KA ʻEUANELIO I KĀKAU ʻIA AI E IOANE 5 - Ka Baibala Hemolele

1 Hoʻōla ʻo Iesū i ke kanaka maʻi i ka lā Sābati. 10 Hoʻohewa nā Iudaio iā ia i kāna hana pēlā i ka lā Sābati, a manaʻo lākou e pepehi iā ia. 17 Hoʻākāka mai ʻo Iesū i ka pono o kāna hana. 19 Hōʻike mai hoʻi ia i ka hewa nui o ko lākou hoʻomaloka ʻana; a i ko lākou mālama ʻole i kāna ʻōlelo, ua mālama ʻole lākou i kā Mose.

MOKUNA V.

¹ ¶ Ma hope iho o ia mau mea, he ʻahaʻaina a nā Iudaio, a piʻi akula ʻo Iesū i Ierusalema.

² A ma Ierusalema, ma ka Puka Hipa, he wai ʻauʻau, ʻo Beteseda ka inoa i ka ʻōlelo Hebera, ʻelima ona mau hale malumalu.

³ He nui loa nā mea maʻi e moe ana i loko, ʻo nā makapō, nā ʻoʻopa, a me nā lōlō, e kali ana i ka ʻaleʻale o ka wai.

⁴ No ka mea, i kekahi manawa, iho maila kekahi ʻānela i loko o ka wai ʻauʻau, a hōʻaleʻale i ka wai; a ʻo ka mea i iho mua i loko o ka wai ma hope o ka hōʻaleʻale ʻana o ka wai, ua ola kona maʻi i loʻohia ai ʻo ia.

⁵ Ma laila kekahi kanaka, he kanakolukumamāwalu nā makahiki o kona maʻi ʻana.

⁶ ʻIke maila ʻo Iesū iā ia e moe ana, a ʻike nō hoʻi, he kahiko loa kona maʻi ʻana, nīnau maila iā ia, “ʻEā, ke makemake nei anei ʻoe e ola?”

⁷ ʻĪ akula ke kanaka maʻi iā ia, “E ka Haku, ʻaʻohe oʻu kanaka, nāna au e lawe aku i loko o ka wai ʻauʻau, i ka wā i ʻaleʻale ai ka wai; akā, i koʻu hele ʻana aku, iho ʻē akula kekahi i loko ma mua oʻu.”

⁸ ʻŌlelo maila ʻo Iesū iā ia, “E kū aʻe, e kaʻikaʻi i kou wahi moe, a hele.”

⁹ A ola koke aʻela ua kanaka lā, a lawe akula ia i kona wahi moe, a hele akula. ʻO ka lā Sābati nō ia.

¹⁰ No ia mea, ʻōlelo akula nā Iudaio i ka mea i hoʻōla ʻia, “He Sābati kēia; ʻaʻole ʻoe e pono ke hali i kahi moe.”

¹¹ ʻĪ maila ʻo ia iā lākou, “ʻO ka Mea nāna au i hoʻōla, ʻo ia kai ʻōlelo mai iaʻu, ‘E kaʻikaʻi i kou wahi moe, a e hele.’”

¹² Nīnau akula lākou iā ia, “ʻO wai ke kanaka i ʻōlelo mai ai iā ʻoe, ‘E kaʻikaʻi i kou wahi moe, a e hele’?”

¹³ ʻO ka mea i hoʻōla ʻia, ʻaʻole ia i ʻike iā ia; no ka mea, ua hoʻonalo ʻē Iesū iā ia iho, he nui nā kānaka ma ia wahi.

¹⁴ Ma hope iho, ʻike maila ʻo Iesū iā ia i loko o ka luakini, ʻī maila iā ia, “Eia hoʻi, ua hoʻōla ʻia ʻoe; mai hana hewa hou aku, o loʻohia ʻoe e ka ʻino i ʻoi aku.”

