KA BUKE ʻALUA A SAMUʻELA 1 - Ka Baibala Hemolele

1 Ua lawe mai kā ʻAmeleka i ka pāpale aliʻi o Saula i o Dāvida lā, 6 a ua haʻi mai i kona make me ka heʻe ʻana o kā ʻIseraʻela i ke kaua. 19 Ke kanikau a Dāvida.

MOKUNA I.

¹ ¶ Ma hope iho o ka make ʻana o Saula, a ua hoʻi hou mai ʻo Dāvida mai ka luku ʻana i kā ʻAmeleka, a noho iho ʻo Dāvida ʻelua lā i Zikelaga;

² a i ke kolu o ka lā, aia hoʻi, he kanaka i hele mai, mai ke kahua kaua, mai Saula mai, me kona kapa i haehae ʻia, a me ka lepo ma luna o kona poʻo; a hiki akula ia i o Dāvida lā, moe ihola ia ma ka honua, a hoʻomaikaʻi akula.

³ ʻĪ akula ʻo Dāvida iā ia, “Mai hea mai ʻoe i hele mai nei?” ʻĪ maila kēlā iā ia, “Ua pakele mai nei au mai ke kahua kaua mai o kā ʻIseraʻela.”

⁴ ʻĪ akula ʻo Dāvida iā ia, “Pehea kēlā mea? Ke noi aku nei au iā ʻoe, e haʻi mai iaʻu.” ʻĪ maila kēlā, “Ua heʻe akula nā kānaka mai ke kaua aku, a ua hāʻule nā kānaka he nui loa a make; ua make hoʻi ʻo Saula a me kāna keiki kāne ʻo Ionatana.”

⁵ ʻĪ akula ʻo Dāvida i ke kanaka ʻōpiopio nāna i haʻi mai iā ia, “Pehea kāu ʻike ʻana, ua make ʻo Saula a me Ionatana kāna keiki?”

⁶ ʻĪ maila ua kanaka ʻōpiopio lā nāna i haʻi mai iā ia, “A i koʻu hiki wale ʻana aku ma luna o ka puʻu ʻo Gileboa, aia hoʻi, e kālele ana ʻo Saula ma luna iho o kona ihe; a hahai ikaika maila nā hale kaʻa a me nā hoʻoholo lio ma hope ona.

⁷ “ʻAlawa aʻela ia i hope, ʻike maila iaʻu, a kāhea maila iaʻu; ʻī akula au, ‘Eia nō wau.’

⁸ “Nīnau mai kēlā iaʻu, ‘ʻO wai ʻoe?’ ʻŌlelo akula au, ‘He ʻAmeleka wau.’

⁹ “ʻĪ hou maila ia iaʻu, ‘Ke noi aku nei au iā ʻoe, e kū ʻoe ma luna iho oʻu, a e pepehi mai iaʻu; no ka mea, ke kau mai nei ka pōniuniu ma luna iho oʻu, a ke koe nei ke ola ʻokoʻa i loko oʻu.’

¹⁰ “A kū ihola au ma luna ona, a pepehi ihola iā ia; no ka mea, ua ʻike pono au, ʻaʻole ia e ola ma hope iho o kona hāʻule ʻana; lawe aʻela nō au i ka pāpale aliʻi ma luna o kona poʻo, a me ke kūpeʻe ma kona lima, a ua halihali mai nei au ia mau mea i kuʻu haku.”

¹¹ ¶ A laila, lālau ihola ʻo Dāvida i kona kapa, a haehae ihola, a pēlā nō hoʻi nā kānaka a pau me ia.

¹² Kanikau akula lākou me ka uē aku, a hoʻokē ʻai ihola lākou a hiki i ke ahiahi, no Saula a no Ionatana kāna keiki, a no ka poʻe kānaka o Iēhova, a no ka ʻohana a ʻIseraʻela; no ka mea, ua hāʻule lākou i ka pahi kaua.

