KA BUKE ʻALUA A SAMUʻELA 14 - Ka Baibala Hemolele

1 Ka ʻōlelo ʻana a kekahi wahine naʻauao ʻo Tekoa iā Dāvida, no ka hoʻihoʻi ʻana mai iā ʻAbesaloma. 21 Kiʻi akula ʻo Ioaba, a hoʻihoʻi maila iā ia i Ierusalema. 28 Noho liʻuliʻu lā ia, a ma hope ʻae maila ʻo Dāvida e ʻike iā ia.

MOKUNA XIV.

¹ ¶ ʻIke aʻela ʻo Ioaba ke keiki a Zeruia, ua hele aku ka naʻau o ke aliʻi i o ʻAbesaloma lā.

² Hoʻouna akula ʻo Ioaba i Tekoa, a lawe maila i kekahi wahine akamai mai laila mai, ʻī akula iā ia, “Ke noi aku nei au iā ʻoe, e hoʻolike ʻoe iā ʻoe iho me ka mea kanikau, a e ʻaʻahu ʻoe i ke kapa makena, ʻaʻole hoʻi e kāhinu i ka ʻaila; e like ʻoe me ka wahine i kanikau loa no ka mea i make.

³ “A e hele aku i ke aliʻi, a penei e ʻōlelo aku ai.” A laila, haʻi akula ʻo Ioaba i nā hua ʻōlelo no kona waha.

⁴ ¶ A i ka wā i ʻōlelo aku ai ka wahine o Tekoa i ke aliʻi, moe ihola ia i lalo kona alo, hoʻomaikaʻi akula i ke aliʻi, ʻī akula, “E hoʻōla mai, e ke aliʻi!”

⁵ ʻĪ maila ke aliʻi iā ia, “He aha kāu?” ʻĪ akula kēlā, “He wahine kāne make au, ua make kuʻu kāne.

⁶ “He mau keiki kāne ʻelua a kāu kauā wahine, hakakā aʻela lāua ma ke kula, ʻaʻohe mea hoʻi nāna e ʻuao, a hahau akula kekahi i kona hoa, a make ihola ia.

⁷ “Aia hoʻi, ua kūʻē mai ka ʻohana a pau i kāu kauā wahine; ʻī mai lākou, ‘E hāʻawi mai ʻoe i ka mea nāna i hahau i kona hoahānau, i pepehi aku mākou iā ia, no ke ola o kona hoahānau āna i pepehi aku ai; a e hoʻopau nō hoʻi mākou i ka hoʻoilina’; pēlā nō lākou e kinai ai i kuʻu lānahu ahi i koe, ʻaʻole nō hoʻi lākou e waiho no kaʻu kāne i inoa, ʻaʻole hoʻi koena ma luna o ka honua.”

⁸ ¶ ʻĪ maila ke aliʻi i ua wahine lā, “Ō hoʻi ʻoe i kou hale, a e kauoha aku hoʻi au nou.”

⁹ ʻŌlelo akula ka wahine o Tekoa i ke aliʻi, “E kuʻu haku, e ke aliʻi, ma luna iho oʻu ka hala, a ma luna hoʻi o ka ʻohana a koʻu makua; a e hala ʻole ke aliʻi a me kona noho aliʻi.”

¹⁰ ʻĪ maila ke aliʻi, “ʻO ka mea ʻōlelo mai iā ʻoe, e kaʻi mai iā ia i oʻu nei, ʻaʻole hoʻi ia e hoʻopā hou aku iā ʻoe.”

¹¹ A laila, ʻī akula kēlā, “Ke noi aku nei au iā ʻoe, e hoʻomanaʻo ke aliʻi iā Iēhova i kou Akua, i ʻole e luku hou aku ka mea hoʻopaʻi koko, o make kaʻu keiki.” ʻĪ maila ke aliʻi, “Ma ko Iēhova ola ʻana, ʻaʻole e hāʻule ka lauoho hoʻokahi o kāu keiki ma ka honua.”

