KA BUKE ʻALUA A SAMUʻELA 17 - Ka Baibala Hemolele

1 Ua hoʻoholo ʻia ka ʻōlelo aʻo a Husai i kūʻē i ka ʻAhitopela. 15 Hoʻouka akula ʻo Husai i ka ʻōlelo iā Dāvida, a hele akula Dāvida ma ʻō o Ioredane. 23 Kāʻawe ihola ʻo ʻAhitopela iā ia iho. 25 ʻO ʻAmasa ka luna koa no ʻAbesaloma.

MOKUNA XVII.

¹ ¶ ʻŌlelo akula ʻo ʻAhitopela iā ʻAbesaloma, “He pono naʻu e wae aku ʻānō i nā kānaka he ʻumikumamālua tausani, a e kū aʻe au a e hahai aku ma hope o Dāvida i nēia pō.

² “A e loaʻa aku iaʻu ia ʻoi nāwaliwali ia a me ke kanaka ʻole, a e hoʻoweliweli aku au iā ia; a e holo aku nā kānaka a pau me ia; a ʻo ke aliʻi wale nō kaʻu e pepehi aku ai.

³ “A e hoʻihoʻi mai nei au i nā kānaka a pau i ou nei; ʻo ke kanaka āu e ʻimi nei, ua like ia me ka hoʻi hou ʻana mai o lākou a pau; pēlā e malu ai nā kānaka a pau.”

⁴ He pono kēia ʻōlelo i ka manaʻo o ʻAbesaloma a me nā lunakahiko a pau o kā ʻIseraʻela.

⁵ ¶ A laila, ʻī maila ʻo ʻAbesaloma, “E kāhea aku hoʻi iā Husai no ʻAreki; e lohe hoʻi kākou i kāna ʻōlelo.”

⁶ A hiki mai ʻo Husai i o ʻAbesaloma lā, ʻōlelo maila ʻo ʻAbesaloma iā ia, ʻī maila, “Pēlā kā ʻAhitopela i ʻōlelo mai ai; e hana anei kākou e like me kāna ʻōlelo? A i ʻole, e ʻōlelo mai hoʻi ʻoe.”

⁷ ʻĪ akula ʻo Husai iā ʻAbesaloma, “ʻO ka ʻōlelo aʻo a ʻAhitopela āna i ʻōlelo mai ai, ʻaʻohe pono ia i nēia manawa.

⁸ “No ka mea,” wahi a Husai, “ua ʻike ʻoe i kou makua kāne a me nā kānaka ona, he poʻe kānaka ikaika lākou, a ua ukiuki ko lākou naʻau me he bea lā i kāʻili ʻia aku kāna ʻohana keiki ma ke kula; he kanaka kaua nō hoʻi kou makua kāne, ʻaʻole ia e moe me nā kānaka.

⁹ “Aia nō ia ua peʻe ma kekahi lua, i kekahi wahi paha; a i ka hāʻule mua ʻana o kekahi mau mea o lākou, e ʻōlelo auaneʻi ka poʻe lohe, ‘He luku ʻia i waena o ka poʻe hahai iā ʻAbesaloma.’

¹⁰ “A ʻo ke koa, ka mea naʻau e like me ka naʻau o ka liona, e heheʻe loa ia; no ka mea, ua ʻike kā ʻIseraʻela a pau, he kanaka koa kou makua kāne, a he poʻe kānaka ikaika hoʻi ka poʻe me ia.

¹¹ “No laila, eia kuʻu manaʻo ke haʻi aku nei, ‘I hoʻākoakoa ʻia mai kā ʻIseraʻela a pau i ou nei, mai Dana a hiki i Beʻeraseba, e like me ke one o ke kai ka nui loa; a e hele ʻoe iho nō i ke kaua.’

¹² “Pēlā kākou e hiki aku ai i ona lā i kahi e loaʻa aku ai iā ia, a e kau aku kākou ma luna ona, e like me ka hau e kau mai ma luna o ka honua; a ʻo ia, a ʻo ka poʻe a pau me ia, ʻaʻole loa e koe kekahi o lākou.

¹³ “A inā paha ua komo aku ia i loko o kekahi kūlanakauhale, a laila e lawe aku kā ʻIseraʻela a pau i nā kāula i ua kūlanakauhale lā, a e kauō aku kākou ia wahi ma loko o ka muliwai, a koe ʻole ma ia wahi kekahi pōhaku liʻiliʻi.”

¹⁴ ʻĪ akula ʻo ʻAbesaloma a me nā kānaka a pau o kā ʻIseraʻela, “Ua ʻoi aku ka pono o ka ʻōlelo aʻo a Husai no ʻAreki, ma mua o ka ʻōlelo aʻo a ʻAhitopela.” No ka mea, ua manaʻo mai ʻo Iēhova e hoʻolilo i ka ʻōlelo aʻo akamai a ʻAhitopela i mea ʻole, i mea e hoʻoili mai ai ʻo Iēhova i ka ʻino ma luna o ʻAbesaloma.

