KA BUKE NO NĀ LUNA KĀNĀWAI 4 - Ka Baibala Hemolele

1 Paʻa kā ʻIseraʻela iā Iabina a me Sisera, a na Debora lāua ʻo Baraka i hoʻopakele iā lākou.

MOKUNA IV.

¹ ¶ Hana hewa hou akula nā mamo a ʻIseraʻela i mua o Iēhova, ma hope iho o ka make ʻana o ʻEhuda.

² Hoʻolilo akula ʻo Iēhova iā lākou i ka lima o Iabina, ke aliʻi o Kanaʻana i noho aliʻi ma Hazora; ʻo Sisera ka ʻalihikaua no kona poʻe koa, a noho nō ia ma Haroseta Goima.

³ Kāhea akula nā mamo a ʻIseraʻela iā Iēhova; no ka mea, ʻeiwa haneri ona kaʻa kaua hao. Hoʻokaumaha loa ʻo ia i nā mamo a ʻIseraʻela, he iwakālua makahiki.

⁴ ¶ ʻO Debora, he kāula wahine, ka wahine a Lapidota, ʻo ia kai hoʻoponopono i kā ʻIseraʻela, ia manawa.

⁵ Noho ihola ia ma lalo iho o ka lāʻau pāma o Debora, ma waena o Harama a me Betela, ma ka mauna ʻo ʻEperaima; a hele maila nā mamo a ʻIseraʻela i ona lā i hoʻoponopono ʻia mai.

⁶ Hoʻouna ʻo ia, a kiʻi akula iā Baraka, ke keiki a ʻAbinoama, ma Kedesa Napetali, ʻī aʻela iā ia, “ʻAʻole anei i kauoha mai ʻo Iēhova, ke Akua o kā ʻIseraʻela, ʻŌ hele, e hoʻokokoke aku ma ka mauna ʻo Tabora; e lawe pū me ʻoe, i ʻumi tausani kānaka, nā mamo a Napetali, a ʻo nā mamo a Zebuluna.

⁷ ʻA naʻu nō e kaʻi mai i mua ou, ma ke kahawai ʻo Kisona, iā Sisera, ka luna o ko Iabina poʻe koa, me kona poʻe kaʻa kaua, a me kona lehulehu; a e hāʻawi aku nō au iā ia i kou lima.’”

⁸ ʻĪ aʻela ʻo Baraka iā ia, “Inā e hele pū ʻoe me aʻu, a laila, hele au; a i ʻole ʻoe e hele pū me aʻu, a laila, ʻaʻole au e hele!”

⁹ ʻĪ akula ʻo ia, “I ka hele ʻana, e hele pū nō au me ʻoe. Akā, ʻo kēia hele ʻana āu e hele ai, ʻaʻole ʻoe e hoʻonani ʻia i laila; no ka mea, e hāʻawi ana ʻo Iēhova iā Sisera i ka lima o kekahi wahine.” Kū aʻela ʻo Debora, a hele pū akula me Baraka i Kedesa.

¹⁰ Hoʻākoakoa maila ʻo Baraka i kā Zebuluna, a me kā Napetali i Kedesa; a piʻi pū akula ia me nā kānaka, he ʻumi tausani, ma kona wāwae, a piʻi pū akula ʻo Debora me ia.

¹¹ ¶ ʻO Hebera no ko Kena, no nā mamo a Hobaba, ka makuahōnōai kāne o Mose, ua hoʻokaʻawale ʻo ia iā ia iho, mai ko Kena aku, a ua hoʻomoana aʻe ʻo ia ma nā pāpū ʻo Zaʻanaima, e kokoke ana iā Kedesa.

¹² ¶ Hōʻike aʻela lākou iā Sisera, ua piʻi aku ʻo Baraka, ke keiki a ʻAbinoama i ka mauna ʻo Tabora.

