KA ʻEUANELIO I KĀKAU ʻIA AI E IOANE 4 - Ka Baibala Hemolele

1 Hele akula ʻo Iesū mai Iudea a Galilaia. 7 Kāna ʻōlelo me ka wahine no Samaria. 39 Nui nā mea o ko Samaria i manaʻoʻiʻo iā ia. 46 Hoʻōla ʻo Iesū i ke keiki a kekahi aliʻi.

MOKUNA IV.

¹ ¶ A ʻike aʻela ka Haku, ua lohe ka poʻe Parisaio, he nui nā haumāna a Iesū i hoʻohaumāna ai, a i bapetizo ai hoʻi, a he hapa kā Ioane;

² (ʻaʻole naʻe ʻo Iesū iho i bapetizo ai, ʻo kāna poʻe haumāna nō,)

³ haʻalele ihola ia iā Iudea, a hoʻi akula i Galilaia.

⁴ A he pono nō ia ke hele aku ma waena o Samaria.

⁵ A hiki akula ia i kekahi kūlanakauhale o Samaria, ʻo Sukara ka inoa, e kokoke ana i ka ʻāina a Iakoba i hāʻawi aku ai no kāna keiki no Iosepa.

⁶ I laila ka pūnāwai o Iakoba. No ka māluhiluhi o Iesū i ka hele ʻana, noho ihola ia ma ua pūnāwai lā; ʻo ke ono paha ia o ka hora.

⁷ Hele aʻela kekahi wahine no Samaria e huki wai; ʻī maila ʻo Iesū iā ia, “Hō mai noʻu e inu.”

⁸ No ka mea, ua hala aʻela nā haumāna āna i ke kūlanakauhale e kūʻai i ʻai.

⁹ A laila nīnau akula ka wahine no Samaria iā ia, “No ke aha lā ʻoe, he Iudaio, e noi mai nei iaʻu, i ka wahine no Samaria, i mea inu?” No ka mea, ʻaʻole e launa pū nā Iudaio me ko Samaria.

¹⁰ ʻŌlelo maila ʻo Iesū iā ia, ʻī maila, “Inā ua ʻike ʻoe i ka makana o ke Akua, a i ka mea hoʻi e ʻōlelo ana iā ʻoe, ‘Hō mai noʻu e inu;’ inā ua noi mai ʻoe iā ia, a ua hāʻawi aku ia i ka wai ola nou.”

¹¹ ʻŌlelo akula ka wahine iā ia, “E ka Haku, ʻaʻole ou bākeke, a ua hohonu ka pūnāwai; no hea lā e loaʻa ai iā ʻoe ua wai ola lā?

¹² “Ua ʻoi aku anei ʻoe ma mua o Iakoba o ko mākou kupuna, nāna i hāʻawi kēia pūnāwai no mākou, a nāna hoʻi i inu i ka wai, a me kāna poʻe keiki, a me kāna poʻe holoholona?”

¹³ ʻŌlelo maila ʻo Iesū, ʻī maila iā ia, “ʻO nā mea a pau e inu i kēia wai, e make wai hou aku nō ia.

¹⁴ “Akā, ʻo ka mea e inu i ka wai aʻu e hāʻawi aku ai iā ia, ʻaʻole loa ia e make wai hou aku; akā, ʻo ka wai aʻu e hāʻawi aku ai iā ia, e lilo ia i wai puna i loko ona e pipiʻi ana i ke ola mau loa.”

¹⁵ ʻŌlelo akula ka wahine iā ia, “E ka Haku, hō mai noʻu ua wai lā, i ʻole e make wai hou aku au, i ʻole hoʻi e hele hou mai i ʻaneʻi e huki.”

¹⁶ ʻŌlelo maila ʻo Iesū iā ia, “Ō hele, e kāhea aku i kāu kāne, a e hele hou mai i ʻaneʻi.”

¹⁷ ʻŌlelo akula ka wahine, ʻī akula, “ʻAʻohe aʻu kāne.” ʻĪ maila ʻo Iesū iā ia, “He pono kāu i ʻī mai nei, ‘ʻAʻohe aʻu kāne’;

¹⁸ no ka mea, ʻelima aʻe nei āu mau kāne, a ʻo kāu mea i kēia manawa, ʻaʻole ia ʻo kāu kāne; he ʻoiaʻiʻo kāu i ʻī mai nei.”

