KA BUKE ʻALUA A SAMUʻELA 13 - Ka Baibala Hemolele

1 No ka puʻe ʻana o ʻAmenona iā Tamara, a me ka moe ʻana me ia. 15 Inaina aku ʻo ia iā Tamara a hoʻokuke aku. 28 Pepehi ʻia ʻo ʻAmenona e ʻAbesaloma a make. 34 A mahuka akula ʻo ʻAbesaloma i Gesura.

MOKUNA XIII.

¹ ¶ A ma hope iho o ia mea, he kaikuahine maikaʻi ko ʻAbesaloma ke keiki kāne a Dāvida, ʻo Tamara kona inoa; aloha maila ʻo ʻAmenona ke keiki kāne a Dāvida iā ia.

² Pēlā ka pono ʻole ʻana o ʻAmenona, a maʻi ihola ia no kona kaikuahine no Tamara; no ka mea, he puʻupaʻa ia; ʻaʻole i hiki pono iā ʻAmenona ke hana aku i kekahi mea iā ia.

³ He hoalauna ko ʻAmenona, ʻo Ionadaba kona inoa, ke keiki a Simea a ko Dāvida kaikuaʻana; a he kanaka maʻalea loa ʻo Ionadaba.

⁴ ʻĪ akula kēlā iā ia, “ʻO ʻoe ke keiki a ke aliʻi, he aha lā kāu mea e wīwī ai i kēlā lā i kēia lā? ʻAʻole ʻoe e haʻi mai iaʻu, ʻeā?” ʻĪ maila ʻo ʻAmenona iā ia, “Ua aloha au iā Tamara i ke kaikuahine o kuʻu kaikaina ʻo ʻAbesaloma.”

⁵ ʻĪ akula ʻo Ionadaba iā ia, “E moe iho ʻoe ma kou wahi moe, a e hoʻomaʻimaʻi iho ʻoe; a hele mai kou makua kāne e ʻike iā ʻoe, e ʻī aku ʻoe iā ia, ‘ʻEā, ke noi aku nei au iā ʻoe, e ʻae mai ʻoe e hele mai ʻo Tamara kuʻu kaikuahine e hāʻawi mai ia i ʻai naʻu, e hoʻomākaukau ia i ka ʻai i mua o koʻu mau maka, i ʻike au, a ʻai iho hoʻi ma kona lima.’”

⁶ Moe ihola ʻo ʻAmenona, a hoʻomaʻimaʻi iā ia iho; a hele mai ke aliʻi e ʻike iā ia, ʻī akula ʻo ʻAmenona i ke aliʻi, “Ē, ke noi aku nei au iā ʻoe, e ʻae mai ʻoe e hele mai ʻo Tamara kuʻu kaikuahine, a hana iho naʻu i ʻelua wahi pōpō palaoa i mua o kuʻu mau maka, i ʻai iho au ma kona lima.”

⁷ ¶ A laila, hoʻouna akula ʻo Dāvida i o Tamara lā ma kona wahi, ʻī akula, “E hele ʻoe ʻānō i ka hale o kou kaikunāne ʻo ʻAmenona, a e hana ʻoe i wahi ʻai nāna.”

⁸ Hele akula ʻo Tamara i ka hale o kona kaikunāne ʻo ʻAmenona, a e moe ana nō ia. Lawe aʻela kēlā i ka palaoa, kāwili aʻela, a hana ihola i nā pōpō i mua o kona maka, a pūlehu ihola i ua mau pōpō lā.

⁹ Lawe aʻela ia i ke pā, a ninini akula ia mau mea i mua ona, ʻaʻole naʻe ia i ʻai. ʻĪ akula ʻo ʻAmenona, “E hele i waho nā kānaka a pau mai oʻu aku nei”; a hele akula nā kānaka a pau i waho mai ona aku lā.

¹⁰ ʻĪ akula ʻo ʻAmenona iā Tamara, “E lawe mai ʻoe i ka ʻai ma loko o ke keʻena nei i ʻai iho au ma kou lima.” Lawe aʻela ʻo Tamara i nā pōpō palaoa āna i hana ai, a halihali maila i loko o ke keʻena i o ʻAmenona lā i kona kaikunāne.

¹¹ Aia lawe maila ia i ona lā e ʻai ai, lālau akula kēlā ia ia, ʻī akula iā ia, “Ē, e moe kāua, e kuʻu kaikuahine.”

