KA BUKE NO NĀ LUNA KĀNĀWAI 20 - Ka Baibala Hemolele

1 Ka ʻahaʻōlelo ʻana a me ke kaua. 36 Luku ʻia ko Beniamina.

MOKUNA XX.

¹ ¶ A laila, hele akula nā mamo a pau o kā ʻIseraʻela, a ʻākoakoa aʻela ia poʻe, me he kanaka hoʻokahi lā, mai Dana, a hiki i Beʻereseba, a me ko ka ʻāina ʻo Gileada, a i o Iēhova lā i Mizepa.

² Kū maila nā luna o nā kānaka a pau, no nā ʻohana a pau o kā ʻIseraʻela ma loko o ka ʻaha kanaka o ke Akua, ʻehā haneri tausani kānaka i hele wāwae, me ka unuhi i ka pahi kaua.

³ (Lohe ihola nā mamo a Beniamina, ua piʻi aku nā mamo a ʻIseraʻela i Mizepa.) A laila, ʻōlelo mai nā mamo a ʻIseraʻela, “E haʻi mai ʻoukou, pehea lā kēia hewa?”

⁴ ʻŌlelo akula kā Levi, ke kāne a ka wahine i pepehi ʻia, ʻī akula, “I koʻu hele ʻana i Gibea no Beniamina, ʻo wau a me kaʻu haiā wahine, a moe i laila.

⁵ “Kūʻēʻē maila nā kānaka o Gibea iaʻu, a hoʻopuni ihola lākou i ka hale ma luna oʻu, i ka pō, manaʻo ihola e pepehi mai iaʻu; a hoʻohaʻahaʻa ihola lākou i kaʻu haiā wahine, a ua make loa ia.

⁶ “Lālau akula au i kaʻu haiā wahine, ʻoki liʻiliʻi ihola, a hoʻouna akula i nā ʻāina a pau i ili mai ai i kā ʻIseraʻela; no ka mea, ua hana lākou ma ka moekolohe a me ka lapuwale i loko o kā ʻIseraʻela.

⁷ “Aia hoʻi, he poʻe mamo ʻoukou a pau na ʻIseraʻela. E hāʻawi mai i ko ʻoukou manaʻo a me kā ʻoukou pono!”

⁸ ¶ Kū maila nā kānaka a pau me he kanaka hoʻokahi lā, ʻī maila, “ʻAʻole kekahi o kākou e hele i kona halelewa, ʻaʻole hoʻi kekahi o kākou e hoʻi i kona hale.

⁹ “Eia ka mea a kākou e hana aku ai iā Gibea, ma ka hailona e kūʻē iā ia.

¹⁰ “E lawe kākou i ʻumi kānaka o ka haneri, no nā ʻohana a pau o kā ʻIseraʻela, a he haneri no ka tausani, a he tausani no ka ʻumi tausani, na lākou nō e lawe mai i ka ʻai na nā kānaka, i hana lākou i ko Gibea no Beniamina, ke hiki lākou i laila, e like me ka mea lapuwale a pau a lākou i hana ai ma loko o kā ʻIseraʻela.”

¹¹ A laila, hoʻākoakoa maila nā kānaka a pau o kā ʻIseraʻela, e kūʻē i ua kūlanakauhale lā, ua hui pū e like me ke kanaka hoʻokahi.

¹² ¶ Hoʻouna akula nā ʻohana o ʻIseraʻela i kānaka ma ka ʻohana a pau o Beniamina, ʻī akula, “He aha kēia hewa i hana ʻia i waena o ʻoukou?

¹³ “No laila ʻeā, e hāʻawi mai ʻoukou ia poʻe kānaka i nā kānaka hewa hoʻi ma Gibea, i pepehi aku mākou iā lākou, a hoʻopau aku i ka hewa, mai ʻIseraʻela aku!” ʻAʻole i hoʻolohe mai kā Beniamina i ka leo o ko lākou poʻe hoahānau, nā mamo a ʻIseraʻela.

¹⁴ Hoʻākoakoa maila nā mamo a Beniamina, mai loko mai o nā kūlanakauhale ma Gibea, e hele aku e kaua me nā mamo a ʻIseraʻela.

¹⁵ Ua helu ʻia nā mamo a Beniamina ia lā, mai loko mai o nā kūlanakauhale, he iwakāluakumamāono tausani kānaka i unuhi i ka pahi kaua, a koe aku ka poʻe i noho ma Gibea, a helu ʻia lākou, ʻehiku haneri kānaka i wae ʻia.

