ma luna o lākou i ke ao, ʻaʻole hoʻi nā holoholona o ke kula i ka pō.

¹¹ A ua haʻi ʻia aku iā Dāvida ka mea a Rizepa ke kaikamahine a ʻAia, ka haiā wahine a Saula i hana ai.

¹² Hele akula ʻo Dāvida, a lawe maila ia i nā iwi o Saula a me nā iwi o Ionatana kāna keiki mai nā kānaka o Iabesa Gileada mai, ka poʻe nāna i lawe malū iā lāua mai ke alanui ʻo Bete Sana mai, kahi a ka poʻe Pilisetia i kau ai iā lāua, i ka wā i pepehi ai ka poʻe Pilisetia iā Saula i Gileboa.

¹³ Lawe maila ia i nā iwi o Saula a me nā iwi o Ionatana kāna keiki mai laila mai; a hōʻiliʻili aʻela lākou i nā iwi o ka poʻe i kāʻawe ʻia.

¹⁴ Kanu akula lākou i nā iwi o Saula a ʻo Ionatana kāna keiki ma Zela ma ka ʻāina o kā Beniamina, ma loko o ka hale kupapaʻu no Kisa no kona makua kāne; a hana akula lākou i nā mea a pau a ke aliʻi i kēnā aku ai. A ma hope iho ua hoʻomaliu ʻia aku ke Akua no ka ʻāina.

¹⁵ ¶ A kaua hou maila ko Pilisetia me kā ʻIseraʻela; iho akula ʻo Dāvida me kāna poʻe kauā, a kaua akula i ko Pilisetia; a paupauaho ihola ʻo Dāvida.

¹⁶ A ʻo ʻIsebi-Benoba no nā keiki a ke kanaka nunui, ʻo kona ihe, ʻekolu haneri sekela keleawe ia ma ke kaupaona ʻana, ua kāʻei ʻo ia i ka pahi kaua hou, a manaʻo ihola ʻo ia e pepehi iā Dāvida.

¹⁷ Kōkua maila ʻo ʻAbisai ke keiki a Zeruia iā ia, hahau akula ia i ke kanaka no Pilisetia, a pepehi ihola iā ia. A laila pāpā maila nā kānaka iā Dāvida, ʻī maila, “Mai hele hou aku ʻoe me mākou i ke kaua, i kinai ʻole iho ai ʻoe i ke kukui no kā ʻIseraʻela.”

¹⁸ ¶ A ma hope iho o kēia manawa, he kaua hou me ko Pilisetia ma Goba; a pepehi ihola ʻo Sibekai no Husata iā Sapa no nā keiki a ke kanaka nunui.

¹⁹ He kaua hou nō hoʻi ma Goba me ko Pilisetia, i laila i pepehi iho ai ʻo ʻElehanana ke keiki a Iaʻare-ʻOregima no Betelehema i ke kaikaina o Golia no Gata, ʻo ke ʻau o kona ihe, ua like ia me ka lāʻau o ka mea ulana lole.

²⁰ A he kaua hou ma Gata, i laila he kanaka nunui me nā manamana lima ʻeono ma kēlā lima ma kēia lima, a me nā manamana wāwae ʻeono nō ma kēlā wāwae ma kēia wāwae, he iwakāluakumamāhā i ka helu ʻana; ua hānau hoʻi ia na ke kanaka nunui.

²¹ I kona hōʻino ʻana mai i kā ʻIseraʻela, pepehi ihola ʻo Ionatana ke keiki a Simea a ke kaikuaʻana a Dāvida iā ia.

²² Ua hānau kēia poʻe ʻehā na ke kanaka nunui ma Gata, a ua hāʻule lākou ma ka lima o Dāvida, a me ka lima hoʻi o kāna poʻe kauā.