KA ʻEUANELIO I KĀKAU ʻIA AI E IOANE 7 - Ka Baibala Hemolele

1 Hele malū akula ʻo Iesū ma Ierusalema i ka ʻAhaʻaina. 14 Aʻo akula ia i loko o ka luakini. 40 Nui nā manaʻo a nā kānaka nona. 45 Manaʻoʻiʻo kekahi, manaʻo kānalua kekahi, manaʻo pepehi kekahi.

MOKUNA VII.

¹ ¶ Ma hope iho o ia mau mea, kaʻahele aʻela ʻo Iesū i Galilaia; ʻaʻole ona makemake e kaʻahele i Iudea; no ka mea, ua ʻimi nā Iudaio e pepehi iā ia.

² A ua kokoke mai nō ka ʻAhaʻaina Kauhalelewa a nā Iudaio.

³ No ia mea, ʻōlelo akula kona mau hoahānau iā ia, “E haʻalele ʻoe i kēia wahi, a e hele aku i Iudea, i ʻike ai kāu poʻe haumāna i nā hana āu e hana ai.

⁴ “No ka mea, ʻaʻohe mea hana malū, ke makemake ia e ʻike ʻia mai ʻo ia. Inā e hana ʻoe i kēia mau mea, e hōʻike aku ʻoe iā ʻoe iho i ko ke ao nei.”

⁵ ʻAʻole naʻe ʻo kona poʻe hoahānau i manaʻoʻiʻo iā ia.

⁶ ʻŌlelo maila ʻo Iesū iā lākou, “ʻAʻole i hiki mai koʻu manawa; akā, ʻo ko ʻoukou manawa ua maopopo mau nō ia.

⁷ “ʻAʻole e inaina mai ko ke ao nei iā ʻoukou; ke inaina mai nei nō naʻe lākou iaʻu; no ka mea, ʻo wau ke hōʻike aku no lākou, ua hewa kā lākou hana ʻana.

⁸ “ʻO ʻoukou ke piʻi i kēia ʻahaʻaina; ʻaʻole au e piʻi ʻānō i kēia ʻahaʻaina; no ka mea, ʻaʻole i hiki maopopo mai koʻu manawa.”

⁹ A pau aʻela kāna ʻōlelo ʻana ia mau mea iā lākou, noho iho ia i Galilaia.

¹⁰ ¶ A piʻi akula kona poʻe hoahānau, a laila piʻi malū akula ia i ka ʻahaʻaina, ʻaʻole i ʻikea.

¹¹ No laila ʻimi ihola ka poʻe Iudaio iā ia ma ka ʻahaʻaina, a nīnau aʻela lākou, “ʻAuhea ʻo ia?”

¹² A nui loa aʻela ka hoʻopaʻapaʻa ʻana o ua ʻaha kanaka lā nona; ʻōlelo maila kekahi poʻe, “He maikaʻi ʻo ia”; ʻī maila kekahi poʻe, “ʻAʻole, ke hoʻopunipuni mai nei ia i nā kānaka.”

¹³ ʻAʻole naʻe kekahi i ʻōlelo mai nona ma ke ākea, no ka makaʻu i ka poʻe Iudaio.

¹⁴ ¶ I waena o ka ʻahaʻaina, piʻi maila ʻo Iesū i loko o ka luakini, a aʻo maila.

¹⁵ A kāhāhā ihola ka naʻau o nā Iudaio, ʻī aʻela, “Pehea lā i ʻike ai ʻo ia nei i ka Palapala, ʻaʻole ia i aʻo ʻia?”

¹⁶ ʻŌlelo maila ʻo Iesū iā lākou, ʻī maila, “ʻO kaʻu mea e aʻo aku nei, ʻaʻole naʻu ia; akā, na ka Mea nāna au i hoʻouna mai.

¹⁷ “Inā makemake kekahi e hana i kona makemake, e ʻike nō ia i ka mea aʻu e ʻōlelo nei, na ke Akua mai ia, ʻaʻole naʻu iho.

