KA BUKE ʻALUA A SAMUʻELA 12 - Ka Baibala Hemolele

1 Ka ʻōlelo nane a Natana iā Dāvida; 13 haʻi maila ʻo Dāvida i kona hewa i mua o Natana, a hōʻike maila hoʻi ʻo Natana i kā ke Akua iā ia; 18 make iho nō ke keiki a Bateseba i hānau ai. 24 Ka hānau ʻana o Solomona.

MOKUNA XII.

¹ ¶ Hoʻouna maila ʻo Iēhova iā Natana i o Dāvida lā; hele maila ia i ona lā, ʻī maila iā ia, “ʻElua mau kānaka ma kekahi kūlanakauhale; ua waiwai kekahi, a ua ʻilihune kekahi.

² “He nui loa hoʻi nā ʻohana hipa a me nā ʻohana bipi a ke kanaka waiwai.

³ “Akā, na ke kanaka ʻilihune, hoʻokahi wale nō keiki hipa wahine ʻuʻuku Āna i kūʻai ai a hānai iho ai; Noho pū ihola ia me ia a me nā keiki āna; ʻAi ihola ia i kāna ʻai, a inu hoʻi ma kona kīʻaha, a moe ihola ia ma kona poli, A me he kaikamahine lā ia nāna.

⁴ “A hele maila he kanaka hele i ua kanaka waiwai lā, A ʻauʻa ihola ia ke lawe i ko kāna ʻohana hipa a me kāna ʻohana bipi E kālua na ua kanaka lā i hele mai i ona lā; Akā, kiʻi akula ia i ke keiki hipa a ke kanaka ʻilihune, a kālua ihola na ke kanaka i hele mai i ona lā.”

⁵ Huhū loa akula ʻo Dāvida i ua kanaka lā; ʻī akula ʻo ia iā Natana, “Ma ke ola ʻana o Iēhova, he ʻoiaʻiʻo nō e make ke kanaka nāna i hana ia mea!

⁶ “A e hoʻihoʻi pāhā aku ia i ke keiki hipa, no ka hana ʻana ia mea, a no ka mea, ʻaʻohe ona aloha.”

⁷ ¶ ʻĪ akula ʻo Natana iā Dāvida, “ʻO ʻoe nō ia kanaka! Penei kā Iēhova ke Akua no kā ʻIseraʻela i ʻōlelo mai ai, ‘Ua poni aku nō au iā ʻoe i aliʻi ma luna o kā ʻIseraʻela, a ua hoʻopakele hoʻi au iā ʻoe i ka lima o Saula.

⁸ ‘A hāʻawi akula au i ka hale o kou haku nou, a me nā wāhine a kou haku i loko o kou poli, a hāʻawi akula hoʻi au i ka ʻohana o kā ʻIseraʻela a me kā Iuda nou; a inā he ʻuʻuku kēia mau mea, a laila e hāʻawi aku hoʻi au nāu, i kēlā mau mea, a i kēia mau mea!

⁹ ‘He aha hoʻi kāu i hoʻowahāwahā ai i ke kānāwai o Iēhova, e hana i ka hewa i mua o kona maka? Ua pepehi aʻe ʻoe iā ʻUria ka Heta me ka pahi kaua, a ua lawe ʻoe i kāna wahine i wahine nāu; a ua pepehi i ke kāne me ka pahi kaua a ka poʻe mamo a ʻAmona.

¹⁰ ‘No ia mea hoʻi, ʻaʻole loa e kaʻawale aku ka pahi kaua mai kou ʻohana aku; no ka mea, ua hoʻowahāwahā mai ʻoe iaʻu, a ua lawe ʻoe i ka wahine a ʻUria ka Heta i wahine nāu.’

¹¹ “Penei kā Iēhova i ʻōlelo mai ai, ‘Eia hoʻi, e hoʻāla auaneʻi au i ka ʻino kūʻē iā ʻoe ma loko o kou hale, a e lawe au i kāu mau wāhine i mua o kou maka, a e hāʻawi aku iā lākou na kou hoalauna, a e moe ia me kāu mau wāhine i mua o kēia lā.

¹² ‘No ka mea, ua hana malū ʻoe i kāu; akā, e hana au i kēia mea i mua o kā ʻIseraʻela a pau, a i mua hoʻi o ka lā.’”

¹³ ʻĪ akula ʻo Dāvida iā Natana, “Ua hana hewa wau iā Iēhova.” ʻĪ maila ʻo Natana iā Dāvida, “Ua kala aku hoʻi ʻo Iēhova i kou hewa; ʻaʻole ʻoe e make.

¹⁴ “Akā; no ka mea, ma kēia hana ʻana āu, ua loaʻa i ka poʻe ʻenemi o Iēhova ke kumu e ʻōlelo hōʻino ai, he ʻoiaʻiʻo nō e make ke keiki i hānau mai nāu.”

¹⁵ Hoʻi akula ʻo Natana i kona hale. Hahau maila ʻo Iēhova i ke keiki a ka wahine a ʻUria i hānau mai ai na Dāvida, a maʻi nui ihola ia.

