KA ʻEUANELIO I KĀKAU ʻIA AI E IOANE 2 - Ka Baibala Hemolele

1 Hoʻolilo ihola ʻo Iesū i ka wai i waina. 12 Hele aku ʻo Iesū i Kaperenauma a i Ierusalema. 15 Hoʻomaʻemaʻe ʻo ia i ka luakini.

MOKUNA II.

¹ ¶ I ke kolu o ka lā, he ʻahaʻaina mare ma Kāna i Galilaia; i laila nō hoʻi ka makuahine o Iesū.

² Ua ʻōlelo ʻia ʻo Iesū, a me nā haumāna āna, e hele i ua ʻahaʻaina mare lā.

³ A nele i ka waina, ʻī akula ka makuahine o Iesū iā ia, “ʻAʻohe o lākou waina.”

⁴ ʻŌlelo maila Iesū iā ia, “E ka wahine, ʻo ke aha lā ia iā kāua? ʻAʻole i hiki mai koʻu manawa.”

⁵ ʻŌlelo akula kona makuahine i nā kauā, “ʻO ka mea āna e ʻōlelo mai ai iā ʻoukou, ʻo ia kā ʻoukou e hana ai.”

⁶ E waiho ana ma laila nā ipu wai pōhaku ʻeono, no ka hoʻomaʻemaʻe ʻana o ka poʻe Iudaio, he iwakāluakumamāhiku, he kanahā paha nā gālani e piha ai kā kekahi, kā kekahi.

⁷ ʻĪ maila ʻo Iesū iā lākou, “E hoʻopiha i nā ipu wai i ka wai.” Hoʻopiha iho lākou i ua mau mea lā, a piha loa.

⁸ ʻĪ mai hoʻi ʻo ia iā lākou, “E hoʻokahe mai ʻānō, a lawe aku i ka luna ʻahaʻaina.” A lawe akula lākou.

⁹ A i ka hoʻāʻo ʻana o ka luna ʻahaʻaina i ka wai i hoʻolilo ʻia i waina, ʻaʻole ʻo ia i ʻike i kahi i loaʻa ai, (ʻo nā kauā, nāna i hoʻokahe ka wai, kai ʻike,) kāhea akula ka luna ʻahaʻaina i ke kāne mare,

¹⁰ ʻī akula iā ia, “Lawe mua mai nō kēlā kanaka kēia kanaka i ka waina maikaʻi, a nui ko lākou inu ʻana, a laila i ka waina ʻino; ua mālama kā ʻoe i ka waina maikaʻi, a kēia manawa.”

¹¹ Hana ihola ʻo Iesū i kēia hana mana mua ma Kāna i Galilaia, a hōʻike aʻela ia i kona nani; a manaʻoʻiʻo akula kāna poʻe haumāna iā ia.

¹² ¶ Ma hope mai o kēia, iho akula ia i Kaperenauma, ʻo ia a me kona makuahine, a me kona mau hoahānau, a me kāna poʻe haumāna, ʻaʻohe nui nā lā i noho ai lākou ma laila.

¹³ ¶ Ua kokoke mai ka Mōliaola a nā Iudaio; a piʻi akula ʻo Iesū i Ierusalema.

¹⁴ A loaʻa akula iā ia ka poʻe e kūʻai ana i nā bipi, a me nā hipa, a me nā manu nūnū, a me ka poʻe kūʻai kālā, e noho ana i loko o ka luakini.

¹⁵ Hana ihola ia i mea hahau no nā kaula liʻiliʻi, a hoʻokuke akula ʻo ia iā lākou a pau i waho o ka luakini, a me nā hipa, a me nā bipi; lū akula i nā kālā o ka poʻe kūʻai kālā, a hoʻokahuli i nā papa;

¹⁶ ʻōlelo maila ia i ka poʻe kūʻai manu nūnū, “E lawe aʻe i kēia mau mea mai kēia wahi aku; mai hoʻolilo ʻoukou i ka hale o koʻu Makua i hale kūʻai.”

¹⁷ Hoʻomanaʻo ihola kāna poʻe haumāna i ka mea i palapala ʻia, “«ʻO ka manaʻo nui i kou hale ka mea e ʻai mai nei iaʻu».”

¹⁸ Nīnau akula nā Iudaio iā ia, ʻī akula, “He aha ka hōʻailona āu e hōʻike mai ai iā mākou, i hana ai ʻoe i nēia mau mea?”

¹⁹ ʻŌlelo maila ʻo Iesū iā lākou, “E wāwahi ʻoukou i kēia luakini, a e kūkulu hou aku au ia i nā lā ʻekolu.”

²⁰ A laila ʻōlelo akula nā Iudaio, “Hoʻokahi kanahā makahiki a me kumamāono ka hana ʻana o kēia luakini, a e kūkulu hou anei ʻoe ia mea i nā lā ʻekolu?”

²¹ ʻO kona kino iho nō ka luakini āna i ʻōlelo mai ai.

²² A ala mai ʻo ia mai ka make mai, hoʻomanaʻo ihola kāna poʻe haumāna, ua ʻōlelo ʻo ia i kēia mea; a manaʻoʻiʻo ihola lākou i ka Palapala Hemolele, a me ka ʻōlelo a Iesū i ʻōlelo mai ai.

²³ ¶ A i kona noho ʻana ma Ierusalema i ka ʻAhaʻaina Mōliaola, he nui loa nā mea i manaʻoʻiʻo i kona inoa, i ko lākou ʻike ʻana i nā hana mana āna i hana ai.

²⁴ Akā, ʻaʻole ʻo Iesū i kuʻu aku iā ia iho no lākou; no ka mea, ua ʻike nō ʻo ia iā lākou a pau,

²⁵ ʻaʻole ona hemahema e pono ai ke hōʻike aku kekahi iā ia i ko ke kanaka; no ka mea, ua ʻike nō ia i ko loko o kānaka.