¹³ Nīnau akula ʻo Dāvida i ke kanaka ʻōpiopio nāna i haʻi mai iā ia, “No hea ʻoe?” ʻĪ maila kēlā, “He keiki au na kekahi malihini, he ʻAmeleka.”

¹⁴ ʻĪ akula ʻo Dāvida iā ia, “He aha kou mea i makaʻu ʻole ai i ka ʻō aku i kou lima e pepehi i kā Iēhova mea i poni ʻia?”

¹⁵ Kāhea akula ʻo Dāvida i kekahi kanaka ʻōpiopio, ʻī akula, “E neʻeneʻe aku ʻoe, a e lele aku ma luna ona!” Pepehi akula kēlā iā ia, a make ihola ia.

¹⁶ ʻĪ akula ʻo Dāvida iā ia, “Ma luna o kou poʻo iho ke koko ou; no ka mea, ua ʻāhewa maila kou waha iho iā ʻoe, i ka ʻī ʻana, ‘Ua pepehi nō au i kā Iēhova mea i poni ʻia.’”

¹⁷ ¶ Kanikau akula ʻo Dāvida i kēia kanikau ʻana iā Saula a iā Ionatana kāna keiki.

¹⁸ (Kauoha akula hoʻi ia e aʻo i nā mamo a Iuda i ke kakaka; aia hoʻi ua kākau ʻia ma loko o ka Buke a Iasera.)

¹⁹ “ʻO ka nani o kā ʻIseraʻela, ua pepehi ʻia ʻo ia ma luna o nā wahi kiʻekiʻe ou! Kai ka hāʻule ʻana o ka poʻe ikaika!

²⁰ “Mai haʻi aku ia mea ma Gata, Mai kala aku hoʻi ia ma nā alanui o ʻAsekelona; O hauʻoli nā kaikamāhine a ka poʻe Pilisetia, O haʻanui hoʻi nā kaikamāhine a ka poʻe ʻoki poepoe ʻole ʻia.

²¹ “E nā puʻu ʻo Gileboa, ʻaʻole make hau, ʻAʻole hoʻi he ua ma luna iho o ʻoukou, ʻAʻole hoʻi nā mahina ʻai o nā hua mua. I laila kahi i hoʻolei ʻia aku ai ka pale kaua o ka mea ikaika! Ka pale kaua o Saula i poni ʻole ʻia i ka ʻaila.

²² “Mai ke koko aʻe o ka poʻe i make, A mai ka momona aʻe o ka poʻe ikaika, ʻAʻole i hoʻi i hope ke kakaka o Ionatana, ʻAʻole hoʻi i hoʻi nele mai ka pahi kaua a Saula.

²³ “Ua aloha nō, a ua ʻoluʻolu hoʻi ʻo Saula a ʻo Ionatana i ko lāua ola ʻana, A i ko lāua make ʻana, ʻaʻole lāua i hoʻokaʻawale ʻia; Ua ʻoi aku ko lāua māmā i ko nā ʻaeto, A me ko lāua ikaika i ko nā liona.

²⁴ “E nā kaikamāhine o kā ʻIseraʻela, e kanikau aku ʻoukou iā Saula, Nāna ʻoukou i hōʻaʻahu aku i ke kapa ʻula, a me nā mea nani; Nāna i hoʻonani i ko ʻoukou kapa i ke gula.

²⁵ “Kai ka hāʻule ʻana o ka poʻe ikaika i waena o ke kaua ʻana! E Ionatana, ua pepehi ʻia ʻoe ma luna o nā wahi kiʻekiʻe ou.

²⁶ “Ua ʻehaʻeha loa au nou, e kuʻu hoahānau, e Ionatana; He ʻoluʻolu loa ʻoe iaʻu; he kupanaha kou aloha iaʻu, E ʻoi mai ana i ke aloha o nā wāhine.

²⁷ “Kai ka hāʻule ʻana o ka poʻe ikaika, A me ka pau ʻana o nā mea kaua!”