KA BUKE NO NĀ LUNA KĀNĀWAI 6 - Ka Baibala Hemolele

1 No ka hewa o kā ʻIseraʻela, pio lākou i ko Midiana, 8 Hoʻouna ʻia mai ke kāula. 11 Kauoha mai ka ʻānela iā Gideona a nāna lākou i hoʻopakele.

MOKUNA VI.

¹ ¶ Hana hewa ihola nā mamo a ʻIseraʻela i mua o Iēhova, a hāʻawi aʻela ʻo Iēhova iā lākou i ka lima o ko Midiana, i ʻehiku makahiki.

² Ikaika loa ihola ka lima o ko Midiana ma luna o kā ʻIseraʻela; a hana aʻela ka poʻe mamo a ʻIseraʻela i nā lua no lākou, mai nā maka aku o ko Midiana, aia ma nā mauna, a i nā ana hoʻi, a me nā puʻukaua.

³ A i ka manawa i lūlū ai kā ʻIseraʻela, a laila, piʻi maila ko Midiana, a me kā ʻAmeleka, a me ka poʻe noho ma ka Hikina, hele kūʻē maila lākou.

⁴ A hoʻomoana kūʻē maila, a hoʻopau ihola i nā mea kupu o ka honua, a hiki aku i Gaza, ʻaʻole i waiho i kekahi mea ola na kā ʻIseraʻela, ʻaʻole i ka hipa, ʻaʻole i ka bipi, ʻaʻole i ka hoki.

⁵ Piʻi maila lākou me ko lākou holoholona, a me ko lākou mau halelewa, hele mai lākou, e like me nā ʻūhini ka nui loa; ʻo lākou a me ko lākou poʻe kāmelo, he poʻe mea helu ʻole ʻia; a komo lākou i ka ʻāina, e luku iho.

⁶ Hune loa ihola kā ʻIseraʻela, no ko Midiana, a hea akula nā mamo a ʻIseraʻela iā Iēhova.

⁷ ¶ A i ka wā i hea aku ai nā mamo a ʻIseraʻela iā Iēhova no ko Midiana,

⁸ A laila, hoʻouna mai ʻo Iēhova i kekahi kanaka, he kāula, ʻī maila ia iā lākou, “Penei ka ʻōlelo ʻana mai a Iēhova, ke Akua o kā ʻIseraʻela, ‘Naʻu nō ʻoukou i lawe mai nei, mai ʻAigupita mai, a hoʻopuka mai iā ʻoukou, mai loko mai o ka hale hoʻoluhi;

⁹ hoʻopakele aʻe au iā ʻoukou, mai ka lima aʻe o ko ʻAigupita, a mai ka lima aku o ka poʻe a pau i hoʻoluhi hewa mai iā ʻoukou, a kipaku akula au iā lākou, mai ko ʻoukou alo aku, a hāʻawi akula au i ko lākou ʻāina no ʻoukou.

¹⁰ ‘ʻĪ akula au iā ʻoukou, “ʻO wau nō ʻo Iēhova, ʻo ko ʻoukou Akua. Mai makaʻu ʻoukou i nā akua o kā ʻAmora, nā mea nona ka ʻāina, a ʻoukou e noho ai. Akā, ʻaʻole ʻoukou i hoʻolohe i koʻu leo.”’”

¹¹ ¶ Hele maila ka ʻānela o Iēhova, noho ihola ma lalo iho o kekahi lāʻau ʻoka, ma ʻOpera no Ioasa, he kanaka no ko ʻAbiezera. E hahi ana kāna keiki ʻo Gideona i ka huapalaoa, ma kahi kaomi waina, i nalo i ko Midiana.

¹² ʻIkea akula ka ʻānela o ka Haku e ia, ʻī maila iā ia, “Eia pū nō me ʻoe ʻo Iēhova, e ke kanaka koa loa!”

¹³ ʻĪ akula ʻo Gideona iā ia, “E kuʻu Haku ē, inā ʻo Iēhova kekahi pū me mākou, no ke aha lā mākou i loʻohia i kēia mau mea a pau? ʻAuhea kāna mau hana mana nui, a ko mākou poʻe mākua i haʻi mai ai iā mākou, i ka ʻī ʻana mai, ‘ʻAʻole anei i lawe mai ʻo Iēhova iā kākou, mai ʻAigupita mai?’ Akā, ua haʻalele mai ʻo Iēhova iā kākou, a ua hāʻawi iā kākou i loko o nā lima o ko Midiana.”

