KA BUKE ʻALUA A SAMUʻELA 19 - Ka Baibala Hemolele

1 Ka ʻōlelo hoʻokiʻekiʻe a Ioaba iā Dāvida. 9 Kiʻi maila kā Iuda a me kā ʻIseraʻela e hoʻihoʻi aku iā Dāvida. 16 Ka mihi o Simei, a me ka hālāwai ʻana mai o Mepiboseta me ke aliʻi. 41 Hakakā aʻela ʻo kā ʻIseraʻela me kā Iuda no ka hoʻihoʻi ʻana mai iā Dāvida.

MOKUNA XIX.

¹ ¶ Ua haʻi ʻia aku iā Ioaba, “Aiʻa ke uē nei ke aliʻi, a ke kanikau nei ʻo ia no ʻAbesaloma.”

² Ia lā, lilo aʻela ke ola i mea e kanikau ai ʻo nā kānaka a pau; no ka mea, ua lohe nā kānaka ia lā, “I ka haʻi ʻia mai o ka uē ʻana o ke aliʻi no kāna keiki.”

³ A hoʻi malū akula nā kānaka i loko o ke kūlanakauhale ia lā, e like me nā kānaka hilahila e holo malū aku, ke heʻe lākou i ke kaua.

⁴ Akā, ʻo ke aliʻi, pūloʻu ihola ia i kona maka, a uē akula ke aliʻi me ka leo nui, “E kuʻu keiki e ʻAbesaloma ē! E ʻAbesaloma kuʻu keiki, kuʻu keiki ē!”

⁵ Hele akula ʻo Ioaba i loko o ka hale i ke aliʻi, ʻī akula, “Ua hoʻohilahila ʻoe i kēia lā i nā maka o kāu poʻe kauā a pau, ʻo ka poʻe nāna i mālama i kou ola, a me ke ola o kāu mau keiki kāne, a me kāu mau kaikamāhine, a me ke ola o kāu mau wāhine, a me ke ola o kāu mau haiā wahine;

⁶ ma kou aloha ʻana aku i kou poʻe ʻenemi, a me ka hoʻowahāwahā ʻana i kou poʻe hoalauna; no ka mea, ua hōʻike mai ʻoe i kēia lā, he mea ʻole iā ʻoe nā aliʻi a me nā kauā; a ke ʻike nei au i kēia lā, inā paha i ola ʻo ʻAbesaloma, a make mākou a pau i kēia lā, inā ua ʻoluʻolu ʻiʻo nō ʻoe.

⁷ “ʻĀnō hoʻi, e ala aʻe ʻoe, e hele i waho, a e ʻōlelo hōʻoluʻolu aku i kāu poʻe kauā. Ke hoʻohiki aku nei au ma o Iēhova lā, a i hele ʻole aku ʻoe, ʻaʻole e noho kekahi me ʻoe i nēia pō; a e ʻino loa aku ia mea, i nā mea ʻino a pau i hiki mai i ou lā mai kou wā ʻōpiopio a hiki i ʻaneʻi.”

⁸ A laila ala aʻela ke aliʻi, a noho ihola ma ka ʻīpuka o ka pā. Haʻi akula lākou i nā kānaka a pau, “Aia hoʻi, ke noho maila ke aliʻi ma ka ʻīpuka.” A hele maila nā kānaka a pau i mua o ke aliʻi; no ka mea, ua mahuka akula kā ʻIseraʻela ʻo kēlā kanaka kēia kanaka a pau i kona halelewa iho.

⁹ Hoʻopaʻapaʻa aʻela nā kānaka a pau ma nā ʻohana a pau o kā ʻIseraʻela, ʻī aʻela, “Ua hoʻōla mai ke aliʻi iā kākou mai ka lima aʻe o ko kākou poʻe ʻenemi, a ua hoʻopakele hoʻi ʻo ia iā kākou mai ka lima aʻe o ko Pilisetia; ʻānō hoʻi, ua holo aku nō ia ma waho o ka ʻāina no ʻAbesaloma.

