KA ʻEUANELIO I KĀKAU ʻIA AI E IOANE 15 - Ka Baibala Hemolele

1 No ke kumu waina, a me nā lālā. 12 Kauoha Iesū i nā haumāna e aloha kekahi i kekahi. 19 ʻO ka inaina o ko ke ao nei i nā haumāna, a iā Iesū a me ka Makua.

MOKUNA XV.

¹ ¶ “ʻO wau nō ke kumu waina ʻoiaʻiʻo, a ʻo koʻu Makua ka mahi waina.

² “ʻO ka lālā hua ʻole i loko oʻu, ʻo ia kāna e ʻoki aku; a ʻo ka lālā hua, ʻo ia kāna e hoʻomaʻemaʻe i māhuahua aʻe ai kona hua.

³ “ʻĀnō ua maʻemaʻe ʻoukou ma ka ʻōlelo aʻu i ʻōlelo aku ai iā ʻoukou.

⁴ “E noho ʻoukou i loko oʻu, a ʻo wau hoʻi i loko o ʻoukou. ʻAʻole e hiki i ka lālā ke hoʻohua ma ona iho, ke pili ʻole i ke kumu waina; pēlā e hiki ʻole ai iā ʻoukou ke pili ʻole mai iaʻu.

⁵ “ʻO wau nō ke kumu waina, ʻo ʻoukou nā lālā. ʻO ka mea e pili ana iaʻu, a ʻo wau hoʻi iā ia, ʻo ia ke hoʻohua nui mai; no ka mea, ʻaʻole mea iki e hiki iā ʻoukou ke hana, ke ʻole wau.

⁶ “Inā e pili ʻole mai kekahi iaʻu, ua hoʻokaʻawale ʻia aku ia e like me ka lālā, a ua maloʻo; a e hōʻiliʻili ʻia lākou, a e hoʻolei ʻia i loko o ke ahi, a ua pau i ka puhi ʻia.

⁷ “Inā e pili mai ʻoukou iaʻu, a e noho kaʻu mau ʻōlelo i loko o ʻoukou, a laila, e nonoi ʻoukou i kā ʻoukou mea e makemake ai, a e hāʻawi ʻia nō ia iā ʻoukou.

⁸ “Ma kēia mea e hoʻonani ʻia ai koʻu Makua, ke hoʻohua ʻoukou i ka hua he nui; a e lilo ʻoukou i poʻe haumāna naʻu.

⁹ “E like me ka Makua i aloha mai ai iaʻu, pēlā hoʻi au i aloha aku ai iā ʻoukou; e noho ʻoukou i loko o kuʻu aloha.

¹⁰ “Inā e mālama ʻoukou i kaʻu mau kauoha, e noho ʻoukou i loko o kuʻu aloha; e like me aʻu i mālama ai i nā kauoha a koʻu Makua, a e noho i loko o kona aloha.

¹¹ “Ua ʻōlelo aku au ia mau mea, i mau ai kuʻu ʻoliʻoli no ʻoukou, i māhuahua ai ko ʻoukou ʻoliʻoli.

¹² “Eia kaʻu kauoha, i aloha ai ʻoukou i kekahi i kekahi, e like me aʻu i aloha aku ai iā ʻoukou.

¹³ “ʻAʻole ko kekahi kanaka aloha i ʻoi aku i kēia, ʻo ka waiho aku a kekahi i kona ola no kona mau hoaaloha.

¹⁴ “ʻO ʻoukou koʻu mau hoaaloha, ke hana ʻoukou i nā mea aʻu e kauoha nei iā ʻoukou.

¹⁵ “ʻAʻole au e kapa hou aku iā ʻoukou he poʻe kauā; no ka mea, ʻaʻole e ʻike ke kauā i ka mea a kona haku e hana ai; akā, ua kapa aku au iā ʻoukou he poʻe hoaaloha; no ka mea, ua hōʻike aku au iā ʻoukou i nā mea a pau aʻu i lohe ai i koʻu Makua.

¹⁶ “ʻAʻole ʻoukou i wae mai iaʻu; akā, ʻo wau kai wae aku iā ʻoukou, a i hoʻokaʻawale iā ʻoukou, i hele ai ʻoukou, a e hoʻohua mai ai i ka hua, a i mau ai hoʻi ko ʻoukou hua; i hāʻawi mai ai ka Makua iā ʻoukou i ka mea a ʻoukou e nonoi ai iā ia ma koʻu inoa.

¹⁷ “ʻO kēia kaʻu e kauoha aku nei iā ʻoukou, e aloha aku ʻoukou i kekahi i kekahi.

¹⁸ “Inā e inaina ko ke ao nei iā ʻoukou, e hoʻomaopopo ʻoukou, ua inaina ʻē mai ia iaʻu ma mua o ʻoukou.

¹⁹ “Inā no ke ao nei ʻoukou, inā ua aloha mai ke ao nei i kona iho; ʻaʻole naʻe no ke ao nei ʻoukou; akā, ua wae au iā ʻoukou no loko mai o ke ao nei; no ia mea, ke inaina mai nei ko ke ao nei iā ʻoukou.

²⁰ “E hoʻomanaʻo ʻoukou i ka mea aʻu i ʻōlelo aku ai iā ʻoukou, ‘ʻAʻole i ʻoi aku ke kauā ma mua o kona haku.’ Inā ua hoʻomaʻau lākou iaʻu, e hoʻomaʻau nō hoʻi lākou iā ʻoukou; inā ua mālama lākou i kaʻu ʻōlelo, e mālama nō hoʻi lākou i kā ʻoukou.

²¹ “E hana mai nō lākou ia mau mea iā ʻoukou no koʻu inoa, no ko lākou ʻike ʻole i ka Mea nāna au i hoʻouna mai.

²² “Inā ʻaʻole au i hele mai, a ʻōlelo aku iā lākou, inā ʻaʻole o lākou hewa. ʻĀnō hoʻi, ʻaʻohe o lākou mea e uhi ai i ko lākou hewa.

²³ “ʻO ka mea e inaina mai iaʻu, ua inaina nō hoʻi ia i koʻu Makua.

²⁴ “Inā wau i hana ʻole i waena o lākou i nā hana ʻaʻole i hana ʻia e kekahi mea ʻē, inā ua hewa ʻole lākou; ʻānō hoʻi, ua ʻike lākou, a ua inaina mai lākou iaʻu, a me koʻu Makua.

²⁵ “Pēlā i kō ai ka ʻōlelo i palapala ʻia i loko o ko lākou Kānāwai, ‘«Ua inaina kumu ʻole mai lākou iaʻu».’

²⁶ “Aia hiki mai ke Kōkua, ka Mea e hoʻouna ʻia e aʻu mai ka Makua mai, ʻo ia ka ʻUhane ʻoiaʻiʻo, ka Mea i hele mai mai ka Makua mai, nāna nō e hōʻike aku noʻu;

²⁷ ‘o ʻoukou nō hoʻi kekahi e hōʻike aku; no ka mea, me aʻu nō ʻoukou mai ke kumu mai.”