KA BUKE NO NĀ LUNA KĀNĀWAI 2 - Ka Baibala Hemolele

1 Ke aʻo ʻana mai o ka ʻānela i ka hewa o nā kānaka, a me ka uku.

MOKUNA II.

¹ ¶ Hele maila ka ʻānela o Iēhova, mai Gilegala mai, a i Bokima, ʻī maila: “Ua lawe mai au iā ʻoukou mai ʻAigupita mai, a ua hoʻokomo mai au iā ʻoukou i ka ʻāina aʻu i hoʻohiki ai i ko ʻoukou mau kūpuna. ʻĪ ihola au, ʻʻAʻole au e uhaʻi i kaʻu berita, a hiki loa i ka hopena.

² ʻMai hana ʻoukou i berita me ka poʻe e noho ana ma kēia ʻāina, e hoʻohiolo nō ʻoukou i ko lākou mau kuahu.’ ʻAʻole ʻoukou i hoʻolohe i koʻu leo. No ke aha lā ʻoukou i hana ai i kēia?

³ “No laila au i ʻōlelo ai, ʻʻAʻole au e kipaku iā lākou, mai ko ʻoukou alo aku, a e lilo lākou i poʻe ʻenemi no ʻoukou; a e lilo ko lākou mau akua i mea e hihia ai ʻoukou.’”

⁴ A i ka wā i ʻōlelo ai ka ʻānela o Iēhova i kēia mau ʻōlelo i nā mamo a pau a ʻIseraʻela, hoʻokiʻekiʻe aʻela nā kānaka i ko lākou leo, uē ihola.

⁵ Kapa akula lākou i ka inoa o ia wahi, Bokima. A ma laila lākou i mōhai aku ai no Iēhova.

⁶ ¶ I ka wā i kuʻu aku ai ʻo Iosua i kānaka, a laila hele akula kēlā kanaka kēia kanaka o nā mamo a ʻIseraʻela i kona hoʻoilina iho, a komo i ka ʻāina.

⁷ Mālama nō nā kānaka iā Iēhova i nā lā a pau o Iosua, a i nā lā a pau o nā lunakahiko i ola ma hope iho o Iosua, ka poʻe i ʻike i nā hana nui a pau a Iēhova i hana mai ai no kā ʻIseraʻela.

⁸ A make ihola ʻo Iosua, ke keiki a Nuna, ke kauā a Iēhova, hoʻokahi nō haneri kona mau makahiki me ka ʻumi keu.

⁹ A kanu ihola lākou iā ia ma ke kihi o kona ʻāina, me Timena Heresa, ma ka puʻu ʻo ʻEperaima, ma ke kūkulu ʻākau o ka puʻu ʻo Gaʻasa.

¹⁰ Hui pū ʻia aʻela ia hanauna a pau me ko lākou poʻe mākua; a ala maila kekahi hanauna hou, ma hope mai o lākou, ʻaʻole lākou i ʻike iā Iēhova, ʻaʻole hoʻi i nā hana āna i hana mai ai no kā ʻIseraʻela.

¹¹ ¶ Hana hewa akula nā mamo a ʻIseraʻela i mua o Iēhova, a mālama lākou iā Baʻala.

¹² Haʻalele lākou iā Iēhova, i ke Akua o ko lākou poʻe mākua, i ka mea i lawe mai ai iā lākou mai ka ʻāina ʻo ʻAigupita mai, a hahai lākou ma muli o nā akua ʻē, i nā akua o ka poʻe kānaka e noho pōʻai ana iā lākou, a kūlou i mua o lākou, a hoʻonāukiuki akula iā Iēhova.

¹³ Haʻalele lākou iā Iēhova, a mālama ihola iā Baʻala a me ʻAsetarota.

¹⁴ Wela ihola ka huhū o Iēhova i kā ʻIseraʻela, a hāʻawi aʻela iā lākou i ka lima o ka poʻe hao, a hao aʻela ia poʻe i kā lākou, a hoʻolilo aku ʻo ia iā lākou i ka lima o ko lākou poʻe ʻenemi, e noho pōʻai ana iā lākou, ʻaʻole hiki iā lākou ke kū hou i mua o ko lākou poʻe ʻenemi.

¹⁵ Ma nā wahi a pau a lākou i hele aku ai, kūʻē nō ka lima o Iēhova iā lākou i mea e hewa ai, e like me kā Iēhova i hoʻohiki mai ai iā lākou; a pilikia loa ihola lākou.

¹⁶ Hoʻāla mai nō naʻe ʻo Iēhova i nā luna kānāwai, a hoʻōla aʻela lākou i kā ʻIseraʻela mai loko aʻe o ka lima o ka poʻe i hao i kā lākou.

¹⁷ ʻAʻole hoʻi lākou i hoʻolohe i nā luna kānāwai; akā, moekolohe lākou ma muli o nā akua ʻē, a kūlou hoʻomana akula iā lākou. Haʻalele koke lākou i ke ala a ko lākou poʻe mākua i hele ai, me ka hoʻolohe pono i ke kauoha a Iēhova; ʻaʻole hana kēia poʻe pēlā.

¹⁸ A i ka wā i hoʻāla mai ai ʻo Iēhova i nā luna kānāwai no lākou, a laila, noho pū ʻo Iēhova me ka luna kānāwai, a hoʻōla nō ia iā lākou, mai ka lima aʻe o ko lākou poʻe ʻenemi, i nā lā a pau o ia luna kānāwai; no ka mea, minamina ʻo Iēhova, no ko lākou kaniʻuhū ʻana i ka hoʻopilikia ʻia, a me ka hoʻokaumaha ʻia mai.

¹⁹ A i ka wā i make ai ka luna kānāwai, hoʻi hou nō lākou, a ʻoi aku nō ko lākou hewa ma mua o ko lākou poʻe mākua, ma ka hahai ʻana ma muli o nā akua ʻē, e mālama iā lākou, a e kūlou hoʻomana iā lākou. ʻAʻole lākou i hoʻōki iki i kā lākou hana, ʻaʻole i ko lākou ʻaoʻao paʻakikī.

²⁰ Wela ihola ka huhū o Iēhova i kā ʻIseraʻela, ʻī aʻela ia, “No ka hehi ʻana o kēia poʻe kānaka ma luna o kaʻu berita, aʻu i kauoha aku ai i ko lākou poʻe mākua, ʻaʻole hoʻi i hoʻolohe i koʻu leo;

²¹ no laila, ʻaʻole au e kipaku hou, mai ko lākou alo aku, i kekahi o ko nā ʻāina a Iosua i waiho ai i kona make ʻana.

²² “I hoʻāʻo aku ai au i kā ʻIseraʻela ma o lākou lā, i mālama paha lākou i ka ʻaoʻao o Iēhova, e hele ma laila, e like me ka mālama ʻana o ko lākou poʻe mākua, ʻaʻole paha.”

²³ Waiho nō ʻo Iēhova i ko ia mau ʻāina, ʻaʻole ia i kipaku koke aku iā lākou; ʻaʻole hoʻi i hāʻawi mai iā lākou i ka lima o Iosua.