¹⁰ “A ʻo ʻAbesaloma ka mea a kākou i poni ai i aliʻi ma luna o kākou, ua make ia i loko o ke kaua; he aha hoʻi ka mea e ʻōlelo ʻole aku ai ʻoukou i kekahi hua ʻōlelo no ka hoʻihoʻi ʻana mai i ke aliʻi?”

¹¹ ¶ Hoʻouna akula ʻo Dāvida ke aliʻi i o Zadoka lā a me ʻAbiatara nā kāhuna, ʻī akula, “E ʻōlelo aku ʻolua i nā lunakahiko o kā Iuda, e ʻī aku, ‘No ke aha lā e lohi loa nei ʻoukou i ka hoʻihoʻi ʻana mai i ke aliʻi i kona hale? No ka mea, ua hiki mai ka ʻōlelo a kā ʻIseraʻela a pau i ke aliʻi, a i kona ʻohana.

¹² ‘ʻOukou nō nā hoahānau oʻu, ʻoukou nō koʻu mau iwi a me koʻu ʻiʻo; no ke aha hoʻi e lohi loa nei ʻoukou i ka hoʻihoʻi aku i ke aliʻi?’

¹³ “E ʻī aku hoʻi ʻolua iā ʻAmasa, ‘ʻAʻole anei ʻoe no kuʻu iwi a me kuʻu ʻiʻo? Pēlā ke Akua e hana mai ai iaʻu, a nui aku, i ʻole ʻoe ka luna kaua mau i mua oʻu ma ko Ioaba wahi.’”

¹⁴ Hoʻohuli maila kēlā i ka naʻau o nā kānaka a pau o kā Iuda, e like me ko ke kanaka hoʻokahi; no laila, ʻōlelo akula lākou i ke aliʻi, “E hoʻi hou mai ʻoe a me āu mau kauā a pau!”

¹⁵ A laila hoʻi maila ke aliʻi, a hiki mai i Ioredane. A hele maila kā Iuda i Gilegala e hālāwai me ke aliʻi, a e alakaʻi i ke aliʻi ma kēia ʻaoʻao o Ioredane.

¹⁶ ¶ A ʻo Simei ke keiki a Gera, he mamo na Beniamina no Bahurima, wikiwiki aʻela ia a iho pū akula me nā kānaka o kā Iuda e hālāwai me ke aliʻi me Dāvida.

¹⁷ Me ia pū nā kānaka o kā Beniamina he tausani, a ʻo Ziba ke kauā na ka ʻohana a Saula, a me ia hoʻi nā keiki kāne āna he ʻumikumamālima, a me nā kauā āna he iwakālua; hele maila lākou ma kēia ʻaoʻao o Ioredane i mua o ke aliʻi.

¹⁸ A holo aʻela ka waʻapā e ʻalo mai i ko ka hale o ke aliʻi, a e lawelawe hoʻi i ka mea a ke aliʻi i manaʻo ai he pono. Moe ihola ʻo Simei ke keiki a Gera i mua o ke aliʻi i kona pae ʻana i kēia ʻaoʻao o Ioredane.

¹⁹ ʻĪ maila ia i ke aliʻi, “Mai manaʻo hewa mai kuʻu haku iaʻu, ʻaʻole hoʻi e hoʻomauhala i ka mea a kāu kauā i hana kolohe aku ai i ka lā a kuʻu haku a ke aliʻi i puka mai ai i waho o Ierusalema, i waiho ai ke aliʻi ia mea ma loko o kona naʻau.

²⁰ “No ka mea, ke ʻike nei kāu kauā; ua hana hewa nō wau; no laila, eia au i hele mai nei, ka mea mua o ka ʻohana a Iosepa, i iho mai e hālāwai me kuʻu haku me ke aliʻi.”