¹⁴ Nānā maila ʻo Iēhova iā ia, ʻī maila, “Ma kēia mana ou, e hele ai ʻoe, a e hoʻōla nō ʻoe i kā ʻIseraʻela mai ka lima aʻe o ko Midiana. ʻAʻole anei au i hoʻouna aku iā ʻoe?”

¹⁵ ʻĪ akula kēia iā ia, “E kuʻu Haku, pehea lā wau e hoʻōla ai i kā ʻIseraʻela? He nāwaliwali koʻu hanauna i kā Manase a pau; a ua liʻiliʻi au i loko o ka hale o koʻu makua.”

¹⁶ ʻĪ maila ʻo Iēhova iā ia, “ʻO wau pū kekahi me ʻoe, a e luku aku ʻoe i ko Midiana, e like me ke kanaka hoʻokahi.”

¹⁷ ʻĪ akula kēia iā ia, “Inā i loaʻa iaʻu ka lokomaikaʻi ʻia mai i mua ou, e hāʻawi mai ʻoe i hōʻailona no kou kamaʻilio ʻana mai iaʻu.”

¹⁸ Ke noi aku nei au iā ʻoe, “Mai hele aku ʻoe, a hiki mai au i ou lā, a lawe mai i koʻu mōhai makana, a waiho i mua ou.” ʻĪ maila kēlā, “E kakali nō wau, a hoʻi hou mai ʻoe.”

¹⁹ ¶ Hele akula ʻo Gideona i loko, a hoʻomākaukau ihola i keiki kao, a i palaoa hū ʻole, i hoʻokahi ʻepa; a waiho ihola i ka ʻiʻo i loko o ka hīnaʻi, a ʻo ke kai, waiho ihola ia ma loko o ka ipu, a lawe aʻela ia, i ona lā ma lalo o ka lāʻau ʻoka, a hāʻawi akula.

²⁰ ʻĪ maila ka ʻānela o ke Akua iā ia, “E lawe ʻoe i ka ʻiʻo, a i ka palaoa hū ʻole, a e waiho ma luna o kēia pōhaku, a e ninini iho i ke kai.” A hana ihola ia pēlā.

²¹ A laila, ʻō akula ka ʻānela o Iēhova i ka wēlau o ke koʻokoʻo, ma kona lima, a hoʻopā ihola i ka ʻiʻo, a me ka palaoa hū ʻole; a piʻi aʻela ke ahi, mai loko aʻe o ka pōhaku, a hoʻopau aʻela i ka ʻiʻo, a me ka palaoa hū ʻole. A laila, hele akula ka ʻānela o ka Haku, mai kona alo aku.

²² A ʻike maopopo aʻela ʻo Gideona, he ʻānela ia no Iēhova, ʻī ihola ʻo Gideona, “Auē, e ka Haku, e Iēhova ē! No ka mea, ua ʻike au i kekahi ʻānela o Iēhova, he maka nō he maka.”

²³ ʻĪ maila ʻo Iēhova iā ia, “Aloha ʻoe. Mai makaʻu ʻoe, ʻaʻole ʻoe e make.”

²⁴ A laila hana ihola ʻo Gideona i kuahu ma laila, no Iēhova, a kapa akula ʻo ia ia mea, ʻo IĒHOVA-Aloha. Aia nō ia i kēia lā, ma ʻOpera, no kā ʻAbiezera.

²⁵ ¶ Ia pō nō, ʻōlelo mai ʻo Iēhova iā ia, “E kiʻi ʻoe i bipi ʻōpiopio, i ka bipi a kou makua kāne, a me kekahi bipi ʻehiku makahiki, a e hoʻohiolo i ka lele o Baʻala, a kou makua kāne, a e kua i lalo i ke kiʻi o ʻAsetarota e kū kokoke ana me ia;

²⁶ a e hana ʻoe i kuahu no Iēhova, no kou Akua, me ka hoʻonohonoho pono, ma luna o kēia wahi paʻa; a e lawe ʻoe i ka lua o nā bipi, a e kaumaha aku i mōhai kuni, me ka wahie o ua kiʻi o ʻAsetarota lā, āu e kua ai.”

