KA ʻEUANELIO I KĀKAU ʻIA AI E IOANE 8 - Ka Baibala Hemolele

3 No ka wahine moekolohe. 12 ʻO Iesū ka mālamalama o kēia ao. 30 Nui ka poʻe manaʻoʻiʻo. 33 Hoʻākāka mai ʻo Iesū, ʻo nā Iudaio he poʻe lākou na ka hewa, a he poʻe keiki lākou na ka diabolō.

MOKUNA VIII.

¹ ¶ Hele akula ʻo Iesū i ka mauna ʻo ʻOliveta.

² A i ka wanaʻao hoʻi hou ia i ka luakini, a hele akula nā kānaka a pau i ona lā; a noho ihola ia, a aʻo maila iā lākou.

³ Alakaʻi akula nā kākau ʻōlelo a me nā Parisaio i ona lā i kekahi wahine i loaʻa e moekolohe ana; a hoʻokū akula iā ia i waena;

⁴ ʻōlelo akula lākou iā ia, “E ke Kumu, ua loaʻa kēia wahine e moekolohe ana.

⁵ “Kauoha maila ʻo Mose iā mākou i loko o ke Kānāwai, e hailuku ʻia i ka pōhaku ka mea i hana pēlā: he aha hoʻi kāu e ʻōlelo mai ai?”

⁶ ʻŌlelo aku lākou i kēia i mea e hoʻāʻo ai iā ia, i loaʻa ai iā lākou ka mea e hoʻāhewa aku ai iā ia. Kūlou ihola ʻo Iesū i lalo, a kahakaha ihola kona lima ma ka lepo.

⁷ A i ko lākou nīnau mau ʻana aku iā ia, ea aʻela ia i luna, ʻī maila iā lākou, “ʻO ka mea hala ʻole o ʻoukou, ʻo ia mua ke pehi aku iā ia i ka pōhaku.”

⁸ Kūlou hou ihola ia i lalo, a kahakaha ihola ma ka lepo.

⁹ A lohe aʻela lākou, a ua hoʻāhewa ʻia lākou e ko lākou lunaʻikehala, hele pākahi akula lākou i waho, mai nā lunakahiko ka hoʻomaka ʻana, a hiki i ka poʻe i lalo loa; a koe ihola ʻo Iesū wale nō, a me ka wahine e kū ana i waena.

¹⁰ Ea aʻela ʻo Iesū i luna, ʻaʻohe mea ʻē aʻe āna i ʻike ai, ʻo ka wahine wale nō, nīnau maila iā ia, “E ka wahine, ʻauhea lā kēlā poʻe i hoʻopiʻi mai nei iā ʻoe? ʻAʻole anei kekahi i hoʻopaʻi mai iā ʻoe?”

¹¹ ʻĪ akula ia, “ʻAʻole kekahi, e ka Haku.” ʻĪ maila ʻo Iesū iā ia, “ʻAʻole nō hoʻi au e hoʻopaʻi aku iā ʻoe; e hele ʻoe, mai hana hewa hou aku.”

¹² ¶ ʻŌlelo hou maila ʻo Iesū iā lākou, ʻī maila, “ʻO wau nō ka mālamalama o ke ao nei; ʻo ka mea e hahai mai iaʻu, ʻaʻole ia e hele i ka pouli; akā, e loaʻa iā ia ka mālamalama e ola ai.”

¹³ No laila ʻōlelo akula nā Parisaio iā ia, “Ke hōʻike nei ʻoe nou iho, ʻaʻole pono kāu hōʻike ʻana.”

¹⁴ ʻŌlelo maila ʻo Iesū ʻī maila iā lākou, “Inā e hōʻike aku au noʻu iho, he pono kaʻu hōʻike ʻana; no ka mea, ua ʻike au i koʻu wahi i hele mai ai, a me koʻu wahi e hele aku ai; akā, ʻaʻole ʻoukou i ʻike i koʻu wahi i hele mai ai, a me koʻu wahi e hele aku ai.