¹³ Kiʻi akula ʻo Sisera i kona mau kaʻa kaua a pau loa, ʻeiwa haneri kaʻa hao, a me kona poʻe kānaka a pau loa, mai Haroseta Goima a hiki i ke kahawai ʻo Kisona.

¹⁴ ʻĪ aʻela ʻo Debora iā Baraka, “E kū mai; no ka mea, eia ka lā e hāʻawi mai ai ʻo Iēhova iā Sisera i kou lima. ʻAʻole anei i hele aku ʻo Iēhova ma mua ou?” Iho akula ʻo Baraka, mai ka mauna ʻo Tabora aku, a me nā kānaka he ʻumi tausani pū me ia.

¹⁵ Hoʻoʻauheʻe akula ʻo Iēhova iā Sisera, a me nā kaʻa a pau, a me ka pūʻali a pau i mua o Baraka, me ka maka o ka pahi kaua. Iho ihola ʻo Sisera, mai ke kaʻa kaua iho, a holo akula ma kona wāwae.

¹⁶ Hahai akula ʻo Baraka ma hope o nā kaʻa kaua, a ma hope o ka pūʻali, a hiki i Haroseta Goima. A hāʻule ihola ka pūʻali a pau o Sisera, ma ka maka o ka pahi kaua, ʻaʻole hoʻokahi kanaka i koe.

¹⁷ ¶ Holo akula ʻo Sisera ma kona wāwae, a i ka halelewa o Iaʻela ka wahine a Hebera no ko Kena; no ka mea, ua noho kuʻikahi ʻo Iabina, ke aliʻi o Hazora me ka poʻe o Hebera no ko Kena.

¹⁸ Hele aku ʻo Iaʻela i waho e hālāwai me Sisera, ʻī akula iā ia, “E kipa mai ʻoe, e kuʻu haku, e kipa mai ʻoe i loko, ma oʻu nei; mai makaʻu.” Kipa aʻela ʻo ia ma ona lā, i loko o ka halelewa, a uhi maila ʻo ia iā ia i ke kapa moe.

¹⁹ ʻĪ maila kēlā, “Ke noi aku nei au iā ʻoe, e hāʻawi mai ʻoe iaʻu i wahi wai ʻuʻuku e inu; no ka mea, ua make wai au.” Wehe aʻela ʻo ia i ka hue waiū, hoʻoinu akula, a uhi ihola iā ia.

²⁰ ʻŌlelo hou mai kēlā iā ia, “E kū ʻoe ma ka puka o ka halelewa, a hiki i ka manawa e hele mai ai ke kanaka e nīnau mai iā ʻoe, i ka ʻī ʻana mai, ‘He kanaka anei ma ʻaneʻi?’ E ʻī aku ʻoe, ‘ʻAʻole.’”

²¹ Lālau ihola ʻo Iaʻela, ka wahine a Hebera, i ke kui o ka halelewa, a kau ka hāmare ma kekahi lima ona, a hele malū akula i ona lā, a mākia ihola i kona maha i ke kui, a paʻa i ka lepo; no ka mea, ua hiamoe paʻa loa ia, i kona unā ʻana. A make nō ia.

²² Aia hoʻi, i ko Baraka hahai ʻana iā Sisera, puka mai ʻo Iaʻela i waho, e hālāwai me ia, ʻī aʻela iā ia, “E hele mai a e hōʻike aku au iā ʻoe i ke kanaka āu e ʻimi nei.” Komo akula ia i ona lā, aia hoʻi, e waiho ana ia, ua make, a ʻo ke kui hoʻi, aia nō i loko o kona maha.

²³ ¶ Ia lā nō, hoʻopio akula ke Akua iā Iabina, ke aliʻi o Kanaʻana i mua o nā mamo a ʻIseraʻela.

²⁴ Lanakila akula ka lima o nā mamo a ʻIseraʻela, a kaumaha ihola ma luna o Iabina ke aliʻi o Kanaʻana, a hiki i ka wā i oki hoʻopau ai lākou iā Iabina, i ke aliʻi o Kanaʻana.