KA BUKE NO NĀ LUNA KĀNĀWAI 8 - Ka Baibala Hemolele

1 Huhū kā ʻEperaima. 10 Pio ʻo Zeba, lāua ʻo Zalemuna. 28 Pio ko Midiana a pau. 32 Make ʻo Gideona, a hewa hou kā ʻIseraʻela.

MOKUNA VIII.

¹ ¶ ʻŌlelo akula nā kānaka o ʻEperaima iā ia, “He aha kēia mea āu i hana mai ai iā mākou, i kou hea ʻole ʻana mai iā mākou, i kou wā i hele aku ai e kaua me ko Midiana?” Ikaika loa ko lākou hoʻopaʻapaʻa ʻana iā ia.

² ʻŌlelo aʻela ʻo ia iā lākou, “He aha kaʻu i hana ai me kā ʻoukou? ʻAʻole anei i ʻoi ke koena ʻai no ʻEperaima ma mua o ka hōʻiliʻili ʻana o kā ʻAbiezera?

³ “Ua hāʻawi mai ke Akua i ko ʻoukou lima i nā aliʻi o Midiana, ʻo ʻOreba, a me Zeʻeba. He aha ka mea i hiki iaʻu ke hana e like me kā ʻoukou?” A laila, i kāna ʻōlelo ʻana pēlā, maha aʻela ko lākou huhū iā ia.

⁴ ¶ Hele maila ʻo Gideona i Ioredane, a māʻalo aʻela i kēlā ʻaoʻao, ʻo ia a me ia mau haneri kānaka ʻekolu pū me ia, ua maka pōniuniu, e hahai ana naʻe.

⁵ ʻĪ aʻela ia i kānaka o Sukota, “Ke nonoi aku nei au iā ʻoukou, e hāʻawi mai i mau pōpō berena na ka poʻe e hahai ana iaʻu; no ka mea, ua maka pōniuniu lākou, a e hahai ana au iā Zeba, a me Zalemuna, i nā aliʻi o ko Midiana.”

⁶ ʻĪ maila nā aliʻi o Sukota, “Ua loaʻa anei nā lima o Zeba, lāua ʻo Zalemuna i kou lima, i hāʻawi aku ai mākou i berena na kou poʻe kaua?”

⁷ ʻĪ aʻela ʻo Gideona, “No ia mea, i ka wā e hāʻawi mai ai ʻo Iēhova iā Zeba, lāua ʻo Zalemuna, i koʻu lima, a laila e kahi au i ko ʻoukou ʻiʻo i ke kākalaioa a me nā mea ʻoʻoi o ka nāhelehele!”

⁸ Piʻi akula ia, mai laila aku, a i Penuʻela, a ʻōlelo akula iā lākou pēlā. ʻĪ maila nā kānaka o Penuʻela iā ia, e like me kā nā kānaka o Sukota i ʻī mai ai.

⁹ ʻŌlelo aʻela ia i nā kānaka o Penuʻela, ʻī akula, “A hoʻi mai au me ka malu, a laila, e wāwahi au i kēia hale kiaʻi!”

¹⁰ E noho ana ʻo Zeba, lāua ʻo Zalemuna ma Karekora, a ʻo ko lāua mau pūʻali pū me lāua, he ʻumikumamālima tausani paha, ʻo ka poʻe a pau i koe o nā pūʻali ʻo ka poʻe i noho ma ka Hikina. Ua hāʻule hoʻokahi haneri me ka iwakālua tausani kānaka, unuhi pahi.

¹¹ Piʻi akula ʻo Gideona ma ke ala o ka poʻe noho ma nā halelewa, ma ka hikina o Noba, a me Iogebeha, a luku akula i ka pūʻali; no ka mea, e noho makaʻu ʻole ana ka pūʻali.

¹² Heʻe akula ʻo Zeba, lāua ʻo Zalemuna, a hahai akula ia iā lāua, a pio ihola iā ia nā aliʻi ʻelua o Midiana, ʻo Zeba a me Zalemuna, a ʻauheʻe akula ka pūʻali a pau.

¹³ ¶ Hoʻi maila ʻo Gideona, ke keiki a Ioasa, mai ke kaua ʻana mai, ma mua o ka Hiki ʻana a ka Lā.

¹⁴ Paʻa ihola iā ia kekahi kanaka uʻi o Sukota, a nīnau akula iā ia, a hōʻike maila ʻo ia iā ia i nā aliʻi o Sukota a me ko laila poʻe lunakahiko, he kanahikukumamāhiku kānaka.

¹⁵ Hele maila ia i kānaka o Sukota, ʻī aʻela, “Eia hoʻi ʻo Zeba, lāua ʻo Zalemuna, nā mea a ʻoukou i hoʻowahāwahā mai ai iaʻu, i ka ʻī ʻana mai, ‘Ua loaʻa anei nā lima o Zeba lāua ʻo Zalemuna i kou lima, i hāʻawi aku ai mākou i ka berena na kou poʻe kānaka maka pōniuniu?’”

¹⁶ Lālau ihola ia i nā lunakahiko o ia kūlanakauhale, a me ke kākalaioa, a me nā mea ʻoiʻoi o ka nāhelehele, a me ia mau mea nō ia i aʻo aku ai i nā kānaka o Sukota.

