KA BUKE NO NĀ LUNA KĀNĀWAI 17 - Ka Baibala Hemolele

1 No ka hewa o Mika.

MOKUNA XVII.

¹ ¶ Aia ma ka mauna ʻo ʻEperaima he kanaka, ʻo Mika kona inoa.

² ʻĪ akula ia i kona makuahine, “ʻO kēlā mau ʻāpana kālā, hoʻokahi tausani, me ka haneri keu, i lawe ʻia, mai ou mai nei, ka mea āu i kūamuamu ai, a i ʻōlelo mai ai hoʻi ma koʻu pepeiao, eia nō iaʻu ua kālā lā. Naʻu nō i lawe.” ʻĪ maila kona makuahine, “E pōmaikaʻi ana ʻoe iā Iēhova, e kuʻu keiki!”

³ A hoʻihoʻi aku ia i ke tausani ʻāpana kālā me ka haneri keu i kona makuahine, a laila, ʻōlelo maila kona makuahine, “Ua hoʻolaʻa loa aku au ia kālā iā Iēhova, mai koʻu lima aku, i mea na kaʻu keiki, e hana aku ai i kiʻi, a i kiʻi hoʻoheheʻe ʻia; no laila ʻeā, e hoʻihoʻi aku au ia iā ʻoe.”

⁴ Akā, hoʻihoʻi hou aʻela ia i ke kālā i kona makuahine. Lawe aʻela kona makuahine i ʻelua haneri ʻāpana kālā, a hāʻawi akula i ka mea hoʻoheheʻe kālā, nāna nō i hana i kiʻi, a i kiʻi hoʻi i hoʻoheheʻe ʻia. Aia nō lāua ma loko o ka hale o Mika.

⁵ He hale akua ko ua kanaka lā o ko Mika, a hana ihola ia i ʻēpoda, a i terapima, a hoʻolaʻa aʻela ia i kekahi o kāna mau keiki kāne, a lilo ia i kahuna nona.

⁶ Ia manawa, ʻaʻole aliʻi ma kā ʻIseraʻela. Hana nō kēlā kanaka kēia kanaka i ka mea i pono ma kona mau maka.

⁷ ¶ He kanaka ʻōpiopio, mai loko mai ʻo Betelehema Iuda, no ka ʻohana a Iuda, he mamo na Levi, a noho nō ia ma laila.

⁸ Hele akula ua kanaka lā, mai ke kūlanakauhale ʻo Betelehema Iuda aku, e noho ma kahi e loaʻa ai, a i kona hele ʻana, hiki aʻela ia i ka mauna ʻo ʻEperaima, i ka hale o Mika.

⁹ ʻĪ maila ʻo Mika iā ia, “Mai hea mai ʻoe i hele mai ai?” ʻĪ akula ia, “He Levi au, no Betelehema Iuda mai, a ke hele nei au e noho ma kahi e loaʻa ai.”

¹⁰ ʻĪ maila ʻo Mika iā ia, “E noho pū ʻoe me aʻu, i lilo ʻoe i makua noʻu, a i kahuna hoʻi, a e hāʻawi aku au iā ʻoe i ʻumi ʻāpana kālā ma ka makahiki, a i pā lole komo ʻelua, a i ka ʻai nō hoʻi”; no laila, komo akula ua Levi nei i loko.

¹¹ Leʻaleʻa ia Levi e noho pū me ua kanaka lā, a ua like ia kanaka ʻōpiopio iā ia, me kekahi o kāna mau keiki kāne.

¹² Hoʻolaʻa ihola ʻo Mika i kā Levi, a lilo ua kanaka ʻōpiopio nei i kahuna nona, a noho ihola ma ka hale o Mika.

¹³ A laila, ʻī aʻela ʻo Mika, “Ua ʻike au, e hoʻopōmaikaʻi ana ʻo Iēhova iaʻu; no ka mea, he Levi nō koʻu kahuna!”