KA BUKE NO NĀ LUNA KĀNĀWAI 3 - Ka Baibala Hemolele

1 Ka hihia o kā ʻIseraʻela me ko nā ʻāina ʻē, 9 ʻo ʻOteniʻela a me ʻEhuda.

MOKUNA III.

¹ ¶ Eia nā lāhui kanaka a Iēhova i waiho ai e hoʻāʻo i kā ʻIseraʻela, i ka poʻe a pau i ʻike ʻole i ke kaua ʻana a pau ma Kanaʻana;

² i mea wale nō e ʻike ai nā hanauna o nā mamo a ʻIseraʻela, e aʻo aku iā lākou i ke kaua, i ka poʻe hoʻi i ʻike ʻole ia mea ma mua.

³ ʻElima aliʻi o ko Pilisetia, a me ko Kanaʻana a pau, a me ko Zidona, a me ko Heva i noho ma ka mauna ʻo Lebanona, mai ka mauna mai ʻo Baʻala Heremona a hiki i Hamata.

⁴ He mea lākou e hoʻāʻo ai i kā ʻIseraʻela, i ʻike ʻia ko lākou hoʻolohe a me ka ʻole i nā kauoha a Iēhova āna i kauoha mai ai i ko lākou poʻe mākua, ma ka lima o Mose.

⁵ Noho pū ihola nō nā mamo a ʻIseraʻela me ko Kanaʻana, a me kā Heta, a me kā ʻAmora, a me kā Pereza, a me kā Heva, a me kā Iebusa.

⁶ A lawe nō lākou i kā lākou kaikamāhine, i wāhine na lākou, a hāʻawi nō i kā lākou kaikamāhine iho i nā keiki kāne a kēlā poʻe kānaka; a mālama nō i ko lākou poʻe akua.

⁷ Hana hewa ihola nā mamo a ʻIseraʻela i mua o Iēhova, a hoʻopoina aʻela iā Iēhova, i ko lākou Akua, a mālama akula iā Baʻala a me ʻAsetarota.

⁸ Wela ihola ka huhū o Iēhova i kā ʻIseraʻela, a hoʻolilo aʻela ʻo ia iā lākou i ka lima o Kusana-Risataima, ke aliʻi o Mesopotamia, a hoʻokauā aku nā mamo a ʻIseraʻela na Kusana-Risataima, i ʻewalu makahiki.

⁹ A kāhea akula nā mamo a ʻIseraʻela iā Iēhova, a laila, hoʻāla mai ʻo Iēhova i mea nāna e hoʻōla aʻe i nā mamo a ʻIseraʻela, a hoʻōla aʻela ʻo ia iā lākou; ʻo ʻOteniʻela, ke keiki a Kenaza, ke kaikaina o Kaleba.

¹⁰ Kau mai ka ʻUhane o Iēhova ma luna ona, a hoʻoponopono ia i kā ʻIseraʻela, a hele akula i ke kaua; a hāʻawi maila ʻo Iēhova ma kona lima, iā Kusana-Risataima, ke aliʻi o Mesopotamia. A lanakila aʻela kona lima ma luna o Kusana-Risataima.

¹¹ Kuapapa nui ihola ka ʻāina i hoʻokahi kanahā makahiki; a make ihola ʻo ʻOteniʻela, ke keiki a Kenaza.

¹² ¶ Hana hewa hou akula nā mamo a ʻIseraʻela i mua o Iēhova. A hoʻoikaika maila ʻo Iēhova iā ʻEgelona i ke aliʻi o Moaba, e kūʻē i kā ʻIseraʻela; no ka mea, ua hana hewa lākou i mua o Iēhova.

¹³ Hoʻākoakoa maila ʻo ia i ona lā i nā mamo o ʻAmona, a me ʻAmeleka, hele aʻela, a luku akula i kā ʻIseraʻela, a loaʻa iā ia ke kūlanakauhale o nā lāʻau pāma.

¹⁴ Hoʻokauā aku ka poʻe mamo a ʻIseraʻela na ʻEgelona, ke aliʻi o Moaba, i ʻumikumamāwalu makahiki.

¹⁵ ¶ A i ka wā i kāhea aku ai nā mamo a ʻIseraʻela iā Iēhova, a laila, hoʻāla mai ʻo Iēhova i mea e hoʻopakele aʻe iā lākou, ʻo ʻEhuda, ke keiki a Gera, he mamo na Beniamina, he kanaka lima hema; a ma kona lima i hoʻouna aku ai nā mamo a ʻIseraʻela i makana no ʻEgelona ke aliʻi o Moaba.