¹² ¶ A laila ʻī akula ua wahine lā, “Ke noi aku nei au iā ʻoe, e ʻae mai ʻoe i kāu kauā wahine, e haʻi aku ia i hoʻokahi hua ʻōlelo i kuʻu haku i ke aliʻi.” ʻĪ maila kēlā, “E haʻi mai.”

¹³ ʻĪ akula ka wahine, “No ke aha lā hoʻi ʻoe i manaʻo ia mea kūʻē i ko ke Akua poʻe kānaka? No ka mea, ua ʻōlelo mai ke aliʻi ia mea, me he mea hewa lā, i ka hoʻihoʻi ʻole mai o ke aliʻi i ʻaneʻi i ka mea āna i hoʻokuke aku ai.

¹⁴ “No ka mea, he ʻoiaʻiʻo nō e make kākou, a ua like me ka wai i hānini ʻia ma ka honua, ʻaʻole e hiki ke ukuhi hou ʻia; ʻaʻole nō ke Akua i lawe aku i kona ola; akā, ua noʻonoʻo kēlā i ka mea e lilo loa ʻole ai ka mea āna i hoʻokuke aku ai.

¹⁵ “No laila hoʻi, i kuʻu hiki ʻana mai e ʻōlelo aku i kuʻu haku i ke aliʻi ma ia mea, no ka hoʻomakaʻu ʻana mai a nā kānaka iaʻu; ʻī ihola kāu kauā wahine, ‘E ʻōlelo aku nō wau i ke aliʻi; malia paha e hana mai ke aliʻi e like me ka noi ʻana aku a kāna kauā wahine.

¹⁶ ‘No ka mea, e lohe mai nō ke aliʻi, i hoʻopakele ʻo ia i kāna kauā wahine i ka lima o ke kanaka nāna e hoʻolei aku iā māua pū me kuʻu keiki i waho o ka noho ʻana o ke Akua.’

¹⁷ “A laila, ʻī ihola kāu kauā wahine, ‘E lilo nō ka ʻōlelo a kuʻu haku a ke aliʻi i mea hoʻomaha; no ka mea, ua like kuʻu haku ke aliʻi me ka ʻānela o ke Akua, i ka nānā i ka pono a me ka hewa; no laila, me ʻoe pū auaneʻi ʻo Iēhova ʻo kou Akua.’”

¹⁸ ¶ A laila, ʻōlelo maila ke aliʻi, ʻī maila i ua wahine lā, “Mai hūnā ʻoe iaʻu ʻeā, i ka mea aʻu e nīnau aku nei iā ʻoe.” ʻĪ akula ka wahine, “E ʻōlelo mai kuʻu haku ke aliʻi ʻānō.”

¹⁹ ʻĪ maila ke aliʻi, “ʻAʻole anei ka lima o Ioaba pū me ʻoe i nēia mea?” ʻŌlelo akula ua wahine lā, ʻī akula, “ʻOiaʻiʻo nō, e kuʻu haku, e ke aliʻi, ʻaʻole e hiki i kekahi ke kāpae aku ma ka ʻākau, ʻaʻole hoʻi ma ka hema o kekahi mea a kuʻu haku a ke aliʻi i ʻōlelo mai nei; ʻo kāu kauā ʻo Ioaba, ʻo ia kai kauoha mai iaʻu, a hahao maila ia mau hua ʻōlelo a pau ma loko o ka waha o kāu kauā wahine.

²⁰ “Pēlā i hana iho ai ʻo Ioaba i mea e loaʻa ai kēia ʻano o ka ʻōlelo; a ua naʻauao koʻu haku, e like me ka naʻauao o ka ʻānela o ke Akua, ma ka ʻike i nā mea a pau o ka honua nei.”

²¹ ¶ ʻĪ akula ke aliʻi iā Ioaba, “Aia hoʻi, ua hana iho nei au i kēia mea, e kiʻi aku ʻoe, a e hoʻihoʻi mai i ke kanaka ʻōpiopio iā ʻAbesaloma.”