¹⁵ “Ke hoʻāhewa nei ʻoukou ma muli o ke kino, ʻaʻole au e hoʻāhewa aku i kekahi.

¹⁶ “Inā e hoʻāhewa aku au, he pono kaʻu hoʻohewa ʻana; no ka mea, ʻaʻole ʻo wau wale nō; akā, ʻo māua me ka Makua nāna au i hoʻouna mai.

¹⁷ “Ua palapala ʻia i loko o ko ʻoukou kānāwai, he pono ka hōʻike ʻana a nā kānaka ʻelua.

¹⁸ “ʻO wau nō kekahi e hōʻike noʻu iho, a ʻo ka Makua nāna au i hoʻouna mai, ʻo ia kekahi e hōʻike mai noʻu.”

¹⁹ No ka mea nīnau akula lākou iā ia, “ʻAuhea kou Makua?” ʻĪ maila ʻo Iesū, “ʻAʻole ʻoukou i ʻike iaʻu, ʻaʻole hoʻi i koʻu Makua: inā ua ʻike ʻoukou iaʻu; inā ua ʻike nō hoʻi ʻoukou i koʻu Makua.”

²⁰ ʻŌlelo maila ʻo Iesū i kēia mau ʻōlelo ma kahi waihona kālā, i kāna aʻo ʻana i loko o ka luakini; ʻaʻole hoʻi kekahi i lālau aku iā ia; no ka mea, ʻaʻole i hiki mai kona manawa.

²¹ ¶ ʻŌlelo hou maila ʻo Iesū iā lākou, “E hele aku ana au, a e ʻimi ʻoukou iaʻu, a e make ʻoukou i loko o ko ʻoukou hewa; a i koʻu wahi e hele ai, ʻaʻole e hiki iā ʻoukou ke hele i laila.”

²² A laila ʻōlelo ihola nā Iudaio, “E pepehi anei kēlā iā ia iho? No ka mea, ʻī maila ia, ‘I koʻu wahi e hele ai, ʻaʻole e hiki iā ʻoukou ke hele i laila.’”

²³ ʻĪ maila ʻo ia iā lākou, “No lalo nei ʻoukou; no luna mai nō wau; no ke ao nei ʻoukou; ʻaʻole wau no ke ao nei.

²⁴ “No ia mea i ʻōlelo aku ai au iā ʻoukou, e make auaneʻi ʻoukou i loko o ko ʻoukou hewa; no ka mea, a i ʻole ʻoukou e manaʻo mai, ʻo wau nō ia, e make nō ʻoukou i loko o ko ʻoukou hewa.”

²⁵ No laila nīnau akula lākou iā ia, “ʻO wai ʻoe?” ʻĪ maila ʻo Iesū iā lākou, “ʻO wau nō ka mea aʻu i haʻi aku ai iā ʻoukou i kinohi.

²⁶ “He nui kaʻu mau mea e ʻōlelo aku ai, a e hoʻohewa aku ai iā ʻoukou; akā, ʻo ka Mea nāna au i hoʻouna mai he ʻoiaʻiʻo ia; a ʻo nā mea aʻu i lohe ai iā ia, ʻo ia kaʻu e ʻōlelo aku nei i ko ke ao nei.”

²⁷ ʻAʻole lākou i ʻike, ʻo ka Makua, kāna i ʻōlelo mai ai iā lākou.

²⁸ No ia hoʻi, ʻōlelo maila ʻo Iesū iā lākou, “Aia kau aku ʻoukou i ke Keiki a ke Kanaka i luna, a laila e ʻike ʻoukou, ʻo wau nō ia, ʻaʻole hoʻi naʻu wale iho e hana aku i kekahi mea; akā, ʻo nā mea a koʻu Makua i aʻo mai ai iaʻu, ʻo ia nā mea aʻu e ʻōlelo aku nei.