¹⁹ ʻŌlelo akula ua wahine lā iā ia, “E ka Haku, ke ʻike nei au he kāula ʻoe.

²⁰ “Ma luna o kēia mauna ko mākou poʻe mākua i hoʻomana ai; akā, ke ʻōlelo mai nei ʻoukou, aia ma Ierusalema kahi pono e hoʻomana aku ai.”

²¹ ʻŌlelo maila ʻo Iesū iā ia, “E ka wahine, e manaʻoʻiʻo mai i kaʻu, e hiki mai auaneʻi ka manawa, ʻaʻole ma kēia mauna, ʻaʻole hoʻi ma Ierusalema e hoʻomana aku ai ʻoukou i ka Makua.

²² “Ke hoʻomana nei ʻoukou i ka mea a ʻoukou i ʻike ʻole ai; ke hoʻomana nei mākou i ka mea a mākou i ʻike ai; no ka mea, no nā Iudaio mai ke ola.

²³ “Akā, e hele mai ana ka manawa, a ʻo nei hoʻi ia, ʻo ka poʻe hoʻomana ʻoiaʻiʻo, e hoʻomana lākou i ka Makua me ka ʻuhane a me ka ʻoiaʻiʻo; no ka mea, ʻo ia ka poʻe a ka Makua i makemake ai e hoʻomana aku iā ia.

²⁴ “He ʻUhane ke Akua; a ʻo ka poʻe hoʻomana iā ia, he pono nō lākou e hoʻomana aku iā ia me ka ʻuhane a me ka ʻoiaʻiʻo.”

²⁵ ʻŌlelo akula ka wahine iā ia, “Ua ʻike nō au e hele mai ana ka Mesia, ka mea i ʻōlelo ʻia ʻo Kristo; aia hiki mai ia, nāna nō e hoʻākāka mai nā mea a pau iā mākou.”

²⁶ ʻŌlelo maila ʻo Iesū iā ia, “ʻO wau nō ia, ka mea e kamaʻilio pū ana me ʻoe.”

²⁷ ¶ A laila hoʻi maila kāna poʻe haumāna, a kāhāhā ihola ko lākou naʻau i kāna kamaʻilio pū ʻana me ka wahine; ʻaʻole naʻe kekahi i nīnau aku iā ia, “He aha kāu e ʻimi nei? A no ke aha lā kāu e kamaʻilio pū me ia?”

²⁸ No laila haʻalele ka wahine i kona ipu wai, a hoʻi akula i ke kūlanakauhale, a ʻōlelo akula i nā kānaka,

²⁹ “E hele mai, e ʻike i ke kanaka, nāna i haʻi mai iaʻu nā mea a pau aʻu i hana ai; ʻaʻole anei ʻo ia ka Mesia?”

³⁰ A laila puka mai lākou no loko mai o ke kūlanakauhale, a hele i ona lā.

³¹ A ma waena iho, nonoi akula kāna poʻe haumāna iā ia, ʻī akula, “E Rabi, e ʻai.”

³² ʻĪ maila ʻo ia iā lākou, “He ʻai kaʻu e ʻai ai, ka mea a ʻoukou i ʻike ʻole ai.”

³³ No ia mea, nīnau aʻela nā haumāna kekahi i kekahi, “Ua lawe mai anei kekahi i ʻai nāna?”

³⁴ ʻŌlelo maila ʻo Iesū iā lākou, “ʻO kaʻu ʻai kēia, e hana au i ka makemake o ka Mea nāna au i hoʻouna mai, a e hoʻopau hoʻi i kāna hana.

³⁵ “ʻAʻole anei ʻoukou e ʻōlelo, ‘ʻEhā malama i koe, a hiki mai ka ʻohi palaoa ʻana?’ Aia hoʻi, ke ʻōlelo aku nei au iā ʻoukou, e ʻalawa aʻe ko ʻoukou mau maka, a e nānā i nā mahina ʻai; ua keʻokeʻo mai ʻānō no ka ʻohi ʻana.

