KA BUKE NO NĀ LUNA KĀNĀWAI 18 - Ka Baibala Hemolele

1 No ka hoʻouna ʻana o ko Dana i mau kānaka e ʻimi i wahi e noho ai.

MOKUNA XVIII.

¹ ¶ Ia manawa, ʻaʻole aliʻi ma luna o kā ʻIseraʻela, a i kēlā mau lā e ʻimi ana ʻo kā Dana i ʻāina kahi e noho ai no lākou; no ka mea, a hiki mai ia wā, ʻaʻole i ili mai ko Dana ʻāina i waena o nā ʻohana o kā ʻIseraʻela.

² Hoʻouna aʻela nā mamo a Dana i ʻelima kānaka o kā lākou ʻohana, no ko lākou ʻāina, he poʻe kānaka koa, no Zora, a no ʻAsetaola, e kiu i ka ʻāina, a mākaʻikaʻi; a ʻī maila lākou, “E hele, e mākaʻikaʻi i ka ʻāina.” A hiki lākou i ka mauna ʻo ʻEperaima, i ka hale o Mika, kipa aʻela lākou i laila.

³ A ma ka hale o Mika lākou, maopopo iā lākou ka leo o ke kanaka hou o kā Levi; kipa aʻela lākou i laila, ʻī aʻela iā ia, “Na wai ʻoe i kaʻi mai nei? He aha hoʻi kāu e hana nei ma kēia wahi? He aha kāu o neʻi?”

⁴ ʻĪ maila ia, “Penei, a penei ka hana ʻana o Mika iaʻu, a ua hoʻolimalima mai iaʻu, a ʻo wau nō kona kahuna.”

⁵ ʻĪ akula lākou iā ia, “E nīnau aku paha ʻoe i ke Akua, i ʻike mākou, e pōmaikaʻi paha ko mākou hele, e hele nei.”

⁶ ʻĪ maila ke kahuna iā lākou, “Ō hele me ka pōmaikaʻi, he pololei iā Iēhova ka hele a ʻoukou e hele nei.”

⁷ ¶ A laila, hele akula ua mau kānaka lā ʻelima, a hiki akula i Laisa, ʻike ihola i ko laila kānaka e noho makaʻu ʻole ana, ma ke ʻano o ko Zidona, ua mālie, ʻaʻole i makaʻu, ʻaʻole mea e noho aliʻi ana ma ka honua nei i hana ʻino mai; a ua lōʻihi lākou, mai Zidona aku, ʻaʻohe o lākou mea pū me kekahi kanaka ʻē.

⁸ A hoʻi maila lākou i ko lākou poʻe hoahānau ma Zora, a me ʻAsetaola. ʻĪ akula ko lākou poʻe hoahānau iā lākou, “He aha kā ʻoukou?”

⁹ ʻĪ maila lākou, “E ala mai, i piʻi kūʻē kākou iā lākou; no ka mea, ua ʻike mākou i ka ʻāina, aia hoʻi, ua maikaʻi loa ia; a e noho mālie ana ʻoukou? Mai hoʻomoloā ʻoukou i ka piʻi aku, a komo, a hoʻopio i ka ʻāina.

¹⁰ “I ko ʻoukou hele ʻana, e hiki nō ʻoukou i ka poʻe kānaka, e makaʻu ʻole ana, a i ka ʻāina nui; no ka mea, ua hāʻawi mai ke Akua ia ʻāina i ko ʻoukou lima. ʻAʻole hoʻi i nele ia ʻāina i kekahi mea o ka honua.”

¹¹ ¶ Hele akula, mai ia wahi aku, no ka ʻohana a Dana, mai Zora, a me ʻAsetaola aku, ʻeono haneri kānaka i kāhiko ʻia i nā mea kaua.

¹² Piʻi akula lākou a hoʻomoana ihola ma Kiriata Iearima ma kā Iuda; no laila, kapa akula lākou ia wahi, ʻo Mahane Dana, a hiki mai i nēia lā; aia nō ma ke kua o Kiriata Iearima.

¹³ A ma laila aku lākou i hele ai a i ka mauna ʻo ʻEperaima, a hiki akula i ka hale o Mika.

¹⁴ ¶ A laila, nīnau aʻela nā kanaka ʻelima, i hele aku e mākaʻikaʻi i ka ʻāina ʻo Laisa, ʻī akula i ko lākou poʻe hoahānau, “Ua ʻike anei ʻoukou, aia ma loko o kēia mau hale, he ʻēpoda, a he terapima, a me ke kiʻi, a me ke kiʻi hoʻoheheʻe ʻia? No laila ʻeā, e noʻonoʻo ʻoukou i kā ʻoukou mea e hana ai.”