¹⁵ Hele akula ia kanaka, a haʻi akula i nā Iudaio, ʻo Iesū ka Mea nāna ia i hoʻōla.

¹⁶ No ia mea, hoʻomaʻau akula nā Iudaio iā Iesū, a ʻimi lākou e pepehi iā ia, no kāna hana ʻana ia mea i ka lā Sābati.

¹⁷ ʻŌlelo maila ʻo Iesū iā lākou, “Ke hana mau nei koʻu Makua, a ke hana nei nō hoʻi au.”

¹⁸ No ia mea hoʻi, ʻimi nui aʻela nā Iudaio e pepehi iā ia, ʻaʻole no kona mālama ʻole i ke Sābati wale nō; akā, no kāna ʻōlelo ʻana, ʻo ke Akua kona Makua, e hoʻolike ana iā ia iho me ke Akua.

¹⁹ ¶ ʻŌlelo maila ʻo Iesū, ʻī maila iā lākou, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻaʻole e hiki i ke Keiki wale iho nō, ke hana aku i kekahi mea, ke ʻike ʻole ia i ka Makua e hana ana ia mea; no laila, ʻo nā mea āna i hana ai, ʻo ia hoʻi nā mea a ke Keiki e hana ai.

²⁰ “Ke aloha nei ka Makua i ke Keiki, a ke hōʻike nei iā ia i nā mea a pau āna e hana ai; a e hōʻike mai kēlā iā ia i nā hana e ʻoi aku ma mua o kēia, i mahalo ai ʻoukou.

²¹ “E like me ko ka Makua hoʻāla ʻana i ka poʻe make, a me ka hoʻōla iā lākou; pēlā nō hoʻi ke Keiki e hoʻōla mai ai i ka poʻe āna i makemake ai.

²² “ʻAʻole no ka Makua e hoʻopaʻi i kekahi; akā, ua hāʻawi mai ia i ka hoʻopaʻi ʻana a pau na ke Keiki;

²³ i hoʻomaikaʻi ai nā kānaka a pau i ke Keiki e like me lākou i hoʻomaikaʻi ai i ka Makua. ʻO ka mea hoʻomaikaʻi ʻole i ke Keiki, ʻo ia ke hoʻomaikaʻi ʻole i ka Makua, nāna ia i hoʻouna mai.

²⁴ “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo ka mea e hoʻolohe i kaʻu ʻōlelo, a e manaʻoʻiʻo hoʻi i ka Mea nāna au i hoʻouna mai, he ola mau loa kona, ʻaʻole ia e lilo i ka hoʻohewa ʻia; akā, ua lilo aʻe ia mai ka make aʻe i ke ola.

²⁵ “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, e hiki mai auaneʻi ka manawa, a ʻo nēia hoʻi ia, e hoʻolohe ai ka poʻe make i ka leo o ke Keiki a ke Akua; a ʻo ka poʻe hoʻolohe, ʻo lākou ke ola.

²⁶ “No ka mea, e like me ka Makua he ola kona i loko ona iho; pēlā hoʻi ia i hāʻawi mai ai i ke Keiki i ola nona i loko ona iho.

²⁷ “A ua hāʻawi mai hoʻi iā ia i ka mana e hoʻopaʻi aku ai; no ka mea, ʻo ia ke Keiki a ke Kanaka.

²⁸ “Mai kāhāhā ko ʻoukou naʻau i kēia; no ka mea, e hiki mai auaneʻi ka manawa e lohe ai ka poʻe a pau i loko o nā ilina i kona leo,

²⁹ a e hele mai i waho; ʻo ka poʻe i hana maikaʻi, e ala mai lākou no ke ola; akā, ʻo ka poʻe i hana ʻino, e ala mai lākou no ka make.

