KA BUKE NO NĀ LUNA KĀNĀWAI 21 - Ka Baibala Hemolele

1 Ke kūmākena ʻana o kā ʻIseraʻela i ko Beniamina. 16 Ke kūkākūkā ʻana o nā lunakahiko.

MOKUNA XXI.

¹ ¶ Ua hoʻohiki mua nā kānaka o kā ʻIseraʻela ma Mizepa, ʻī aʻela, “ʻAʻole e hāʻawi kekahi o lākou i kāna kaikamahine i wahine na kā Beniamina.”

² Hele maila nā kānaka i ka hale o ke Akua, noho ihola ma laila a ahiahi i mua i ke alo o ke Akua, hoʻokiʻekiʻe aʻela i ko lākou leo, a uē nui ihola.

³ ʻĪ ihola, “E Iēhova, e ke Akua o ʻIseraʻela ē, no ke aha lā i hiki mai ai kēia i loko o kā ʻIseraʻela, i nalowale kekahi ʻohana ma loko o kā ʻIseraʻela i kēia lā?”

⁴ Ia lā iho, ala mai nā kānaka i kakahiaka nui, a hana ihola i lele, a kaumaha akula i nā mōhai kuni, a me nā mōhai hoʻomalu.

⁵ ¶ Nīnau aʻela nā mamo a ʻIseraʻela, “ʻO wai ka mea i waena o nā ʻohana a pau o kā ʻIseraʻela, i hele pū ʻole mai me ka ʻaha kanaka iā Iēhova?” No ka mea, hoʻohiki nui loa lākou no ke kanaka i piʻi ʻole mai iā Iēhova i Mizepa, ʻī aʻela, “E ʻoiaʻiʻo nō e pepehi ʻia ʻo ia.”

⁶ Minamina ihola nā mamo a ʻIseraʻela i kā Beniamina, i ko lākou kaikaina, ʻī aʻela, “I kēia lā, ua moku akula kekahi ʻohana mai kā ʻIseraʻela aku.

⁷ “Pehea lā kākou e hana ai, i loaʻa nā wāhine i ka poʻe i koe o lākou? No ka mea, ua hoʻohiki kākou iā Iēhova, e hāʻawi ʻole kākou i kā kākou mau kaikamāhine, i wāhine na lākou.”

⁸ ¶ Nīnau akula lākou, “ʻO wai kekahi ʻohana o kā ʻIseraʻela, i piʻi ʻole mai i Mizepa iā Iēhova?” Aia hoʻi, ʻaʻohe mea i hele mai o nā kānaka o Iabesa Gileada i ka ʻaha kanaka i kahi hoʻomoana ai.

⁹ A helu ʻia nā kānaka, aia hoʻi, ʻaʻole ma laila kekahi o ka poʻe i noho ma Iabesa Gileada.

¹⁰ Hoʻouna akula ka ʻaha kanaka i ʻumikumamālua tausani kānaka, ʻo ka poʻe koa loa, a kauoha akula iā lākou, ʻī akula, “E hele, e luku i kānaka o Iabesa Gileada, me ka maka o ka pahi kaua, i nā wāhine a me nā keiki.

¹¹ “Eia ka mea a ʻoukou e hana ai. E luku loa ʻoukou i nā kāne a pau a me nā wāhine a pau i ʻike i ka moe ʻana i ke kāne.”

¹² A loaʻa iā lākou ma loko o ka poʻe i noho ma Iabesa Gileada, ʻehā haneri kaikamāhine puʻupaʻa i ʻike ʻole i ka moe kāne ʻana. A lawe mai lākou ia poʻe i kahi hoʻomoana ai ma Silo, ma ka ʻāina ʻo Kanaʻana.

¹³ ¶ Hoʻouna akula ka ʻaha kanaka a pau, ʻōlelo akula i nā mamo a Beniamina, ma ka pōhaku o Rimona, a haʻi akula i ka malu iā lākou.