¹⁶ Hana ihola ʻo ʻEhuda i pahi kaua ʻoi lua nāna, hoʻokahi kūbita ka lōʻihi, a ʻōmau aʻela ma kona ʻūhā ʻākau, ma loko o kona kapa.

¹⁷ A lawe akula ia i ka makana iā ʻEgelona, i ke aliʻi o Moaba. He kanaka konāhua loa ʻo ʻEgelona.

¹⁸ A pau ka hāʻawi ʻana i ka makana, hoʻihoʻi akula ia i ka poʻe kānaka i lawe i ka makana.

¹⁹ Hoʻi hou akula ia, mai nā kiʻi o Gilegala aku, ʻī akula, “He ʻōlelo malū kaʻu nāu, e ke aliʻi.” ʻĪ aʻela kēlā, “E noho mālie!” A ʻo ka poʻe a pau e kū pū ana me ia, hele akula lākou i waho.

²⁰ Hele maila ʻo ʻEhuda i ona lā; e noho ana ia ma ke keʻena hōʻoluʻolu ma luna; nona wale nō ia wahi. ʻĪ aʻela ʻo ʻEhuda iā ia, “He mea kaʻu iā ʻoe, na ke Akua mai.” Kū maila ʻo ia, mai kona noho mai.

²¹ Hoʻoholo ihola ʻo ʻEhuda i kona lima hema, lālau ihola i ka pahi ma kona ʻūhā ʻākau, a hou akula i loko o kona ʻōpū.

²² Komo pū akula ke ʻau ma hope o ka maka, a paʻa maila ke konāhua ma luna o ka maka, ʻaʻole i hiki iā ia ke unuhi i ka pahi mai loko mai o kona ʻōpū; a hū maila ka lepo.

²³ A laila, hele akula ʻo ʻEhuda i waho o ka lānai, a pani aʻela i nā puka o ke keʻena, a hoʻopaʻa ihola.

²⁴ ¶ A hala akula ia i waho, hele maila nā kauā a ʻEgelona, nānā aʻela, aia hoʻi, ua paʻa nā puka o ke keʻena. ʻĪ ihola lākou, “Ke uhi wale nei ʻo ia i kona wāwae ma loko o ke keʻena hōʻoluʻolu.”

²⁵ Kakali ihola lākou, a hilahila wale, aia hoʻi, ʻaʻole ia i wehe mai i nā puka o ke keʻena; a lawe lākou i ke kī, a wehe aʻela, aia hoʻi, ua hina ko lākou haku i lalo i ka honua, ua make.

²⁶ ¶ Pakele ʻo ʻEhuda, i ko lākou kakali ʻana, a hele akula, ma ʻō aku o nā kiʻi, a hiki i Seirata.

²⁷ A hiki akula ia, puhi ihola ia i ka pū ma nā mauna ʻo ʻEperaima, a iho pū akula nā mamo a ʻIseraʻela me ia, mai ka mauna mai, a ʻo ia ma ko lākou alo.

²⁸ ʻĪ akula ia iā lākou, “E hahai ʻoukou ma muli oʻu; no ka mea, ua hāʻawi mai ʻo Iēhova i ko ʻoukou poʻe ʻenemi, i kā Moaba i loko o ko ʻoukou lima.” A hahai akula lākou ma muli ona, a lilo iā lākou nā āhua o Ioredane, e kū pono ana i Moaba, ʻaʻole i ʻae aku i kekahi kanaka ke hele i kēlā ʻaoʻao.

²⁹ Luku akula lākou i ko Moaba ia manawa, i ʻumi paha tausani kānaka, he poʻe puʻipuʻi wale nō, ua koa nō lākou a pau; ʻaʻole hoʻokahi kanaka i pakele.

³⁰ Hoʻohaʻahaʻa ʻia ko Moaba ia lā ma lalo iho o ka lima o kā ʻIseraʻela. Kuapapa nui ihola ka ʻāina, i kanawalu makahiki.

³¹ ¶ Ma hope iho ona, kū mai ʻo Samegara, ke keiki a ʻAnata, nāna i luku aku i ʻeono haneri kānaka o ko Pilisetia i ke ʻō bipi; a hoʻopakele aʻela hoʻi ʻo ia i kā ʻIseraʻela.