¹⁸ “ʻO ka mea e ʻōlelo aku i kāna iho, ʻo ia ke ʻimi e hoʻonani iā ia iho; akā, ʻo ka mea i ʻimi e hoʻonani i ka Mea nāna ia i hoʻouna mai, he ʻoiaʻiʻo kāna, ʻaʻole he wahaheʻe i loko ona.

¹⁹ “ʻAʻole anei ʻo Mose i hāʻawi mai iā ʻoukou i ke Kānāwai, ʻaʻole hoʻi kekahi o ʻoukou e mālama i ke Kānāwai? No ke aha lā ʻoukou e ʻimi nei e pepehi iaʻu?”

²⁰ ʻŌlelo akula ka ʻaha kanaka, ʻī akula, “He daimonio kou, ʻo wai lā ke ʻimi e pepehi iā ʻoe?”

²¹ ʻŌlelo maila ʻo Iesū, ʻī maila iā lākou, “Ua hana iho nei au i kekahi hana, a kāhāhā ko ʻoukou naʻau a pau ia mea.

²² “Na Mose i hāʻawi mai iā ʻoukou ke ʻoki poepoe, ʻaʻole naʻe na Mose mai ia, na ka poʻe kūpuna mai; a ke ʻoki poepoe nei ʻoukou i ke kanaka i ka lā Sābati.

²³ “Inā e ʻoki poepoe ʻia ke kanaka i ka lā Sābati, i haʻi ʻole ʻia ai ke Kānāwai o Mose, ke huhū mai nei anei ʻoukou iaʻu, i kuʻu hoʻōla ʻana i ke kanaka i ka lā Sābati?

²⁴ “Mai manaʻo ʻoukou ma ka mea o waho; akā, ma ka pono ʻiʻo ʻoukou e manaʻo ai.”

²⁵ ¶ A laila ʻōlelo aʻela kekahi poʻe no Ierusalema, “ʻAʻole anei kēia ka mea a lākou e ʻimi nei e pepehi?

²⁶ “Aia hoʻi, ke ʻōlelo wiwo ʻole mai nei ia, ʻaʻole lākou e ʻōlelo aku iā ia. Ua ʻike maopopo anei ka poʻe aliʻi, ʻo ia nō ka Mesia?

²⁷ “Ua ʻike nō kākou i kahi i hele mai ai kēia; akā, aia hiki mai ka Mesia, ʻaʻole e ʻike kekahi i kona wahi i hele mai ai.”

²⁸ No laila kāhea maila ʻo Iesū i kāna aʻo ʻana i loko o ka luakini, ʻī maila, “Ua ʻike ʻoukou iaʻu, ʻike hoʻi ʻoukou i koʻu wahi i hele mai ai; ʻaʻole au i hele mai noʻu iho; akā, ʻo ka Mea nāna au i hoʻouna mai, he ʻoiaʻiʻo ia, ka Mea a ʻoukou i ʻike ʻole ai.

²⁹ “ʻO wau kai ʻike iā ia; no ka mea, nona mai wau, a nāna hoʻi au i hoʻouna mai.”

³⁰ No ia mea, ʻimi ihola lākou e hopu iā ia; ʻaʻole naʻe i lālau aku kekahi lima iā ia; no ka mea, ʻaʻole i hiki mai kona manawa.

³¹ Akā, nui nā mea o ua ʻaha kanaka lā i manaʻoʻiʻo iā ia, ʻī ihola, “Aia hiki mai ka Mesia, e ʻoi aku anei nā hana mana āna e hana mai ai, ma mua o nā mea a kēia kanaka i hana ai?”

³² Lohe aʻela nā Parisaio i ka ʻōhumu ʻana o ua ʻaha kanaka lā i kēia mau mea nona; hoʻouna akula nā Parisaio a me nā kāhuna nui i nā ilāmuku e lālau iā ia.

³³ A laila ʻōlelo maila ʻo Iesū iā lākou, “ʻAʻole au e liʻuliʻu me ʻoukou, a hoʻi aku au i ka Mea nāna au i hoʻouna mai.

³⁴ “E ʻimi auaneʻi ʻoukou iaʻu, ʻaʻole e loaʻa; a ma koʻu wahi e noho ai, ʻaʻole loa ʻoukou e hiki aku.”

