KA BUKE NO NĀ LUNA KĀNĀWAI 5 - Ka Baibala Hemolele

1 Ke mele a Debora, lāua a Baraka.

MOKUNA V.

¹ ¶ Ia lā, mele akula ʻo Debora lāua ʻo Baraka, ke keiki a ʻAbinoama, i ka ʻī ʻana:

² “No ke alakaʻi koa ʻana o nā aliʻi i loko o kā ʻIseraʻela, No ka hoʻoikaika nui ʻana o nā kānaka, E hoʻomaikaʻi iā Iēhova!

³ “E hoʻolohe mai, e nā aliʻi! E hāliu mai i pepeiao, e nā mea nani! ʻO wau, iā Iēhova nō wau e mele aku ai; E ʻoli aku au iā Iēhova i ke Akua o kā ʻIseraʻela.

⁴ “E Iēhova, i kou puka ʻana i waho o Seira, I kou hele ʻana aku, mai ka pāpū aku o ʻEdoma, Naue aʻela ka honua, kulu ka lani, Nākulukulu nō hoʻi nā ao i ka wai;

⁵ “Heheʻe ihola nā mauna i mua o Iēhova, ʻO Sinai nei i mua o Iēhova, ke Akua o kā ʻIseraʻela.

⁶ ¶ “I nā lā o Samegara, ke keiki a ʻAnata, I nā lā o Iaʻela, oki loa ihola nā huakaʻi hele, ʻO ka poʻe i hele i ke alanui, hele lākou ma nā ala malū.

⁷ “Oki ihola nā luna, Oki lākou i loko o kā ʻIseraʻela, A kū i luna au, ʻo Debora nei, Kū maila au, he makuahine i loko o kā ʻIseraʻela.

⁸ “ʻOliʻoli lākou i nā akua hou; A laila, he kaua ma nā puka o ka pā; Ua ʻikea anei ka pale kaua, a me ka pololū, I waena o nā kanahā tausani o kā ʻIseraʻela?

⁹ “Aia nō koʻu naʻau me nā luna o kā ʻIseraʻela, Me ka poʻe i hoʻoikaika wale i waena o nā kānaka. E hoʻomaikaʻi iā Iēhova!

¹⁰ “E ka poʻe holo ma nā hoki keʻokeʻo, Ka poʻe noho e hoʻoponopono ana, Nā mea hele ma nā alanui, E noʻonoʻo ʻoukou.

¹¹ “Me ka uwalaʻau ʻole o ka poʻe e puʻunaue ana i ka waiwai pio ma nā holowaʻa wai, I laila, e hoʻokani lākou i nā lanakila ʻana o Iēhova, Nā lanakila ʻana o kona poʻe luna ma loko o kā ʻIseraʻela; A laila, e iho nō nā kānaka o Iēhova, i nā puka o ka pā.

¹² ¶ “E ala, e ala, e Debora! E ala, e ala, e ʻoli i ka ʻoli! E kū mai, e Baraka, e alakaʻi pio aku i kou poʻe pio, e ke keiki a ʻAbinoama!

¹³ “ʻO ka mea i pakele, ua hoʻolanakila mai kēlā iā ia ma luna o nā mea kiʻekiʻe o kānaka; Ua hoʻolanakila mai ʻo Iēhova iā ia, ma luna o ka poʻe koa.

¹⁴ “Ma waena mai o ʻEperaima, ke kumu i kūʻē i ko ʻAmeleka. Ma hope ou, e Beniamina, ma loko o kou poʻe kānaka, Mai Makira mai i iho mai ai nā luna, A mai Zebuluna mai ka poʻe i paʻa ai ka ihe o ka ʻalihikaua.

¹⁵ “Me Debora nō nā aliʻi o ʻIsakara; ʻO ʻIsakara nō, a pēlā nō ʻo Baraka Ma kona wāwae ia i hoʻouna ʻia aku ai i ke awāwa; Ma nā kahawai o Reubena, nui loa ka noʻonoʻo ʻana o ka naʻau.