²² Moe ihola ʻo Ioaba ma ka honua i lalo kona alo, kūlou ihola, a hoʻomaikaʻi akula i ke aliʻi. ʻĪ akula ʻo Ioaba, “Ke ʻike nei au i kēia lā, ua loaʻa iaʻu ke aloha i mua o kou maka, e kuʻu haku, e ke aliʻi; no ka mea, ua hoʻokō mai ke aliʻi i ka mea a kāna kauā i noi aku ai.”

²³ Kū aʻela ʻo Ioaba, a hele akula i Gesura, a lawe maila iā ʻAbesaloma i Ierusalema.

²⁴ ʻĪ akula ke aliʻi, “E kipa aʻe ia i kona hale iho, ʻaʻole ia e ʻike mai i kuʻu maka.” A hoʻi aʻela ʻo ʻAbesaloma i kona hale, ʻaʻole i ʻike aku i nā maka o ke aliʻi.

²⁵ ¶ A i loko o kā ʻIseraʻela a pau, ʻaʻole he kanaka ʻē aʻe i mahalo nui ʻia e like me ʻAbesaloma no kona maikaʻi; mai ka poli wāwae ona a hiki i luna i ka piko o kona poʻo, ʻaʻohe ona kīnā iki.

²⁶ Aia ʻako ia i kona poʻo, (no ka mea, i ka pau ʻana o kēlā makahiki, kēia makahiki, ʻako aʻela ia i ke oho; no ke kaumaha o ke oho ma luna ona; no laila ia i ʻako ia mea); kaupaona ihola ia i ke oho o kona poʻo, ʻelua haneri sekela, e like me kā ke aliʻi hoʻokau ʻana.

²⁷ Ua hānau na ʻAbesaloma ʻekolu keiki kāne, a hoʻokahi kaikamahine, ʻo Tamara kona inoa; he wahine maikaʻi hoʻi ma kona helehelena.

²⁸ ¶ Pēlā i noho ai ʻo ʻAbesaloma ma Ierusalema, ʻelua makahiki ʻokoʻa, ʻaʻole hoʻi ia i ʻike aku i nā maka o ke aliʻi.

²⁹ No laila, kēnā akula ʻo ʻAbesaloma e kiʻi iā Ioaba, e hoʻouna aku iā ia e hele i ke aliʻi; ʻaʻole naʻe ia i hele mai i ona lā; a hoʻouna hou akula ia, ʻo ka lua ia o ke kiʻi ʻana, ʻaʻole hoʻi ia i hele mai.

³⁰ A laila ʻī akula ia i kāna poʻe kauā, “Aia ka mahina ʻai a Ioaba e kokoke ana i kuʻu wahi, a he bale kāna i laila; ō uhaele ʻoukou e puhi i ke ahi.” A puhi akula nā kauā a ʻAbesaloma i ua mahina ʻai lā i ke ahi.

³¹ A laila kū aʻela ʻo Ioaba, a hele mai i o ʻAbesaloma lā i kona hale, ʻī maila iā ia, “Ē, he aha ka mea i puhi aku ai kāu poʻe kauā i kuʻu mahina ʻai i ke ahi?”

³² ʻŌlelo akula ʻo ʻAbesaloma iā Ioaba, “Aia hoʻi, ua hoʻouna akula au i ou lā, me ka ʻī ʻana aku, ‘E hele mai i ʻaneʻi, i hoʻouna aku ai au iā ʻoe i ke aliʻi, e ʻī aku iā ia, “He aha ka mea i hoʻi mai nei au mai Gesura mai? E aho nō wau e noho ma laila a hiki i nēia wā”’; ʻānō hoʻi, e ʻae mai ʻoe e ʻike aku au i nā maka o ke aliʻi; a inā he hewa i loko oʻu, e pepehi mai kēlā iaʻu.”

³³ A laila hele akula ʻo Ioaba i ke aliʻi, a haʻi akula iā ia; a hea maila ʻo ia iā ʻAbesaloma, a hele akula ia i ke aliʻi, a kūlou ihola ia ma ka honua i lalo kona alo i mua o ke aliʻi; a honi maila ke aliʻi iā ʻAbesaloma.