KA BUKE ʻALUA A SAMUʻELA 2 - Ka Baibala Hemolele

1 Ua hoʻāliʻi ʻia ʻo Dāvida ma Heberona. 12 No ke kaua ʻana o Dāvida mā me ʻIseboseta ke aliʻi o kā ʻIseraʻela. 23 Ka make o ʻAsahela.

MOKUNA II.

¹ ¶ Ma hope iho o kēia mea, nīnau akula ʻo Dāvida i o Iēhova, ʻī akula, “E piʻi aku anei au i kekahi kūlanakauhale o kā Iuda?” ʻĪ maila ʻo Iēhova iā ia, “E piʻi ʻoe.” ʻĪ akula ʻo Dāvida, “Ai lā i hea kahi e piʻi aku ai au?” ʻĪ maila kēlā, “I Heberona.”

² Hele akula ʻo Dāvida i laila, a me kāna mau wāhine ʻelua, ʻo ʻAhinoama no Iezereʻela, a me ʻAbigaila, ka wahine a Nabala no Karemela.

³ Lawe pū akula ʻo Dāvida i nā kānaka ona, ka poʻe i noho pū me ia, ʻo kēlā kanaka kēia kanaka me kona ʻōhua; a noho ihola lākou ma nā kūlanakauhale o Heberona.

⁴ Hele maila nā kānaka o kā Iuda, a ma laila lākou i poni ai iā ia i aliʻi ma luna o ka ʻohana a Iuda. Haʻi akula hoʻi lākou iā Dāvida, ʻī akula, “ʻO nā kānaka o Iabesa Gileada, ka poʻe nāna i kanu iā Saula.”

⁵ Hoʻouna akula ʻo Dāvida i nā ʻelele i kānaka o Iabesa Gileada, ʻī akula iā lākou, “E aloha ʻia mai ʻoukou e Iēhova; no ka mea, ua hana aku ʻoukou i kēia lokomaikaʻi i ko ʻoukou haku iā Saula, a ua kanu iho iā ia.

⁶ “ʻĀnō hoʻi, e hana mai ʻo Iēhova i ka lokomaikaʻi a me ka ʻoiaʻiʻo iā ʻoukou; ʻo wau nō hoʻi e uku aku iā ʻoukou i kēia lokomaikaʻi, no kā ʻoukou hana ʻana i kēia mea.

⁷ “No laila hoʻi, e hoʻoikaika ʻia ko ʻoukou mau lima; i nui ke aho o ʻoukou; no ka mea, ua make ko ʻoukou haku ʻo Saula, a ua poni mai ka ʻohana a Iuda iaʻu i aliʻi ma luna o lākou.”

⁸ ¶ Akā, ʻo ʻAbenera ke keiki a Nera, ke aliʻi koa no ko Saula poʻe kaua, lālau akula ʻo ia iā ʻIse-Boseta ke keiki kāne a Saula, a lawe akula iā ia i Mahanaima.

⁹ A hoʻāliʻi akula iā ia ma luna o ka Gileada, a ma luna o kā ʻAsera, ma luna hoʻi o ko Iezereʻela, a ma luna o kā ʻEperaima, a ma luna o kā Beniamina, a ma luna hoʻi ʻo kā ʻIseraʻela a pau.

¹⁰ He kanahā nā makahiki o ʻIse-Boseta ke keiki a Saula, i kona wā i noho ai i aliʻi, a ʻelua mau makahiki ʻo ia i noho aliʻi ai. Akā, hahai akula ka ʻohana a Iuda ma muli o Dāvida.

¹¹ A ʻo ka manawa i noho aliʻi ai ʻo Dāvida ma Heberona ma luna o ka ʻohana a Iuda, ʻehiku ia mau makahiki a me nā malama keu ʻeono.

¹² ¶ Haele maila ʻo ʻAbenera ke keiki a Nera me nā kānaka o ʻIse-Boseta ke keiki a Saula, mai Mahanaima mai a Gibeona.

¹³ Hele akula hoʻi ʻo Ioaba ke keiki a Zeruia, me nā kānaka o Dāvida, a hālāwai pū aʻela lākou ma ka pūnāwai ʻo Gibeona; a noho ihola lākou, ʻo kekahi poʻe ma kēia ʻaoʻao o ka pūnāwai, a ʻo kēlā poʻe ma kēlā ʻaoʻao o ka pūnāwai.

¹⁴ ʻŌlelo maila ʻo ʻAbenera iā Ioaba, “E kū aʻe nā kanaka ʻōpiopio, a e pāʻani i mua o kākou.” ʻĪ akula ʻo Ioaba, “E kū aʻe lākou.”

¹⁵ A laila, kū aʻela a hele akula nā mea he ʻumikumamālua o kā Beniamina no ʻIse-Boseta ke keiki a Saula, a me nā kānaka o Dāvida he ʻumikumamālua.