¹⁴ Hoʻi maila kā Beniamina ia manawa, a hāʻawi maila kēlā poʻe iā lākou nei i wāhine na lākou i ka poʻe a lākou i hoʻōla ai ma Iabesa Gileada; ʻaʻole hoʻi i lawa iā lākou.

¹⁵ Minamina ihola nā kānaka i kā Beniamina; no ka mea, ua hoʻokahuli ʻia e Iēhova kekahi ʻohana o kā ʻIseraʻela.

¹⁶ ¶ A laila, ʻōlelo ihola nā lunakahiko i ka ʻaha kanaka, “He aha kā mākou e hana ai, i loaʻa ai nā wāhine i ka poʻe o lākou i koe? No ka mea, ua luku ʻia nā wāhine o kā Beniamina.”

¹⁷ ʻĪ ihola lākou, “I ʻāina hoʻoili no ka poʻe i pakele o Beniamina, i ʻānai ʻole ʻia kekahi ʻohana, mai loko aku o kā ʻIseraʻela.

¹⁸ “Akā, ʻaʻole hiki iā kākou ke hāʻawi i kā kākou mau kaikamāhine iho, i wāhine na lākou; no ka mea, ua hoʻohiki nā mamo a ʻIseraʻela me ka ʻōlelo iho, ‘E ʻāhewa ʻia ka mea nāna e hāʻawi aku i wahine na kā Beniamina.’”

¹⁹ ¶ ʻŌlelo ihola lākou, “Aia hoʻi, he ʻahaʻaina ko Iēhova i kēlā makahiki, i kēia makahiki, ma Silo, ma ka ʻaoʻao ʻākau o Betelehema, a ma ka ʻaoʻao hikina o ke kuamoʻo e hiki aku ai, mai Betela i Sekema, a ma ka ʻaoʻao hema hoʻi o Lebona.”

²⁰ A laila, kauoha akula lākou i nā mamo a Beniamina, ʻī akula, “Ō hele a moe malū ma nā pā waina;

²¹ e nānā ʻoukou, aia hele mai nā kaikamāhine o Silo e hula ma nā hula, a laila e hele mai ʻoukou, mai loko mai o nā pā waina, a e hopu kēlā kanaka kēia kanaka i wahine nāna, no nā kaikamāhine o Silo, a e hoʻi i ka ʻāina ʻo Beniamina.

²² “A hiki i ka manawa, e hele mai ai i o kākou nei, ko lākou mau mākua kāne, a ʻo ko lākou mau kaikunāne paha, e hoʻopiʻi mai, a laila, e ʻōlelo mākou iā lākou, ‘E lokomaikaʻi mai ʻoukou iā mākou, ma o lākou lā; no ka mea, ʻaʻole mākou i mālama i wahine na kēlā kanaka kēia kanaka, ma ke kaua ʻana, ʻaʻole hoʻi ʻoukou i hāʻawi na lākou i kēia wā, i mea e hewa ai ʻoukou.’”

²³ A hana ihola nā mamo a Beniamina pēlā, a lawe i nā wāhine a lākou i hopu ai ma ke kula, e like me ko lākou helu ʻana. A hele lākou, a hoʻi aku i ko lākou ʻāina, a hoʻomākaukau hou i nā kūlanakauhale, a noho ihola ma laila.

²⁴ Ia manawa, hele akula nā mamo a ʻIseraʻela, mai laila aku, ʻo kēlā kanaka kēia kanaka i kona ʻāina iho, a i kona hoahānau, a ma laila aku lākou i hele ai, ʻo kēlā kanaka, kēia kanaka, i kona ʻāina hoʻoili iho.

²⁵ ¶ Ia manawa, ʻaʻohe aliʻi ma kā ʻIseraʻela; hana ihola kēlā kanaka kēia kanaka i ka mea i pono ma kona mau maka.