KA BUKE ʻALUA A SAMUʻELA 10 - Ka Baibala Hemolele

1 Ua hōʻino ʻia mai nā ʻelele a Dāvida e Hanuna ke aliʻi o kā ʻAmona. 7 Ua kaua aku ʻo Dāvida me ke aliʻi o kā ʻAmona. 13 Ua lanakila ʻo Dāvida ma luna o ko Suria, ka poʻe nāna i kōkua aku iā Hanuna.

MOKUNA X.

¹ ¶ Ma hope mai o ia mau mea, make ihola ke aliʻi o ka poʻe mamo a ʻAmona, a noho aliʻi ihola ʻo Hanuna kāna keiki ma kona wahi.

² ʻŌlelo ihola ʻo Dāvida, “E lokomaikaʻi aku au iā Hanuna ke keiki a Nahasa, e like me kona makua kāne i lokomaikaʻi mai ai iaʻu.” Hoʻouna akula ʻo Dāvida e hōʻoluʻolu aku iā ia no kona makua kāne ma ka lima o nā kānaka ona. A hiki akula nā kānaka o Dāvida ma ka ʻāina o nā mamo a ʻAmona.

³ A ʻo nā aliʻi o nā mamo a ʻAmona, ʻī akula lākou iā Hanuna i ko lākou haku, “Ke manaʻo nei anei ʻoe e hoʻomaikaʻi nei ʻo Dāvida i kou makua kāne i kona hoʻouna ʻana mai i ou lā i nā mea hōʻoluʻolu mai? ʻAʻole anei ʻo Dāvida i hoʻouna mai i kona mau kānaka e mākaʻikaʻi i ke kūlanakauhale, a e hoʻomakakiu mai, a e hoʻokahuli ia wahi?”

⁴ No laila, lālau akula ʻo Hanuna i nā kānaka o Dāvida, a kahi aʻela i kekahi ʻaoʻao o ko lākou ʻumiʻumi, a ʻokiʻoki ihola i ko lākou kapa ma waena ma ko lākou kīkala, a hoʻokuʻu maila iā lākou.

⁵ A haʻi akula lākou ia mea iā Dāvida, a laila hoʻouna akula ia e hālāwai me lākou; no ka mea, ua hilahila loa ua mau kānaka lā; ʻī akula ke aliʻi, “E noho ʻoukou i Ieriko, a ulu aʻe ko ʻoukou ʻumiʻumi, a laila e hoʻi mai.”

⁶ ¶ A ʻike ihola nā mamo a ʻAmona, ua pilau lākou i mua o Dāvida, kiʻi akula nā mamo a ʻAmona, a hoʻolimalima akula i ko Suria no Bete Rehoba, a me ko Suria no Zoba, he iwakālua tausani nā koa kaniwāwae, me ka tausani hoʻokahi o nā kānaka no Maʻaka ke aliʻi, a me nā kānaka no ʻIse Toba he ʻumikumamālua tausani.

⁷ A lohe aʻela ʻo Dāvida, hoʻouna akula ʻo ia iā Ioaba, a me ka pūʻali a pau o ka poʻe ikaika.

⁸ Hele maila ka poʻe mamo a ʻAmona i waho, a hoʻonohonoho ihola i ke kaua ma kahi e komo ai i loko o ka puka; a kū kaʻawale maila ka poʻe Suria no Zoba, a no Rehoba, no ʻIse Toba, a no Maʻaka, ma ke kula.

⁹ ¶ A ʻike akula ʻo Ioaba i ke alo o nā kaua, ma mua kekahi, a ma hope kekahi, a laila wae ihola ia i ka poʻe uʻi a pau o kā ʻIseraʻela, a hoʻonohonoho akula iā lākou e kūʻē i ka poʻe Suria.

¹⁰ A hāʻawi akula ia i ka poʻe i koe ma ka lima o ʻAbisai kona kaikaina, i hoʻonohonoho aku ai ʻo ia iā lākou e kūʻē i ka poʻe mamo a ʻAmona.

¹¹ ʻŌlelo akula ia, “Inā paha e ʻoi aku ka ikaika o ko Suria i koʻu, a laila e kōkua mai ʻoe iaʻu; akā, inā paha e ʻoi aku ka ikaika o ka poʻe mamo a ʻAmona i kou, a laila au e hele aku ai e kōkua iā ʻoe.

¹² “I nui ka ikaika, a e koa hoʻi kākou no ko kākou lāhui kanaka, a me nā kūlanakauhale o ko kākou Akua; e hana mai hoʻi ʻo Iēhova e like me ka mea e pono i mua o kona mau maka.”

¹³ Neʻeneʻe akula ʻo Ioaba me nā kānaka me ia e kaua aku i ko Suria, a heʻe akula lākou i mua ona.

¹⁴ A ʻike aʻela ka poʻe mamo a ʻAmona, ua heʻe akula ko Suria, a laila heʻe akula hoʻi lākou i mua o ʻAbisai, a komo akula i loko o ke kūlanakauhale. A hoʻi hou maila ʻo Ioaba mai ka poʻe mamo a ʻAmona mai, a hele maila i Ierusalema.

¹⁵ ¶ A ʻike aʻela ko Suria ua pepehi ʻia lākou i mua o kā ʻIseraʻela, hoʻākoakoa aʻe lākou i kahi hoʻokahi.

¹⁶ Kiʻi akula ʻo Hadarezera, a kaʻi maila i ko Suria ma kēlā ʻaoʻao o ka Muliwai; a hele maila lākou i Helama; i mua hoʻi o lākou ʻo Sobaka ka luna kaua o Hadarezera.

¹⁷ A haʻi ʻia mai ia iā Dāvida, hoʻākoakoa aʻe ia i kā ʻIseraʻela a pau, a hele akula ma kēlā ʻaoʻao o Ioredane, a hiki akula i Helama; a hoʻonohonoho akula ko Suria iā lākou iho e kūʻē iā Dāvida, a kaua akula lākou iā ia.

¹⁸ Heʻe akula ko Suria i mua o kā ʻIseraʻela, pepehi ihola ʻo Dāvida i ko nā hale kaʻa ʻehiku haneri o ko Suria, me nā tausani koa hoʻoholo lio he kanahā; a pepehi akula hoʻi ʻo ia iā Sobaka ka luna kaua o lākou, a make ihola ia i laila.

¹⁹ A ʻike aʻela ka poʻe aliʻi a pau o nā kauā a Hadarezera, ua pepehi ʻia lākou i mua o kā ʻIseraʻela, hoʻokuʻikahi maila lākou me kā ʻIseraʻela, a hoʻokauā maila na lākou. Pēlā i makaʻu ai ko Suria i ke kōkua hou aku i ka poʻe mamo a ʻAmona.