²¹ ʻŌlelo maila ʻo ʻAbisai ke keiki a Zeruia, ʻī maila, “ʻAʻole anei e make ʻo Simei ia mea; no ka mea, ua hōʻino mai ia i kā Iēhova mea i poni ʻia?”

²² ʻĪ akula ʻo Dāvida, “He aha kaʻu iā ʻolua, e nā keiki a Zeruia, i kūʻē mai ai ʻolua iaʻu i kēia lā? E make anei kekahi kanaka i kēia lā i loko o kā ʻIseraʻela? ʻAʻole anei au i ʻike, ʻo wau nō ke aliʻi i kēia lā ma luna o kā ʻIseraʻela?”

²³ ʻĪ akula ke aliʻi iā Simei, “ʻAʻole ʻoe e make”; a hoʻohiki akula ke aliʻi iā ia.

²⁴ ¶ Iho akula hoʻi ʻo Mepiboseta ka moʻopuna a Saula e hālāwai me ke aliʻi; ʻaʻole ia i hoʻoponopono i kona mau wāwae, ʻaʻole i hoʻomaikaʻi i kona ʻumiʻumi, ʻaʻole nō hoʻi i holoi i kona kapa, mai ka lā i hele aku ai ke aliʻi, a hiki i ka lā i hoʻi hou mai ai ia me ka malu.

²⁵ A hiki maila ia i Ierusalema e hālāwai me ke aliʻi, ʻī akula ke aliʻi iā ia, “E Mepiboseta, he aha kāu i hele pū ʻole ai me aʻu?”

²⁶ ʻĪ maila kēlā, “E kuʻu haku, e ke aliʻi, ua hoʻopunipuni mai kuʻu kauā iaʻu; no ka mea, ʻī akula kāu kauā, ‘E hoʻēʻe aku nō au i ka noho ma luna o ka hoki noʻu, i holo ai au ma luna, a hele aku i ke aliʻi’; no ka mea, he ʻoʻopa kāu kauā.

²⁷ “A ua ʻalapahi kēlā i kāu kauā i mua o kuʻu haku o ke aliʻi; a ua like kuʻu haku ke aliʻi me ka ʻānela o ke Akua; no laila, e hana aku ʻoe i ka mea pono ma kou maka.

²⁸ “No ka mea, ua like me nā kānaka make ka poʻe ʻohana a pau o kuʻu kupuna kāne i mua o kuʻu haku o ke aliʻi; akā, ua hoʻonoho ʻoe i kāu kauā i waena o ka poʻe nāna i ʻai ma kou papa ʻaina iho; he aha hoʻi kuʻu pono e kāhea hou aku ai i ke aliʻi?”

²⁹ ʻĪ akula ke aliʻi iā ia, “No ke aha ʻoe e ʻōlelo hou mai nei no kāu mau mea? Ua ʻōlelo aku nō wau, ‘E hoʻolike a like ʻolua me Ziba i ka ʻāina.’”

³⁰ ʻĪ maila ʻo Mepiboseta i ke aliʻi, “ʻAe, e lawe kēlā nona i nā mea a pau; no ka mea, ua hoʻi hou mai nei kuʻu haku ke aliʻi i kona hale me ka malu.”

³¹ ¶ Iho maila hoʻi ʻo Barezilai no Gileada mai Rogelima mai, a hele pū mai me ke aliʻi ma kēia kapa o Ioredane, e alakaʻi iā ia ma nēia ʻaoʻao o Ioredane.

³² He kanaka ʻelemakule ʻo Barezilai; he kanawalu kona mau makahiki; a hānai akula ia i ke aliʻi i kona wā i noho ai ma Mahanaima; no ka mea, he kanaka koʻikoʻi nui loa ia.

³³ ʻĪ akula ke aliʻi iā Barezilai, “E hele pū ʻoe me aʻu, a e hānai aku nō au iā ʻoe ma Ierusalema.”

