KA ʻEUANELIO I KĀKAU ʻIA AI E IOANE 1 - Ka Baibala Hemolele

1 No ka Logou, ʻo ia ke Akua. ʻO ia ke Ola. 6 No Ioane Bapetite, a me kāna mea i hele mai ai. 14 Lilo ka Logou i kanaka; ʻo ia ke Keiki Hipa a ke Akua; ʻo ia ka mōhai hoʻokalahala. 29 Nāna e lawe aku ka hala o ke ao nei.

MOKUNA I.

¹ ¶ I kinohi ka Logou, me ke Akua ka Logou, a ʻo ke Akua nō ka Logou.

² Me ke Akua nō hoʻi ia i kinohi.

³ Hana ʻia ihola nā mea a pau e ia; ʻaʻole kekahi mea i hana ʻia i hana ʻole ʻia e ia.

⁴ I loko ona ke ola, a ʻo ua ola lā ka mālamalama no nā kānaka.

⁵ Puka maila ka mālamalama i loko o ka pouli, ʻaʻole naʻe i hoʻokipa ka pouli iā ia.

⁶ ¶ Hoʻouna ʻia maila e ke Akua kekahi kanaka, ʻo Ioane kona inoa.

⁷ Hele maila ʻo ia i mea hōʻike, i hōʻike ai ia no ua mālamalama lā, i manaʻoʻiʻo ai nā kānaka a pau ma ona lā.

⁸ ʻAʻole nō ʻo ia ka mālamalama; akā, ua hele mai ia e hōʻike i ka mālamalama.

⁹ ¶ ʻO ka mālamalama ʻiʻo ia, ka mea nāna e hoʻomālamalama nā kānaka a pau e hele mai ana i ke ao nei.

¹⁰ I ke ao nei ʻo ia, a i hana ʻia kēia ao e ia, ʻaʻole naʻe ko ke ao nei i ʻike iā ia.

¹¹ Hele maila ia i kona iho, ʻaʻole kona poʻe i mālama iā ia.

¹² Akā, ʻo ka poʻe i mālama iā ia me ka manaʻoʻiʻo i kona inoa, hāʻawi maila ia i ka pono no lākou e lilo ai i poʻe keiki na ke Akua;

¹³ ʻo ka poʻe i hānau ʻia, ʻaʻole na ke koko, ʻaʻole na ka makemake o ke kino, ʻaʻole hoʻi na ka makemake o ke kanaka, na ke Akua nō.

¹⁴ ¶ Lilo maila ka Logou i kanaka, a noho ihola me kākou, a ʻike kākou i kona nani, i ka nani o ka hiwahiwa a ke Akua, ua piha i ka lokomaikaʻi a me ka ʻoiaʻiʻo.

¹⁵ Hōʻike akāka maila ʻo Ioane, ʻī maila, “ʻO ia ka mea nona wau i ʻōlelo ai, ‘ʻO ka mea e hele mai ana ma hope oʻu, ma mua oʻu ia; no ka mea, ua mua ia noʻu.’”

¹⁶ No loko mai o kāna mea i piha ai, ua loaʻa iā kākou nā mea maikaʻi a nui loa.

¹⁷ Ua hāʻawi ʻia mai ke Kānāwai ma o Mose lā; akā, ʻo ka lokomaikaʻi a me ka ʻoiaʻiʻo ma o Iesū Kristo lā ia.

¹⁸ ʻAʻole loa i ʻike pono kekahi i ke Akua; ʻo ke Keiki hiwahiwa, aia ma ka poli o ka Makua, ʻo ia kai hōʻike mai iā ia.

¹⁹ ¶ Eia kā Ioane i hōʻike mai ai, i ka wā i hoʻouna aku ai nā Iudaio i nā kāhuna, a me nā Levi no Ierusalema aku, e nīnau aku iā ia, “ʻO wai ʻoe?”

²⁰ Haʻi akāka maila ia, ʻaʻole i hōʻole, ʻī maila, “ʻAʻole ʻo wau ka Mesia.”

