KA BUKE ʻALUA A SAMUʻELA 16 - Ka Baibala Hemolele

1 Ka hoʻopunipuni o Ziba. 5 Ka hōʻino ʻana o Simei iā Dāvida. 21 Nā ʻōlelo aʻo a ʻAhitopela iā ʻAbesaloma me nā haiā wahine a Dāvida.

MOKUNA XVI.

¹ ¶ A hala iki akula ʻo Dāvida mai kahi kiʻekiʻe o ka puʻu aku, aia hoʻi, hālāwai maila me ia ʻo Ziba ke kauā a Mepiboseta, me nā hoki ʻelua i hoʻēʻe ʻia e nā noho, a ma luna iho o lāua ʻelua haneri paʻi berena, me nā hui waina maloʻo he haneri, me nā ʻope hua fiku maloʻo he haneri, a me kekahi hue waina.

² Nīnau akula ke aliʻi iā Ziba, “I mea aha kēia mau mea iā ʻoe?” ʻĪ maila ʻo Ziba, “ʻO nā hoki, no nā ʻōhua o ke aliʻi ia e holo ia; a ʻo ka berena a me ka hua maloʻo, na nā kānaka ʻōpiopio ia e ʻai ai; a ʻo ka waina, no ka poʻe nāwaliwali ia e inu ai ma ka wao nahele.”

³ Nīnau akula ke aliʻi, “ʻAuhea lā ke keiki a kou haku?” ʻĪ akula ʻo Ziba i ke aliʻi, “Aia nō e noho lā ma Ierusalema; no ka mea, ʻī akula ia, ‘I kēia lā e hoʻihoʻi mai ana ka ʻohana a ʻIseraʻela i ke aupuni o koʻu kupuna kāne noʻu.’”

⁴ A laila, ʻī maila ke aliʻi iā Ziba, “Aia hoʻi, nou nō nā mea a pau i pili no Mepiboseta.” ʻĪ akula ʻo Ziba, “Ke noi haʻahaʻa aku nei au iā ʻoe, i loaʻa iaʻu ke aloha i mua o kou maka, e kuʻu haku, e ke aliʻi ē!”

⁵ ¶ A hiki akula ʻo Dāvida ke aliʻi i Bahurima, Aia hoʻi, puka maila i waho kekahi kanaka no ka ʻohana a Saula, ʻo Simei kona inoa, ʻo ke keiki a Gera; hele maila ia i waho, a kūamuamu maila i kona hele ʻana mai.

⁶ Nou akula ia i nā pōhaku iā Dāvida, a i nā kauā a ke aliʻi a Dāvida; ma kona ʻākau a ma kona hema ka poʻe kānaka a pau, a me ka poʻe koa a pau.

⁷ Penei kā Simei i ʻōlelo ai i kāna kūamuamu ʻana, “E puka ʻoe i waho, e puka ʻoe i waho, e ke kanaka koko, ke kanaka Beliala!

⁸ “Ua hoʻopaʻi mai ʻo Iēhova ma luna iho ou i ke koko a pau o ka ʻohana a Saula, nona kou wahi i noho aliʻi ai; a ua hāʻawi aku ʻo Iēhova i ke aupuni i loko o ka lima o ʻAbesaloma ʻo kāu keiki; aia hoʻi ʻoe ma loko o kou kolohe; no ka mea, he kanaka koko ʻoe!”

⁹ ¶ A laila, ʻī akula ʻo ʻAbisai ke keiki a Zeruia i ke aliʻi, “No ke aha lā e kūamuamu mai ai kēia ʻīlio make i kuʻu haku i ke aliʻi? E hele aku paha wau i ʻō, a e ʻoki aʻe i kona poʻo!”

¹⁰ ʻĪ maila ke aliʻi, “He aha kaʻu iā ʻolua, e nā keiki a Zeruia? E kūamuamu mai nō ʻo ia pēlā; no ka mea, ua ʻōlelo mai nō ʻo Iēhova iā ia, ‘E kūamuamu iā Dāvida.’ ʻO wai hoʻi ke ʻōlelo aku, ‘No ke aha lā ʻoe i hana ai pēlā?’”