¹⁶ “No ke aha lā ʻoe i noho ai ma nā pā holoholona, E hoʻolohe aku i ka uē ʻana o nā hipa? Ma nā kahawai o Reubena, nui loa ka huli ʻana o ka naʻau.

¹⁷ “Noho akula ko Gileada ma ʻō aku o Ioredane, No ke aha lā i noho ai kā Dana ma nā moku? Noho nō kā ʻAsera ma kahakai, Ma kona awa lulu kona noho ʻana.

¹⁸ “He poʻe kānaka kā Zebuluna, i hoʻowahāwahā i ko lākou ola i ka make, ʻO kā Napetali kekahi, ma nā puʻu o ke kula.

¹⁹ ¶ “Hele mai nā aliʻi, a kaua, A laila, kaua nā aliʻi o Kanaʻana Ma Taʻanaka, ma nā wai o Megido; ʻAʻole lākou i lawe i ke kālā i mea waiwai.

²⁰ “Kaua mai ko ka lani; Kaua mai nā hōkū ma ko lākou kuamoʻo, iā Sisera.

²¹ “Na ka muliwai o Kisona lākou i lawe aku, ʻO ka muliwai kahiko, ka muliwai o Kisona. E kuʻu ʻuhane, ua hele ʻoe me ka ikaika nui!

²² “A laila, hehi iho nā mānea o nā lio, No ka wikiwiki, ka wikiwiki o ko lākou aliʻi.

²³ ‘E hōʻino aku iā Meroza,’ Wahi a ka ʻānela o Iēhova, ‘Me ka hōʻino nui e hōʻino ai i ka poʻe i noho i laila, No ka mea, ʻaʻole lākou i hele e kōkua ma muli o Iēhova, E kōkua iā Iēhova i mua o ka poʻe ikaika.’

²⁴ ¶ “Ma mua o nā wāhine, e pōmaikaʻi ana ʻo Iaʻela, Ka wahine a Hebera no ko Kena; E pōmaikaʻi ana ia ma mua o nā wāhine i loko o nā halelewa.

²⁵ “Nonoi mai ʻo Sisera i ka wai, Hāʻawi aku ʻo ia i ka waiū; ʻO ka waiūpaʻa kāna i lawe mai ai ma ka ipu nani.

²⁶ “Kau akula ʻo ia i kona lima ma ke kui, ʻO kona lima ʻākau hoʻi ma ka hāmare o ka mea paʻahana; Hahau aʻela iā Sisera, hahau ʻiʻo nō i kona poʻo, Kuʻi akula ʻo ia, a hou aku nō i kona maha.

²⁷ “Ma waena o kona mau wāwae ia i kūlou ai, Hina nō ia a moe ihola i lalo; Ma waena o kona mau wāwae ia i kūlou ai, a hina ihola; Ma kahi āna i kūlou ai, ma laila ia i hina make ai.

²⁸ ¶ “Ma ka puka makani i haka pono aku ai ka makuahine o Sisera, Ma ka puka ʻolu ʻo ia i hea aku ai, ‘No ke aha lā i hoʻokaʻulua kona kaʻa kaua ke hele mai? Ua lohi nā pokakā o kona mau kaʻa kaua i ke aha?’

²⁹ “ʻĪ maila nā aliʻi wahine akamai, Nāna nō i haʻi mai iā ia iho,

³⁰ ‘ʻAʻole anei i loaʻa iā lākou? ʻAʻole anei lākou i puʻunaue i ka waiwai pio? Pākahi, pāpālua paha na ke kāne ke kaikamahine? No Sisera ka waiwai pio ʻōniʻoniʻo, Ka waiwai pio ʻōniʻoniʻo i humu ʻia, Ka mea i humu ʻōniʻoniʻo ʻia no nā ʻāʻī o ka poʻe lanakila?’

³¹ “Pēlā e make ai kou poʻe ʻenemi a pau, e Iēhova! Akā, ʻo ka poʻe aloha iā ʻoe, e like aʻe lākou me ka lā e puka ana ma kona ikaika.” Hoʻomaha ihola ka ʻāina, i hoʻokahi kanahā makahiki.