KA ʻEUANELIO I KĀKAU ʻIA AI E IOANE 13 - Ka Baibala Hemolele

1 Holoi ʻo Iesū i nā wāwae o kāna poʻe haumāna. 18 No Iuda ka mea nāna ia i kumakaia. 31 No ka hoʻonani ʻia ʻana ʻo Iesū.

MOKUNA XIII.

¹ ¶ Ma mua o ka ʻAhaʻaina Mōliaola, ʻike ihola ʻo Iesū, ua hiki mai kona manawa e hele aku ai ia i ka Makua mai kēia ao aku, i ke aloha ʻana i kona poʻe ponoʻī i ke ao nei, ua aloha ʻo ia iā lākou a hiki i ka hope.

² A i ka ʻahaʻaina ʻana, ua hoʻokomo ka diabolō i loko o ka naʻau o Iuda ʻIsekariota na Simona, e kumakaia iā ia;

³ ʻike nō ʻo Iesū, ua hāʻawi mai ka Makua i nā mea a pau i kona lima, a ua hele mai ia mai ke Akua mai, a e hoʻi hou aku nō ia i ke Akua;

⁴ kū aʻela ia mai ka ʻahaʻaina aʻe, a waiho akula i kona ʻaʻahu; a lawe aʻela ia i ke kāwele, a kāʻei ihola iā ia iho.

⁵ A laila ninini ihola ia i ka wai i loko o ka pā holoi, a hoʻomaka ihola e holoi i nā wāwae o ka poʻe haumāna, a holoi maloʻo hoʻi me ke kāwele āna i kāʻei ʻia ai.

⁶ A hiki mai ia i o Simona Petero lā; nīnau akula ʻo ia iā ia, “E ka Haku, e holoi mai anei ʻoe i koʻu mau wāwae?”

⁷ ʻŌlelo maila ʻo Iesū, ʻī maila iā ia, “ʻO ka mea aʻu e hana nei, ʻaʻole ʻoe e ʻike i kēia wā; akā, e ʻike auaneʻi ʻoe ma muli aku.”

⁸ ʻĪ akula ʻo Petero iā ia, “ʻAʻole loa ʻoe e holoi mai i koʻu mau wāwae!” ʻĪ maila ʻo Iesū iā ia, “Inā e holoi ʻole aku au iā ʻoe, ʻaʻohe ou wahi kuleana pū me aʻu.”

⁹ ʻĪ akula ʻo Simona Petero iā ia, “E ka Haku, ʻaʻole ʻo nā wāwae wale nō oʻu, ʻo nā lima a me ke poʻo kekahi.”

¹⁰ ʻŌlelo maila ʻo Iesū iā ia, “ʻO ka mea i ʻauʻau ʻia, ʻo nā wāwae wale nō ke holoi ʻia e pono ai, a ua pau loa ia i ka maʻemaʻe; a ua maʻemaʻe ʻoukou, ʻaʻole naʻe ʻoukou a pau.”

¹¹ No ka mea, ua ʻike nō ia i ka mea nāna ia e kumakaia; no ia hoʻi, i ʻōlelo ai ʻo ia, “ʻAʻole pau ʻoukou i ka maʻemaʻe.”

¹² ¶ A pau aʻela kona holoi ʻana i ko lākou mau wāwae, lawe ihola ia i kona ʻaʻahu, a noho hou ihola i lalo, nīnau maila ʻo ia iā lākou, “Ke ʻike nei anei ʻoukou i ka mea aʻu i hana aku ai iā ʻoukou?

¹³ “Ke hea mai ʻoukou iaʻu, he Kumu, he Haku hoʻi; a ke ʻōlelo pono nei ʻoukou; no ka mea, ʻo ia nō wau.

¹⁴ “Inā hoʻi ʻo wau ka Haku a me ke Kumu i holoi i ko ʻoukou mau wāwae; he pono nō ʻoukou ke holoi kekahi i nā wāwae o kekahi.

¹⁵ “No ka mea, ua hāʻawi aku au i kumu hoʻolike no ʻoukou, e like me kaʻu i hana aku ai iā ʻoukou, pēlā ʻoukou e hana ai.

¹⁶ “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻaʻole e ʻoi aku ke kauā ma mua o kona haku; ʻaʻole hoʻi e ʻoi aku ka mea i hoʻouna ʻia ma mua o ka mea nāna ia i hoʻouna aku.

¹⁷ “A i ʻike ʻoukou i kēia mau mea, pōmaikaʻi ʻoukou, ke hana aku ia.

¹⁸ “ʻAʻole no ʻoukou a pau kaʻu e ʻōlelo nei; ua ʻike nō au i nā mea aʻu i wae ai; akā, i kō ai ka Palapala Hemolele, ‘«ʻO ka mea e ʻai pū ana i ka berena me aʻu, ua kaʻikaʻi ʻo ia i kona kuʻekuʻe wāwae iaʻu».’

