KA BUKE ʻALUA A SAMUʻELA 20 - Ka Baibala Hemolele

1 Alakaʻi akula ʻo Seba i kā ʻIseraʻela e kipi hou iā Dāvida. 5 Hele akula ʻo ʻAmasa mā e hahai i ka poʻe kipi, a ua pepehi ʻia ʻo ia e Ioaba. 13 Alakaʻi akula ʻo Ioaba i nā koa a hiki i ʻAbela. 16 No ka ʻuao ʻana o kekahi wahine naʻauao, ua ʻoki ʻia ke poʻo o Seba, a hoʻi nui akula Ioaba mā i Ierusalema.

MOKUNA XX.

¹ ¶ I laila kekahi kanaka hewa, ʻo Seba kona inoa, ke keiki a Bikeri, he mamo a Beniamina; puhi akula ia i ka pū, ʻī akula, “ʻAʻole a kākou kuleana i loko o Dāvida, ʻAʻole hoʻi he hoʻoilina i loko o ke keiki a Iese; E hoʻi nō kēlā kanaka kēia kanaka a pau i kona halelewa, e kā ʻIseraʻela!”

² A laila piʻi akula nā kānaka a pau o ʻIseraʻela mai o Dāvida aku lā, a hahai akula lākou iā Seba ke keiki a Bikeri; akā, hoʻopili akula nā kānaka o kā Iuda i ko lākou aliʻi, mai Ioredane a hiki i Ierusalema.

³ ¶ Hele maila ʻo Dāvida i kona hale i Ierusalema; a lawe aʻela ke aliʻi i ua mau haiā wahine lā he ʻumi āna i waiho ai e kiaʻi i ka hale, a hahao aʻela iā lākou i loko o ka hale paʻahao, a hānai akula iā lākou; akā, ʻaʻole ia i komo aku i loko i o lākou lā. Pēlā lākou i paʻa ai e noho kāne ʻole ana, a hiki i ko lākou lā make.

⁴ ¶ A laila ʻī akula ke aliʻi iā ʻAmasa, “E hōʻuluʻulu ʻoe noʻu i nā kānaka o kā Iuda i nā lā ʻekolu, a e hoʻi hou mai ma ʻaneʻi.”

⁵ A laila hele akula ʻo ʻAmasa e hōʻuluʻulu i kā Iuda; akā, ua lohi kēlā a hala ka manawa i hāʻawi ʻia nona.

⁶ ʻĪ akula ʻo Dāvida iā ʻAbisai, “ʻĀnō, e ʻoi aku ka ʻino a Seba ke keiki a Bikeri e hana mai ai iā kākou ma mua o ka ʻAbesaloma; e lawe ʻoe i nā kauā a kou haku, a e alualu aku iā ia, o loaʻa iā ia nā kūlanakauhale i paʻa i ka pā, a hoʻopakele iā ia iho mai o kākou aku.”

⁷ A hele akula ma muli ona nā kānaka o Ioaba, me ka poʻe Kereti a me ka poʻe Peleti, a me ka poʻe kānaka ikaika a pau; puka akula lākou i waho o Ierusalema e alualu iā Seba ke keiki a Bikeri.

⁸ Aia hiki aku lākou ma ka pōhaku nui i Gibeona, hele akula ʻo ʻAmasa i mua o lākou. A ʻo ka ʻaʻahu a Ioaba i ʻaʻahu iho ai, ua kākua ʻia ia ma luna ona, a ma luna iho ke kāʻei; ua paʻa ʻia ma kona pūhaka ka pahi kaua ma loko o kona wahi; a i kona hele ʻana aku, hāʻule ihola ia mea.

⁹ ʻĪ akula ʻo Ioaba iā ʻAmasa, “E ola ana ʻoe, e kuʻu hoahānau?” Lālau akula Ioaba iā ʻAmasa ma ka ʻumiʻumi me ka lima ʻākau e honi iā ia.

¹⁰ ʻAʻole i manaʻo ʻo ʻAmasa i ka pahi kaua ma ka lima o Ioaba; hou akula kēlā iā ia me ia mea ma ka lima o ka iwi ʻaoʻao, a pohā maila kona naʻau ma ka honua, ʻaʻole ia i hou hou aku iā ia; a make akula ia. A alualu akula ʻo Ioaba a me ʻAbisai kona hoahānau iā Seba ke keiki a Bikeri.

¹¹ Kū maila kekahi kanaka o Ioaba ma ona lā, ʻī maila, “ʻO ka mea makemake iā Ioaba, a ʻo ka mea no Dāvida, ma muli ia o Ioaba!”