³⁵ No ia mea, nīnau ihola nā Iudaio iā lākou iho, “Ma hea anei ʻo ia e hele ai, i loaʻa ʻole ai ʻo ia iā kākou? E hele anei ia i ka poʻe i puehu liʻiliʻi i waena o nā Helene, a e aʻo aku i nā Helene?

³⁶ “He aha hoʻi kēia mea āna i ʻōlelo mai nei, ‘E ʻimi auaneʻi ʻoukou iaʻu, ʻaʻole e loaʻa; a ma koʻu wahi e noho ai, ʻaʻole loa ʻoukou e hiki aku’?”

³⁷ ¶ I ka lā nui ma ka hope o ua ʻahaʻaina lā, kū aʻela ʻo Iesū, kāhea akula, i ka ʻī ʻana aʻe, “Inā e make wai kekahi, e hele mai ia i oʻu nei e inu.

³⁸ “ʻO ka mea e manaʻoʻiʻo iaʻu, e like me kā ka Palapala Hemolele i ʻī mai ai, ‘E kahe mau mai nā muliwai no loko mai o kona ʻōpū.’”

³⁹ (ʻO kēia kāna i ʻōlelo ai no ka ʻUhane, ka mea e loaʻa auaneʻi i ka poʻe e manaʻoʻiʻo iā ia; ʻaʻole i hiki mai ka ʻUhane Hemolele ia manawa; no ka mea, ʻaʻole i hoʻonani ʻia ʻo Iesū ia wā.)

⁴⁰ No ia hoʻi, he nui ka poʻe o ua ʻaha kanaka lā i ko lākou lohe ʻana ia ʻōlelo, ʻōlelo ihola lākou, “He ʻoiaʻiʻo, ʻo ke Kāula kēia.”

⁴¹ ʻŌlelo maila kekahi poʻe, “ʻO ka Mesia kēia.” Akā, nīnau aʻela kekahi poʻe, “E hele mai anei ka Mesia no Galilaia mai?

⁴² “ʻAʻole anei i ʻī mai ka Palapala Hemolele, na nā mamo a Dāvida mai ka Mesia, a no Betelehema mai, ke kūlanakauhale o Dāvida?”

⁴³ Kūʻē ihola kekahi poʻe me kekahi poʻe nona.

⁴⁴ Makemake ihola kekahi poʻe e hopu iā ia, ʻaʻole naʻe kekahi i kau aku i ka lima ma luna ona.

⁴⁵ ¶ A laila hoʻi maila nā ilāmuku i nā kāhuna nui a me ka poʻe Parisaio; a nīnau maila lākou iā lākou lā, “No ke aha lā i lawe ʻole mai ai ʻoukou iā ia?”

⁴⁶ ʻĪ akula nā ilāmuku, “ʻAʻole loa he kanaka i ʻōlelo like me kēia kanaka.”

⁴⁷ Nīnau maila nā Parisaio iā lākou, “ʻO ʻoukou anei kekahi i hoʻopunipuni ʻia?

⁴⁸ “Ua manaʻoʻiʻo nō anei kekahi o ka poʻe aliʻi, a me nā Parisaio iā ia?

⁴⁹ “Akā, ʻo kēia ʻaha kanaka ʻike ʻole i ke Kānāwai, ua hoʻohewa ʻia lākou.”

⁵⁰ Nīnau aʻela ʻo Nikodemo iā lākou, (ʻo ka mea i hele i ona lā i ka pō, ʻo ia kekahi o lākou,)

⁵¹ “Ke hoʻohewa nei anei ko kākou Kānāwai i ke kanaka ma mua o ka lohe ʻana iā ia, a ʻike hoʻi i kāna mea i hana ai?”

⁵² ʻŌlelo maila lākou iā ia, ʻī maila, “No Galilaia anei ʻoe? E ʻimi, a ʻike ʻoe, ʻaʻohe kāula no loko mai o Galilaia.”

⁵³ A hoʻi akula kēlā mea kēia mea i kona hale iho.