KA ʻEUANELIO I KĀKAU ʻIA AI E IOANE 9 - Ka Baibala Hemolele

1 Hoʻōla ʻo Iesū i ka makapō. 13 Hoʻohewa nā Parisaio i ua kanaka lā. 24 Hoʻokolokolo lākou iā ia a kipaku akula i waho. 35 Manaʻoʻiʻo ke kanaka iā ia, a hoʻomana akula iā ia.

MOKUNA IX.

¹ ¶ A i kona hele ʻana, ʻike nō ia i kekahi kanaka i makapō mai ka hānau ʻana mai.

² Nīnau akula kāna poʻe haumāna iā ia, ʻī akula, “E Rabi, ʻo wai kai hewa, ʻo ia nei anei, a ʻo kona mau mākua anei, i hānau makapō mai ai ia?”

³ ʻĪ maila ʻo Iesū, “ʻAʻole i hewa ʻo ia nei, ʻaʻole hoʻi ʻo kona mau mākua; akā, ʻo ka mea ia e ʻike ʻia ai nā hana a ke Akua iā ia.

⁴ “He pono noʻu e hana i nā hana a ka Mea nāna au i hoʻouna mai, ʻoiai ka lā; e hiki mai auaneʻi ka pō, ʻaʻohe kanaka e hiki ke hana i laila.

⁵ “Iaʻu e noho ai i ke ao nei, ʻo wau nō ka mālamalama o kēia ao.”

⁶ A pau aʻela kāna ʻōlelo ʻana ia mau mea, kuha ihola ia ma ka lepo, a hokahokai ihola i ke kuha me ka lepo, a hoʻopala aʻela i ka lepo ma nā maka o ua makapō lā;

⁷ a ʻī maila iā ia, “E hele ʻoe, e holoi ma ka wai ʻauʻau ʻo Siloama,” (ma ka hoʻohālike ʻana, “ʻO ka hoʻouna ʻia”); no laila hele akula ia, a holoi ihola, a hoʻi maila e ʻike ana.

⁸ No ia mea, nīnau aʻela nā hoalauna, a me ka poʻe i ʻike iā ia ma mua, he makapō, “ʻAʻole anei ʻo ia nei ka mea i noho e nonoi ana?”

⁹ ʻĪ maila kekahi poʻe, “ʻO ia nō;” a kekahi poʻe, “Ua like ʻo ia me ia;” akā, ʻī maila ʻo ia, “ʻO wau nō ia.”

¹⁰ No laila, nīnau akula lākou iā ia, “Pehea lā i hoʻokaʻakaʻa ʻia ai kou mau maka?”

¹¹ ʻŌlelo maila ia, ʻī maila, “He kanaka i kapa ʻia ʻo Iesū, nāna i hokahokai ka lepo, a hoʻopala i kuʻu maka, a ʻī maila iaʻu, ‘E hele i ka wai ʻauʻau ʻo Siloama, a holoi.’ Hele aku au, a holoi, a loaʻa iaʻu ka ʻike.”

¹² No ia hoʻi, nīnau akula lākou iā ia, “Ai hea ʻo ia?” ʻĪ maila ia, “ʻAʻole au i ʻike.”

¹³ ¶ Alakaʻi akula lākou i ka mea i makapō ma mua i ka poʻe Parisaio.

¹⁴ He Sābati ka manawa a Iesū i hokahokai ai i ka lepo, a hoʻokaʻakaʻa mai ai i kona maka.

¹⁵ A laila nīnau hou akula ka poʻe Parisaio iā ia i ka mea i ʻike ai ʻo ia. ʻĪ maila ia iā lākou, “Hoʻopala maila ia i ka lepo ma kuʻu mau maka, holoi ihola au, a ua ʻike.”

¹⁶ No ia hoʻi, ʻōlelo aʻela kekahi poʻe o nā Parisaio, “ʻAʻole no ke Akua kēia kanaka; no ka mea, ʻaʻole ia i mālama i ka Sābati.” ʻŌlelo maila kekahi poʻe, “Pehea lā e hiki ai i ke kanaka hewa ke hana i nā hana mana me kēia?” A mokuāhana ihola lākou.

¹⁷ Nīnau hou akula lākou i ua makapō lā, “He aha kāu e ʻōlelo ai nona, i kona hoʻokaʻakaʻa i kou mau maka?” ʻĪ maila kēlā, “He kāula ia.”

¹⁸ ʻAʻole naʻe i manaʻoʻiʻo nā Iudaio nona, ua makapō ia, a ua loaʻa iā ia ka ʻike, a kāhea akula lākou i nā mākua o ka mea i loaʻa ka ʻike.

¹⁹ A nīnau akula lākou iā lāua, ʻī akula, “ʻO kā ʻolua keiki anei kēia, ka mea a ʻolua i ʻī mai ai, ua hānau makapō ʻia? Pehea lā ia i ʻike ai i kēia wā?”

