KA BUKE ʻALUA A SAMUʻELA 11 - Ka Baibala Hemolele

1 No ka moekolohe ʻana o Dāvida me ka wahine a ʻUria. 14 Ka make ʻana o ʻUria i ke kaua, 17 a me ka mare ʻana o Dāvida me kāna wahine, a hānau ʻia nāna he keiki.

MOKUNA XI.

¹ ¶ A i ka makahiki hou, i ka manawa e hele aku ai nā aliʻi i ke kaua, hoʻouna akula ʻo Dāvida iā Ioaba, a me nā kauā āna me ia, a me kā ʻIseraʻela a pau; a luku akula lākou i ka poʻe mamo a ʻAmona; a puʻe akula iā Raba; akā, noho ihola ʻo Dāvida ma Ierusalema ia manawa.

² ¶ A i ka manawa ahiahi ala aʻela ʻo Dāvida mai kona wahi moe, a holoholo aʻela ma luna o ka hale o ke aliʻi; nānā akula ia mai luna aʻe o ka hale i kekahi wahine e ʻauʻau ana; a he maikaʻi loa ua wahine lā ke nānā ʻia aku.

³ Hoʻouna akula ʻo Dāvida e nīnau aku no ka wahine. ʻĪ maila kekahi, “ʻAʻole anei kēia ʻo Bateseba ke kaikamahine a ʻEliama, ka wahine hoʻi a ʻUria kā Heta?”

⁴ Hoʻouna akula ʻo Dāvida i nā mea kiʻi aku, a lālau akula iā ia; a hele maila ia i loko i ona lā, a moe ihola kēlā me ia; no ka mea, ua huikala ʻia ʻo ia i kona haumia ʻana; a hoʻi hou akula ia i kona hale.

⁵ A hāpai aʻela ua wahine lā, hoʻouna akula a haʻi iā Dāvida, i ka ʻī ʻana, “Ua hāpai au.”

⁶ ¶ Hoʻouna akula ʻo Dāvida i o Ioaba lā, ʻī akula, “E hoʻouna mai ʻoe iā ʻUria kā Heta i oʻu nei.” A hoʻouna maila ʻo Ioaba iā ʻUria i o Dāvida lā.

⁷ A hiki maila ʻo ʻUria i ona lā, nīnau akula ʻo Dāvida iā ia i ka pōmaikaʻi o Ioaba, me ka pōmaikaʻi o nā kānaka, a me ka pōmaikaʻi ʻana o ke kaua.

⁸ ʻĪ akula ʻo Dāvida iā ʻUria, “E iho iho ʻoe i kou hale, a e holoi i kou wāwae.” A hele akula ʻo ʻUria i waho o ka hale o ke aliʻi, a ukali akula kekahi ʻai ma hope ona na ke aliʻi aku.

⁹ Akā, hiamoe ihola ʻo ʻUria ma ka puka o ka hale o ke aliʻi me nā kauā a pau a kona haku, ʻaʻole ia i hele aku i kona hale.

¹⁰ Haʻi akula lākou iā Dāvida, ʻī akula, “ʻAʻole i hele aku ʻo ʻUria i kona hale.” Nīnau akula ʻo Dāvida iā ʻUria, “ʻAʻole anei ʻoe i hele mai mai kou hele ʻana? He aha hoʻi kāu i hele ʻole aku ai i kou hale?”

¹¹ ʻĪ akula ʻo ʻUria iā Dāvida, “Ke noho nei ka pahu berita, a ʻo kā ʻIseraʻela a ʻo kā Iuda i loko o nā halelewa; ke hoʻomoana lā hoʻi kuʻu haku ʻo Ioaba me nā kauā a kuʻu haku ma waho ma ke kula; e komo anei hoʻi au i loko o koʻu hale e ʻai, a e inu, a e moe me kaʻu wahine? Ma kou ola ʻana, me ke ola ʻana hoʻi o kou ʻuhane, ʻaʻole au e hana ia mea.”

¹² ʻĪ akula ʻo Dāvida iā ʻUria, “E noho iho hoʻi ʻoe i kēia lā, a ʻapōpō e kuʻu aku ai au iā ʻoe e hoʻi.” A noho ihola ʻo ʻUria ma Ierusalema ia lā, a hiki i kekahi lā aʻe.