³⁴ ʻĪ maila ʻo Barezilai i ke aliʻi, “ʻEhia mau lā o kuʻu ola e koe, i piʻi aku ai au me ke aliʻi i Ierusalema?

³⁵ “He kanawalu nā makahiki oʻu i kēia lā; e hiki anei iaʻu ke ʻike ma waena o ka pono a me ka hewa? Ua ʻono anei i kāu kauā kaʻu mea e ʻai ai, a me kaʻu mea e inu ai? E lohe hou anei au i ka leo o nā kāne mea mele a me nā wāhine mea mele? No ke aha hoʻi e hoʻokaumaha aku ai kāu kauā i kuʻu haku i ke aliʻi?

³⁶ “E hele ana kāu kauā ma ʻō iki aku o Ioredane me ke aliʻi; no ke aha hoʻi e hoʻouku mai ai ke aliʻi iaʻu ia uku nui?

³⁷ “Ke noi aku nei au iā ʻoe, e ʻae mai ʻoe i kāu kauā e hoʻi hou aku ia, i make au ma loko o kuʻu kūlanakauhale, ma ka hale kupapaʻu o kuʻu makua kāne a me kuʻu makuahine. Akā, eia hoʻi kāu kauā ʻo Kimehama; e aho e hele pū ia me kuʻu haku me ke aliʻi; e hana aku ʻoe iā ia e like me ka mea pono iā ʻoe.”

³⁸ ʻĪ akula ke aliʻi, “E hele pū ʻo Kimehama me aʻu, a e hana aku au iā ia ma ka mea pono iā ʻoe; a ʻo ka mea āu e makemake mai ai iaʻu, ʻo ia kaʻu e hana aku ai nou.”

³⁹ Hele maila nā kānaka a pau ma nēia ʻaoʻao o Ioredane. A pae mai ke aliʻi, a laila honi aʻela ke aliʻi iā Barezilai, a hoʻomaikaʻi akula iā ia, a hoʻi hou akula ia i kona wahi,

⁴⁰ ¶ A laila hele akula ke aliʻi i Gilegala, a hele pū akula ʻo Kimehama me ia; a alakaʻi akula nā kānaka a pau o kā Iuda i ke aliʻi, a pēlā hoʻi kekahi hapa o nā kānaka o kā ʻIseraʻela.

⁴¹ Aia hoʻi, hele maila nā kānaka a pau o kā ʻIseraʻela i ke aliʻi, ʻī akula i ke aliʻi, “No ke aha lā i ʻaihue aku ai ko mākou mau hoahānau nā kānaka o kā Iuda iā ʻoe, a ua kaʻi mai i ke aliʻi a me ko ka hale ona, a me nā kānaka o Dāvida a pau me ia ma kēia kapa o Ioredane?”

⁴² ʻŌlelo akula nā kānaka a pau o kā Iuda i nā kānaka o kā ʻIseraʻela, “No ka mea, ua hoʻokahi kona hanauna me ko mākou; he aha kā ʻoukou e huhū mai nei ia mea? Ua ʻai iki anei mākou i kā ke aliʻi? A ua hāʻawi mai anei ia i ka manawaleʻa iā mākou?”

⁴³ ʻŌlelo akula nā kānaka o kā ʻIseraʻela i nā kānaka o kā Iuda, ʻī aʻela, “He ʻumi mau hakina o ke aliʻi kā mākou, a he nui aku ko mākou iā Dāvida i kā ʻoukou; no ke aha hoʻi ʻoukou i hoʻowahāwahā ai iā mākou, i lilo ʻole kā mākou ʻōlelo no ka hoʻihoʻi ʻana mai i ke aliʻi i ka mea mua?” A ʻo ka ʻōlelo ʻana a nā kānaka o kā Iuda, he ikaika aku ia i ka ʻōlelo ʻana a nā kānaka o kā ʻIseraʻela.