¹² ʻĪ maila kēlā iā ia, “ʻAʻole, e kuʻu kaikunāne, mai puʻe wale mai ʻoe iaʻu; no ka mea, ʻaʻole e pono ke hana pēlā i waena o kā ʻIseraʻela; mai hana ʻoe i kēia mea ʻino!

¹³ “A ʻo wau lā, ma hea lā auaneʻi au e hūnā ai i kuʻu hilahila? A ʻo ʻoe hoʻi, e like auaneʻi ʻoe me kekahi o ka poʻe haukaʻe i loko o kā ʻIseraʻela. No ia mea ʻeā, e ʻōlelo aku ʻoe i ke aliʻi; ʻaʻole ia e paʻa iaʻu mai ou aku lā.”

¹⁴ ʻAʻole naʻe ia i hoʻolohe mai i kona leo; akā, no ka ʻoi o kona ikaika i ko ia lā, puʻe wale akula kēlā iā ia, a moe ihola me ia.

¹⁵ ¶ A laila, inaina akula ʻo ʻAmenona iā ia me ka inaina nui loa; a ua ʻoi aku ka inaina āna i inaina aku ai iā ia, i ke aloha āna i aloha mua aku ai iā ia. ʻĪ akula ʻo ʻAmenona iā ia, “E ala aʻe, e hoʻi!”

¹⁶ ʻĪ maila kēlā iā ia, “ʻAʻohe pono; ʻo kēia hala o kou kipaku ʻana iaʻu ua ʻoi aku ia i kēlā mea āu i hana iho nei iaʻu;” ʻaʻole naʻe ia i hoʻolohe aku iā ia.

¹⁷ Kāhea akula ia i kāna kauā, i ka mea i lawelawe nāna, ʻī akula, “E kipaku aku ʻoe iā ia nei i waho mai oʻu aku nei, a e hoʻopaʻa i ka puka ma hope ona.”

¹⁸ He kapa ʻōniʻoniʻo ma luna ona; pēlā nō i kāhiko ʻia ai nā kaikamāhine puʻupaʻa a ke aliʻi. A laila lawe aʻela kāna kauā iā ia i waho, a hoʻopaʻa ihola i ka puka ma hope ona.

¹⁹ Lū ihola ʻo Tamara i ka lehu ahi ma luna o kona poʻo, haehae aʻela i kona kapa ʻōniʻoniʻo ma luna ona, kau aʻela hoʻi ia i kona lima ma luna o kona poʻo, a hele akula e uē ana.

²⁰ ¶ ʻĪ akula ʻo ʻAbesaloma ʻo kona kaikunāne iā ia, “Ua moe nō anei ʻo ʻAmenona kou kaikunāne me ʻoe? E noho mālie hoʻi ʻoe, e kuʻu kaikuahine, ʻo kou kaikunāne kēlā, mai manaʻo nui ʻoe ma ia mea.” A noho mehameha ihola ʻo Tamara ma ka hale o ʻAbesaloma kona kaikunāne.

²¹ A i ka lohe ʻana o Dāvida ke aliʻi ia mau mea a pau, huhū loa ihola ia.

²² ʻAʻole i ʻōlelo aku ʻo ʻAbesaloma iā ʻAmenona kona kaikuaʻana i ka pono, ʻaʻole hoʻi i ka hewa; no ka mea, ua inaina aku ʻo ʻAbesaloma iā ʻAmenona, i kona puʻe wale ʻana iā Tamara i kona kaikuahine.

²³ ¶ A hala aʻela nā makahiki ʻokoʻa ʻelua, he ʻaha ʻako hipa ko ʻAbesaloma ma Baʻala Hazora e kokoke ana me ko ʻEperaima; a kono akula ʻo ʻAbesaloma i nā keiki kāne a pau a ke aliʻi e hele i laila.

²⁴ Hele maila ʻo ʻAbesaloma i ke aliʻi, ʻī maila, “Aia he ʻaha ʻako hipa o kāu kauā; ke noi aku nei au iā ʻoe, e hele pū ke aliʻi a me kāna poʻe kauā me kāu kauā.”

²⁵ ʻĪ akula ke aliʻi iā ʻAbesaloma, “ʻAʻole mākou a pau e hele, e kuʻu keiki, o hoʻokaumaha mākou iā ʻoe.” Koi maila kēlā iā ia; ʻaʻole naʻe ia i manaʻo e hele; akā, hoʻomaikaʻi akula ʻo ia iā ia.

