KA ʻEUANELIO I KĀKAU ʻIA AI E IOANE 11 - Ka Baibala Hemolele

1 No ka maʻi o Lazaro a me kona make ʻana. 41 Hoʻāla maila ʻo Iesū iā ia. 47 Hoʻākoakoa ʻana o ka poʻe Parisaio i ka ʻahaʻōlelo.

MOKUNA XI.

¹ ¶ Ua maʻi kekahi, ʻo Lazaro, no Betania, no ke kauhale o Maria a me kona kaikuaʻana ʻo Mareta.

² ʻO kā Maria kēia i kāhinu ai i ka Haku i ka mea poni, a holoi hoʻi i kona wāwae me kona lauoho, nona ke kaikunāne maʻi, ʻo Lazaro.

³ Hoʻouna aʻela nā kaikuāhine i ona lā, ʻī aʻela, “E ka Haku, aia hoʻi ʻo ka mea āu i aloha ai, ua maʻi.”

⁴ A lohe aʻela ʻo Iesū, ʻī aʻela, “ʻAʻole kēia ka maʻi e make ai; akā, no ka nani o ke Akua, i hoʻonani ʻia ai hoʻi ke Keiki a ke Akua ma ia mea.”

⁵ Aloha aʻela ʻo Iesū iā Mareta, a me kona kaikaina, a me Lazaro.

⁶ A lohe aʻela ia, ua maʻi ʻo ia, a laila noho ihola ia ma ia wahi i nā lā ʻelua.

⁷ Ma hope iho, ʻōlelo maila ia i nā haumāna, “E hele hou kākou i Iudea.”

⁸ ʻĪ akula nā haumāna iā ia, “E Rabi, ua ʻimi iho nei nā Iudaio e hailuku iā ʻoe, a e hele hou anei ʻoe i laila?”

⁹ ʻĪ maila ʻo Iesū, “ʻAʻole anei he ʻumikumamālua hora o ke ao? Inā e hele kekahi i ke ao, ʻaʻole ia e ʻōkupe; no ka mea, ua ʻike nō ia i ka mālamalama o kēia ao.

¹⁰ “Akā, inā e hele kekahi i ka pō, e ʻōkupe nō ia; no ka mea, ʻaʻohe ona mālamalama.”

¹¹ Pau aʻela kāna ʻōlelo ʻana ia mea; a laila ʻī maila ʻo ia iā lākou, “Ua hiamoe ʻo Lazaro ko kākou hoaaloha; akā, e hele aku au e hoʻāla mai iā ia.”

¹² ʻĪ akula kāna poʻe haumāna, “E ka Haku, a i hiamoe ia, e ola auaneʻi.”

¹³ No kona make ʻana hoʻi kā Iesū i ʻōlelo ai; akā, manaʻo ihola lākou, no ka hoʻomaha ʻana ma ka hiamoe kāna i ʻōlelo ai.

¹⁴ A laila ʻōlelo akāka maila ʻo Iesū iā lākou, “Ua make ʻiʻo ʻo Lazaro.

¹⁵ “A ke ʻoliʻoli nei au no ʻoukou; no ka mea, ʻaʻole au i laila, i manaʻoʻiʻo ai ʻoukou; akā, e haele kākou i ona lā.”

¹⁶ ʻĪ akula ʻo Toma, i ʻōlelo ʻia ʻo Didumo, i kona mau hoa haumāna, “E haele hoʻi kākou, i make pū ai kākou me ia.”

¹⁷ ¶ A hiki akula ʻo Iesū, ʻike ihola ia, ʻahā ona lā i loko o ka hale kupapaʻu.

¹⁸ Ua kokoke ʻo Betania i Ierusalema, he ʻumi paha a me kumamālima setadia.

¹⁹ A nui ka poʻe Iudaio i hele aku i o Mareta lā, a me Maria, e hōʻoluʻolu iā lāua no ko lāua kaikunāne.

²⁰ A lohe aʻela ʻo Mareta, i ko Iesū hele ʻana mai, hoʻohālāwai akula kēlā me ia; akā, noho ihola ʻo Maria ma ka hale.

²¹ ʻŌlelo akula ʻo Mareta iā Iesū, “E ka Haku, inā ʻo ʻoe ma ʻaneʻi, inā ʻaʻole nō i make kuʻu kaikunāne.