¹⁶ No laila, nonoi akula ʻo Dāvida i ke Akua no ke keiki; hoʻokē ʻai ihola ʻo Dāvida, komo akula, a moe ihola ma ka honua a ao ka pō.

¹⁷ Kū aʻela nā lunakahiko o kona hale, hele akula i ona lā e hoʻāla iā ia mai ka honua aʻe; ʻaʻole ia i ʻae aku, ʻaʻole hoʻi i ʻai i ka ʻai me lākou.

¹⁸ A i ka hiku o ka lā, make ihola ke keiki. Makaʻu ihola nā kauā a Dāvida e haʻi aku iā ia, ua make ke keiki; ʻī aʻela lākou, “Aia i ke ola ʻana o ke keiki, ʻōlelo akula kākou iā ia, ʻaʻole ia i hoʻolohe mai i ko kākou leo; he ʻoiaʻiʻo nō, e hana ʻeha ʻo ia iā ia iho, ke haʻi aku kākou iā ia, ua make ke keiki!”

¹⁹ A ʻike aʻela ʻo Dāvida i ka hamumumu a nā kauā āna, ʻike ihola ʻo Dāvida, ua make ke keiki; no laila ʻī akula ʻo Dāvida i kāna mau kauā, “Ua make anei ke keiki?” ʻĪ maila lākou, “Ua make.”

²⁰ A laila, kū aʻela ʻo Dāvida mai ka honua aku, ʻauʻau ihola, a hamo ihola i ka ʻaila, ʻaʻahu ihola iā ia i ka lole hou, hele akula i ka hale o Iēhova, a hoʻomana akula. A laila hoʻi maila ia i kona hale; a kēnā akula ia, a kau maila lākou i ka ʻai i mua ona, a ʻai ihola ia.

²¹ A laila, ʻī akula kāna mau kauā iā ia. “He aha kēia āu i hana iho nei? Hoʻokē ʻai ihola ʻoe me ka uē i ke keiki i kona wā e ola ana; a make iho ke keiki, ua ala aʻe ʻoe a ʻai iho i ka ʻai.”

²² ʻĪ maila kēlā, “A e ola ana ke keiki, hoʻokē ʻai ihola au me ka uē; ʻī ihola au, ‘Malama paha e aloha mai ke Akua iaʻu i ola ke keiki?’

²³ “ʻĀnō hoʻi, ua make ia; no ke aha hoʻi au e hoʻokē ʻai ai? E hiki anei iaʻu ke hoʻihoʻi mai iā ia? ʻO wau ke hele aku i ona lā; akā, ʻaʻole ia e hoʻi hou mai i oʻu nei.”

²⁴ ¶ Hōʻoluʻolu akula ʻo Dāvida iā Bateseba i kāna wahine; komo akula ia i loko i ona lā, a moe me ia; a hānau maila ia i keiki kāne, a kapa akula kēlā i kona inoa, ʻo Solomona; a aloha maila ʻo Iēhova iā ia.

²⁵ Hoʻouna maila ia i ke kāula iā Natana, a kapa maila ia i kona inoa ʻo Iedidia, no Iēhova.

²⁶ ¶ Kaua akula ʻo Ioaba iā Raba o nā mamo a ʻAmona, a hoʻopio maila i ke kūlanakauhale aliʻi.

²⁷ Hoʻouna maila ʻo Ioaba i nā ʻelele i o Dāvida lā, i maila, “Ē, ua kaua aku nō wau iā Raba, a ua hoʻopio iho i ke kūlanakauhale wai.

²⁸ “ʻĀnō hoʻi, e hoʻākoakoa pū mai ʻoe i nā kānaka e koe, e kaua aku i ke kūlanakauhale, a e hoʻopio ia wahi; o pio auaneʻi ke kūlanakauhale iaʻu, a e kāhea ʻia koʻu inoa ma luna ona.”

²⁹ Hoʻākoakoa pū aʻela ʻo Dāvida i nā kānaka a pau, a hele akula i Raba, kaua akula ia, a hoʻopio ihola ia wahi.

³⁰ Lawe aʻela hoʻi ia i ka pāpale o ko lākou aliʻi, mai luna o kona poʻo, ma ke kaupaona ʻana, he tālena gula ia, me nā pōhaku makamae, a ua kau ʻia ma luna o ke poʻo o Dāvida. A lawe maila ia i ka waiwai pio o ke kūlanakauhale he nui loa.

³¹ Lawe aʻela hoʻi ʻo ia i nā kānaka ma loko, a kau ihola iā lākou ma lalo o nā pahiolo, a ma lalo o nā mea hao ʻoiʻoi, a ma lalo hoʻi o nā koʻi lipi hao, a hoʻohele akula hoʻi iā lākou ma waena o ka umu pōhaku ʻula; pēlā ia i hana aku ai i nā kūlanakauhale a pau i nā mamo a ʻAmona. A hoʻi akula ʻo Dāvida a me nā kānaka a pau i Ierusalema.