¹¹ ʻĪ akula ʻo Dāvida iā ʻAbisai a me kāna poʻe kauā a pau, “Aia hoʻi kaʻu keiki, ka mea i puka aʻe mai loko aku oʻu, ua ʻimi mai kēlā i kuʻu ola; e ʻoiaʻiʻo nō hoʻi kēia mamo a Beniamina. E waiho pēlā, e aho ʻo ia ke kūamuamu mai; no ka mea, ua ʻōlelo mai ʻo Iēhova iā ia.

¹² “Malia paha e nānā mai ʻo Iēhova i kuʻu ʻehaʻeha, a e hoʻomaikaʻi paha ʻo Iēhova iaʻu no kāna kūamuamu ʻana mai i kēia lā.”

¹³ A i ka hele ʻana o Dāvida a me nā kānaka ona ma ke ala, hele akula hoʻi ʻo Simei ma ka ʻaoʻao o ka puʻu e kū pono ana iā ia; a i kona hele ʻana, kūamuamu maila ia, nou maila i nā pōhaku iā ia, a hoʻolei maila hoʻi i ka lepo.

¹⁴ Māluhiluhi ihola ke aliʻi a me ka poʻe kānaka a pau me ia, a hoʻomaha ihola i laila.

¹⁵ ¶ Hele maila ʻo ʻAbesaloma a me nā kānaka a pau o kā ʻIseraʻela i Ierusalema, a ʻo ʻAhitopela kekahi me ia.

¹⁶ A hiki akula hoʻi ʻo Husai no ʻAreki, ka hoalauna o Dāvida i o ʻAbesaloma lā, ʻī akula ʻo Husai iā ʻAbesaloma, “E ola ke aliʻi, e ola ke aliʻi!”

¹⁷ ʻĪ maila ʻo ʻAbesaloma iā Husai, “ʻO ia anei kou aloha i kou hoalauna? He aha hoʻi kāu i hele ʻole aku ai me kou hoalauna?”

¹⁸ ʻĪ akula ʻo Husai iā ʻAbesaloma, “ʻAʻole, ʻo ka mea a Iēhova, a ʻo kēia poʻe kānaka, a ʻo nā kānaka o kā ʻIseraʻela a pau e koho ai, nona nō wau, a e noho pū au me ia.

¹⁹ “Na wai lā hoʻi au e hoʻokauā aku ai, ke ʻole ma ke alo o kāna keiki? Me aʻu i hoʻokauā aku ai ma ke alo o kou makua kāne, pēlā hoʻi au e hoʻokauā aku ai ma kou alo.”

²⁰ ¶ A laila, ʻī maila ʻo ʻAbesaloma iā ʻAhitopela, “E kūkākūkā ʻoukou i ka mea a kākou e hana aku ai.”

²¹ ʻĪ akula ʻo ʻAhitopela iā ʻAbesaloma, “E komo aku ʻoe i loko i nā haiā wahine a kou makua kāne, āna i waiho ai e kiaʻi i ka hale; a e lohe kā ʻIseraʻela a pau e hoʻowahāwahā ʻia ʻoe e kou makua kāne, a laila e ikaika ai nā lima o ka poʻe a pau me ʻoe.”

²² No laila, kūkulu lākou i hale lole no ʻAbesaloma ma luna o ka hale; a komo akula ʻo ʻAbesaloma ma loko i nā haiā wahine a kona makua kāne, i mua o kā ʻIseraʻela a pau.

²³ A ʻo ka ʻōlelo aʻo a ʻAhitopela i ʻōlelo aku ai ia mau lā, ua like ia me kā ke Akua ʻōlelo a ke kanaka i nīnau aku ai; pēlā nō ka ʻōlelo aʻo a pau a ʻAhitopela iā Dāvida a me ʻAbesaloma.