²² “Akā, ua ʻike nō au ʻānō, ʻo ka mea āu e noi aku ai i ke Akua, ʻo ia kā ke Akua e hāʻawi mai ai iā ʻoe.”

²³ ʻŌlelo maila ʻo Iesū iā ia, “E ala hou mai nō kou kaikunāne.”

²⁴ ʻĪ akula ʻo Mareta iā ia, “Ua ʻike nō au e ala hou mai ia i ke ala hou ʻana i ka lā ma hope.”

²⁵ ʻĪ maila ʻo Iesū iā ia, “ʻO wau nō ke ala hou ʻana, a me ke ola; ʻo ka mea e manaʻoʻiʻo mai iaʻu, inā e make ia, e ola hou auaneʻi ʻo ia.

²⁶ “ʻO ka mea e ola ana, a e manaʻoʻiʻo mai iaʻu, ʻaʻole loa ia e make. Ke manaʻoʻiʻo nei anei ʻoe i kēia?”

²⁷ ʻĪ akula kēlā iā ia, “ʻAe, e ka Haku, ke manaʻoʻiʻo nei au ʻo ʻoe ka Mesia, ke Keiki a ke Akua, ka mea hele mai i ke ao nei.”

²⁸ A oki aʻela ia ʻōlelo, hoʻi akula ia, a hea malū akula iā Maria, kona kaikaina, ʻī akula, “Ua hiki mai ke Kumu, a ke hea mai nei iā ʻoe.”

²⁹ A lohe aʻela ia, kū koke aʻe, a hele akula i ona lā.

³⁰ ¶ ʻAʻole i hiki aku ʻo Iesū i ke kūlanahale, aia nō ia ma kahi i hālāwai ai ʻo Mareta me ia.

³¹ A ʻo nā Iudaio e noho pū ana me ia ma ka hale, a e hōʻoluʻolu ana iā ia, ʻike akula iā Maria e kū koke aʻe a hele i waho, hahai akula lākou iā ia, ʻī aʻela, “Ua hele aku nei ia ma ka hale kupapaʻu e uē ai ma laila.”

³² A hiki akula ʻo Maria i ko Iesū wahi, a ʻike akula iā ia, moe ihola ia ma kona wāwae, ʻī akula iā ia, “E ka Haku, inā ʻo ʻoe ma ʻaneʻi, inā ʻaʻole i make kuʻu kaikunāne.”

³³ A ʻike maila ʻo Iesū iā ia e uē ana, a me ka poʻe Iudaio i hele pū mai me ia e uē ana, auē ihola ia ma ka naʻau, a ʻehaʻeha hoʻi,

³⁴ a nīnau maila ia, “Ma hea lā ʻoukou i waiho ai iā ia?” ʻĪ akula lākou iā ia, “E ka Haku, e hele mai e nānā.”

³⁵ Uē ihola ʻo Iesū.

³⁶ No ia mea, ʻōlelo aʻela ka poʻe Iudaio, “Aia hoʻi, nani kona aloha iā ia!”

³⁷ ʻŌlelo aʻela kekahi poʻe o lākou, “ʻAʻole anei i hiki iā ia nei, nāna i hoʻokaʻakaʻa nā maka o ka makapō, ke hana, i ʻole ai e make kēia kanaka?”

³⁸ ¶ A laila uē hou ihola ʻo Iesū i loko ona, a hiki ma ka hale kupapaʻu. He ana ia, a ua pani ʻia i ka pōhaku.

³⁹ ʻĪ maila ʻo Iesū, “E lawe aku i ka pōhaku.” ʻĪ akula ʻo Mareta iā ia, ke kaikuahine o ka mea i make, “E ka Haku, ua pilau ia; no ka mea, ʻo ka hā kēia o ka lā.”

⁴⁰ ʻĪ maila ʻo Iesū iā ia, “ʻAʻole anei au i ʻōlelo aku iā ʻoe, inā e manaʻoʻiʻo mai ʻoe, e ʻike auaneʻi ʻoe i ka nani o ke Akua?”