²⁹ “A ʻo ka Mea nāna au i hoʻouna mai ʻo ia pū kekahi me aʻu; ʻaʻole i waiho wale mai ka Makua iaʻu ʻo wau wale nō; no ka mea, ke hana mau nei au i nā mea āna i ʻoluʻolu ai.”

³⁰ I kāna ʻōlelo ʻana ia mau mea, nui ka poʻe i manaʻoʻiʻo iā ia.

³¹ ¶ A laila ʻōlelo maila ʻo Iesū i ka poʻe Iudaio i manaʻoʻiʻo iā ia, “Inā e hoʻomau ʻoukou ma kaʻu ʻōlelo, a laila he poʻe haumāna ʻiʻo ʻoukou naʻu.

³² “A e ʻike auaneʻi ʻoukou i ka ʻoiaʻiʻo, a ʻo ka ʻoiaʻiʻo e kuʻu aku iā ʻoukou.”

³³ ʻŌlelo akula lākou iā ia, “He mamo mākou na ʻAberahama, ʻaʻole loa mākou i noho pio na kekahi; pehea lā kāu i ʻōlelo mai ai, ‘E kuʻu ʻia ʻoukou’?”

³⁴ ʻŌlelo maila Iesū iā lākou, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo ka mea e hana ana i ka hewa, he kauā ia na ka hewa.

³⁵ “ʻAʻole e noho mau loa ke kauā ma ka hale; akā, ʻo ke keiki ʻo ia ke noho mau loa.

³⁶ “Inā na ke Keiki ʻoukou e hoʻonoho kaʻawale, a laila e kaʻawale ʻiʻo ʻoukou.

³⁷ “Ua ʻike nō au, he mamo ʻoukou na ʻAberahama; akā, ke ʻimi nei ʻoukou iaʻu e pepehi; no ka mea, ʻaʻole i komo ʻiʻo kaʻu ʻōlelo i loko o ʻoukou.

³⁸ “Ke ʻōlelo aku nei au i ka mea aʻu i ʻike ai i koʻu Makua; a ke hana nei hoʻi ʻoukou i ka mea a ʻoukou i ʻike ai i ko ʻoukou makua.”

³⁹ ʻŌlelo akula lākou, ʻī akula iā ia, “ʻO ʻAberahama ko mākou makua.” ʻĪ maila ʻo Iesū iā lākou, “Inā he poʻe keiki ʻoukou na ʻAberahama, inā ua hana ʻoukou i nā hana a ʻAberahama.

⁴⁰ “Akā, ʻānō ke ʻimi nei ʻoukou e pepehi iaʻu, i ke kanaka nāna i haʻi aku iā ʻoukou ka ʻoiaʻiʻo aʻu i lohe ai i ke Akua; ʻaʻole pēlā kā ʻAberahama i hana ai.

⁴¹ “Ke hana nei ʻoukou i nā hana a ko ʻoukou makua.” A laila ʻōlelo akula lākou iā ia, “ʻAʻole mākou i hānau ʻia no ka moekolohe; hoʻokahi o mākou Makua, ʻo ke Akua.”

⁴² ʻŌlelo maila ʻo Iesū iā lākou, “Inā ʻo ke Akua ko ʻoukou Makua, inā ua aloha mai ʻoukou iaʻu; no ka mea, no ke Akua mai au a hele mai nei; ʻaʻole naʻu wale iho i hele mai nei; akā, nāna nō au i hoʻouna mai.

⁴³ “No ke aha lā i ʻike ʻole ai ʻoukou i kaʻu ʻōlelo? No ka mea, no ka hiki ʻole iā ʻoukou ke hoʻolohe i kaʻu ʻōlelo.

⁴⁴ “Na ko ʻoukou makua ʻoukou na ka diabolō, a makemake nō ʻoukou e hana i nā kuko o ko ʻoukou makua. He pepehi kanaka ia mai ke kumu mai, ʻaʻole ia i kū ma ka ʻoiaʻiʻo; no ka mea, ʻaʻohe ʻoiaʻiʻo i loko ona. Inā ʻōlelo ʻo ia i ka wahaheʻe, ʻōlelo nō ʻo ia i kāna iho; no ka mea, he wahaheʻe ʻo ia, a ʻo ka makua hoʻi ia no ka wahaheʻe.

