KA ʻEUANELIO I KĀKAU ʻIA AI E IOANE 10 - Ka Baibala Hemolele

1 ʻO Iesū ka puka, a me ke kahu hipa maikaʻi. 22 Hōʻike mai ʻo Iesū ma kāna mau hana ʻo ia ka Mesia. 30 ʻO ia a ʻo ka Makua hoʻokahi nō ia.

MOKUNA X.

¹ ¶ “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo ka mea komo ʻole ma ka puka i loko o ka pā hipa; akā, e piʻi aʻe ma kahi ʻē, he ʻaihue ia a me ka pōā.

² “Akā, ʻo ka mea e komo ma ka puka, ʻo ia ke kahu o nā hipa.

³ “Ke wehe aʻela ke kiaʻi puka nona, a ua hoʻolohe nā hipa i kona leo; a kāhea aku ia i kāna poʻe hipa ma ka inoa, a alakaʻi aku iā lākou ma waho.

⁴ “Aia kuʻu aku ia i kāna poʻe hipa ponoʻī ma waho, hele nō ia ma mua o lākou, a hahai mai nā hipa iā ia; no ka mea, ua hoʻomaopopo lākou i kona leo.

⁵ “ʻAʻole lākou e hahai aku i ke kanaka ʻē; akā, e holo lākou mai ona aku lā; no ka mea, ʻaʻole lākou i hoʻomaopopo i ka leo o nā kānaka ʻē.”

⁶ ʻŌlelo maila ʻo Iesū i kēia ʻōlelo nane iā lākou; ʻaʻole naʻe lākou i ʻike i ke ʻano o nā mea āna i ʻōlelo mai ai iā lākou.

⁷ ¶ No ia mea, ʻōlelo hou maila ʻo Iesū iā lākou, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo wau nō ka puka no nā hipa.

⁸ “ʻO ka poʻe a pau i hele mai ma mua oʻu, he poʻe ʻaihue lākou a me ka pōā; akā, ʻaʻole i hoʻolohe nā hipa iā lākou.

⁹ “ʻO wau nō ka puka; inā e komo kekahi ma oʻu nei, e ola ia, a e komo mai ia i loko, a e puka aku i waho, a e loaʻa iā ia ka ʻai.

¹⁰ “ʻO ka ʻaihue, hele mai ia e ʻaihue wale nō, a e pepehi, a e luku aku; i hele mai hoʻi au, i loaʻa ai iā lākou ke ola, a nui loa.

¹¹ “ʻO wau nō ke kahu hipa maikaʻi; ʻo ke kahu hipa maikaʻi, ʻo ia ke hāʻawi i kona ola iho no nā hipa.

¹² “Akā, ʻo ke kanaka i hoʻolimalima ʻia, ʻaʻole hoʻi ke kahu, ʻaʻole hoʻi nāna ponoʻī nā hipa, ʻike aku nō ia i ka ʻīlio hae e hele mai ana, a laila haʻalele aku ia i nā hipa, a holo akula; a hopu maila ka ʻīlio hae iā lākou, a hoʻopuehu akula i ka poʻe hipa.

¹³ “Holo nō hoʻi ka hoʻolimalima, no kona hoʻolimalima ʻia ʻana, ʻaʻole ʻo ia i manaʻo i nā hipa.

¹⁴ “ʻO wau nō ke kahu hipa maikaʻi, ua ʻike nō au i kaʻu, ua ʻike ʻia hoʻi au e kaʻu.

¹⁵ “E like me ka Makua e ʻike mai iaʻu, pēlā hoʻi au e ʻike ai i ka Makua; ke hāʻawi nei au i kuʻu ola no nā hipa.

¹⁶ “A he poʻe hipa ʻē aʻe nō kaʻu, ʻaʻole no kēia pā; he pono hoʻi noʻu e alakaʻi mai iā lākou, a e hoʻolohe auaneʻi lākou i koʻu leo; a e lilo i hoʻokahi ʻohana hipa, hoʻokahi hoʻi kahu hipa.

¹⁷ “No ia mea, ke aloha mai nei ka Makua iaʻu; no ka mea, ke hāʻawi nei au i koʻu ola, i lawe hou mai ai au ia mea.

¹⁸ “ʻAʻole kekahi e kāʻili ia mea mai oʻu aku lā; akā, naʻu iho nō e hāʻawi aku ia; he mana koʻu e hāʻawi aku ia, he mana hoʻi koʻu e hāʻawi aku ia, he mana hoʻi koʻu e lawe hou mai ia. Ua loaʻa iaʻu kēia kauoha na koʻu Makua mai.”

¹⁹ ¶ A laila he kūʻē hou ʻana i waena o nā Iudaio, no kēia mau ʻōlelo.

²⁰ He nui nā mea o lākou i ʻōlelo, “He daimonio kona, a ua hehena hoʻi; no ke aha lā ʻoukou e hoʻolohe iā ia?”