¹⁷ Wāwahi ihola nō hoʻi ia i ka hale kiaʻi o Penuʻela, a luku akula i kānaka o ia kūlanakauhale.

¹⁸ ¶ A laila, nīnau akula ʻo ia iā Zeba lāua ʻo Zalemuna, “He aha ke ʻano o nā kānaka a ʻolua i pepehi ai ma Tabora?” ʻĪ maila lāua, “E like me ʻoe nei, pēlā lākou. Ua like lākou a pau me nā keiki aliʻi.”

¹⁹ ʻĪ akula kēia, “He poʻe hoahānau lākou noʻu, he poʻe keiki na koʻu makuahine. Me Iēhova e ola nei, inā i hoʻōla ʻolua iā lākou, inā ʻaʻole au e pepehi aku iā ʻolua.”

²⁰ ʻĪ maila ia iā Ietera, i kāna hiapo, “E kū i luna, a pepehi iā lāua!” ʻAʻole unuhi ua keiki lā i kāna pahi kaua; ua makaʻu; no ka mea, he keiki ia.

²¹ A laila, ʻōlelo mai ʻo Zeba lāua ʻo Zalemuna, “E kū mai ʻoe, a e pepehi mai iā māua; no ka mea, e like me ke kanaka, pēlā kona ikaika.” Kū aʻela ʻo Gideona, a pepehi ihola iā Zeba, lāua ʻo Zalemuna, a lawe ʻo ia i nā lei o nā ʻāʻī o kā lāua mau kāmelo.

²² ¶ A laila, ʻōlelo akula nā kānaka o kā ʻIseraʻela iā Gideona, “I aliʻi ʻoe ma luna o mākou, ʻo ʻoe a me kāu keiki, a me ke keiki a kāu keiki; no ka mea, ua hoʻōla mai ʻoe iā mākou, mai loko aʻe o ka lima o ko Midiana.”

²³ ʻĪ maila ʻo Gideona iā lākou, “ʻAʻole au e lilo i aliʻi ma luna o ʻoukou, ʻaʻole e lilo kaʻu keiki i aliʻi ma luna o ʻoukou. E lilo nō ʻo Iēhova i aliʻi ma luna o ʻoukou.”

²⁴ ʻĪ maila ʻo Gideona iā lākou, “He manaʻo nonoi aku koʻu e nonoi aku ai iā ʻoukou, e hāʻawi mai kēlā kanaka kēia kanaka o ʻoukou iaʻu, i nā apo pepeiao o kona mea pio.” (He apo pepeiao gula ko lākou; no ka mea, no kā ʻIsemaʻela lākou.)

²⁵ ʻĪ maila lākou, “E hāʻawi ʻiʻo nō mākou.” Hohola ihola lākou i lole, a hoʻolei ihola kēlā kanaka kēia kanaka i nā apo pepeiao o kona pio ma luna iho.

²⁶ ʻO ke kaumaha o ia mau apo pepeiao, āna i noi aku ai, hoʻokahi ia tausani ʻehiku haneri sekela gula; a keu aku nā lei, a me nā momi pepeiao, a me ka lole poni mahana o nā aliʻi o ko Midiana, a me nā lei ma nā ʻāʻī o kā lāua mau kāmelo.

²⁷ Hana ihola ʻo Gideona ia mea, i ʻēpoda, a waiho ihola ma kona kūlanakauhale, ma ʻOpera. Hahai akula i laila kā ʻIseraʻela a pau, e kuko ana ma muli o ia mea; a lilo ihola ia i mea e hihia ai no Gideona, a me ko kona hale.

²⁸ Pēlā i pio ai ko Midiana i mua o nā mamo a ʻIseraʻela, ʻaʻole lākou i hoʻāla hou i ko lākou poʻo. Kuapapa nui ihola ka ʻāina hoʻokahi kanahā makahiki, i ke kau iā Gideona.

²⁹ ¶ Hele akula ʻo Ierubaʻala ke keiki a Ioasa, a noho ihola ma kona hale iho.

³⁰ He kanahiku kā Gideona mau keiki kāne, mai loko aku o kona pūhaka; no ka mea, ua nui loa kāna poʻe wāhine.

³¹ A ʻo kāna haiā wahine ma Sekema, ʻo ia kekahi i hānau mai i keiki kāne nāna, a kapa akula ʻo ia i kona inoa ʻo ʻAbimeleka.

³² Make ihola ʻo Gideona ke keiki a Ioasa, ua ʻelemakule maikaʻi, a kanu ʻia ʻo ia ma ka ilina o kona makua kāne, ma ʻOpera, no kā ʻAbiezara.

³³ ¶ A ma hope iho o ka make ʻana o Gideona, huli hou akula nā mamo a ʻIseraʻela, a moekolohe ihola me Baʻalima, a hoʻolilo ihola iā Baʻala-Berita, i akua no lākou.

³⁴ ʻAʻole hoʻomanaʻo nā mamo a ʻIseraʻela iā Iēhova, i ko lākou Akua, i ka mea i hoʻōla aʻe iā lākou mai ka lima aku o ko lākou poʻe ʻenemi, ma nā ʻaoʻao a puni.

³⁵ ʻAʻole lākou i lokomaikaʻi aku i ko ka hale o Ierubaʻala, ʻo ia hoʻi ʻo Gideona, e like me nā mea maikaʻi a pau āna i hana mai ai i kā ʻIseraʻela.