³⁶ “A ʻo ka mea ʻohi, loaʻa nō iā ia ka uku, a hōʻiliʻili ia i ka hua no ke ola mau loa; i ʻoliʻoli pū ai ka mea nāna i lūlū me ka mea nāna i ʻohi.

³⁷ “No ka mea, pēlā i akāka ai, he ʻoiaʻiʻo ka ʻōlelo, ‘Na kekahi e lūlū, na kekahi mea ʻē hoʻi e ʻohi.’

³⁸ “Ua hoʻouna aku au iā ʻoukou e ʻohi i ka mea a ʻoukou i luhi ʻole ai; na haʻi i hana, a komo ʻoukou i loko o kā lākou hana.”

³⁹ ¶ A nui ko Samaria poʻe o ua kūlanakauhale lā i manaʻoʻiʻo iā ia, no ka ʻōlelo a ka wahine i hōʻike aku ai, “Ua haʻi mai ia iaʻu i nā mea a pau aʻu i hana ai.”

⁴⁰ A ʻo ko Samaria i hele aku i ona lā, nonoi akula lākou iā ia e noho me lākou; a noho ihola ia ma laila i nā lā ʻelua.

⁴¹ A nui loa nā mea ʻē aʻe i manaʻoʻiʻo ma kāna ʻōlelo.

⁴² ʻĪ akula lākou i ka wahine, “ʻAʻole mākou i manaʻoʻiʻo ma kāu ʻōlelo wale nō; no ka mea, ʻo mākou iho kekahi i lohe, a ʻike hoʻi, ʻo ka Hoʻōla ʻoiaʻiʻo kēia o ke ao nei, ʻo ka Mesia.”

⁴³ ¶ A ma hope iho o nā lā ʻelua, hele akula ia mai laila aku, a hiki i Galilaia.

⁴⁴ No ka mea, na Iesū nō i hōʻike mai, ʻaʻole mālama ʻia ke kāula ma kona ʻāina iho.

⁴⁵ A hiki maila ia i Galilaia, hoʻokipa maila ko Galilaia iā ia, no ko lākou ʻike ʻana i nā mea a pau āna i hana ai ma Ierusalema i ka ʻahaʻaina; no ka mea, ua hele nō lākou i ua ʻahaʻaina lā.

⁴⁶ ¶ A hele hou akula ʻo Iesū ma Kāna i Galilaia, kahi āna i hoʻolilo ai ka wai i waina. A ua maʻi ke keiki a kekahi aliʻi ma Kaperenauma.

⁴⁷ A lohe aʻela ia, ua hiki mai ʻo Iesū i Galilaia mai Iudea mai, hele akula ia i ona lā, nonoi akula iā ia, e iho aʻe ia e hoʻōla i kāna keiki; no ka mea, ua kokoke ia e make.

⁴⁸ ʻĪ maila ʻo Iesū iā ia, “Inā ʻaʻole ʻoukou e ʻike i nā hōʻailona a me nā mea kupanaha, ʻaʻole ʻoukou e manaʻoʻiʻo mai.”

⁴⁹ ʻŌlelo aku ua aliʻi lā iā ia, “E ka Haku, e iho aʻe ʻoe, o make ʻē kuʻu keiki.”

⁵⁰ ʻŌlelo maila ʻo Iesū iā ia, “Ō hoʻi; ua ola kāu keiki.” A manaʻoʻiʻo aku ua kanaka lā i ka ʻōlelo a Iesū i haʻi mai ai iā ia, a hoʻi akula.

⁵¹ A i kona iho ʻana, hālāwai maila kāna mau kauā me ia, haʻi maila lākou, ʻī maila, “Ua ola kāu keiki.”

⁵² Nīnau akula ʻo ia iā lākou i ka hora ona i maha ai. ʻĪ maila lākou iā ia, “I nehinei i ka hiku o ka hora, i haʻalele ai ke kuni iā ia.”

⁵³ No ia mea, ʻike ihola ka makua kāne, ʻo ia ka hora i ʻōlelo mai ai ʻo Iesū iā ia, “Ua ola kāu keiki”; a manaʻoʻiʻo ihola nō ia, a me kona ʻohana a pau.

⁵⁴ ʻO kēia ka lua o ka hana mana a Iesū i hana ai, i kona hele ʻana i Galilaia mai Iudea mai.