²⁷ A laila lawe aʻela ʻo Gideona, i ʻumi kānaka o kona poʻe kauā, a hana ihola e like me kā Iēhova i kauoha mai ai iā ia. Eia kekahi, no kona makaʻu ʻana i ko ka hale o kona makua, a i nā kānaka o ke kūlanakauhale, ʻaʻole ia i hana i ke ao; akā, hana nō ia i ka pō.

²⁸ ¶ A i ke ala ʻana o nā kānaka o ke kūlanakauhale i kakahiaka nui, aia hoʻi, ua hoʻohiolo ʻia ka lele o Baʻala, a ua kua ʻia ke kiʻi o ʻAsetarota e kokoke ana, a ua kaumaha ʻia ka lua o ka bipi ma luna o ke kuahu i hana ʻia.

²⁹ ʻĪ aʻela kekahi i kekahi, “Na wai lā i hana i kēia mea?” ʻImi lākou a nīnau hoʻi; a laila, haʻi ʻia maila, “Na Gideona, ke keiki a Ioasa, i hana i kēia mea.”

³⁰ A laila ʻōlelo akula nā kānaka o ke kūlanakauhale iā Ioasa, “E lawe mai ʻoe i kāu keiki kāne i waho, i make ia; no ka mea, ua hoʻohiolo ʻo ia i ke kuahu o Baʻala, a ua kua ʻo ia i lalo i ke kiʻi o ʻAsetarota e kokoke ana me ia.”

³¹ ʻŌlelo akula ʻo Ioasa i nā kānaka a pau i kūʻē mai iā ia, “E hakakā anei ʻoukou ma muli o Baʻala? E hoʻōla anei ʻoukou iā ia? ʻO ka mea e hakakā ma muli ona, e make ia, i kēia kakahiaka. Inā he akua ia, e hakakā ʻo ia ma muli ona iho, no ka hoʻohiolo ʻana o kekahi i kona lele!”

³² No laila kapa akula ʻo ia iā ia i kēlā lā, ʻo Ierubaʻala, ʻī aʻela, “Na Baʻala e hakakā me ia; no ka mea, ua hoʻohiolo ʻo ia i kona kuahu.”

³³ ¶ A laila ʻākoakoa maila ko Midiana a pau, a me kā ʻAmeleka, a me ka poʻe noho ma ka hikina, hele aʻela, a hoʻomoana ihola ma ka pāpū ʻo Iezereʻela.

³⁴ Uhi maila ka ʻUhane o Iēhova ma luna o Gideona, a puhi ihola ia i ka pū, a ʻākoakoa maila ka ʻAbiezera ma muli ona.

³⁵ A hoʻouna akula ia i nā luna i kā Manase a pau, a ʻākoakoa maila lākou ma muli ona; a hoʻouna akula ʻo ia i nā luna i kā ʻAsera, a i kā Zebuluna, a i kā Napetali, a piʻi maila lākou e hālāwai me ia poʻe.

³⁶ ¶ ʻĪ akula ʻo Gideona iā Iēhova, “Inā e hoʻōla mai ʻoe i kā ʻIseraʻela ma koʻu lima, e like me kāu i ʻōlelo mai ai,

³⁷ e hāliʻi au i huluhulu ma kahi e hehi ai i ka palaoa; a inā he hau ma ka huluhulu wale nō, a e maloʻo ka honua ʻē a pau, a laila, e ʻike pono au, e hoʻōla nō ʻoe i kā ʻIseraʻela ma koʻu lima, e like me kāu i ʻōlelo mai ai.”

³⁸ Eia hoʻi, i kona ala ʻana i kakahiaka aʻe, kaomi ihola ʻo ia i ka huluhulu, a ʻuī aʻela i ke hau o ka huluhulu, a piha ka bola i ka wai.

³⁹ ʻĪ akula ʻo Gideona i ke Akua, “Mai wela mai kou huhū iaʻu, a e ʻōlelo aku au i kēia wale nō; e ʻae mai ʻoe iaʻu i hoʻokahi oʻu hoʻāʻo hou ʻana me ka huluhulu. Ke nonoi aku nei au iā ʻoe, i maloʻo ma ka huluhulu wale nō, a i hau hoʻi ma ka honua a pau.”

⁴⁰ Ia pō, hana mai ke Akua pēlā; ua maloʻo ma ka huluhulu wale nō, he hau nō ma ka honua a pau.