²¹ ʻŌlelo aʻela kekahi poʻe, “ʻO kēia mau ʻōlelo ʻaʻole na ka mea i uluhia e ka daimonio; e hiki anei i ka daimonio ke hoʻokaʻakaʻa i nā maka o nā makapō?”

²² ¶ A he ʻAhaʻaina Hoʻolilo ma Ierusalema, a he wā hoʻoilo ia.

²³ A holoholo aʻela ʻo Iesū i loko o ka luakini ma ka lānai o Solomona.

²⁴ Hoʻopuni aʻela nā Iudaio iā ia, ʻī akula iā ia, “Pehea lā ka lōʻihi o kou hoʻokānalua ʻana i ko mākou naʻau? Inā ʻo ʻoe ka Mesia, e haʻi akāka mai iā mākou.”

²⁵ ʻŌlelo maila ʻo Iesū iā lākou, “Ua haʻi aku au iā ʻoukou, ʻaʻole ʻoukou i manaʻoʻiʻo mai. ʻO nā hana aʻu e hana nei ma ka inoa o koʻu Makua, ʻo ia nā mea e hōʻike nei iaʻu.

²⁶ “ʻAʻole naʻe ʻoukou i manaʻoʻiʻo mai; no ka mea, ʻaʻole no kaʻu poʻe hipa ʻoukou, e like me kaʻu i ʻōlelo aku ai iā ʻoukou.

²⁷ “Ua hoʻolohe kaʻu poʻe hipa i koʻu leo, a ua ʻike au iā lākou, a hahai nō lākou iaʻu;

²⁸ a e hāʻawi aku au iā lākou i ke ola mau loa; ʻaʻole loa lākou e make, ʻaʻole hoʻi he mea nāna lākou e kāʻili aʻe mai loko aku o koʻu lima.

²⁹ “ʻO koʻu Makua, nāna lākou i hāʻawi naʻu, ua ʻoi aku ia ma mua o nā mea a pau; ʻaʻole he mea e hiki iā ia ke kāʻili aʻe iā lākou mai loko aʻe o ka lima o koʻu Makua.

³⁰ “ʻO wau a ʻo ka Makua, hoʻokahi māua.”

³¹ ¶ A laila lālau hou ihola nā Iudaio i nā pōhaku e hailuku iā ia.

³² ʻŌlelo maila ʻo Iesū iā lākou, “He nui nā hana maikaʻi aʻu i hōʻike aku ai iā ʻoukou na koʻu Makua; no ka hana hea o ua mau hana lā, e hailuku mai ai ʻoukou iaʻu?”

³³ ʻŌlelo akula nā Iudaio iā ia, i ka ʻī ʻana aʻe, “ʻAʻole no ka hana maikaʻi e hailuku aku ai mākou iā ʻoe; akā, no ka ʻōlelo hōʻino; no ka mea, ʻo ʻoe ke kanaka, ke hoʻolilo iā ʻoe iho i Akua.”

³⁴ Nīnau maila ʻo Iesū iā lākou, “ʻAʻole anei i palapala ʻia i loko o ko ʻoukou Kānāwai, ‘«Ua ʻōlelo au, he mau akua ʻoukou»?’

³⁵ “Inā i kapa mai ʻo ia iā lākou he mau akua, ka poʻe i loaʻa iā lākou ka ʻōlelo a ke Akua, ʻaʻole hoʻi i hewa ka Palapala Hemolele;

³⁶ ke ʻōlelo mai nei anei ʻoukou i ka mea a ke Akua i hoʻolaʻa ai, a i hoʻouna mai ai i ke ao nei, ‘Ua ʻōlelo hōʻino ʻoe,’ no kaʻu ʻī ʻana aku, ‘ʻO wau nō ke Keiki a ke Akua’?

³⁷ “Inā ʻaʻole au e hana i nā hana a koʻu Makua, mai manaʻoʻiʻo mai ʻoukou iaʻu.

³⁸ “Akā, inā e hana au ia mau mea, a i manaʻoʻiʻo ʻole mai ʻoukou iaʻu, e manaʻoʻiʻo ʻoukou ia mau hana, i ʻike ai ʻoukou, a i manaʻoʻiʻo ai hoʻi, ʻo ka Makua i loko oʻu, a ʻo wau i loko ona.”

³⁹ No ia mea, ʻimi hou ihola lākou e lālau iā ia; a pakele akula ia i ko lākou lima.

⁴⁰ ¶ Hele hou akula ia ma kēlā ʻaoʻao o Ioredane, i kahi a Ioane i bapetizo ai i kinohi; a noho ihola i laila.

⁴¹ A nui ka poʻe i hele aku i ona lā, ʻī ihola, “ʻAʻole ʻo Ioane i hana i kekahi hana mana; akā, ʻo nā mea a pau a Ioane i ʻōlelo mai ai no ia nei, he ʻoiaʻiʻo ia.”

⁴² A nui ka poʻe ma laila i manaʻoʻiʻo iā ia.