¹⁶ I loko o ia poʻe kānaka a pau, ʻehiku haneri kānaka i wae ʻia, he poʻe lima hema; e hiki nō iā lākou a pau ke maʻa aku i ka pōhaku i ka lauoho, ʻaʻole hoʻi e hala.

¹⁷ ¶ A ʻo nā kānaka o kā ʻIseraʻela i helu ʻia, ʻehā haneri tausani lākou i unuhi i ka pahi kaua, a koe aku kā Beniamina. He poʻe kānaka kaua kēia a pau.

¹⁸ Kū maila nā mamo a ʻIseraʻela, a piʻi akula i ka hale o ke Akua, nīnau akula i ke Akua, ʻī akula, “ʻO wai ko mākou mea e piʻi mua aku ai, e kaua aku i nā mamo a Beniamina?” ʻĪ maila ʻo Iēhova, “ʻO Iuda mua.”

¹⁹ ¶ Kū maila nā mamo o kā ʻIseraʻela i kakahiaka, a hoʻonohonoho kūʻē akula iā Gibea.

²⁰ Hele akula nā kānaka o ʻIseraʻela e kaua aku i kā Beniamina; a hoʻomākaukau iho nā kānaka o ʻIseraʻela e kaua aku iā lākou ma Gibea.

²¹ Puka maila nā mamo a Beniamina, mai loko mai o Gibea, a luku ihola i lalo i ka lepo ia lā, he iwakāluakumamālua tausani kānaka o kā ʻIseraʻela.

²² Hoʻoikaika ihola nā kānaka o kā ʻIseraʻela, a hoʻomākaukau e hoʻouka hou i ke kaua ma kahi a lākou i hoʻouka ai i ka lā mua.

²³ (Piʻi akula nā mamo a ʻIseraʻela, a uē akula i mua o Iēhova, a ahiahi, nīnau akula iā Iēhova, ʻī akula, “E piʻi hou anei au e kaua aku i nā keiki a Beniamina, a kuʻu kaikaina?” ʻĪ maila ʻo Iēhova, “E piʻi kūʻē iā ia.”)

²⁴ ¶ A i ka lua o ka lā hoʻokokoke mai nā mamo a ʻIseraʻela e kūʻē i nā mamo a Beniamina.

²⁵ Puka maila kā Beniamina mai loko mai o Gibea, i ka lua o ka lā, a luku honua maila i nā mamo a ʻIseraʻela, he ʻumikumamāwalu tausani kānaka, he poʻe unuhi pahi kaua kēia a pau.

²⁶ A laila, piʻi akula nā mamo a ʻIseraʻela, a me nā kānaka a pau, a hiki akula i ka hale o ke Akua, a uē akula, a noho ihola i mua o Iēhova, a hoʻokē ʻai ihola ia lā a pō, a mōhai akula i nā mōhai kuni, a me nā mōhai makana, i mua o Iēhova.

²⁷ Nīnau akula nā mamo a ʻIseraʻela iā Iēhova, (no ka mea, ma laila nō ka pahu berita o ke Akua ia mau lā,

²⁸ ʻO Pinehasa, ke keiki a ʻEleazara ke keiki a ʻAʻarona, kai kū i mua ona ia mau lā,) ʻī akula, “E hele hou anei au e kaua aku i nā mamo a Beniamina, a kuʻu kaikaina, e oki anei?” ʻĪ maila ʻo Iēhova, “Ō piʻi; no ka mea, ʻapōpō, e hāʻawi au iā lākou i loko o kou lima.”

²⁹ ¶ Hoʻonoho ihola kā ʻIseraʻela i poʻe hoʻohālua a puni ʻo Gibea.

³⁰ Piʻi akula nā mamo a ʻIseraʻela e kūʻē i nā mamo a Beniamina, i ke kolu o ka lā, a hoʻomākaukau e kaua i ko Gibea e like me nā wā ma mua.

³¹ Puka akula nā mamo a Beniamina e kūʻē i kānaka, a kaʻi ʻia akula lākou, mai ke kūlanakauhale aku; a hoʻomaka e luku aku i kānaka, me ka hou aku e like me ka wā ma mua, ma nā ala e piʻi aku ai i Betela, a i nā kula ʻo Gibea kekahi, he kanakolu paha kānaka o ʻIseraʻela.

³² ʻĪ ihola nā mamo a Beniamina, “Ua luku ʻia lākou i mua o kākou e like me ka wā ma mua.” ʻŌlelo nō hoʻi nā mamo a ʻIseraʻela, “E heʻe kākou, a e kaʻi aku iā lākou, mai ke kūlanakauhale aku, a i nā alanui.”