¹⁶ Lālau akula kēlā mea kēia mea i kona hoa paio ma ke poʻo, a hou akula i kona pahi kaua ma loko o ka ʻaoʻao o kona hoa paio, a hāʻule pū ihola lākou a pau; no laila, ua kapa ʻia kēlā wahi, Helekata Hazurima; aia nō i Gibeona.

¹⁷ A he kaua nui nō ia lā; a ua luku ʻia ʻo ʻAbenera me nā kānaka o kā ʻIseraʻela i mua o nā kānaka o Dāvida.

¹⁸ ¶ I laila nā keiki kāne ʻekolu a Zeruia, ʻo Ioaba, ʻo ʻAbisai, a ʻo ʻAsahela; a he māmā nā wāwae o ʻAsahela me he dia lā o ka nāhelehele.

¹⁹ Alualu akula ʻo ʻAsahela iā ʻAbenera; a i ka hele ʻana, ʻaʻole ia i kāpae ma ka ʻākau, ʻaʻole hoʻi ma ka hema, ma hope o ʻAbenera.

²⁰ Nānā aʻela ʻo ʻAbenera ma hope ona, ʻī aʻela, “ʻO ʻAsahela anei ʻoe?” ʻĪ maila kēlā, “ʻO wau nō.”

²¹ ʻĪ akula ʻo ʻAbenera iā ia, “E hāliu aʻe ʻoe ma kou lima ʻākau paha, ma kou hema paha, e lālau aku i kekahi kanaka ʻōpiopio, a e lawe nou i kona kāhiko ʻana.” ʻAʻole naʻe i manaʻo ʻo ʻAsahela e hāliu aʻe mai ke alualu ʻana iā ia.

²² ʻŌlelo hou akula ʻo ʻAbenera iā ʻAsahela, “E hāliu aʻe ʻoe mai oʻu aku nei; no ke aha lā au e pepehi iho ai iā ʻoe a ka honua? Pehea lā hoʻi e nānā pono aku ai kuʻu maka iā Ioaba kou kaikuaʻana?”

²³ Akā, hōʻole akula ia, ʻaʻole e hāliu aʻe; no laila, hou akula ʻo ʻAbenera i ke kumu o ka ihe ma lalo iho o ka lima o kona iwi ʻaoʻao, a puka akula ka ihe ma kona kua; hina ihola ia i laila, a make ihola ma ia wahi; a ʻo nā mea a pau i hiki aku ma kahi i hina iho ai ʻo ʻAsahela a make, kū mālie ihola lākou.

²⁴ ¶ Alualu akula hoʻi ʻo Ioaba a me ʻAbisai iā ʻAbenera; a napoʻo ihola ka lā i ko lākou hiki ʻana aku i ka puʻu ʻo ʻAma i mua o Gia, ma ka ʻaoʻao o ka wao nahele ʻo Gibeona.

²⁵ Hoʻākoakoa pū aʻela nā mamo a Beniamina ma muli o ʻAbenera, a lilo aʻela i hoʻokahi poʻe, a kū ihola ma luna pono o ka puʻu.

²⁶ A laila, kāhea maila ʻo ʻAbenera iā Ioaba, ʻī maila, “E ʻai mau nō anei ka pahi kaua? ʻAʻole anei ʻoe e ʻike, he mea ʻawaʻawa nō ia ma ka hopena? Pehea lā ka lōʻihi, a kēnā aku ʻoe i nā kānaka e uhoʻi aku mai ke alualu ʻana aʻe i ko lākou poʻe hoahānau?”

²⁷ ʻĪ akula ʻo Ioaba, “Ma ko ke Akua ola ʻana, inā ʻaʻole ʻoe i ʻōlelo mai, inā ua hoʻi aku kēlā kanaka kēia kanaka i kakahiaka nei mai ke alualu ʻana aku i kona hoahānau.”

²⁸ A laila puhi akula ʻo Ioaba i ka pū, a kū mālie ihola nā kānaka a pau, ʻaʻole i alualu hou aku iā lākou, ʻaʻole hoʻi i kaua hou aku lākou.

²⁹ Haele akula ʻo ʻAbenera me nā kānaka ona ma kahi pāpū, a hele akula ma kēlā ʻaoʻao o Ioredane, a haele aʻela ma Biterona a pau, a hiki aku i Mahanaima.

³⁰ ¶ Hoʻi hou akula ʻo Ioaba mai ke alualu ʻana iā ʻAbenera; a hoʻākoakoa aʻela i nā kānaka a pau, ua nalo iho nā kānaka o Dāvida he ʻumikumamāiwa a me ʻAsahela.

³¹ Akā, ua pepehi aku nā kānaka o Dāvida i kā Beniamina a me nā kānaka o ʻAbenera, a make ihola nā kānaka ʻekolu haneri a me kanaono.

³² Lawe aʻela lākou iā ʻAsahela, a kanu ihola iā ia i loko o ka hale kupapaʻu o kona makua kāne i Betelehema. Haele akula ʻo Ioaba me nā kānaka ona ia pō a pau, a hiki akula i Heberona i ka wanaʻao.