²¹ Nīnau akula lākou iā ia, “ʻO wai hoʻi? ʻO ʻElia anei ʻoe?” ʻĪ maila ia, “ʻAʻole.” “ʻO kēlā Kāula anei ʻoe?” ʻĪ maila ia, “ʻAʻole.”

²² Nīnau hou akula lākou iā ia, “ʻO wai lā hoʻi ʻoe? I haʻi aku ai mākou i ka poʻe nāna mākou i hoʻouna mai; he aha kāu ʻōlelo nou iho?”

²³ Haʻi maila ia, “ʻO wau nō «ka leo e kala ana i ka wao nahele, ‘E hoʻopololei i ke alanui no Iēhova»,’ e like me kā ʻIsaia ke kāula i ʻōlelo ai.”

²⁴ ʻO nā mea i hoʻouna ʻia aku, no ka poʻe Parisaio lākou.

²⁵ Nīnau akula lākou iā ia, ʻī akula iā ia, “No ke aha lā hoʻi ʻoe i bapetizo ai, ke ʻole ʻoe ka Mesia, ʻaʻole hoʻi ʻo ʻElia, ʻaʻole hoʻi ʻo kēlā Kāula?”

²⁶ ʻŌlelo maila ʻo Ioane iā lākou, ʻī maila, “Ke bapetizo nei au me ka wai; akā, ke kū nei kekahi i waena o ʻoukou, ka mea a ʻoukou i ʻike ʻole ai.

²⁷ “ʻO ia ka mea e hele mai ana ma hope oʻu, ma mua oʻu ia; ʻaʻole au e pono ke kala aʻe i ke kaula a kona kāmaʻa.”

²⁸ Hana ʻia ihola kēia mau mea i Betabara ma kēlā ʻaoʻao o Ioredane, kahi a Ioane i bapetizo ai.

²⁹ ¶ A ia lā aʻe, ʻike aʻela ʻo Ioane iā Iesū e hele mai ana i ona lā, ʻī maila, “E nānā i ke Keiki Hipa a ke Akua, nāna e lawe aku ka hala o ke ao nei!

³⁰ “ʻO ia nei ka mea nona wau i ʻōlelo ai, ‘E hele mai ana kekahi Kanaka ma hope oʻu, ma mua oʻu ia; no ka mea, ua mua ia noʻu.’

³¹ “ʻAʻole naʻe au i ʻike pono iā ia; akā, i hōʻike ʻia ʻo ia i kā ʻIseraʻela; no laila au i hele mai nei e bapetizo ana me ka wai.”

³² Hōʻike maila ʻo Ioane, ʻī maila, “Ua ʻike au i ka ʻUhane e iho mai ana mai ka lani mai, e like me ka manu nūnū, a e noho ana ma luna iho ona.

³³ “ʻAʻole naʻe au i ʻike pono iā ia; akā, ʻo ka Mea nāna au i hoʻouna mai e bapetizo me ka wai, ʻo ia kai ʻōlelo mai iaʻu, ‘Aia ʻike aku ʻoe i ka ʻUhane e iho mai ana ma luna ona, a e noho ana ma luna ona, ʻo ia ka mea, nāna e bapetizo me ka ʻUhane Hemolele.’

³⁴ “A ua ʻike au, e hōʻike mai hoʻi, ʻo ia ke Keiki a ke Akua.”

³⁵ ¶ A ia lā aʻe, kū hou aʻela ʻo Ioane, me nā haumāna āna ʻelua.

³⁶ A ʻike akula iā Iesū e hele aʻe ana, ʻī maila ia, “E nānā i ke Keiki Hipa a ke Akua!”

³⁷ A lohe aʻela nā haumāna ʻelua i kāna ʻōlelo ʻana, a hahai akula lāua iā Iesū.