¹⁹ “Ke haʻi aku nei au iā ʻoukou ma mua o ka wā e kō ai, aia kō ia, a laila e manaʻoʻiʻo ʻoukou, ʻo wau nō ia.

²⁰ “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo ka mea e launa mai i ka mea aʻu e hoʻouna aku ai, ʻo ia ke launa mai iaʻu; a ʻo ka mea e launa mai iaʻu, ʻo ia ke launa i ka Mea nāna au i hoʻouna mai.”

²¹ ¶ Pau aʻela kā Iesū ʻōlelo ʻana aku ia mau mea, luʻuluʻu ihola ka naʻau, a hōʻike maila ia, ʻī maila, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo kekahi o ʻoukou e kumakaia aku iaʻu.”

²² Nānā aʻela nā haumāna i kekahi i kekahi, me ke kānalua i ka mea nona ia i ʻōlelo ai.

²³ E hilinaʻi ana kekahi o kāna poʻe haumāna ma ka poli o Iesū, ka mea a Iesū i aloha ai.

²⁴ Kūnou aʻela ʻo Simona Petero iā ia e nīnau aku i ka mea nona ia i ʻōlelo ai.

²⁵ A laila ʻo ka mea e hilinaʻi ana ma ka umauma o Iesū, nīnau akula iā ia, “E ka Haku, ʻo wai lā ia?”

²⁶ ʻĪ maila ʻo Iesū, “ʻO ka mea aʻu e hāʻawi i ka hakina aʻu e hōʻū ai, ʻo ia nō ia.” A hōʻū ihola ia i ka hakina ʻai, hāʻawi akula ʻo ia na Iuda ʻIsekariota na Simona.

²⁷ A ma hope o ka hakina, a laila komo ihola ʻo Sātana i loko ona. ʻĪ maila hoʻi ʻo Iesū iā ia, “E hana koke ʻoe i kāu mea e hana aku ai.”

²⁸ ʻAʻole i ʻike kekahi o ka poʻe e ʻai ana i ke ʻano o ka mea āna i ʻōlelo aku ai iā ia.

²⁹ Manaʻo ihola kekahi poʻe no kā Iuda hali ʻana i ke ʻeke kālā, ua ʻōlelo aku ʻo Iesū iā ia, “E kūʻai i nā mea i pono ai no ka ʻahaʻaina”; a e hāʻawi aku paha i kekahi mea na ka poʻe ʻilihune.

³⁰ A loaʻa iā ia ka hakina ʻai, hele koke akula ia i waho; a ua pō ihola.

³¹ ¶ A puka akula ia, ʻōlelo maila ʻo Iesū, “ʻĀnō, ua hoʻonani ʻia mai ke Keiki a ke Kanaka, ua hoʻonani ʻia hoʻi ke Akua ma ona lā.

³² “Inā e hoʻonani ʻia ke Akua ma ona lā, e hoʻonani ʻia mai nō hoʻi ke Akua iā ia ma ona iho, a e hoʻonani koke mai nō ʻo ia iā ia.

³³ “E nā keiki aloha, he manawa pōkole koʻu me ʻoukou. E ʻimi mai auaneʻi ʻoukou iaʻu; a e like me kaʻu i ʻōlelo aku ai i nā Iudaio, ma koʻu wahi e hele ai, ʻaʻole loa e hiki iā ʻoukou ke hele i laila; pēlā hoʻi kaʻu e ʻōlelo aku nei iā ʻoukou ʻānō.

³⁴ “He kauoha hou kaʻu e hāʻawi aku nei iā ʻoukou, e aloha aku ʻoukou i kekahi i kekahi; e like me kaʻu i aloha ai iā ʻoukou, pēlā ʻoukou e aloha aku ai i kekahi i kekahi.

³⁵ “Ma kēia mea e ʻike ai nā kānaka a pau, he poʻe haumāna ʻoukou naʻu, ke aloha aku ʻoukou i kekahi i kekahi.”

³⁶ ¶ Nīnau akula Simona Petero iā ia, “E ka Haku, ma hea ʻoe e hele ai?” ʻĪ maila ʻo Iesū iā ia, “ʻO koʻu wahi e hele ai, ʻaʻole e hiki iā ʻoe ʻānō ke hahai mai iaʻu; akā, ma muli e hahai mai nō ʻoe iaʻu.”

³⁷ ʻĪ akula ʻo Petero iā ia, “E ka Haku, he aha ka mea e hiki ʻole ai iaʻu, ke hahai aku iā ʻoe i kēia wā? E waiho aku au i kuʻu ola nou.”

³⁸ ʻĪ maila ʻo Iesū iā ia, “E waiho aku anei ʻoe i kou ola noʻu? ʻOiaʻiʻo, he ʻoiaʻiʻo kaʻu e ʻōlelo aku nei iā ʻoe, ʻaʻole e kani mai ka moa, a ʻekolu kāu hōʻole ʻē ʻana iaʻu.”