²⁶ ʻĪ maila ʻo ʻAbesaloma, “A i ʻole, ke noi aku nei au iā ʻoe, e ʻae mai i kuʻu kaikuaʻana iā ʻAmenona e hele pū me mākou.” ʻĪ akula ke aliʻi iā ia, “He aha lā kāna e hele pū aku ai me ʻoe?”

²⁷ Koi akula ʻo ʻAbesaloma iā ia, a ʻae maila ia e hele pū ʻo ʻAmenona, a ʻo nā keiki kāne a pau a ke aliʻi me ia.

²⁸ ¶ Kauoha akula ʻo ʻAbesaloma i kāna poʻe kauā, ʻī akula, “E nānā ʻoukou, a ʻoliʻoli ka naʻau o ʻAmenona i ka waina; a ʻōlelo aku hoʻi au iā ʻoukou, ‘E pepehi iā ʻAmenona,’ a laila e pepehi iā ia, mai makaʻu; ʻaʻole anei au i kauoha aku? I nui ke aho, a e koa hoʻi.”

²⁹ A hana akula nā kauā a ʻAbesaloma iā ʻAmenona, e like me kā ʻAbesaloma i kauoha ai; a laila kū aʻela nā keiki kāne a pau a ke aliʻi, eʻe akula kēlā kanaka kēia kanaka ma luna o kona hoki, a holo akula.

³⁰ ¶ Aia ma ke alanui lākou, haʻi ʻia mai iā Dāvida, i ka ʻī ʻana, “Ua pepehi ihola ʻo ʻAbesaloma i nā keiki kāne a pau a ke aliʻi, ʻaʻole koe kekahi o lākou!”

³¹ A laila, kū aʻela ke aliʻi, haehae aʻela i nā kapa ona, a moe ihola ma ka honua, a kū maila nā kauā āna a pau me ka haehae ʻia ʻo ko lākou kapa.

³² ʻŌlelo maila ʻo Ionadaba ke keiki a Simea a ko Dāvida kaikuaʻana, ʻī maila, “Mai manaʻo ʻoe, e kuʻu haku, ua pepehi lākou i ka poʻe kānaka ʻōpiopio a pau, i nā keiki kāne a ke aliʻi; ʻo ʻAmenona wale nō kai make; no ka mea, ua ʻōhumu ʻia kēia mea ma ka waha o ʻAbesaloma, mai ka lā mai i puʻe wale aku ai kēlā i kona kaikuahine iā Tamara.

³³ “No laila hoʻi, mai hoʻokaumaha kuʻu haku ke aliʻi i kona naʻau ia mea, me ka manaʻo ua make nā keiki a pau a ke aliʻi; ʻo ʻAmenona wale nō kai make.”

³⁴ ¶ Mahuka akula ʻo ʻAbesaloma. A ʻo ke kanaka ʻōpiopio e kiaʻi ana, ʻalawa aʻela nā maka ona i luna, ʻike akula, aia lā, he nui nā kānaka e hele mai ana ma ke ala ma ka ʻaoʻao o ka puʻu ma hope ona.

³⁵ ʻĪ akula ʻo Ionadaba i ke aliʻi, “Aia lā, ke hele mai nei nā keiki kāne a ke aliʻi, e like me ka ʻōlelo ʻana a kāu kauā.”

³⁶ A pau aʻela ka ʻōlelo ʻana, hiki maila nā keiki kāne a ke aliʻi, hoʻokiʻekiʻe aʻela lākou i ko lākou leo, a uē akula; uē nui loa ihola ke aliʻi a me kāna poʻe kauā a pau.

³⁷ ¶ Mahuka akula ʻo ʻAbesaloma, a hele akula i o Talemai lā i ke keiki a ʻAmihuda ke aliʻi no Gesura. Kanikau ihola ʻo Dāvida i kāna keiki i kēlā lā i kēia lā.

³⁸ Mahuka akula ʻo ʻAbesaloma, a hele akula i Gesura, noho ihola i laila ʻekolu makahiki.

³⁹ ʻIʻini loa ihola ʻo Dāvida ke aliʻi e hele aku i o ʻAbesaloma lā; no ka mea, ua hōʻoluʻolu ʻia ʻo ia no ʻAmenona, i kona make ʻana.