¹³ Kāhea akula ʻo Dāvida iā ia, a ʻai ihola ia a inu hoʻi i mua ona; hoʻīnu ihola ʻo Dāvida iā ia a ʻona; a ahiahi aʻela, hele akula ia i waho e moe ma kona wahi moe me nā kauā o kona haku, ʻaʻole naʻe ia i hele i kona hale.

¹⁴ ¶ A kakahiaka aʻe, kākau ihola ʻo Dāvida i ka palapala iā Ioaba, a hoʻouka akula ia ma ka lima o ʻUria.

¹⁵ Kākau ihola ia i loko o ka palapala, i ka ʻī ʻana aku, “E hoʻonoho aku ʻoe iā ʻUria ma ke alo o ke kaua ikaika, a e hoʻi i hope ʻoukou mai ona aku lā, i pepehi ʻia ai ʻo ia a make.”

¹⁶ A i ko Ioaba nānā ʻana aku i ke kūlanakauhale, hoʻonoho akula ʻo ia iā ʻUria ma kahi āna i ʻike ai i laila nā kānaka ikaika.

¹⁷ Hele maila nā kānaka o ua kūlanakauhale lā i waho, a kaua maila iā Ioaba mā; a hina ihola kekahi poʻe kānaka o nā kauā a Dāvida, a make ihola hoʻi ʻo ʻUria ka Heta.

¹⁸ Hoʻouna akula ʻo Ioaba, a haʻi akula iā Dāvida i nā mea a pau o ke kaua;

¹⁹ kauoha akula ia i ka ʻelele, ʻī akula, “A pau kāu haʻi ʻana aku i nā mea o ke kaua i ke aliʻi;

²⁰ inā paha e huhū mai ke aliʻi, a e ʻī mai hoʻi iā ʻoe, ‘No ke aha lā ʻoukou i hele aku ai pēlā a kokoke i ke kūlanakauhale i ke kaua ʻana o ʻoukou? ʻAʻole anei ʻoukou i ʻike, e pana mai lākou mai luna mai o ka pā?

²¹ ‘Na wai i pepehi iā ʻAbimeleka ke keiki a Ierubeseta? ʻAʻole anei he wahine i hoʻolei iho i ka ʻāpana pōhaku wili palaoa ma luna ona, i make ai ʻo ia ma Tebeza? No ke aha lā ʻoukou i hele aku ai a kokoke i ka pā?’ A laila e ʻī aku ʻoe, ‘Ua make nō hoʻi kāu kauā ʻo ʻUria o kā Heta.’”

²² ¶ Hele akula ka ʻelele, hiki akula a haʻi akula iā Dāvida i nā mea a pau a Ioaba i hoʻouna aku ai iā ia.

²³ ʻĪ akula ka ʻelele iā Dāvida, “He ʻoiaʻiʻo ua lanakila mai kēlā poʻe kānaka ma luna o mākou, a hele maila lākou i waho i o mākou lā ma ke kula, a hahai akula mākou iā lākou a hiki i ke komo ʻana ma ka puka.

²⁴ “A pana maila ka poʻe pana mai luna mai o ka pā ma luna iho o kāu poʻe kauā, a ua make kekahi poʻe kauā a ke aliʻi, a ua make hoʻi kāu kauā ʻo ʻUria.”

²⁵ A laila ʻī akula ʻo Dāvida i ka ʻelele, “Penei kāu e ʻōlelo aku ai iā Ioaba, ‘Mai hōʻino ʻoe ia mea ma kou manaʻo; no ka mea, i ka ʻai ʻana mai a ka pahi kaua e like me kēia, pēlā nō i nā mea a pau; e hoʻoikaika aʻe ʻoe i kou kaua ʻana i ke kūlanakauhale, a e hoʻokahuli ia wahi’; a nāu nō e hoʻoikaika aku iā ia.”

²⁶ ¶ A lohe aʻela ka wahine a ʻUria, ua make ʻo ʻUria kāna kāne, kanikau ihola ia i kāna kāne.

²⁷ A pau aʻela ke kanikau ʻana, kiʻi akula ʻo Dāvida, a lawe maila iā ia i kona hale, a lilo aʻela ia i wahine nāna; a hānau maila ia i keiki kāne nāna; akā, he ʻino ka mea a Dāvida i hana ai i mua o Iēhova.