³⁰ ¶ “ʻAʻole e hiki iaʻu wale iho, ke hana i kekahi mea: e like me kaʻu i lohe ai, pēlā hoʻi kaʻu e hoʻopaʻi ai; a he pono kaʻu hoʻopaʻi ʻana; no ka mea, ʻaʻole wau e ʻimi i koʻu makemake iho; akā, i ka makemake o ka Makua nāna au i hoʻouna mai.

³¹ “Inā ʻo wau wale nō e hōʻike noʻu iho, ʻaʻole e pono koʻu hōʻike ʻana.

³² “ʻO haʻi ke hōʻike mai noʻu; a ua ʻike au, he ʻoiaʻiʻo kāna hōʻike ʻana mai noʻu.

³³ “Hoʻouna akula ʻoukou i o Ioane lā, a ua hōʻike mai ia ma ka ʻoiaʻiʻo.

³⁴ “ʻAʻole naʻe oʻu manaʻo i kā ke kanaka hōʻike ʻana; akā, ke ʻōlelo nei au ia mau mea, i ola ai ʻoukou.

³⁵ “He kukui ʻaʻā mālamalama ʻo ia; a ʻoliʻoli ihola ʻoukou i kona mālamalama i kekahi manawa.

³⁶ “Akā, he hōʻike koʻu i ʻoi aku ma mua o kā Ioane; no ka mea, ʻo nā hana a ka Makua i hāʻawi mai ai naʻu e hana, ʻo kēia mau hana aʻu e hana nei ke hōʻike mai noʻu, ua hoʻouna mai ka Makua iaʻu.

³⁷ “ʻO ka Makua hoʻi nāna au i hoʻouna mai, ʻo ia kai hōʻike mai noʻu. ʻAʻole ʻoukou i lohe i kona leo, ʻaʻole hoʻi i ʻike i kona helehelena.

³⁸ “ʻAʻole iā ʻoukou kāna ʻōlelo e noho ana i loko o ʻoukou; no ia hoʻi, ʻo ka mea āna i hoʻouna mai ai, ʻaʻole ʻoukou i manaʻoʻiʻo iā ia.

³⁹ “E huli ʻoukou i ka Palapala Hemolele; no ka mea, ua manaʻo ʻoukou, he ola mau loa ko ʻoukou ma laila; a ʻo ia ka mea nāna i hōʻike noʻu.

⁴⁰ “ʻAʻole o ʻoukou makemake e hele mai i oʻu nei, i loaʻa ai iā ʻoukou ke ola.

⁴¹ “ʻAʻole oʻu manaʻo i ka hoʻomaikaʻi ʻia e kānaka.

⁴² “Akā, ke ʻike nei au iā ʻoukou, ua loaʻa ʻole iā ʻoukou ke aloha i ke Akua i loko o ʻoukou.

⁴³ “Ua hele mai nei au ma ka inoa o koʻu Makua, ʻaʻole ʻoukou i mālama mai iaʻu; inā hele mai kekahi ma kona inoa iho, e mālama nō ʻoukou iā ia.

⁴⁴ “Pehea lā e hiki ai iā ʻoukou ke manaʻoʻiʻo, me ko ʻoukou manaʻo ʻana i ka hoʻomaikaʻi ʻia o kekahi e kekahi, a me ka ʻimi ʻole i ka hoʻomaikaʻi ʻia mai e ke Akua wale nō?

⁴⁵ “Mai manaʻo ʻoukou, e hoʻopiʻi aku au iā ʻoukou i ka Makua; hoʻokahi nō mea nāna ʻoukou e hoʻopiʻi aku, ʻo Mose, ka mea a ʻoukou e hilinaʻi nei.

⁴⁶ “Inā ua manaʻoʻiʻo ʻoukou i kā Mose, inā ua manaʻoʻiʻo ʻoukou iaʻu; no ka mea, ua palapala mai ia noʻu.

⁴⁷ “Akā, i ʻole ʻoukou e manaʻoʻiʻo i kāna mau palapala, pehea lā ʻoukou e manaʻoʻiʻo ai i kaʻu mau ʻōlelo.”