⁴¹ A laila lawe aʻela lākou i ka pōhaku mai kahi o ka mea make i waiho ai. A leha aʻela ʻo Iesū i kona mau maka i luna, a ʻī akula, “E ka Makua, ke hoʻomaikaʻi aku nei au iā ʻoe, no kou hoʻolohe ʻana iaʻu.

⁴² “A ua ʻike nō au, ua hoʻolohe mai ʻoe iaʻu i nā manawa a pau; akā, no ka ʻaha kanaka e kū mai nei i ʻōlelo aku ai au, i manaʻoʻiʻo mai ai lākou, ʻo ʻoe kai hoʻouna mai iaʻu.”

⁴³ A pau kāna ʻōlelo ʻana ia mea, kāhea akula ia me ka leo nui, “E Lazaro, e hele mai ʻoe i waho.”

⁴⁴ A hele mai i waho ka mea i make, ua nākiʻi ʻia ma nā wāwae a ma nā lima i nā kahakahana lole; a ua kāʻei ʻia kona wahi maka a puni me ka hainakā. ʻĪ maila ʻo Iesū iā lākou, “E kala aʻe iā ia, a kuʻu aku iā ia e hele.”

⁴⁵ ¶ No ia mea, nui ka poʻe o nā Iudaio i hele mai i o Maria lā, a ʻike i nā mea a Iesū i hana ai, manaʻoʻiʻo aku lākou iā ia.

⁴⁶ A hele aku kekahi poʻe o lākou i nā Parisaio, a haʻi akula iā lākou i nā mea a Iesū i hana ai.

⁴⁷ ¶ A laila hoʻākoakoa aʻela nā kāhuna nui, a me nā Parisaio i ka ʻahaʻōlelo, ʻī aʻela lākou, “He aha kā kākou e hana ai? No ka mea, ua hana kēia kanaka i nā hana mana he nui nō.

⁴⁸ “Inā e waiho wale aku kākou iā ia pēlā, e manaʻoʻiʻo auaneʻi nā kānaka a pau iā ia; a e hele mai ko Roma, a e luku i ko kākou wahi a me ko kākou lāhui kanaka.”

⁴⁹ ʻO kekahi o lākou, ʻo Kaiapa, ʻo ia ke kahuna nui i kēlā makahiki, ʻī akula iā lākou, “ʻAʻole maopopo iki iā ʻoukou,

⁵⁰ ʻAʻole hoʻi ʻoukou i manaʻo, he pono nō kākou e make kekahi kanaka no nā kānaka, ʻaʻole hoʻi e luku ʻia ka lāhui kanaka a pau.”

⁵¹ ʻAʻole nāna iho kēia mea āna i ʻōlelo mai ai; akā, e noho kahuna nui ana ia i kēlā makahiki, wānana aʻela ia, e make ʻo Iesū no ka lāhui kanaka;

⁵² ʻaʻole naʻe no ia lāhui kanaka wale nō; akā, i hōʻuluʻulu mai ai hoʻi ia i nā keiki a ke Akua, i noho liʻiliʻi aku ai, i loko o ka hoʻokahi.

⁵³ Mai ia manawa mai, kūkā pū ihola lākou e pepehi iā ia.

⁵⁴ ¶ No ia mea, ʻaʻole i hele hōʻike hou ʻia akula ʻo Iesū i waena o nā Iudaio; akā, hele akula ia mai laila aku ma kahi kokoke i ka wao nahele, ma ke kūlanakauhale i kapa ʻia ʻo ʻEperaima, a ma laila ia i noho ai me kāna poʻe haumāna.

⁵⁵ A kokoke mai ka Mōliaola a nā Iudaio; a nui nā mea i hele aku i Ierusalema mai ka ʻāina aku ma mua o ka Mōliaola, i hoʻomākaukau ai lākou iā lākou iho.

⁵⁶ A laila ʻimi akula lākou iā Iesū, a nīnau aʻela lākou iā lākou iho e kū ana i loko o ka luakini, “He aha ko ʻoukou manaʻo, ʻaʻole anei ia e hele mai i ka ʻahaʻaina?”

⁵⁷ Ua kauoha aku nā kāhuna nui a me nā Parisaio, inā i ʻike kekahi i kona wahi e noho ai, e haʻi mai ia, i hopu aku lākou iā ia.