³³ Kū maila nā kānaka a pau o kā ʻIseraʻela, mai ko lākou wahi mai, a hoʻomākaukau ihola e kaua ma Baʻala Tamara. A ʻo ka poʻe hoʻohālua o kā ʻIseraʻela, lulumi maila lākou mai loko mai o ko lākou wahi, mai nā kula mai o Geba.

³⁴ Hele kūʻē maila iā Gibea, he ʻumi tausani kānaka i wae ʻia mai loko mai o kā ʻIseraʻela a pau, a ikaika loa ihola ke kaua; ʻaʻole naʻe lākou i ʻike, ua kokoke mai ka hewa iā lākou.

³⁵ Luku maila ʻo Iēhova i kā Beniamina i mua o kā ʻIseraʻela. Luku aʻela nā mamo a ʻIseraʻela i kā Beniamina ia lā, he iwakāluakumamālima tausani kānaka, hoʻokahi haneri keu; unuhi kēia poʻe a pau i ka pahi kaua.

³⁶ ¶ ʻIke ihola nā mamo a Beniamina, ua luku ʻia lākou; no ka mea, hāʻawi aʻela nō hoʻi nā kānaka o ʻIseraʻela i wahi no kā Beniamina, no ko lākou manaʻo ʻana i ka poʻe hoʻohālua a lākou i hoʻonoho ai ma Gibea.

³⁷ A ʻo ka poʻe hoʻohālua, wikiwiki iho lākou, a lele aku iā Gibea, a hoʻopālahalaha aʻela iā lākou iho, a luku akula i ua kūlanakauhale lā.

³⁸ Ua hoʻomaopopo ʻia ka manawa i nā kānaka o kā ʻIseraʻela, a me ka poʻe hoʻohālua, i hana lākou i ka uahi, i mea pūnohu aku i luna, mai loko aku o ke kūlanakauhale.

³⁹ A heʻe nā kānaka o ʻIseraʻela i ke kaua, hoʻomaka ihola ko Beniamina e luku aku, me ka hou iho i kānaka o ʻIseraʻela, i kanakolu paha kānaka; no ka mea, ʻōlelo lākou, “He ʻoiaʻiʻo nō, ua luku ʻia lākou i mua o kākou, e like me ke kaua mua ʻana.”

⁴⁰ A piʻi akula ka lapalapa o ke ahi, mai ke kūlanakauhale aku, a lilo i kia ao; a laila, nānā akula ko Beniamina ma hope o lākou, aia hoʻi, pūnohu akula ka wela ʻana o ke kūlanakauhale a pau i ka lani.

⁴¹ A huli hou nā kānaka o ʻIseraʻela, a laila, heʻe piʻoloke ihola nā kānaka o Beniamina; no ka mea, ua ʻike lākou ua hiki mai ka hewa ma luna o lākou.

⁴² No laila, huli lākou, mai ke alo aku o nā kānaka o kā ʻIseraʻela, a i ke ala e hiki aku ai i ka wao nahele; akā, hahai nō ke kaua iā lākou, a luku nō lākou i ka poʻe mai loko mai o nā kauhale i waenakonu o lākou.

⁴³ Hoʻopuni ihola lākou i ko Beniamina, a hahai akula iā lākou, a hahi ihola ma luna o lākou ma Menuka, ma ke alo o Gibea, ma ka hikina o ka lā.

⁴⁴ He ʻumikumamāwalu tausani kānaka o Beniamina i hāʻule, he poʻe kānaka koa kēia a pau.

⁴⁵ Huli lākou, a peʻe aku i ka wao nahele, i ka pōhaku o Rimona; a hōʻiliʻili lākou i ke koena ma nā alanui, ʻelima tausani kānaka, a hahai aku iā lākou a hiki i Gidoma, a luku akula i ʻelua tausani kānaka.

⁴⁶ A ʻo nā kānaka a pau o Beniamina i hāʻule, he iwakāluakumamālima tausani kānaka i unuhi i ka pahi kaua. He poʻe kānaka koa kēia a pau.

⁴⁷ ʻEono haneri kānaka i huli a peʻe i ka wao nahele, ma lalo o ka pōhaku o Rimona, a noho ma ka pōhaku o Rimona, i ʻehā malama.

⁴⁸ Huli hou nā kānaka o ʻIseraʻela e ʻalo i nā mamo a Beniamina, a luku akula iā lākou i ka maka o ka pahi kaua, mai nā kānaka aku a nā holoholona, a me nā mea a pau, i loaʻa iā lākou. A puhi ihola lākou i nā kūlanakauhale a pau i ke ahi, ma nā wahi a lākou i hiki aku ai.