⁴⁵ “A no kaʻu ʻōlelo ʻana aku i ka ʻoiaʻiʻo, ʻo ia ka mea i manaʻoʻiʻo ʻole mai ai ʻoukou iaʻu.

⁴⁶ “ʻO wai lā ka mea o ʻoukou e hōʻike mai i koʻu hewa? Inā ʻōlelo aku au i ka ʻoiaʻiʻo, no ke aha lā ʻoukou i manaʻoʻiʻo ʻole mai ai iaʻu?

⁴⁷ “ʻO ka mea no ke Akua, ʻo ia ke hoʻolohe i kā ke Akua ʻōlelo; ʻaʻole nō ʻoukou e hoʻolohe mai; no ka mea, ʻaʻole no ke Akua ʻoukou.”

⁴⁸ ¶ ʻŌlelo akula nā Iudaio, ʻī akula iā ia, “ʻAʻole anei he pono ke ʻōlelo mākou, ʻo kā Samaria ʻoe, he daimonio hoʻi kou?”

⁴⁹ ʻŌlelo maila ʻo Iesū, “ʻAʻole oʻu daimonio; akā, ke hoʻomaikaʻi nei au i koʻu Makua, a ke hōʻino mai nei ʻoukou iaʻu.

⁵⁰ “ʻAʻole au e ʻimi i koʻu hanohano iho; hoʻokahi nō Mea nāna e ʻimi a e hoʻopono mai.

⁵¹ “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, inā e mālama kekahi i kaʻu ʻōlelo, ʻaʻole loa ia e ʻike i ka make.”

⁵² A laila ʻōlelo akula nā Iudaio iā ia, “ʻĀnō lā, ua ʻike mākou, he daimonio kou. Ua make ʻo ʻAberahama a me nā kāula; a ke ʻōlelo mai nei ʻoe, ‘Inā e mālama kekahi i kaʻu ʻōlelo, ʻaʻole loa ia e make.’

⁵³ “Ua ʻoi aku anei ʻoe ma mua o ʻAberahama, ʻo ko mākou kupuna, ka mea i make? A ua make hoʻi nā kāula; ʻo wai lā ʻoe i kou manaʻo iho?”

⁵⁴ ʻŌlelo maila ʻo Iesū, “Inā e hoʻomaikaʻi au iaʻu iho, he mea ʻole koʻu hoʻomaikaʻi ʻana; ʻo koʻu Makua ke hoʻomaikaʻi mai iaʻu, ʻo ka mea a ʻoukou e ʻōlelo nei, ‘ʻO ko ʻoukou Akua ia.’

⁵⁵ “ʻAʻole naʻe ʻoukou i ʻike iā ia, ʻo wau kai ʻike iā ia; inā e ʻōlelo aku au, ʻaʻole au i ʻike iā ia, inā ua like au me ʻoukou, he wahaheʻe; akā, ua ʻike au iā ia, ke mālama nō hoʻi au i kāna ʻōlelo.

⁵⁶ “ʻOliʻoli ihola ʻo ʻAberahama, e ʻike i koʻu manawa; a ʻike ihola nō ia, a hauʻoli ihola.”

⁵⁷ ʻŌlelo akula nā Iudaio iā ia, “ʻAʻole ou kanalima makahiki, a ua ʻike anei ʻoe iā ʻAberahama?”

⁵⁸ ʻĪ akula ʻo Iesū iā lākou, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ma mua o ko ʻAberahama noho ʻana, ʻO WAU NŌ.”

⁵⁹ A laila lālau ihola lākou i nā pōhaku e pehi iā ia; hele malū akula ʻo Iesū i waho o ka luakini ma waena o lākou, pēlā ʻo ia i pakele ai.