¹² ʻOni aʻela ʻo ʻAmasa ma loko o ke koko, i waena o ke kuamoʻo. A ʻike aʻela ua kanaka lā, ua kū mālie ihola nā kānaka a pau, lawe akula ʻo ia iā ʻAmasa ma waho o ke kuamoʻo i ke kula, a hohola ihola i ke kapa ma luna ona, i kona ʻike ʻana ua kū mālie kēlā kanaka kēia kanaka i hele mai ma ona lā.

¹³ A lawe ʻia aku ia ma waho o ke kuamoʻo, a laila hele akula nā kānaka a pau ma hope o Ioaba, e alualu iā Seba ke keiki a Bikeri.

¹⁴ Hele akula ia ma nā ʻohana a pau o kā ʻIseraʻela, a hiki i ʻAbela a i Bete Maʻaka, a i ka poʻe Beʻerota a pau; a ua hōʻuluʻulu ʻia aʻela hoʻi lākou a hahai akula ma hope ona.

¹⁵ Hiki akula lākou, a hoʻopuni aʻela iā ia i loko o ʻAbela Bete Maʻaka, hoʻoahu akula lākou i ka puʻu e kū pono i ke kūlanakauhale, e kū ana ia ma ka pā ma waho; kuʻi akula ko Ioaba poʻe kānaka a pau i ka pā pōhaku e hoʻohiolo ia mea ma lalo.

¹⁶ A laila, hea maila kekahi wahine naʻauao mai loko mai o ke kūlanakauhale, “E hoʻolohe mai, e hoʻolohe mai; ke noi aku nei au iā ʻoukou, e ʻī aku iā Ioaba, ‘E hele mai a kokoke, i ʻōlelo aku ai au me ʻoe.’”

¹⁷ A hiki akula ia a kokoke i ona lā, ʻī maila ka wahine, “ʻO Ioaba anei ʻoe?” ʻĪ akula ia, “ʻO wau nō.” A laila ʻī maila kēlā, “E hoʻolohe mai ʻoe i ka ʻōlelo a kāu kauā wahine.” ʻĪ akula ia, “Ke lohe nei au.”

¹⁸ ʻŌlelo maila kēlā, ʻī maila, “I ʻōlelo ʻiʻo maila lākou ma mua, i ka ʻī ʻana, ‘He ʻoiaʻiʻo nō e nīnau mai ana lākou ma ʻAbela,’ a pēlā e hoʻōki ai.

¹⁹ “ʻO wau nō ke noho mālie a me ka mālama i loko o kā ʻIseraʻela; ke manaʻo nei ʻoe e luku mai i kekahi kūlanakauhale a me ka makuahine i loko o kā ʻIseraʻela. No ke aha lā ʻoe e hoʻopau ai i ka ʻāina a Iēhova i hoʻoili mai ai?”

²⁰ ʻŌlelo akula ʻo Ioaba, ʻĪ akula, “ʻAʻole loa, ʻaʻole loa iaʻu ia ke hoʻopau iho, ʻaʻole loa ke luku aku!

²¹ “ʻAʻole pēlā ka mea; akā, he wahi kanaka no ka mauna ʻo ʻEperaima, ʻo Seba ke keiki a Bikeri ka inoa, ua hoʻokiʻekiʻe aʻe ia i kona lima e kūʻē i ke aliʻi iā Dāvida; e hāʻawi mai iā ia wale nō, a e hoʻi hou aku nō wau mai ke kūlanakauhale aku.” ʻĪ maila ka wahine iā Ioaba, “Eia hoʻi, e kiola ʻia aku kona poʻo i ou lā ma waho o ka pā.”

²² A laila hele akula ua wahine lā i nā kānaka a pau ma kona akamai. A ʻoki ihola lākou i ke poʻo o Seba ke keiki a Bikeri, a kiola akula i waho i o Ioaba lā. Hoʻokani akula ia i ka pū, a hoʻi akula lākou, ʻo kēlā kanaka kēia kanaka i kona halelewa iho. A hoʻi akula ʻo Ioaba i Ierusalema a i ke aliʻi.

²³ ¶ A ʻo Ioaba, ma luna nō ia o ka poʻe kaua a pau no kā ʻIseraʻela; a ʻo Benaia ke keiki a Iehoida, ma luna nō ia o ka poʻe Kereti a me ka poʻe Peleti.

²⁴ A ʻo ʻAdorama, ma luna nō ia o ke ʻauhau; a ʻo Iehosapata ke keiki a ʻAhiluda ke kākau moʻoʻōlelo;

²⁵ a ʻo Seva ke kākau ʻōlelo; a ʻo Zadoka me ʻAbiatara nā kāhuna;

²⁶ a ʻo ʻIra hoʻi no Iaira, kekahi aliʻi ia no Dāvida.