²⁰ ʻŌlelo maila kona mau mākua iā lākou, ʻī maila, “Ua ʻike māua, ʻo kā māua keiki nō ia, a ua hānau makapō ia;

²¹ akā, ʻo ka mea i ʻike ai ʻo ia i kēia wā, ʻaʻole ʻo māua i ʻike; ʻo ka mea hoʻi nāna i hoʻokaʻakaʻa kona mau maka, ʻaʻole ʻo māua i ʻike. He kanaka makua nō ia, e nīnau aku ʻoukou iā ia; nāna nō e haʻi mai nona iho.”

²² ʻŌlelo maila kona mau mākua pēlā, no ka makaʻu i ka poʻe Iudaio; no ka mea, ua holo ʻē ka manaʻo o ka poʻe Iudaio, inā paha e hōʻoiaʻiʻo mai kekahi, ʻo ia ka Mesia, e kipaku ʻia ʻo ia i waho o ka hale hālāwai.

²³ No ia mea, i ʻōlelo mai ai kona mau mākua, “He kanaka makua ia; e nīnau aku ʻoukou iā ia.”

²⁴ ¶ A laila kāhea hou akula lākou i ua kanaka lā, ka mea i makapō, ʻī akula iā ia, “E hoʻonani aku ʻoe i ke Akua; ua ʻike mākou he kanaka hewa kēia.”

²⁵ No ia mea hoʻi, ʻōlelo maila ia, ʻī maila, “Inā he kanaka hewa ia ʻaʻole au i ʻike; hoʻokahi mea aʻu i ʻike, ma mua he makapō koʻu, ʻānō lā ua ʻike.”

²⁶ Nīnau hou akula lākou iā ia, “He aha kāna i hana mai ai iā ʻoe? Pehea lā ia i hoʻokaʻakaʻa mai ai i kou mau maka?”

²⁷ ʻĪ maila ʻo ia iā lākou, “Ua haʻi aku au iā ʻoukou, ʻaʻole ʻoukou i hoʻolohe mai; no ke aha lā e makemake ai ʻoukou e lohe hou? Ke manaʻo nei anei ʻoukou e lilo i haumāna nāna?”

²⁸ Henehene akula lākou iā ia, ʻī akula, “ʻO ʻoe nō kāna haumāna; akā, he poʻe haumāna mākou na Mose.

²⁹ “Ua ʻike nō mākou, ua ʻōlelo mai nō ke Akua ma o Mose lā; akā, ʻo kēia kanaka, ʻaʻole mākou i ʻike i kona wahi i hele mai ai.”

³⁰ ʻŌlelo akula ua kanaka lā, ʻī akula iā lākou, “He mea kupanaha kā kēia, ʻo ko ʻoukou ʻike ʻole i kona wahi i hele mai, ua hoʻokaʻakaʻa mai nō naʻe ia i koʻu mau maka.

³¹ “Ua ʻike nō kākou ʻaʻole ke Akua e hoʻolohe mai i ka poʻe hewa; akā, inā e haipule kekahi i ke Akua, a e hana hoʻi i kona makemake, ʻo ia kāna e hoʻolohe mai ai.

³² “Mai ke kumu mai, ʻaʻole i lohe ʻia, ua hoʻokaʻakaʻa kekahi i nā maka o ka mea i hānau makapō mai.

³³ “Inā ʻaʻole no ke Akua mai kēia kanaka, inā ʻaʻole loa e hiki iā ia ke hana i kekahi mea.”

³⁴ ʻŌlelo akula lākou, ʻī akula iā ia, “Ua hānau ʻokoʻa ʻoe i loko o nā hewa, a ke aʻo mai nei anei ʻoe iā mākou?” A kipaku akula lākou iā ia ma waho.

³⁵ ¶ Lohe aʻela ʻo Iesū, ua kipaku lākou iā ia i waho; a hālāwai akula me ia, ʻī akula iā ia, “Ke manaʻoʻiʻo nei anei ʻoe i ke Keiki a ke Akua?”

³⁶ Nīnau akula ia, ʻī akula, “ʻO wai lā ia, e ka Haku, i manaʻoʻiʻo aku ai au iā ia?”

³⁷ ʻĪ maila ʻo Iesū iā ia, “Ua ʻike nō ʻoe iā ia, a ʻo ka mea e kamaʻilio pū ana me ʻoe, ʻo ia nō ia.”

³⁸ ʻĪ akula kēlā, “Ke manaʻoʻiʻo nei au;” a kukuli hoʻomaikaʻi aku iā ia.

³⁹ ʻŌlelo maila ʻo Iesū, “No ka hoʻoponopono kaʻu i hele mai ai i kēia ao, i lilo ai ka poʻe ʻike ʻole i poʻe ʻike; a i lilo ai ka poʻe ʻike i poʻe makapō.”

⁴⁰ A lohe aʻela kekahi poʻe o nā Parisaio me ia i kēia mea, nīnau akula lākou iā ia, “ʻO mākou anei kekahi i makapō?”

⁴¹ ʻĪ maila ʻo Iesū iā lākou, “Inā ua makapō ʻoukou, inā ua hewa ʻole ʻoukou; akā, ke ʻōlelo nei ʻoukou, ‘Ua ʻike mākou;’ no ia mea, ke koe nei ko ʻoukou hewa.”