¹⁵ ¶ A laila, ʻōlelo akula ʻo Husai iā Zadoka lāua ʻo ʻAbiatara nā kāhuna, “Pēlā a penei i ʻōlelo aʻo aku ai ʻo ʻAhitopela iā ʻAbesaloma a me nā lunakahiko o kā ʻIseraʻela; pēlā a penei hoʻi au i ʻōlelo aʻo aku ai.

¹⁶ “No laila, e hoʻouna koke aku ʻolua e haʻi iā Dāvida, i ka ʻī ʻana aku, ‘Mai moe ʻoe i nēia pō ma nā pāpū o ka wao nahele, e hele koke ʻoe ma kēlā ʻaoʻao, o pau loa ke aliʻi a me nā kānaka me ia i ke ale ʻia.’”

¹⁷ A ua noho ʻo Ionatana lāua ʻo ʻAhimaʻaza ma ʻEne Rogela; no ka mea, ʻaʻole pono e ʻike ʻia lāua ke komo i loko o ke kūlanakauhale, a hele akula kekahi kauā wahine, a haʻi akula iā lāua; hele akula hoʻi lāua, a haʻi akula i ke aliʻi iā Dāvida.

¹⁸ Akā, ua ʻike nō kekahi keiki iā lāua, a haʻi akula iā ʻAbesaloma; akā, hele koke akula lāua a hiki akula i ka hale o kekahi kanaka i Bahurima, a he luawai ma loko o ka pā hale ona, i laila lāua i iho ai.

¹⁹ Lālau akula ka wahine i ka mea uhi, hohola ihola ma luna o ka waha o ka luawai, a hāliʻi ihola i ka palaoa ma luna iho; a ua ʻike ʻole ʻia ua mea lā.

²⁰ A hiki mai nā kauā a ʻAbesaloma i ua wahine lā ma ka hale, nīnau maila lākou, “ʻAuhea ʻo ʻAhimaʻaza lāua ʻo Ionatana?” ʻĪ akula ka wahine iā lākou, “Ua hala akula lāua ma kēlā ʻaoʻao o ke kahawai.” ʻImi akula lākou, ʻaʻole hoʻi i loaʻa, a laila hoʻi hou maila lākou i Ierusalema.

²¹ ¶ A hala akula lākou, piʻi maila lāua mai loko mai o ka luawai, hele akula, a haʻi akula i ke aliʻi iā Dāvida. ʻĪ akula iā Dāvida, “E kū aʻe, e holo koke ma kēlā ʻaoʻao o ka wai; no ka mea, penei kā ʻAhitopela i ʻōlelo kūʻē ai iā ʻoukou.”

²² A laila kū aʻela ʻo Dāvida a me nā kānaka a pau me ia, a hele akula ma kēlā ʻaoʻao o Ioredane; a i ka wanaʻao, ʻaʻole i koe kekahi o lākou i ka hele ʻole ma kēlā ʻaoʻao o Ioredane.

²³ A ʻike akula ʻo ʻAhitopela, ʻaʻole i hana ʻia e like me kāna ʻōlelo aʻo, hoʻēʻe akula ia i ka noho ma luna o kona hoki, kū aʻela ia, hoʻi hou akula ia i kona wahi, i kona hale iho, i kona kūlanakauhale, a kauoha akula no ko ka hale ona, a kāʻawe ihola iā ia iho, a make; a ua kanu ʻia ʻo ia ma ka hale kupapaʻu o kona makua kāne.

²⁴ ¶ A laila hele akula ʻo Dāvida i Mahanaima; a hele akula hoʻi ʻo ʻAbesaloma ma kēlā ʻaoʻao o Ioredane, ʻo ia a me nā kānaka a pau o kā ʻIseraʻela me ia.

²⁵ Hoʻonoho akula ʻo ʻAbesaloma iā ʻAmasa ma ko Ioaba wahi ma luna o ka poʻe kaua; a ʻo ua ʻAmasa lā, he keiki ia na kekahi kanaka no kā ʻIseraʻela, ʻo ʻItera ka inoa, ka mea i komo aku i loko i o ʻAbigala lā ke kaikamahine a Nahasa, a ʻo ke kaikaina o Zeruia ʻo ka makuahine o Ioaba.

²⁶ Hoʻomoana ihola kā ʻIseraʻela me ʻAbesaloma ma ka ʻāina ʻo Gileada.

²⁷ ¶ A hiki akula ʻo Dāvida i Mahanaima, i laila ʻo Sobi ke keiki a Nahasa no Raba o nā mamo a ʻAmona, a ʻo Makira ke keiki a ʻAmiʻela no Lo Debara, a ʻo Barezilai no Rogelima ma Gileada,

²⁸ lawe maila lākou i nā moe a me nā kīʻaha a me nā ipu lepo a me nā huapalaoa a me ka bale a me ka palaoa, a me ka palaoa pāpaʻa, a me ka pāpapa maka, a me ka pī, a me ka pāpapa pāpaʻa;

²⁹ a me ka meli, a me ka bata, a me nā hipa, a me ka waiū bipi paʻa, na Dāvida a na ka poʻe kānaka me ia e ʻai ai; no ka mea, ʻōlelo aʻela lākou, “Ua pōloli nā kānaka, ua luhi a me ka make wai ma ka wao nahele.”