¹⁵ Kipa aʻela lākou i laila, a hiki aʻela i ke kanaka hou o kā Levi, i ka hale hoʻi o Mika, a aloha aʻela iā ia.

¹⁶ Kū ihola ma ka ʻīpuka, kēlā poʻe kānaka ʻeono haneri i kāhiko ʻia i nā mea kaua, ʻo ka poʻe mamo hoʻi a Dana.

¹⁷ Piʻi aʻela a komo i laila nā kānaka ʻelima i piʻi aku e mākaʻikaʻi i ka ʻāina, a lawe lākou i ke kiʻi, a me ka ʻēpoda, a me ke terapima, a me ke kiʻi i hoʻoheheʻe ʻia; a kū maila ke kahuna ma ka ʻīpuka me nā kānaka ʻeono haneri i kāhiko ʻia i nā mea kaua.

¹⁸ Hele akula kēia poʻe i loko o ka hale o Mika, a lawe maila i ke kiʻi, a me ka ʻēpoda, a me ke terapima, a me ke kiʻi i hoʻoheheʻe ʻia. A laila, ʻī akula ke kahuna iā lākou, “He aha kā ʻoukou e hana nei?”

¹⁹ ʻĪ maila lākou iā ia, “Hāmau, e kau ʻoe i kou lima ma kou waha, a e hele pū me mākou, i lilo ʻoe i makua no mākou, a i kahuna hoʻi. He mea maikaʻi anei iā ʻoe i kahuna ʻoe no ka hale o ke kanaka hoʻokahi, no ka ʻohana paha, a no ka hanauna i loko o kā ʻIseraʻela?”

²⁰ ʻOliʻoli ihola ka naʻau o ke kahuna, a lawe aʻela ʻo ia i ka ʻēpoda, a me ke terapima, a me ke kiʻi, a hele akula i waena o nā kānaka.

²¹ ¶ Huli aʻela lākou a hele akula, a hoʻonoho ihola i ka poʻe ʻōpio, a me nā holoholona, a me ka ukana i mua o lākou.

²² A hiki lākou i kahi mamao mai ka hale o Mika aku, a laila, hoʻākoakoa ʻia maila nā kānaka o kauhale e kokoke ana ma ka hale o Mika, a hahai akula i nā mamo a Dana.

²³ Hea akula lākou i nā mamo a Dana; a huli mai ko lākou maka, ʻī maila iā Mika, “He aha kāu i ʻākoakoa mai nei?”

²⁴ ʻĪ akula kēia, “Ua lawe aku ʻoukou i koʻu mau akua, aʻu i hana ai, a me ke kahuna, a ua hele ʻoukou. He aha hoʻi ka mea i koe iaʻu? He aha hoʻi kēia mea a ʻoukou i nīnau mai nei iaʻu? ‘He aha kāu?’”

²⁵ ʻĪ maila nā mamo a Dana iā ia, “Mai lohe hou ʻia kou leo i waena o mākou, o lele aku ma luna o ʻoukou nā kānaka i walania, a lilo kou ola, a me ke ola o ko ka hale ou.”

²⁶ Hele akula nā mamo a Dana i ko lākou wahi i hele ai. A ʻike ihola ʻo Mika, ua ʻoi ko lākou ikaika i kona, huli maila ia, a hoʻi aʻela i kona hale.

²⁷ ¶ Lawe lākou i nā mea a Mika i hana ai, a me kona kahuna, a hele akula i Laisa, i ka poʻe kānaka e noho mālie ana, me ka makaʻu ʻole; a luku akula kēia poʻe iā lākou i ka maka o ka pahi kaua, a puhi akula i ko lākou kūlanakauhale i ke ahi.

²⁸ ʻAʻohe mea nāna i hoʻopakele; no ka mea, ua lōʻihi ia mai Zidona aku, ʻaʻole hoʻi lākou he mea pū me kekahi kanaka ʻē. Aia nō ia ma ke kahawai e kokoke ana i Bete Rehoba. Hana ihola lākou i kūlanakauhale, a noho nō i laila.

²⁹ Kapa ihola lākou i ka inoa o ia kūlanakauhale, ʻo Dana, ma muli o Dana, ʻo ko lākou kupuna kāne, ka mea i hānau na ʻIseraʻela; akā, ʻo Laisa ka inoa kahiko o ua kūlanakauhale lā.

³⁰ Kūkulu ihola nā mamo a Dana i ke kiʻi; a ʻo Ionetana, ke keiki a Geresoma, ke keiki a Manase, ʻo ia, a me kāna mau keiki nā kāhuna no ka ʻohana a Dana, a hiki i ka lā i pio ai ka ʻāina.

³¹ Kūkulu lākou i ke kiʻi o Mika, āna i hana ai, i ka manawa a pau i kū ai ka hale o ke Akua ma Silo.