³⁸ Hāliu aʻela ʻo Iesū, ʻike maila iā lāua e hahai ana, ʻī maila iā lāua, “He aha kā ʻolua e ʻimi mai nei?” ʻĪ akula lāua iā ia, “E Rabi, (ma ka hoʻohālike ʻana, e ke Kumu,) ma hea kou wahi i noho ai?”

³⁹ ʻĪ maila kēlā iā lāua, “E hele mai, e ʻike.” A hele akula lāua, a ʻike i kona wahi i noho ai; a noho ihola lāua me ia ia lā; ua kokoke ka ʻumi o ka hora.

⁴⁰ ʻO ʻAnederea, ke kaikaina o Simona Petero, ʻo ia kekahi o ua mau haumāna lā ʻelua i lohe i kā Ioane, a hahai akula iā Iesū.

⁴¹ Loaʻa mua iā ia kona kaikuaʻana iho, ʻo Simona, a ʻī akula iā ia, “Ua loaʻa iā māua ka Mesia,” ma ka hoʻohālike ʻana, ʻo Kristo ia.

⁴² A alakaʻi akula kēlā iā ia i o Iesū lā. A ʻike maila ʻo Iesū iā ia, ʻī maila, “ʻO ʻoe nō ʻo Simona, ke keiki a Iona; e kapa ʻia ʻoe ʻo Kepa,” ma ka hoʻohālike ʻana, he Pōhaku.

⁴³ ¶ Ia lā aʻe, manaʻo ihola ʻo Iesū e hele i Galilaia, a loaʻa iā ia ʻo Pilipo, ʻī maila iā ia, “E hahai mai ʻoe iaʻu.”

⁴⁴ A ʻo Pilipo no Betesaida ia, no ke kūlanakauhale o ʻAnederea, a me Petero.

⁴⁵ Loaʻa iā Pilipo ʻo Natanaʻela, ʻī akula ʻo Pilipo iā ia, “Ua loaʻa iā mākou ka mea a Mose i loko o ke Kānāwai, a me nā Kāula i palapala ai, ʻo Iesū, no Nazareta, ke keiki a Iosepa.”

⁴⁶ Nīnau maila ʻo Natanaʻela iā ia, “E hiki mai anei kekahi mea maikaʻi no Nazareta mai?” ʻĪ akula ʻo Pilipo iā ia, “E hele mai, e ʻike.”

⁴⁷ ʻIke aʻela ʻo Iesū iā Natanaʻela e hele mai ana i ona lā, e ʻōlelo maila ia nona, “E nānā i kā ʻIseraʻela ʻoiaʻiʻo, ʻaʻole he hoʻopunipuni i loko ona!”

⁴⁸ Nīnau akula ʻo Natanaʻela iā ia, ʻī akula, “Ināhea ʻoe i ʻike mai ai iaʻu?” ʻŌlelo maila ʻo Iesū iā ia, ʻī maila, “Ma mua o kā Pilipo kāhea ʻana aku iā ʻoe, ua ʻike au iā ʻoe e noho ana ma lalo o ka lāʻau fiku.”

⁴⁹ ʻŌlelo akula ʻo Natanaʻela iā ia, ʻī akula, “E Rabi, ʻo ʻoe ke Keiki a ke Akua, ʻo ʻoe ke Aliʻi o kā ʻIseraʻela.”

⁵⁰ ʻŌlelo maila ʻo Iesū iā ia, ʻī maila, “No kaʻu haʻi ʻana aku iā ʻoe, Ua ʻike au iā ʻoe ma lalo o ka lāʻau fiku, ke manaʻoʻiʻo nei anei ʻoe? E ʻike auaneʻi ʻoe i nā mea nui ʻē aku i kēia.”

⁵¹ ʻŌlelo maila ʻo ia iā ia, “ʻOiaʻiʻo; he ʻoiaʻiʻo kaʻu e ʻōlelo aku nei iā ʻoukou, Ma hope aku e ʻike ʻoukou i ka lani e hāmama ana, a me nā ʻānela o ke Akua e piʻi aku ana, a e iho mai ana ma luna iho o ke Keiki a ke Kanaka.”